1 ᑯᕆᓐᑎᔭᓇ 2
2
ᑈᓪ ᑲ ᐃᔅᒋᔄᑦ ᒥᒄ ᙭ᑕ ᑲ ᒋᔅᑕᔎᑕᑭᓄᔨᒋ ᒐ ᐊᔨᒧᑕᐧᒃ
1ᓂᐧᑲᓂᓯᑐᒄ, ᐅᔅᑭᒡ ᑲ ᑎᑯᓯᓂᔭᓐ ᐊᓐᑕ ᐊ ᑕᔭᒄ, ᑲ ᐎᑎᒪᑎᑯᒡ ᒪᒃ ᒋᓴᒪᓂᑐᐤ ᐅᑦ ᐃᔨᒧᐅᓐ ᓇᒪ ᓂ ᐅᒋ ᐃᓯ ᐃᔨᒥᓐ ᓇᔅᒡ ᒐᒋ ᐃᑈᐧᑲᑕᑯᓯᔭᓐ ᒪᒃ ᒐᒋ ᐃᑎᑕᑯᓯᔭᓐ ᒧᔭᒻ ᓇᔅᒡ ᐊ ᑭᒐᑕᐛᔨᑎᒪᓐ᙮ 2ᓂᒋ ᐎᔭᔨᑕᓐ ᒥᒄ ᐸᐃᒄ ᒐᒂᓐ ᒐ ᐊᔨᒧᑎᒪᓐ ᐊᐅᒄ ᒋᓴᔅ ᙭ ᑭᔭ ᐊᓂᔭ ᐊᒋ ᒋᔅᑕᔎᑕᑭᓄᐅᑦ᙮ 3ᓇᑕ ᐊ ᑕᔭᒄ ᑲ ᑕᔭᓐ ᓇᒪ ᓇᔅᒡ ᓂ ᐅᒋ ᑕᑈᐅᒐᔨᒥᓱᓐ᙮ ᓇᔅᒡ ᐃᔭᒂ ᓂᒋ ᐃᑎᓐ ᑭᔭ ᓂᒋ ᓇᓇᒥᐱᔨᓐ ᐊᔅᐱᔅ ᓴᒋᓯᔭᓐ᙮ 4ᒪᒂᒡ ᑲᒋ ᐃᔨᒥᐃᑎᑯᒡ ᑭᔭ ᑲᒋ ᑭᒐᔅᒋᒥᑎᑯᒡ ᓇᒪ ᓂ ᐅᒋ ᐎ ᐃᑎᑕᑯᐃᓱᓐ ᓇᔅᒡ ᒐᒋ ᐃᑈᐧᑲᑕᑯᓯᔭᓐ ᐊᓐᑕ ᒐᒋ ᐅᒋ ᑕᑈᑎᒪᒄ᙮ ᒋᓴᒪᓂᑐᐤ ᐅᑦ ᐊᒐᒂ ᐅᓱᐧᑲᑎᓯᐅᓂᔪᐤ ᐊᐅᒄ ᑲ ᐃᑐᑕᑯᔭᒄ ᒐᒋ ᑕᑈᑎᒪᒄ ᑕᓐ ᑲ ᐃᓯ ᐛᐎᑎᒪᓐ᙮ 5ᒋᓴᒪᓂᑐᐤ ᐅᓱᐧᑲᑎᓯᐅᓐ ᐊᐅᒄ ᐊ ᐃᑐᑕᑯᔭᒄ ᒐᒋ ᐊᔭᔭᒄ ᑕᑈᑎᒧᐅᓐ ᓇᒪ ᐎ ᐊᓐ ᐊ ᑕᑈᑎᒪᒄ ᑕᓐ ᐊ ᐃᔅᒋᔄᒡ ᐊᓐᒡ ᑲ ᑭᒐᑕᐛᔨᑕᒡ᙮
ᒋᓴᒪᓂᑐᐤ ᐅᑭᒐᑕᐛᔨᑎᒧᐅᓐ
6ᐊᓐᒡ ᐊᐛᓐᒋ ᑲ ᒥᔪ ᓂᑕᐅᒋᒡ ᑕᑈᑎᒧᐅᓂᒡ ᓂ ᓂᔅᑐᑕᑯᓇᓂᒡ ᑭᒐᑕᐛᔨᑎᒧᓂᒡ ᐊ ᐃᓯ ᐃᔨᒥᐃᒋᒡ᙮ ᓇᒪᐎᔾ ᒪᒃ ᐊᓐ ᑭᒐᑕᐛᔨᑎᒧᐅᓐ ᐊᐛᓐᒋ ᐅᑕ ᐊᔅᒋᒡ ᒋᒋᐛ ᑲ ᐃᑕᔨᑕᒡ ᑲ ᐊᔨᒧᑎᒪᓐ᙮ ᓇᒪᐎᔾ ᑭᔭ ᐊᓐ ᑭᒐᑕᐛᔨᑎᒧᐅᓐ ᒋᒋᐛ ᒐᒂᓐ ᑲ ᐃᑕᔨᑕᒡ ᐊᓐᒡ ᐊᐛᓐᒋ ᑲ ᐅᒋᒪᐅᒡ᙮ ᐛᔅ ᐊᓂᔭ ᐎᔨᐛᐤ ᐅᑭᒐᑕᐛᔨᑎᒧᐅᓄᐛᐤ ᒋᑭ ᐃᔎᐱᔪᐤ᙮ 7ᒋᓴᒪᓂᑐᐤ ᐅᑭᒐᑕᐛᔨᑎᒧᐅᓐ ᐊᐅᒄ ᑲ ᐊᔨᒧᑎᒪᑕᒡ ᐊᓐ ᐊᑲ ᐅᒋ ᒋᔅᒐᔨᑕᑯᑕᑭᓄᐅᒡ ᐅᑕ ᐸᒋ ᐅᑕᒡ᙮ ᐊᔅᒄ ᐊᑲ ᐅᒋ ᐅᓯᑕᑦ ᒋᓴᒪᓂᑐᐤ ᐅᔭ ᐊᔅᒋᔪᐤ, ᓴᔅ ᒋ ᐎᔭᔨᑎᒻ ᑕᓐ ᒐ ᐃᑎᑦ ᐊᓐᑕ ᓂᔅᑕᒥᒡ ᐊᓐᑕ ᒐᒋ ᐅᒋ ᒋᔅᑕᔨᑕᑯᐃᑕᐧᒄ᙮ 8ᓇᒪ ᒪᒃ ᐛᐛᒡ ᐸᐃᒄ ᐊᓐᒡ ᑲ ᐅᒋᒪᐅᒡ ᐅᑕ ᐊᔅᒋᒡ ᐅᒋ ᓂᔅᑐᑎᒧᒡ ᐅᔭ ᑭᒐᑕᐛᔨᑎᒧᐅᓂᔪᐤ ᐛᔅ ᑕᐸ ᒋᐸ ᐅᒋ ᒋᔅᑕᔎᑕᐅᒡ ᐊᓂᔭ ᐅᑎᐸᔨᒋᒐᐛ ᒪᐅᒡ ᑲ ᒋᔅᑕᔨᑕᑯᓯᔨᒋ ᒋ ᒋᔅᒐᔨᑎᒧᐛᑯᐱᓇ᙮ 9ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᓇᒪ ᐊᐛᓐ ᐅᒋ ᐛᐸᑎᒻ
ᑭᔭ ᓇᒪ ᐊᐛᓐ ᐅᒋ ᐸᑎᒻ
ᑭᔭ ᓇᒪ ᐊᐛᓐ ᐅᒋ ᒋᔅᒐᔨᑎᒻ ᑕᓐ ᑲ ᐃᓯ ᐊᔭᔅᑯᔅᑎᒧᐛᑦ ᒋᓴᒪᓂᑐᐤ ᐊᓂᔭᔪᐛ ᑲ ᓴᒋᐃᑯᑦ᙮
10ᒋᓴᒪᓂᑐᐤ ᒪᒃ ᔅᒋ ᒋᔅᒐᔨᑎᒥᐃᑯᓄᐤ ᐅᔭ ᐅᑦ ᐊᒐᒂ ᐅᒡ᙮
ᐛᔅ ᐅᑦ ᐊᒐᒂ ᒥᓯᐛ ᒐᒂᔪᐤ ᓇᓂᑐ ᒋᔅᒐᔨᑎᒥᔪᐛ, ᐛᐛᒡ ᐊᓂᔭ ᑕᓐ ᐊᓐ ᐊ ᐃᑕᔨᑕᑯᓯᔨᒋ ᒋᓴᒪᓂᑐᐛ᙮ 11ᒧᔭᒻ ᐊᐛᓐ ᑕᓐ ᐊᓐ ᐊ ᐃᑕᔨᑕᐧᒃ ᒥᒄ ᐎᔾ ᑎᐱᔨᐛ ᐅᑦ ᐊᒐᐧᑯᒡ ᒋᔅᒐᔨᑎᒻ᙮ ᐊᐅᑯᓐ ᒪᒃ ᒧᔭᒻ ᒋᓴᒪᓂᑐᐤ ᐅᑦ ᐊᒐᒂ, ᒥᒄ ᐎᔾ ᒋᓴᒪᓂᑐᐤ ᐅᑦ ᐊᒐᒂ ᒋᔅᒐᔨᑎᒥᔪᐛ ᑕᓐ ᐊᓐ ᐊ ᐃᑕᔨᑎᒥᔨᒋ ᒋᓴᒪᓂᑐᐛ᙮ 12ᐊᓄᒡ ᒪᒃ, ᓇᒪ ᐅᑕ ᐊᔅᒋᒡ ᐊ ᑕᑦ ᐊᒐᐧᒄ ᒋ ᐅᒋ ᒥᔨᑯᓇᓄᐤ, ᐊᓐ ᐊᒐᐧᒄ ᒋᓴᒪᓂᑐᐤ ᐊ ᑕᑦ ᑲ ᐅᒋᑦ ᐊᐅᑯᓐ ᐊᓐ ᑲ ᒥᔨᑯᐅᔭᐧᒄ᙮ ᐊᐅᒄ ᒪᒃ ᐅ ᐊ ᐃᑐᑕᑕᐧᒄ ᒐᒋ ᒋᔅᒐᔨᑎᒺᐧᒄ ᐊᓂᔭᔪᐛ ᒥᔨᐛᐅᓇ ᑲ ᒥᔨᑕᐧᒄ ᒋᓴᒪᓂᑐᐤ᙮
13ᐊ ᐊᔨᒧᑎᒪᒡ ᒪᒃ ᐅᔭ ᒐᒂᔪᐛ ᓇᒪ ᓂᒥᑐᓇᔨᒋᑭᓇᒡ ᐊ ᐃᓯ ᓂᔅᑐᑎᒪᒡ ᓂᑦ ᐃᓯ ᐊᔨᒧᑕᓇᓐ᙮ ᒋᑦ ᐊᓱᐤ ᐎᑎᒪᑎᓇᓐ ᑕᓐ ᑲ ᐃᓯ ᒋᔅᑯᑎᒧᔨᒥᑦ ᒋᓴᒪᓂᑐᐤ ᐅᑦ ᐊᒐᒂ᙮ ᐊᐅᒄ ᐅ ᐊᒐᐧᒄ ᐛᒋᐃᔨᒥᑦ ᐊ ᐎ ᒋᔅᒐᔨᑎᒥᔨᒥᑦ ᐊᒐᐧᑯ ᑕᑈᐅᓇ ᐊᓐᒡ ᑲ ᐊᔭᐛᒡ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮ 14ᐊᓐ ᐊᐛᓐ ᐊᑲ ᐊᔭᐛᑦ ᒋᓴᒪᓂᑐᐛ ᐅᑦ ᐊᒐᐧᑯᔪᐛ, ᓇᒪ ᒋᑭ ᒋ ᐅᑎᓂᒻ ᐊᓂᔭᔪᐛ ᒥᔨᐛᐅᓇ ᑕᓐ ᐊ ᐃᓯ ᒥᔨᐛᔨᒋ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮ ᐅ ᐊᐛᓐ ᓇᒪ ᑕᑈ ᓂᔅᑐᑎᒻ ᒐᒂᔪᐛ ᐅᔭ, ᓇᒪ ᐎᔭᔅ ᐃᑕᐱᑎᓇ ᐃᑕᔨᑎᒻ᙮ ᐛᔅ ᒥᒄ ᐊᓐᒡ ᐸᔭᒋ ᐊᒐᒂ ᑲ ᐊᔭᐛᒡ ᒋᑭ ᒋ ᓂᔅᑐᑎᒧᒡ ᑕᓐ ᐊ ᐃᓯ ᒋᒋᐛ ᐃᑕᔨᑕᑯᓂᔨᒋ ᐅᔭ ᒥᔨᐛᐅᓇ᙮ 15ᐊᓐ ᒪᒃ ᐊᐛᓐ ᑲ ᐊᔭᐛᑦ ᑲ ᐸᔭᒋᓯᔨᒋ ᐊᒐᒂ ᒥᓯᐛ ᓇᔅᒡ ᓂᑐ ᒋᔅᒐᔨᑎᒻ ᑕᓐ ᒐ ᐃᓯ ᑎᐸᔅᑯᓇᐧᒃ ᒐᒂᔪᐤ᙮ ᒥᒄ ᒪᒃ ᓇᒪ ᒋᑭ ᒋ ᑎᐸᔅᑯᓂᑯᐤ ᐎᔾ ᐊᐛᔪᐛ᙮ 16ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᑕᐤ ᐊ ᐊᐛᓐ ᐊ ᒋᔅᒐᔨᑕᐧᒃ ᑕᓐ ᐊ ᐃᑕᔨᑎᒥᔨᒋ ᒋᓴᒪᓂᑐᐛ ᒐᒋ ᐅᒋ ᒋᔅᒋᓄᐊᒧᐛᑦ᙮
ᒋᔭᓄᐤ ᒪᒃ ᙭ ᐅᒥᑐᓇᔨᒋᑭᓐ ᒋ ᑭᓄᐛᔨᑎᒺᓇᓄᐤ᙮
Currently Selected:
1 ᑯᕆᓐᑎᔭᓇ 2: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
