1 ᑎᒧᑎ 5
5
ᑕᓐ ᐊ ᐃᑎᓱᒪᑭᓄᐎᒡ ᑲ ᐸᐃᑯᓯᒡ ᐃᔎᐅᒡ ᒋᓴᐃᔪᒡ ᑭᔭ ᐊᐱᒋᐊᑭᓐᒡ
1ᐊᑲᐎᔾ ᒋᑕᐊᒧᐤ ᐊᐛᓐ ᑲ ᒋᓴᐃᔪᐅᑦ᙮ ᐊ ᐃᑕᔨᑕᑯᓂᒂ ᒪᒃ ᒐᒋ ᒋᑕᐊᒧᐛᑭᓄᐅᑦ ᒐᒂᔪᐤ ᐃᔭᒂ ᐃᓯ ᐃᔨᒥᐃ ᒧᔭᒻ ᑕᓐ ᒋᐸ ᐃᑐᑐᐛᐤ ᑎᐱᔨᐛ ᒍᑕᐎᔾ᙮ ᐊᓐᒡ ᑲ ᐅᔅᒋᓂᒋᓱᐅᒡ ᒧᔭᒻ ᑎᐱᔨᐛ ᐊ ᐎᐧᑲᓂᓯᔨᓐ ᒋᐸ ᐃᑐᑐᐛᐅᒡ, 2ᐊᑯ ᐊᓐᒡ ᑲ ᒋᓴᐃᔎᐅᒡ ᒧᔭᒻ ᐊ ᐅᑲᐎᔨᓐ ᒋᐸ ᐃᑐᑐᐛᐅᒡ᙮ ᐊᓐᒡ ᑲ ᐅᔅᒋᓂᒋᔎᐅᒡ ᒧᔭᒻ ᑎᐱᔨᐛ ᒋᐧᑲᓂᓯᒡ ᒋᐸ ᐃᑕᔨᒪᐅᒡ, ᓇᒪ ᓇᔅᒡ ᓂᑐᐎᔾ ᒋᐸ ᐅᒋ ᐃᓯ ᒪᒥᑐᓇᔨᒪᐅᒡ᙮
3ᒥᔪ ᓂᓇᑭᑐᐛᔨᒪᐧᑯᒡ ᐊᓐᒡ ᓇᔅᒡ ᑲ ᐸᐃᑯᓯᒡ ᐃᔎᐅᒡ᙮ 4ᐊ ᐸᐃᑯᓯᑦ ᐃᔎᐤ ᐊ ᑕᔨᒂᓂ ᒪᒃ ᐅᑦ ᐊᐛᓯᒪ ᑭᔭ ᒪᒃ ᐅᓯᒪ ᐊ ᐃᔅᐱᑎᓯᔨᒋ ᒐᒋ ᑭᓄᐛᔨᒥᑯᑦ ᑭᑈ ᒋᐸ ᑭᓄᐛᔨᒥᑯᐤ ᑭᔭ ᒋᐸ ᓄᑯᑕᔨᐛ ᐊ ᒋᔅᑕᔨᒪᔨᒋ ᒋᓴᒪᓂᑐᐛ ᑭᔭ ᑕᑈ ᑕᑈᑎᒧᐅᓂᒡ ᐊ ᐃᓯ ᐱᒪᑎᓯᔨᒋ᙮ ᐅᔭ ᐃᑎᑥᐛ ᐊᑯ ᒧᔭᒻ ᐊ ᒋᐛ ᒥᔭᒡ ᑕᓐ ᑲ ᐃᓯ ᒥᔪᑐᑕᑯᒡ ᐅᓂᒋᐃᑯᐛᐛ ᒪᒃ ᐅᒧᓱᒧᐛᐛᐤ ᐊᐅᑯᓐ ᒐ ᐃᓯᓇᑯᓯᒡ᙮ ᐊᐅᒄ ᐅᔭ ᐊ ᐃᓯ ᓇᐊᔨᑎᒥᐃᑯᑦ ᒋᓴᒪᓂᑐᐤ ᐊ ᐃᑎᓇᓄᐎᒡ᙮ 5ᐃᔎᐤ ᒪᒃ ᓇᔅᒡ ᐊ ᐸᐃᑯᓯᑦ ᐊᑲ ᓇᔅᒡ ᑕᔨᒋ ᐊᐛᔪᐛ ᒐᒋ ᐎᒋᐃᑯᑦ ᒥᒄ ᒋᓴᒪᓂᑐᐛ ᐊᔅᐸᔨᒧᑐᑐᐛᐤ᙮ ᒧᔅ ᐎ ᒥᔪ ᐊᔭᒥᐊᐤ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᐊ ᓂᑐᑎᒧᐛᑦ ᒋᓴᒪᓂᑐᐛ ᒐᒋ ᐎᒋᐃᑯᑦ᙮ 6ᐊᑯ ᐊᓐ ᐃᔎᐤ ᑲ ᐸᐃᑯᓯᑦ ᐱᓯᒄ ᒪᒃ ᒥᒄ ᐎᔾ ᑲ ᐎ ᓂᓇᐊᔨᑎᒥᐃᓱᑦ ᒧᔭᒻ ᐊ ᓂᐱᑦ ᐃᓯᓇᑯᓱᐤ ᐊᑎ ᐊᓂᔭ ᐊᔅᒄ ᐊ ᐱᒪᑎᓯᑦ᙮ 7ᐊᔪᐅᒄ ᐅᔭ ᑭᔭ ᐃᓯ ᐛᐎᑎᒧᐅᒡ ᒥᓯᐛ ᐊᓐᒡ ᑲ ᑕᑈᑕᒡ ᑭᔭ ᓇᒪ ᓂᑐᐎᔾ ᒋᑭ ᐅᒋ ᐃᓯ ᐊᑕᒪᔨᑕᑯᓱᐤ ᐊᐛᓐ᙮ 8ᐛᔅ ᒧᔭᒻ ᐊᐛᓐ ᐊᑲ ᓇᔅᒡ ᐛ ᐛᐎᒋᐊᒂ ᑎᐱᔨᐛ ᐎᐧᑲᓂᓴ ᑭᔭ ᐊᓂᔭᔪᐛ ᐊᓐᑕ ᑎᐱᔨᐛ ᐊ ᐸᐃᑯᔅᑲᓇᓯᑦ ᐊ ᑕᔨᒋ ᓇᔅᒡ ᐊᑲ ᑕᑈᑕᐧᒃ ᑕᑈᐅᓂᔪᐤ ᐃᓯᓇᑯᓱᐤ ᐅᔭ ᐊ ᐃᑎᑦ᙮ ᐊᑐᐎᔅ ᐎᔾ ᓇᒪ ᒧᔭᒻ ᐃᑐᐤ ᐃᔅᐱᔅ ᐊᓂᔭ ᐊᑲ ᑕᑈᑎᒥᔨᒋ᙮
9ᓇᒪ ᒋᐸ ᐅᒋ ᒥᓯᓇᐛᑭᓄᐤ ᐃᔎᐤ ᑲ ᐸᐃᑯᓯᑦ ᐊᓐᑕ ᐊᔭᒥᐊᐅᒋᐛᐱᒡ ᒐᒋ ᐅᒋ ᐎᒋᐊᑭᓄᐅᑦ ᐸᑐᔅ ᐊᓱᑕᒡ ᑕᑐᔪᐛᐳᓇᓯᒐ᙮ ᑭᔭ ᓇᒪ ᒋᐸ ᐅᒋ ᐎᒋᐊᑭᓄᐤ ᐅᔅᑕ ᐸᐃᒂᐤ ᑲ ᓂᐳᐅᒂ᙮ 10ᑭᔭ ᒋᐸ ᑎᑯᓂᔪᐤ ᑕᓐ ᐊ ᐃᓯ ᒥᔽᒋᒪᑭᓄᐅᑦ ᐊ ᒪᒥᔪᑐᑎᒪᒐᑦ, ᒧᔭᒻ ᐊᒋ ᒥᔪ ᓂᑕᐅᒋᓇᑦ ᐊᐛᓴ, ᐊᒋ ᒥᔪ ᑭᓄᐛᔨᒪᑦ ᒪᓐ ᒪᓐᑕᐛ, ᑭᔭ ᒧᔅ ᐊᒋ ᒪᒥᔪᑐᑐᐛᑦ ᑲ ᑕᑈᑎᒥᔨᒋ ᑭᔭ ᒧᔅ ᐊᒋ ᓂᓇᑎᒧᐛᑦ ᐊᓂᔭᔪᐛ ᑲ ᐊᔨᒥᐅᔨᒋ ᑭᔭ ᓱᒃ ᒧᔅ ᐊᒋ ᓇᓂᑐᐤ ᒥᔅᑲᐧᒃ ᑕᓐ ᒐ ᐃᓯ ᒪᒥᔪᑐᑎᒪᒐᑦ᙮
11ᐊᓐᒡ ᐃᔎᐅᒡ ᑲ ᐸᐃᑯᓯᒡ ᐊᔅᒄ ᑲ ᐅᔅᒋᐱᒪᑎᓯᒡ ᓇᒪ ᒋᐸ ᐅᒋ ᐊᔅᑎᓯᓇᐛᑭᓄᐎᒡ ᐊᓐᑕ ᒪᓯᓇᐛᑭᓄᔨᒋ ᑲ ᐸᐃᑯᓯᔨᒋ ᐃᔎᐛ᙮ ᐛᔅ ᒋᑭ ᒋ ᐃᓯᓇᑯᓂᔪᐤ ᐊᔅᒄ ᒥᓐ ᒐ ᐎ ᓂᐳᐅᒡ᙮ 12ᒥᓐ ᒪᒃ ᓂᐳᐅᑥᐛ ᓴᔅ ᒪᒃ ᑲ ᒥᓯᓇᐛᑭᓄᐛᒂ ᐊᑯ ᒐ ᐃᓯᓇᑯᓂᔨᒡ ᐊ ᐱᑯᓇᒡ ᑕᓐ ᑲ ᐃᑕᒡ ᒋᓴᒪᓂᑐᐛ ᒐᔅᑎᓇᔅ ᒐ ᐃᑐᑕᒡ᙮ 13ᑯᑎᑭᒡ ᐅᒡ ᑲ ᐅᔅᒋᐱᒪᑎᓯᒡ ᑲ ᐸᐃᑯᓯᒡ ᐃᔎᐅᒡ ᐊᔭᔅᒃ ᓇᒪ ᒐᒂᓂᒡ ᒋᑭ ᐅᒋ ᐃᑕᔨᑎᒧᒡ ᐊᑲ ᓇᔅᒡ ᒐᒂᔪᐤ ᐃᑐᑕᒡ᙮ ᒥᒄ ᐊᑎ ᐸᐱᑎᑯᐛᐅᒡ ᐊᐛᔪᐛ ᐎᒋᔨᒡ, ᒥᒄ ᐊᑎ ᒥᒧᐱᔅᑐᐛᒡ᙮ ᓇᒪ ᒪᒃ ᒥᒄ ᐅᔭ ᐃᑐᐅᒡ, ᒐᒃ ᒧᔅ ᐱᒋᔎᐧᑲᑐᐛᐅᒡ ᑭᔭ ᐱᐱᔎᐅᒡ ᐊ ᐊᔨᒧᑕᒡ ᒐᒂᔪᐤ ᐊᓂᔭ ᐊᑲ ᒋᐸ ᐅᒋ ᐊᐱᑕᔨᑎᒥᐃᑯᐅᒡ᙮ 14ᐅᔅᑕ ᒪᒃ ᒥᔽᔪᐤ ᐊᑯᔅ ᒥᓐ ᒐᒋ ᓂᐳᐅᒡ ᐅᒡ ᐃᔎᐅᒡ ᑲ ᐸᐃᑯᓯᒡ ᐊᔅᒄ ᑲ ᐅᔅᒋᐱᒪᑎᓯᒡ, ᑭᔭ ᒐᒋ ᐊᑎ ᐊᔭᐛᒡ ᐊᐛᓴ ᑭᔭ ᒐᒋ ᒥᔪ ᓂᓇᑭᑐᐛᔨᑕᒡ ᐎᒋᐛᐛ᙮ ᐅᔭ ᒪᒃ ᐃᑐᑕᒂᐛ ᓇᒪ ᓂᑎᒥᒄ ᒋᑭ ᐅᒋ ᐃᓯ ᐃᔭᔨᒺᐧᑲᑕᑯᐅᒡ ᐊᐛᔪᐛ᙮ 15ᓴᔅ ᐛᔅ ᑕᐅᒡ ᐊᓐᒡ ᑲ ᐸᐃᑯᓯᒡ ᐃᔎᐅᒡ ᐅᔅᑕ ᐊ ᐃᑕᔨᑕᒡ ᒥᒋᒥᓂᑐᐛ ᒐᒋ ᓂᓇᐃᑐᐛᒡ᙮
16ᐊ ᑕᒂ ᐃᔎᐤ ᐊ ᑕᔨᒋ ᐃᔎᐛ ᐊ ᐎᐧᑲᓂᓯᑦ ᐊ ᐸᐃᑯᓯᔨᒋ ᒋᐸ ᐎᒋᐊᐤ ᐅᔭ, ᐊᑲᐎᔾ ᒪᒧᐤ ᑲ ᐊᔭᒥᐊᐛᑎᓯᒡ ᒋᑭ ᐅᒋ ᒪᑎᑯᔅᑲᑯᐅᒡ ᐅᔭ ᑭᔭ ᒐᒋ ᐎᒋᐊᒡ, ᐊᓂᔭᔪᐛ ᐃᔭᒄ ᒋᐸ ᐎᒋᐊᐅᒡ ᓇᔅᒡ ᑲ ᐸᐃᑯᓯᔨᒋ ᐃᔎᐛ ᐊᑲ ᓇᔅᒡ ᐊ ᑕᔨᒋ ᐊᐛᔪᐛ ᒐᒋ ᓂᓇᑭᑐᐛᔨᒥᑯᔨᒋ᙮
17ᐊᓐᒡ ᑲ ᐎᒋᐃᐛᒡ ᐊ ᓂᑲᓂᔅᑲᑭᓄᔨᒋ ᐊᔭᒥᐊᐅᒋᐛᐸ ᐊ ᒥᔪ ᓂᓇᑭᑐᐛᔨᑕᒡ ᒪᒃ ᐊᓂᔭ ᐊ ᐃᑕᐱᑎᓯᒡ ᐃᑕᔨᑕᑯᓂᔪᐤ ᓇᔅᒡ ᒐᒋ ᒋᔅᑕᔨᒪᑭᓄᐎᒡ᙮ ᐊᑐᐎᔅ ᒪᒃ ᒋᐸ ᒋᔅᑕᔨᒪᑭᓄᐎᒡ ᐊᓐᒡ ᓇᔅᒡ ᑲ ᐃᓯ ᐱᔅᑎᓂᓱᒡ ᒐᒋ ᐛᐎᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᑭᔭ ᒐᒋ ᒋᔅᑯᑎᒪᒐᒡ᙮ 18ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐊᑲᐎᔾ ᐃᑐᑐᐤ ᒋᑦ ᐊᐛᓯᓯᒻ ᒐ ᐊᑲ ᒋ ᒥᔪ ᐊᓯᒥᑦ ᐊ ᐊᐱᒋᐃᑦ ᒪᒃ᙮” ᒥᓐ ᐊᓐᑕ ᐃᑎᔅᑕᐤ, “ᐊᓐ ᐊᐛᓐ ᑲ ᐊᑐᔅᒐᑦ ᐃᑕᔨᑕᑯᓱᐤ ᒐᒋ ᒥᔭᑭᓄᐅᑦ ᐅᑎᐸᐊᒪᑯᓯᐅᓐ᙮” 19ᐊᑲᐎᔾ ᐊᔨᒪᔨᑎᒧᒄ ᑕᓐ ᐊ ᐃᑕᑭᓄᐅᑦ ᐊ ᐃᓯ ᐊᑕᒪᔨᑕᑯᓯᑦ ᑲᓂᑲᓂᔅᑲᐧᒃ ᐊᔭᒥᐊᐅᒋᐛᐱᔪᐤ ᐸᑐᔅ ᓂᓱ ᑭᔭ ᒪᒃ ᓂᔅᑐ ᐊᐛᓐᒋ ᐸᐃᑯᓂᔨᒐ ᑕᓐ ᐊ ᐃᑕᒋᒪᒡ᙮
20ᐊ ᑕᒂ ᒪᒃ ᐊᐛᓐ ᐊ ᓂᑲᓂᔅᑲᐧᒃ ᐊᔭᒥᐊᐅᒋᐛᐱᔪᐤ ᑕᑈ ᐊ ᐊᑕᒪᔨᑕᑯᓯᑦ ᐊ ᒥᒋᑐᑕᐧᒃ ᑯᐃᔅᒄ ᒋᐸ ᐎᑎᒧᐛᑭᓄᐤ ᑕᓐ ᐊ ᐃᓯ ᐅᓂᑐᑎᐧᒃ ᐅᑎᔅᑯᐤ ᒥᓯᐛ ᐅᒪᒧᐊᔭᒥᐊᐛ ᐊ ᑕᔨᒋ ᑭᔭ ᒥᓯᐛ ᐊᐛᓐ ᐊᓐᑕ ᒐᒋ ᐅᒋ ᐃᔭᒂᒥᑦ᙮
21ᐅ ᒪᒃ ᒋᑦ ᐃᑎᓱᒥᑎᓐ ᒋᓴᒪᓂᑐᐤ ᑭᔭ ᒋᓴᔅ ᙭ ᑭᔭ ᑲ ᐸᔭᒋᓯᒡ ᐊᓐᒋᓐᒡ ᐊ ᐸᑐᐅᒡ, ᓂᓇᐃᑕ ᐅ ᑕᓐ ᑲ ᐃᑎᓱᒥᑕᓐ ᐊᓄᒡ᙮ ᒥᓯᐛ ᒐᒂᓐ ᐊ ᐃᑐᑎᒥᓐ ᓄᑯᑕ ᑕᐱᑐᐤ ᐊ ᐃᑕᔨᒥᑥᐤ ᒥᓯᐛ ᐊᐛᓐᒋ᙮
22ᐊᑲᐎᔾ ᐛᓴ ᐎᐱᒡ ᒋᑭ ᐅᒋ ᑕᒋᓇᐤ ᐊᐛᓐ ᑭᔭ ᒐᒋ ᐎᒋᐃᑦ ᐊᐛᓐ ᐊ ᒥᒋᑐᑕᐧᒃ᙮ ᓱᒃ ᒥᔪ ᑭᓄᐛᔨᒥᓱᐤ ᒐᒋ ᐸᔭᒋᓇᒂᒡ ᒋᐱᒪᑎᓯᐅᓐ᙮
23ᐅ ᒪᒃ ᒋ ᐎ ᐃᑎᑎᓐ ᑎᒧᑎ, ᐊᓐ ᒧᔅ ᑲᒋ ᐎ ᐊᔭᐧᑯᓯᔨᓐ ᒪᓐ, ᑭᔭ ᒋᔅᑭᑕᒡ ᑲᒋ ᐊᐧᑯᓯᔨᓐ, ᐊᑲᐎᔾ ᒥᒄ ᓂᐱᔾ ᒧᔅ ᒥᓂ᙮ ᓇᓂᑯᑎᓂᔾ ᐊᐱᓯᔅ ᒋᐸ ᒥᓐ ᓱᒥᓇᐳᔾ, ᐊᐱᒋᑕ ᒐᒋ ᐅᒋ ᒥᔽᑎᓯᔨᓐ᙮
24ᐱᔅᒐ ᐊᐛᓐᒋ ᐅᒥᒋᑥᐅᓄᐛᐛ ᑎᐛᒡ ᒥᔪ ᓂᔅᑐᓇᑯᓂᔪᐛ ᐊᔅᒄ ᐊᑲ ᐛᐛᒡ ᑎᐸᔅᑯᓇᑭᓄᐎᒡ᙮ ᑯᑎᑭᒡ ᒪᒃ ᓇᒪ ᑎᐛᒡ ᒋᔅᒐᔨᑕᑯᓂᔪᐛ ᐅᒥᒋᑥᐅᓄᐛᐛ᙮ 25ᐊᐅᑯᓐ ᒪᒃ ᒧᔭᒻ ᐊ ᐃᓯᓇᑯᓂᔨᒋ ᑭᔭ ᐊᐛᓐᒋ ᐅᒥᔪᑐᑎᒪᒐᐅᓄᐛᐛ᙮ ᒥᔪ ᓂᔅᑐᓇᑯᓂᔪᐛ ᑯᑎᑭᒡ᙮ ᐊᓐᒡ ᒪᒃ ᐊᑲ ᒥᔪ ᓂᔅᑐᓇᑯᓂᔨᒋ ᐅᒥᔪᑐᑎᒪᒐᐅᓄᐛᐛ ᐊᔅᒄ ᐸᑎᒪ ᒋᑭ ᒋᔅᒐᔨᑕᑯᓂᔪᐛ᙮
Currently Selected:
1 ᑎᒧᑎ 5: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
