1 ᑯᕆᓐᑎᔭᓇ 13
13
ᓴᒋᐃᐛᐅᓐ ᐊᐅᒄ ᒪᐅᒡ ᒐᔅᑕᔨᑕᒂᒡ
1 Corinthians 13 (Epiphany-4 Year C)
1ᐊᑎ ᒥᔨᑯᐅᔭᓐ ᒐᒋ ᐃᓯ ᐃᔨᒥᔭᓐ ᐊ ᐃᓯ ᐃᔨᒥᒡ ᑯᑎᑭᒡ ᐊᐛᓐᒋ ᑭᔭ ᐊ ᐃᓯ ᐃᔨᒥᒡ ᐊᓐᒋᓐᒡ, ᐊᑲ ᒪᒃ ᐊᔭᔭᓐ ᓴᒋᐃᐛᐅᓐ ᓇᒪᐎᔾ ᒐᒂᓐ ᒋᐸ ᐅᒋ ᐃᑕᐱᑎᓐ ᐊᓐ ᑲ ᐃᓯ ᒥᔨᑯᐅᔭᓐ ᒐᒋ ᐃᓯ ᐃᔨᒥᔭᓐ ᐛᔅ ᒧᔭᒻ ᒥᒄ ᐊ ᒪᒥᑥᔭᐱᔅᑲᐃᑭᓄᐅᒡ ᐃᓴᒄ ᓂᐸ ᐃᑎᑕᑯᓯᓐ᙮ 2ᑭᔭ ᐊᑎ ᒥᔨᑯᐅᔭᓐ ᒐᒋ ᑭᔅᒋᐅᔭᓐ ᐊ ᒋᔅᒋᐛᐃᒐᔭᓐ, ᑭᔭ ᐊᑎ ᒥᓯᐛ ᒋᔅᒐᔨᑎᒪᓐ ᓂᔾ ᑕᓐ ᐊ ᐃᓯ ᐊᑲ ᒋᔅᒐᔨᑕᒡ ᑯᑎᑭᒡ ᐊᐛᓐᒋ, ᑭᔭ ᐊᑎ ᒥᔨᑯᐅᔭᓐ ᒥᓯᐛ ᒐᒋ ᒋᔅᒐᔨᑎᒪᓐ ᒐᒂᓐ ᐊᑲ ᐅᒋ ᒋᔅᒐᔨᑎᒥᐃᐛᓄᐅᒡ ᐊᓐᑕ ᐅᑕᒡ ᑭᔭ ᐊᑎ ᐊᔭᔭᓐ ᑕᑈᑎᒧᐅᓐ ᒐᒋ ᐊᑎᓂᒪᓐ ᐱᔅᑯᑎᓇᐛ ᐊᑲ ᒪᒃ ᐊᔭᔭᓐ ᓴᒋᐃᐛᐅᓐ ᐃᔭᐱᒡ ᓇᒪ ᓇᔅᒡ ᒐᒂᓐ ᓂᐸ ᐅᒋ ᐃᑕᔨᑕᑯᓯᓐ᙮ 3ᑭᔭ ᐊᑎ ᒥᓯᐛ ᒐᒂᓐ ᐱᔅᑎᓂᒪᓐ ᑕᓐ ᐊ ᐃᓯ ᑎᐱᔨᐛᐅᓯᔭᓐ ᒐᒋ ᐎᒋᐊᑭᓄᐅᒡ ᑲ ᒋᔅᑎᒪᑎᓯᒡ, ᐊᑎ ᒪᒃ ᑭᔭ ᐱᔅᑎᓂᒪᓐ ᒐᒋ ᐃᔎᓯᑭᓄᐅᒡ ᓂᔪᐤ, ᐊᑲ ᒪᒃ ᐊᔭᔭᓐ ᓴᒋᐃᐛᐅᓐ ᐃᔭᐱᒡ ᓇᒪᐎᔾ ᒐᒂᓐ ᐃᑕᐱᑎᓐ ᐊᓐ ᑕᓐ ᑲ ᐃᑎᔭᓐ᙮
4ᐊᐛᓐ ᐊ ᓴᒋᐊᑦ ᐊᐛᔪᐛ ᓇᔅᒡ ᒥᔪᑐᑐᐛᐤ ᑭᔭ ᒥᔽᔨᑕᑯᓯᔅᑐᐛᐤ, ᓇᒪ ᑭᔭ ᐛ ᐅᑕᔨᑎᒻ ᑭᔭ ᓇᒪ ᒪᒥᒋᒧᐤ, 5ᓇᒪ ᒋᒋᐛ ᐃᑕᔨᒥᓱᐤ, ᑭᔭ ᓇᒪ ᒪᔭᔨᒐᐤ᙮ ᓇᒪ ᒥᒄ ᐎᔾ ᐛ ᐃᑎᑦ ᐃᑐᐤ ᓯᔭᒋᐊᒂ ᐊᐛᔪᐛ᙮ ᓇᒪ ᐛᐧᑲᔅᑲᑯᐤ ᐊᐛᔪᐛ ᑭᔭ ᓇᒪ ᑭᓄᐛᔨᑎᒻ ᐊᓂᔭ ᑕᓐ ᑲ ᐃᓯ ᒋᔄᐃᑯᑦ ᐊᐛᔪᐛ᙮ 6ᐊᐛᓐ ᐊ ᓴᒋᐊᑦ ᐊᐛᔪᐛ, ᓇᒪ ᒥᔽᔨᑎᒻ ᐊ ᐅᓂᑐᑎᒥᔨᒋ᙮ ᒥᒄ ᒪᒃ ᐃᐛᒃ ᒥᔽᔨᑎᒻ ᐃᔅᐱ ᒪᔪᑐᑎᒥᔨᒋ᙮ 7ᐊ ᓴᒋᐊᑦ ᐊᐛᓐ ᐊᐛᔪᐛ ᒧᔅ ᒥᔽᔨᑕᑯᓯᔅᑐᐛᐤ ᒥᒄ ᑕᓐ ᐊ ᐃᑎᒂᓂᔨ᙮ ᑭᔭ ᒧᔅ ᑕᑈᐅᒐᔨᒪᐤ ᐊᓂᔭᔪᐛ ᐊᐛᔪᐛ ᑭᔭ ᒧᔅ ᑎᑯᓂᔪᐤ ᐊ ᐃᓯ ᐊᔅᐸᔨᒧᑦ ᒐᒋ ᒥᔪᐱᔨᒋ᙮ ᓇᒪ ᐳᓂᐤ ᐊ ᒥᔽᔨᑕᑯᓯᔅᑐᐛᑦ ᐊᓂᔭᔪᐛ ᐊᐛᔪᐛ᙮
8ᓇᒪ ᓂᑕ ᒋᑭ ᐅᒋ ᐃᔎᐱᔪᐤ ᓴᒋᐃᐛᐅᓐ᙮ ᑎᑯᓐ ᐛᒋᒡ ᐊ ᐃᔨᒥᔅᑎᒧᐛᑭᓄᐅᑦ ᒋᓴᒪᓂᑐᐤ ᒥᒄ ᒪᒃ ᐊᔅᒄ ᒋᑭ ᐃᔎᐱᔪᐤ ᐅ ᐊ ᐃᑎᓇᓄᐅᒡ᙮ ᑭᔭ ᒋᑭ ᐳᓂᐱᔪᐤ ᐊ ᒂᔅᒋᐃᔨᒥᓇᓄᐅᒡ᙮ ᑭᔭ ᒋᔅᒐᔨᑎᒧᐅᓐ ᒋᑭ ᐃᔎᐱᔪᐤ᙮ 9ᐛᔅ ᓇᒪ ᒥᓯᐛ ᒐᒂᓐ ᒋ ᒋᔅᒐᔨᑕᓇᓄᐤ, ᑭᔭ ᓇᒪ ᐊᓐ ᔅᒋ ᐃᓯ ᒋᔅᒋᐛᐃᒐᓇᓄᐤ ᑕᓐ ᒋᐸ ᐃᓯ ᒋᔅᒋᐛᐃᒐᓇᓄᐤ᙮ 10ᐊᔅᒄ ᐸᐃᒂᐤ ᒋᑭ ᐅᑎᒋᐱᔪᐤ ᒐᒋ ᒋᔅᒐᔨᒪᐧᒄ ᑕᓐ ᐊᓐ ᐊ ᐃᑕᔨᑕᑯᓯᑦ ᒋᓴᒪᓂᑐᐤ᙮ 11ᑲ ᐊᐛᓯᐅᔭᓐ, ᒧᔭᒻ ᐊᐛᔅ ᐊ ᐃᓯ ᐃᔨᒥᑦ ᓂᒋ ᐃᓯ ᐃᔨᒥᓐ, ᑭᔭ ᒧᔭᒻ ᐊᐛᔅ ᐊ ᐃᓯ ᒪᒥᑐᓇᔨᑕᐧᒃ ᓂᒋ ᐃᓯ ᒪᒥᑐᓇᔨᑕᓐ, ᑭᔭ ᒧᔭᒻ ᐊᐛᔅ ᓂᒋ ᐃᑕᔨᑕᑯᓯᓐ᙮ ᒥᒄ ᒪᒃ ᐊᓄᒡ ᐊᑯ ᓂᔭᐸᐅᔭᓐ, ᓇᒪ ᐊᑯ ᓂᑦ ᐊᐛᓱᐛᔨᑕᑯᓯᓐ᙮ 12ᒧᔭᒻ ᑭᔭ ᐊ ᑭᓄᐛᐱᒪᐧᒄ ᐊᐛᓐ ᐊᓐᑕ ᐛᐱᒥᓱᐅᓂᒡ, ᓇᒪ ᒋ ᐱᔭᑭᔅᒋᓄᐛᓄᐤ ᐊ ᐃᔅᐱᔅ ᐱᔭᑭᔅᒋᓄᐛᐧᒄ ᑎᐱᔨᐛ ᒋᔅᒋᓯᑯᓇᒡ ᐊ ᑭᓄᐛᐱᒪᐧᒄ᙮ ᐊᐅᑯᓐ ᒪᒃ ᒧᔭᒻ ᐊ ᐃᓯ ᒋᔅᒐᔨᒪᐧᒄ ᒋᓴᒪᓂᑐᐤ ᐊᓄᒡ᙮ ᓇᒪ ᓇᔅᒡ ᒋ ᒋᔅᒐᔨᒪᓄᐤ᙮ ᒥᒄ ᒪᒃ ᐃᔅᐱ ᐅᑎᔅᑯᐤ ᐛᐱᒪᒂ ᐊᑯ ᓇᔅᒡ ᒐ ᒋᔅᒐᔨᒪᐧᒄ, ᒧᔭᒻ ᒋᔭᓄᐤ ᐊ ᐃᔅᐱᔅ ᓇᔅᒡ ᒋᔅᒐᔨᒥᑕᐧᒄ᙮
13ᓂᔅᑐ ᒐᒂᔪᐛ ᓇᒪ ᓂᑕ ᒋᑭ ᐅᒋ ᐃᔎᐱᔪᐛ, ᐊᐅᒄ ᐅᔭ᙮ ᑕᑈᑎᒧᐅᓐ, ᐊᔅᐸᔨᒧᐅᓐ ᑭᔭ ᓴᒋᐃᐛᐅᓐ᙮ ᐊᓐ ᒪᒃ ᓇᔅᒡ ᒐᔅᑕᔨᑕᒂᒡ ᐊᐅᒄ ᓴᒋᐃᐛᐅᓐ᙮
Currently Selected:
1 ᑯᕆᓐᑎᔭᓇ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
