1 ᑕᓴᓗᓂᔭᓇ 5
5
ᐊᔭᔅᑯᐎᒄ ᒐ ᑎᑯᓯᐧᒃ ᐅᑎᐸᔨᒋᒐᐤ
1 Thessalonians 5.1-11 (Proper-28 Year A)
1ᓂᐧᑲᓂᓯᑐᒄ, ᓇᒪ ᓂᑐᐛᔨᑕᑯᓐ ᒐᒋ ᐊᔨᒧᑎᒪᑎᑯᒡ ᑕᓐ ᐊᓂᔭ ᐊ ᒋᓯᑲᔨᒡ ᑭᔭ ᑕᓐ ᒐ ᐃᔅᐱᔅ ᒋᓯᑲᔨᒡ ᒐ ᑎᑯᓯᐧᒃ ᐅᑎᐸᔨᒋᒐᐤ᙮ 2ᐛᔅ ᒋ ᒥᔪ ᒋᔅᒐᔨᑕᓇᐛᐤ ᓯᔅᒋᑯᒡ ᒐ ᐅᑎᒋᐱᔨᒡ ᐊᓐ ᐊ ᒋᓯᑲᒡ ᐅᑎᐸᔨᒋᒐᐤ ᒐ ᑎᑯᓯᐧᒃ, ᒧᔭᒻ ᐊᐛᓐ ᑲᓂᑕᐅᒋᒧᑎᔨᒋ ᐊ ᐱᑐᒂᑯᑦ ᐊ ᑎᐱᔅᑲᔨᒡ ᓇᒪ ᓂᑲᓐ ᒋᔅᒐᔨᑎᒻ᙮ 3ᒪᒂᒡ ᐃᔅᒋᔄᑥᐛ ᐊᐛᓐᒋ, “ᒥᓯᐛ ᒐᒂᓐ ᒥᔪᐱᔪᐤ, ᓇᒪ ᑎᑯᓐ ᒐᒋ ᓴᒋᓯᔭᐧᒄ,” ᓯᔅᒋᑯᒡ ᒋᑭ ᒥᔅᑎ ᓂᓇᐧᑲᑕᔨᒧᐅᒡ᙮ ᒧᔭᒻ ᐊ ᐃᔅᐱᔅ ᓯᔅᒋᑯᒡ ᐊ ᒧᓯᐅᑦ ᐃᔎᐤ ᐃᔅᐱ ᒐ ᐛᐱᒪᐅᓱᑦ ᐊᐅᑯᓐ ᒐ ᐃᔅᐱᔅ ᓯᔅᒋᑯᒡ ᒥᔅᑎ ᓂᓇᐧᑲᑕᔨᒧᒡ ᐊᐛᓐᒋ᙮ ᓇᒪ ᒪᒃ ᒋᑭ ᐃᑐᐅᒡ ᒐ ᐊᑲ ᓂᓇᐧᑲᑕᔨᒧᒡ᙮
4ᒋᔨᐛᐤ ᒪᒃ ᐎ ᓂᐧᑲᓂᓯᑐᒄ, ᓇᒪ ᒋ ᐊᑎ ᐃᓯ ᐱᒪᑎᓯᓇᐛᐤ ᐊ ᐃᓯ ᐱᒪᑎᓯᒡ ᐊᓐᒡ ᐊᑲ ᒋᔅᒐᔨᒪᒡ ᒋᓴᒪᓂᑐᐛ ᑭᔭ ᑲ ᒥᒋᑐᑕᒡ ᑭᔭ ᓇᒪ ᒋᐸ ᐅᒋ ᐎᔭᓯᐃᑯᓇᐛᐤ ᐅᑎᒋᐱᔨᒐ ᐊᓐ ᐊ ᒋᓯᑲᒡ ᒧᔭᒻ ᐊ ᐃᓯ ᓯᔅᒋᑯᒋᔨᑯᑦ ᐊᐛᓐ ᐊ ᐅᑎᑎᑯᑦ ᑲᓂᑕᐅᒋᒧᑎᔨᒋ᙮ 5ᒥᓯᐛ ᐊ ᑎᓯᔭᒄ ᒋ ᐊᑎ ᐃᓯ ᐱᒪᑎᓯᓇᐛᐤ ᐊ ᐃᓯ ᐱᒪᑎᓯᓇᓄᐅᒡ ᐊ ᒪᒂᒋᓯᑲᒡ, ᐊᓐᑕ ᒥᓯᐛ ᒐᒂᓐ ᐊ ᓄᒂᒡ᙮ ᓇᒪ ᒋ ᐊᑎ ᐃᓯ ᐱᒪᑎᓯᓇᐛᐤ ᐊ ᐃᓯ ᐱᒪᑎᓯᒡ ᐊᐛᓐᒋ ᐊ ᑎᐱᔅᑲᔨᒡ, ᒪᒂᒡ ᐊᑲ ᓄᑯᓂᔨᒡ ᒐᒂᔪᐤ᙮ 6ᓇᒪ ᒪᒃ ᒋᐸ ᐅᒋ ᐃᑎᓇᓄᐤ ᒐ ᐊᑲ ᒋ ᐃᔭᐱᑕᔨᑎᒪᐧᒄ ᑭᔭ ᓇᔅᒡ ᒐ ᐊᑲ ᒋ ᓂᓇᑭᑐᐛᔨᑎᒪᐧᒄ ᑕᓐᑕ ᒐ ᐅᑎᒋᐱᔨᒡ ᐅᑎᐸᔨᒋᒐᐤ ᐅᒋᓯᑲᒻ ᒧᔭᒻ ᐊ ᐃᑎᒡ ᐊᓐᒡ ᐊᑲ ᑕᑈᑕᒡ ᒥᔽᒋᒧᐅᓂᔪᐤ᙮ ᒧᔅ ᒋᐸ ᐊᔭᔅᑯᐎᓇᓄᐤ, ᒧᔅ ᒋᐸ ᐎ ᐛᔅᑭᒪᔨᒧᓇᓄᐤ᙮ 7ᐊ ᑎᐱᔅᑲᒡ ᐊᑯᑕ ᓇᐸᓄᐅᒡ ᑭᔭ ᐊ ᑎᐱᔅᑲᒡ ᐊᑯᑕ ᐊ ᒋᔎᐸᒡ ᐊᐛᓐᒋ᙮ 8ᐊᑯ ᒪᒃ ᒧᔭᒻ ᐊᓐᑕ ᐛᔅᑕᐅᓂᒡ ᐊ ᑕᔭᐧᒄ ᐊ ᐃᓯᓇᑯᓯᔭᐧᒄ ᑯᐃᔅᒄ ᒋᐸ ᐎ ᐃᓯ ᒪᒥᑐᓇᔨᑕᓇᓄᐤ᙮ ᐊᑯ ᒪᒃ ᒋᐸ ᐳᔅᑎᔅᑲᓇᓄᐤ ᒥᔅᑲᔅᒋᑭᓇᐱᔅᒄ ᐊᓐ ᒐ ᓇᑲᐊᒪᓱᐛᒐᔭᐧᒄ᙮ ᐅ ᒪᒃ ᒥᔅᑲᔅᒋᑭᓇᐱᔅᒄ ᐊᐅᒄ ᐊᓐ ᓴᒋᐃᐛᐅᓐ ᑭᔭ ᑕᑈᑎᒧᐅᓐ᙮ ᐃᓴᒄ ᐊᑯᓂᔎᐅᓐ ᑭᔭ ᒋᐸ ᐳᔅᑎᔅᑲᓇᓄᐤ᙮ ᐊᐅᒄ ᐊᔅᐸᔨᒧᐅᓐ ᒐ ᐱᒪᒋᐅᔭᐧᒄ᙮ 9ᓇᒪ ᒋ ᐅᒋ ᐃᑕᔨᒥᑯᓄᐤ ᒋᓴᒪᓂᑐᐤ ᒐ ᐛᐛᓯᐃᑕᐧᒄ ᑎᐸᔅᑯᓂᒐᐅ ᒋᓯᑲᔨᒐ, ᒋ ᐃᑕᔨᑎᒻ ᒐᒋ ᐱᒪᒋᐃᑕᐧᒄ ᐅᑎᐸᔨᒋᒐᐛ ᒋᓴᔅ ᙭ᑕ ᐅᒋ᙮ 10᙭ ᔅᒋ ᓂᐱᔅᑎᒪᑭᓄᐤ ᒐᒋ ᐎᒋ ᐱᒪᑎᓯᒪᐧᒄ ᒪᒂᒡ ᐊ ᐱᒪᑎᓯᔭᐧᒄ ᑭᔭ ᒪᒃ ᓂᐳᐛᒂ᙮ 11ᐊᐅᒄ ᒪᒃ ᐅ ᒐ ᐅᒋ ᓯᒋᒥᑐᔭᒄ ᑭᔭ ᒐ ᐅᒋ ᒥᔽᔨᒧᐃᑐᔭᒄ ᒧᔭᒻ ᑕᓐ ᐊ ᐃᑎᔭᒄ ᐊᓄᒡ᙮
ᑕᓐ ᒪᔅᑕᔾ ᑲ ᐃᑎᓱᒪᑦ ᑈᓪ ᐊᓂᔭᔪᐛ ᑕᓴᓗᓇᐃᑲᒡ ᐊ ᑕᔨᒋ ᑭᔭ ᑲ ᐛᒋᔭᒪᑦ
12ᓂᐧᑲᓂᓯᑐᒄ, ᒋ ᐱᑯᓴᔨᒥᑎᓇᓐ ᒐᒋ ᒋᔅᑕᔨᒪᑯᒡ ᐊᓐᒡ ᑲ ᓂᑲᓂᔅᑲᑕᑯᒡ᙮ ᐛᔅ ᐅᑎᐸᔨᒋᒐᐛ ᒋ ᐅᑎᓂᑯᐅᒡ ᒐᒋ ᒋᔅᒋᓄᑕᐃᑕᑯᒡ ᑭᔭ ᒐᒋ ᒋᔅᑯᑎᒪᑕᑯᒡ ᒋᓴᒪᓂᑐᐛ ᐊ ᑕᔨᒋ ᒐᒋ ᐃᓯ ᐱᒪᑎᓯᐛᒄ᙮ 13ᓇᔅᒡ ᒋᐸ ᒋᔅᑕᔨᒪᐛᐅᒡ ᑭᔭ ᒋᐸ ᓴᒋᐊᐛᐅᒡ ᐊᓂᔭ ᐅᑦ ᐊᑐᔅᒐᐅᓄᐛᐤ ᐅᒡ᙮ ᐊᑲᐎᔾ ᒪᒥᒋᐱᔨᑐᒄ᙮ 14ᓂᐧᑲᓂᓯᑐᒄ, ᒋ ᓯᒋᒥᑎᓇᓐ ᒐᒋ ᐃᔭᒂᒥᒪᑯᒡ ᐊᓐᒡ ᐊᑲ ᐎ ᐊᑐᔅᒐᒡ᙮ ᐎᒋᐊᐧᑯᒡ ᐊᓐᒡ ᑲ ᑯᔅᑕᒋᒡ ᒐ ᐊᑲ ᒋ ᑯᔅᑕᒋᒡ ᑭᔭ ᐎᒋᐊᐧᑯᒡ ᐊᓐᒡ ᐊᑲ ᓴᐸᔨᑕᒡ, ᑭᔭ ᐊᓐᒡ ᑲ ᓄᑕᐱᔨᒡ ᒐᒂᔪᐤ᙮ ᒥᓯᐛ ᐊᐛᓐ ᓯᐱᔪᐛᓯᔅᑐᐛᐧᒄ᙮ 15ᓇᒪ ᔭᐃᑕᔾ ᒋᐸ ᐅᒋ ᑎᐸᐊᒪᓱᓇᐛᐤ ᐊᐛᓐ ᐊ ᐅᓂᑐᑕᑕᒄ ᐃᔭᐱᒡ ᒧᔅ ᒋᐸ ᒥᔪᑐᑕᑐᓇᐛᐤ ᑭᔭ ᒥᓯᐛ ᑯᑎᑭᒡ ᐊᐛᓐᒋ᙮
1 Thessalonians 5.16-24 (Advent-3 Year B)
16ᒧᔅ ᒥᔽᔨᑎᒧᒄ᙮ 17ᒧᔅ ᐊᔭᒥᐊᒄ᙮ 18ᒥᒄ ᑕᓐ ᒐ ᐃᔅᐱᔪᐛᒂ ᒧᔅ ᓂᓇᔅᑯᒧᒄ᙮ ᐛᔅ ᐊᔪᐅᒄ ᐅᔭ ᐊ ᐃᓯ ᐱᑯᓴᔨᒥᑕᒄ ᒋᓴᒪᓂᑐᐤ ᒐᒋ ᐃᑐᐛᒄ ᐊ ᐎᒐᐅᒪᑯ ᙭ ᒋᓴᓴ᙮
19ᐊᑲᐎᔾ ᓂᑲᓇᐧᒄ ᑲ ᐸᔭᒋᓯᑦ ᐊᒐᐧᒄ ᑕᓐ ᐛ ᐃᓯ ᐊᑐᔅᒐᑦ᙮ 20ᐊᑲᐎᔾ ᒪᔭᔨᑎᒺᐧᒄ ᐊᓂᔭ ᑕᓐ ᐊ ᐃᓯ ᓂᑲᓐ ᐎᑕᐧᒃ ᐊᐛᓐ ᒋᓴᒪᓂᑐᐛ ᑲ ᐃᔨᒥᔅᑎᒧᐛᑦ᙮ 21ᒥᓯᐛ ᓂᑐ ᒋᔅᒐᔨᑎᒧᒄ ᑕᓐ ᐊ ᐃᓇᓄᐅᒡ ᑎᔭᑈᒥᑭᓂᒂ, ᑕᑈᒥᑲᒐ ᒪᒃ, ᐊᑯ ᐃᔭᒄ ᒐᒋ ᐅᑎᓂᒪᒄ᙮ 22ᐊᑲᐎᔾ ᐊᐱᑕᔨᑎᒥᒄ ᒥᒐᑎᓯᐅᓐ᙮
23ᓇᓂᑐᑎᒧᐛᐤ ᒋᓴᒪᓂᑐᐤ ᐊᓐ ᑲ ᒥᔨᐛᑦ ᒋᔭᒪᔨᑎᒧᐅᓂᔪᐤ ᓇᔅᒡ ᒐᒋ ᐸᔭᒋᐃᑕᒄ᙮ ᓇᓂᑐᑎᒧᐛᐤ ᒋᑦ ᐊᒐᐧᑯᐛᐛ, ᑭᔭ ᒋᒥᑐᓇᔨᒋᑭᓄᐛᐛ ᑭᔭ ᒋᔪᐛᐛ ᒐᒋ ᑭᓄᐛᔨᑕᒂᒋ ᐊᑲ ᓇᔅᒡ ᒐᒂᓐ ᒐᒋ ᐃᓯ ᐊᑕᒪᔨᑕᒂᒋ ᐃᔅᐱ ᑎᑯᓯᒐ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮ 24ᒋᓴᒪᓂᑐᐤ ᐊᓐ ᑲ ᑕᑈᑎᑕᒄ ᒋᑭ ᐃᑐᑎᒻ ᑕᑈ ᒥᓯᐛ ᑕᓐ ᑲ ᐃᔅᒋᔄᑦ ᒐ ᐃᑐᑕᐧᒃ, ᐛᔅ ᑕᑈᐅᒐᔨᑕᑯᓱᐤ᙮
25ᓂᐧᑲᓂᓯᑐᒄ, ᐸᒋ ᐊᔭᒥᐊᔅᑎᒧᐅᓇᓐ᙮ 26ᒥᓯᐛ ᐛᒋᔭᒪᐧᑯᒡ ᒋᐧᑲᓂᓯᓄᐅᒡ ᐊ ᐅᒐᒪᑯᒡ᙮ 27ᒋᑦ ᐃᑎᓱᒥᑎᓇᐛᐤ ᐅᑎᐸᔨᒋᒐᐤ ᐊ ᐊᔨᒥᔅᑎᒧᐅᒄ ᒐᒋ ᐃᔨᒥᑐᐛᑭᓄᐎᒡ ᒥᓯᐛ ᒋᐧᑲᓂᓯᓄᐅᒡ ᐅᔭ ᒥᓯᓇᐊᒪᑯᓯᐅᓂᔪᐤ᙮
28ᓇᓂᑐᑎᒧᐛᐤ ᒪᒃ ᐅᑎᐸᔨᒋᒐᐤ ᒋᓴᔅ ᙭ ᒐᒋ ᒋᓴᐛᑐᑕᑕᒄ᙮
Currently Selected:
1 ᑕᓴᓗᓂᔭᓇ 5: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
