2 ᑯᕆᓐᑎᔭᓇ 8
8
ᐊ ᓯᒋᒪᑭᓄᐅᑦ ᐊᐛᓐ ᒐᒋ ᐛᔪᐅᒡ ᒥᔨᐛᑦ
1ᓂᐎᒐᐛᑭᓂᑎᒄ, ᒋ ᓂᑐᐛᔨᒥᑎᓇᓐ ᒐᒋ ᒋᔅᒐᔨᒪᑯᒡ ᑕᓐ ᑲ ᐃᓯ ᒥᔪᑐᑎᒪᑯᒡ ᒋᓴᒪᓂᑐᐛ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᒪᓯᑐᓂᔭ ᐊ ᐃᓯᓂᐧᑲᑕᔨᒡ ᐊᔅᒋᔪᐤ ᐊ ᑕᒡ᙮ 2ᓇᔅᒡ ᑕᑈ ᒋ ᐸᒋ ᐊᔨᒥᐅᐎᒡ᙮ ᐊᑎ ᐊᓂᔭ ᐊᔅᐱᔅ ᓇᔅᒡ ᒋᔅᑎᒪᑎᓯᒡ ᐃᔭᐱᒡ ᓇᔅᒡ ᑕᑈ ᒥᔅᑎ ᒋ ᐱᔅᑎᓂᒐᐅᒡ᙮ ᑭᔭ ᓇᔅᒡ ᑕᑈ ᒋ ᒥᔽᔨᑎᒧᒡ ᐊ ᐱᔅᑎᓂᒐᒡ᙮ 3ᒋ ᐱᔅᑎᓂᒧᒡ ᑕᓐ ᑲ ᐃᓯ ᓇᐃᐱᔨᒡ ᒐᒋ ᐃᔅᐱᔅ ᐱᔅᑎᓇᒡ, ᓂᒋ ᐛᐱᒪᐅᒡ ᐛᔅ ᐊᓐ, ᐊᔪᐛᒃ ᒪᒃ ᐃᔭᐱᒡ ᒋ ᐃᔅᐱᔅ ᐱᔅᑎᓂᒐᐅᒡ, ᐎᔨᐛᐤ ᓇᔅᒡ ᐊᒋ ᐃᑕᔨᑎᒥᐃᑯᒡ ᒐᒋ ᐃᔅᐱᔅ ᐱᔅᑎᓂᒐᒡ᙮ 4ᓇᔅᒡ ᓂᒋ ᓯᒋᒥᑯᓇᓂᒡ ᒐᒋ ᐱᔅᑎᓂᒐᔭᒡ ᑭᔭ ᐎᔨᐛᐤ ᒐᒋ ᐱᔅᑎᓂᒐᒡ ᒐᒋ ᐎᒋᐊᑭᓄᔨᒋ ᐊᓂᔭᔪᐛ ᑲ ᒋᔅᑎᒪᑎᓯᔨᒋ ᑲ ᑕᑈᑎᒥᔨᒋ᙮ 5ᐊᑐᐎᔅ ᒪᒃ ᒋ ᐃᑐᑎᒧᒡ ᑕᓐ ᑲ ᐃᑕᔨᒥᒋᒡ ᒐ ᐃᑎᒡ᙮ ᓂᔅᑎᒻ ᒋᓴᒪᓂᑐᐛ ᒋ ᐱᔅᑕᔨᒥᑎᓱᔅᑐᐛᐅᒡ ᐊᑯ ᓂᔭᓐ ᑲ ᐱᔅᑕᔨᒥᑎᓱᔅᑐᐎᒥᒡ ᒧᔭᒻ ᑕᓐ ᑲ ᐃᓯ ᓂᑐᐛᔨᒥᑯᒡ ᒋᓴᒪᓂᑐᐛ ᒐᒋ ᐃᑎᒡ᙮ 6ᑲ ᐛᐸᑎᒧᐅᒋᒡ ᒪᒃ ᐊᓂᔭ ᐊ ᐃᓯ ᒥᔨᐛᒡ ᓂᒋ ᐃᑎᓱᒪᓇᓐ ᑕᐃᑕᔅ ᒐᒋ ᓯᒋᒥᑕᒄ ᒐᒋ ᐱᔅᑎᓂᒐᐛᒄ ᐛᔅ ᐎᔾ ᓂᔅᑎᒻ ᔅᒋ ᐊᔨᒧᑎᒪᑯᐛᐤ ᐊ ᐱᔅᑎᓂᒐᓄᐎᒡ᙮
2 Corinthians 8.7-15 (Proper-8 Year B)
7ᒥᓯᐛ ᒐᒂᓐ ᓇᔅᒡ ᑕᑈ ᒋ ᑭᔅᒋᐅᓇᐛᐤ᙮ ᓱᒐᔨᑕᑯᓐ ᒋᑕᑈᑎᒧᐅᓄᐛᐤ᙮ ᒋ ᑭᔅᒋᐅᓇᐛᐤ ᐊ ᐊᔨᒧᑎᒪᒄ ᑕᓐ ᐊ ᐃᓯ ᑕᑈᑎᒪᒄ᙮ ᒥᔅᑎ ᒋ ᒋᔅᒐᔨᑎᒺᓇᐛᐤ ᒋᓴᒪᓂᑐᐤ ᐅᑦ ᐃᑕᔨᑎᒧᐅᓐ᙮ ᓇᔅᒡ ᑕᑈ ᓱᒃ ᒋᑦ ᐃᑕᔨᑕᓇᐛᐤ ᒐᒋ ᐎᒋᐊᑯᒡ ᑯᑎᑭᒡ ᐊᐛᓐᒋ ᑭᔭ ᓇᔅᒡ ᑕᑈ ᒋᓴᒋᐃᓇᓐ᙮ ᒋᐸ ᐎ ᒥᔪ ᒥᔨᐛᓇᐛᐤ ᒪᒃ᙮
8ᓇᒪ ᒋ ᐎ ᐎᓱᐛᑎᑎᓇᐛᐤ ᐅ ᑲ ᐃᔅᒋᔄᔭᓐ᙮ ᒥᒄ ᒋ ᐎ ᓂᑐ ᒋᔅᒐᔨᒥᑎᓇᐛᐤ ᑕᑈ ᓯᔭᒋᐃᐛᒂ ᐊ ᐛᐎᑎᒪᑎᑯᒡ ᑕᓐ ᐊ ᐃᓯ ᐊᓯᒐᔨᑕᒡ ᐊ ᐱᔅᑎᓂᒐᒡ ᑯᑎᑭᒡ ᐊᐛᓐᒋ᙮ 9ᒋ ᒋᔅᒐᔨᒪᐛᐤ ᑕᓐ ᑲ ᐃᓯ ᒥᔪᑐᑎᒪᒐᑦ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮ ᒋ ᐛᔪᑎᓯᐤ ᐃᔭᐱᒡ ᒪᒃ ᒋ ᐃᑐᑕᓱᐤ ᒐᒋ ᒋᔅᑎᒪᑎᓯᑦ ᒋᔭᓄᐤ ᐅᒡ᙮ ᒋ ᓂᑭᑎᒻ ᐎᔾ ᒥᓯᐛ ᐅᐛᔪᑎᓯᐅᓐ᙮
10ᐊᐅᒄ ᒪᒃ ᐊ ᐃᑕᔨᒥᑎᑯᒡ ᒋᐸ ᐃᑎᓇᐛᐤ᙮ ᐊ ᐱᐳᒡ ᒋᔨᐛᐤ ᓂᔅᑎᒻ ᓇᔅᒡ ᔅᒋ ᐃᑕᔨᑕᓇᐛᐤ ᒐᒋ ᐱᔅᑎᓂᒐᔭᒄ, ᔅᒋ ᒋᒋᐱᔨᑕᓇᐛᐤ ᒪᒃ ᐊ ᐱᔅᑎᓂᒐᔭᒄ᙮ 11ᐊᑯ ᒪᒃ, ᒋᔅᑕᒄ ᑕᓐ ᑲ ᐃᓯ ᒋᒋᐱᔨᑕᔭᒄ᙮ ᑕᓐ ᑲ ᐃᔅᐱᔅ ᓱᒃ ᒋ ᐊᓯᒐᔨᑎᒪᒄ ᐅᔅᑭᒡ ᑲ ᐎ ᒋᒋᐱᔨᑕᔭᒄ ᒐᒋ ᐱᔅᑎᓂᒐᔭᒄ ᐸᐃᑯᓐ ᐃᔭᐱᒡ ᒋᐸ ᐃᓯ ᐊᓯᒐᔨᑕᓇᐛᐤ ᐊᓄᒡ ᐊ ᐱᔅᑎᓂᒐᔭᒄ᙮ 12ᓄᒂᒐ ᓇᔅᒡ ᐊ ᐊᓯᒐᔨᑎᒪᒄ ᒐᒋ ᐱᔅᑎᓂᒐᔭᒄ ᐊᐅᒄ ᐅᔭ ᒐ ᓇᐊᔨᑎᒥᐃᑯᑦ ᒋᓴᒪᓂᑐᐤ᙮ ᑕᐸ ᐊᓂᔭ ᐊᑲ ᐊ ᐊᔭᐅᑦ ᒋᑭ ᐅᒋ ᑭᓄᐛᐸᑎᒻ᙮ ᐊᓂᔭ ᑕᓐ ᐊ ᐃᓯ ᐊᔭᐅᑦ ᐊᔪᐅᒄ ᐊᓂᔭ ᒐ ᑭᓄᐛᐸᑕᐧᒃ᙮
13ᓇᒪ ᒋᑦ ᐃᑎᓱᒥᑎᓇᐛᐤ ᒐᒋ ᐊᔨᒥᐃᓱᔭᒄ ᐊᓐᑕ ᒐᒋ ᐅᒋ ᐛᒋᐅᒡ ᑯᑎᑭᒡ᙮ 14ᒋᐛᔪᐅᒡ ᐊᔭᓇᐛᐤ ᒐᒂᓐ ᒐᒋ ᐎᒋᐊᑯᒡ ᐊᓐᒡ ᐊᐛᓐᒋ ᑲ ᓄᑕᐱᔨᒡ᙮ ᐊᑯ ᒐᒃ ᒪᒃ ᐃᓯᓇᒂᒐ ᒋᔨᐛᐤ ᐊ ᓄᑕᐱᔨᔭᒄ ᑯᑎᑭᒡ ᒪᒃ ᐊ ᐛᔪᐅᒡ ᐊᔭᒡ ᑭᔭ ᐎᔨᐛᐤ ᒂᔅᒋᐱᓐ ᒐᒋ ᐎᒋᐃᑕᑯᒡ᙮ ᐊᑯ ᒪᒃ ᒐ ᑕᐱᑐᐱᔨᒡ ᒥᓯᐛ ᐊᐛᓐ ᑕᓐ ᐊ ᐃᓯ ᐊᔭᑦ᙮ 15ᒧᔭᒻ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊᓐ ᐊᐛᓐ ᒥᔅᑎ ᑲ ᒪᐅᒋᑕᑦ ᓇᒪ ᐛᓴ ᒥᔅᑎ ᐅᒋ ᐊᔭᐤ, ᐊᑯ ᐊᓐ ᒥᒄ ᐊᐱᓯᔅ ᑲ ᒪᐅᒋᑕᑦ ᓇᒪ ᐅᒋ ᓄᑕᐱᔪᐤ᙮”
ᑕᐃᑕᔅ ᑯᕆᓐᑎᒡ ᑲ ᐃᑎᓴᐛᑭᓄᐅᑦ
16ᓂᓇᔅᑯᒪᐤ ᒋᓴᒪᓂᑐᐤ ᐊᒋ ᒥᔭᑦ ᑕᐃᑕᓴ ᒧᔭᒻ ᓂᔾ ᐊ ᐃᓯ ᓴᒋᐃᑎᑯᒡ ᒐᒋ ᐃᓯ ᓴᒋᐃᑕᒄ᙮ 17ᓇᒪ ᒥᒄ ᐊᓂᔭ ᐊᒋ ᐎ ᐃᑎᓴᐅᒋᒡ ᐊᓐᑕ ᐊ ᑕᐛᒄ ᐛᒋ ᐃᑐᑕᑦ, ᓇᔅᒡ ᐛᔅ ᐊᓐ ᔅᒋ ᐎ ᓂᑐᐛᐱᒥᑯᐛᐤ᙮ 18ᑕᐤ ᐅᑕ ᑯᑎᒃ ᒋᐧᑲᓂᓯᓄᐤ ᓇᔅᒡ ᐊ ᒥᔪ ᒋᔅᒐᔨᒥᑯᑦ ᒥᓯᐛ ᐊᓐᑕ ᐊ ᐊᑎ ᑕᔨᒋ ᐅᒪᒧᐊᔭᒥᐊᐛ ᑕᓐ ᐊ ᐃᓯ ᒥᔪ ᐊᐱᑎᓯᑦ ᐊ ᐛᐎᑕᐧᒃ ᒥᔽᒋᒧᐅᓂᔪᐤ᙮ ᐊᐅᑯᓐ ᐅᔭ ᒐ ᐸᒋ ᐎᒐᐅᑯᑦ ᑕᐃᑕᔅ᙮ 19ᑭᔭ ᐅᒪᒧᐊᔭᒥᐊᐛ ᒋ ᐃᑕᔨᒥᑯᐤ ᒐᒋ ᐎᒐᐎᔨᒥᑦ ᐊ ᐃᑐᑐᐅᒋᒡ ᐊᓐᒡ ᑲ ᒋᔅᑎᒪᑎᓯᒡ ᑲ ᑕᑈᑕᒡ ᐊᓂᔭ ᒋᐱᔅᑎᓂᒐᐅᓄᐛᐅᔪᐤ᙮ ᐅᑎᐸᔨᒋᒐᐤ ᒪᒃ ᓂ ᐎ ᒋᔅᒐᔨᑎᒥᐊᓇᓐ ᐅ ᑲ ᐃᑐᑎᒪᒡ᙮ ᐊᑯᑕ ᒐ ᓄᒂᒡ ᐊ ᐎ ᐎᒋᐃᐛᔭᒡ᙮
20ᓇᒪ ᑭᔭ ᓂᑐᐛᔨᑕᓇᓐ ᓂᑎᒥᒄ ᒐᒋ ᐃᓯ ᐊᑕᒪᔨᒥᑯᐅᔭᒡ ᐊ ᐱᒥᐱᔨᑕᔭᒡ ᐅ ᐱᔅᑎᓂᒐᐅᓐ᙮ 21ᒋᓴᒪᓂᑐᐤ ᓂ ᒋᔅᒐᔨᒥᒄ ᒧᔅ ᑯᐃᔅᒄ ᐊ ᐃᑐᐅᒡ᙮ ᓂ ᐱᑯᓴᔨᑕᓐ ᒪᒃ ᒧᔅ ᑯᐃᔅᒄ ᒐᒋ ᐃᑎᔭᓐ ᓇᐸᐤ ᑭᔭ ᐊ ᑭᓄᐛᐱᒥᑦ᙮
22ᐊᐅᒄ ᒪᒃ ᐛᒋ ᐃᑎᓴᐅᒋᒡ ᐅ ᒋᐧᑲᓂᓯᓄᐤ ᒐᒋ ᐎᒐᐛᑦ ᐊᓂᔭ ᑕᐃᑕᓴ᙮ ᒥᒐᑥᐤ ᓂᒋ ᐛᐸᑎᔨᑯᓇᓐ ᑕᑈ ᑭᔭ ᐎᔾ ᐊ ᐎ ᐎᒋᐃᐛᑦ᙮ ᐊᓂᔭ ᒪᒃ ᑕᓐ ᐊ ᐃᓯ ᑕᑈᐅᒐᔨᒥᑕᒄ ᐊᑯ ᐊᑐᐎᔅ ᐛ ᐎᒋᐃᑕᒄ᙮ 23ᐅ ᒪᒃ ᑕᐃᑕᔅ ᐊᐅᒄ ᐅ ᐛᒋ ᐊᑐᔅᒐᒥᑦ ᐊ ᐎᒋᐃᑎᑯᒡ᙮ ᐊᑯ ᐊᓐᒡ ᑯᑎᑭᒡ ᒋᐧᑲᓂᓯᓄᐅᒡ ᐅᒪᒧᐊᔭᒥᐊᐛ ᒋ ᐃᑎᓴᐅᑯᐅᒡ᙮ ᒋᔅᑕᔨᑕᑯᐊᐅᒡ ᒪᒃ ᙭ᑕ ᒐᒂᔪᐤ ᐊ ᐃᑐᑕᒡ᙮ 24ᓱᒃ ᒪᒃ ᐛᐸᑎᔭᐧᑯᒡ ᐅᒡ ᓇᐸᐅᒡ ᐊ ᓴᒋᐊᑯᒡ ᒐᒋ ᐛᐸᑕᒡ ᒪᒧᐤ ᑲ ᐊᔭᒥᐊᐛᑎᓯᒡ ᒋᓴᒋᐃᐛᐅᓄᐛᐅᔪᐤ ᑭᔭ ᒐᒋ ᒋᔅᒐᔨᑕᒡ ᒐᒂᓐ ᐛᒋ ᓇᔅᒡ ᒪᒥᔽᔨᑎᒥᐃᔭᒡ᙮
Currently Selected:
2 ᑯᕆᓐᑎᔭᓇ 8: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
