1 ᑯᕆᓐᑎᔭᓇ 10
10
ᐊᑲᐎᔾ ᒋᔅᑕᔨᒪᐧᑯᒡ ᒥᓂᑐᐧᑲᓐᒡ
1 Corinthians 10.1-13 (Lent-3 Year C)
1ᓂᐧᑲᓂᓯᑐᒄ, ᒋ ᓂᑐᐛᔨᒥᑎᓇᐛᐤ ᒐᒋ ᒋᔅᒋᓯᔭᒄ ᑕᓐ ᑲ ᐃᔅᐱᔨᒡ ᐊᓂᔭᐧᑲ ᒍᑕᐎᓄᐅᒡ ᐊᓐᒡ ᑲᒋ ᑕᒡ ᐊᓐᑕ ᐸᐧᑯᑎᔅᑭᒥᑲᒡ᙮ ᒋᓴᒪᓂᑐᐛ ᒋ ᐃᑎᓴᐛᔪᐛ ᑭᔅᑯᐅᓂᔎ ᒐᒋ ᐎᒐᐅᑯᒡ, ᐊᑯᑕ ᑲ ᐅᒋ ᓄᑯᑕᔨᒋ ᐊ ᑭᓄᐛᔨᒥᑯᒡ᙮ ᒥᓯᐛ ᒋ ᐊᓱᔅᑭᒧᒡ ᐎᓂᐸᑯᔪᐤ ᒋᓴᒪᓂᑐᐛ ᑲ ᑐᓂᒥᔨᒋ ᒐᒋ ᐱᒧᑕᒡ᙮ 2ᐊᓐᑕ ᐊᓂᔭ ᑭᔅᑯᐅᓂᔎ ᐊ ᑕᔨᒋ ᑲ ᑕᒡ ᑭᔭ ᐊᓐᑕ ᐎᓂᐸᑯᒡ ᐊᑯᑕ ᑲ ᓯᑲᐃᑐᐛᑭᓄᐅᒡ ᐊ ᓄᑯᑕᑭᓄᐎᒡ ᒧᓱᓴ ᐊ ᓇᓴᐛᒡ᙮ 3ᒥᓯᐛ ᒪᒃ ᐊ ᑎᓯᒡ ᒋ ᒥᒍᐅᒡ ᐊᓂᔭ ᒥᒋᒥᔪᐤ ᐊᓐᑕ ᒋᒋᒋᓯᑯᒡ ᑲ ᐅᒋᐱᔨᒡ᙮ 4ᑭᔭ ᒥᓯᐛ ᒋ ᒥᓄᐅᒡ ᐊᓂᔭ ᓂᐱᔪᐤ ᒋᓴᒪᓂᑐᐛ ᑲ ᒥᔨᑯᒡ ᐊᓯᓂᒡ ᑲ ᐅᒋᐱᔨᒡ᙮ ᐃᓇᓄᐤ ᒪᒃ ᐊᒋ ᐱᐸ ᓇᓴᐅᑯᒡ ᐊᓂᔭᔪᐛ ᐊᓯᓂᔭ, ᒥᒄ ᒪᒃ ᓇᒪ ᒥᒄ ᐊᓯᓂᔭ ᐊᓂᔭ, ᙭ᑕ ᐊᓂᔭᔪᐛ ᑲ ᐱᐸᐎᒐᐅᑯᒡ᙮ 5ᐊᑎ ᒪᒃ ᐅᔭ ᐊᒋ ᐃᓯ ᒥᔪᐧᑲᑯᒡ ᒋᓴᒪᓂᑐᐛ, ᐃᔭᐱᒡ ᒋ ᑕᐅᒡ ᐊᓐᑕ ᐊ ᒥᒐᑎᒡ ᐊᑲ ᓂᓇᐊᔨᑎᒥᐊᒡ ᒋᓴᒪᓂᑐᐛ, ᑭᔭ ᒂ ᓂᐱᒡ ᐊᓐᑕ ᐸᐧᑯᑎᔅᑭᒥᑲᒡ᙮
6ᒋᐸ ᑎᑯᓂᔪᐤ ᐊ ᐃᓯ ᐃᔭᒂᒥᒥᑯᐅᔭᐧᒄ ᒥᓯᐛ ᑕᓐ ᑲ ᐃᔅᐱᔨᒡ, ᒐ ᐊᑲ ᒋ ᐃᓯᓇᑯᓯᔭᐧᒄ ᒋᔭᓄᐤ ᒐᒋ ᒧᔅᑕᓇᔨᑎᒪᐧᒄ ᒥᒐᑎᓯᐅᓐ᙮ 7ᐊᑯ ᒪᒃ ᐊᑲᐎᔾ ᒋᑭ ᐅᒋ ᐊᔭᒥᐊᔅᑐᐛᓄᐅᒡ ᒥᓂᑐᐧᑲᓐᒡ ᒧᔭᒻ ᐎᔨᐛᐤ ᑲ ᐃᑎᒡ᙮ ᒪᐅ ᐊᑎᔅᑕᒡ ᒥᓯᓇᐃᑭᓂᒡ,
ᐊᓐᒡ ᐃᔪᒡ ᒋ ᒥᒋᓱᐅᒡ, ᑭᔭ ᒋ ᒥᓄᐅᒡ, ᑭᔭ ᒋ ᓂᒧᐅᒡ᙮
8ᑭᔭ ᐊᑲᐎᔾ ᐎᓂᓱᐤ ᐱᒪᑎᓯᑕᐤ ᒧᔭᒻ ᑲ ᐃᓯᓇᑯᓯᒡ ᐱᔅᒐ ᐊᓐᒡ ᐃᔪᒡ᙮ ᐊᓂᔭ ᒪᒃ ᐎᓂᓱᐅᓂᒡ ᐊᒋ ᐃᓯ ᐱᒪᑎᓯᒡ, ᓂᓱᔪᐤ ᐊᓱ ᓂᔍᐤ ᒐᓯᐱᔪᐤ ᒋ ᓂᐳᐅᒡ ᐊ ᐸᐃᑯᓂᔨᒡ ᐊ ᒋᓯᑲᔨᒡ᙮ 9ᑭᔭ ᐊᑲᐎᔾ ᒋᑭ ᐅᒋ ᑯᒂᒋᐊᐛᐤ ᐅᑎᐸᔨᒋᒐᐤ ᒧᔭᒻ ᑕᓐ ᑲ ᐃᑎᒡ ᐱᔅᒐ ᐊᓐᒡ ᐊᐛᓐᒋ᙮ ᒋᓇᐱᒂ ᒪᒃ ᒋ ᓂᐸᐃᑯᐅᒡ᙮ 10ᑭᔭ ᐊᑲᐎᔾ ᒋᑭ ᐅᒋ ᒪᒪᒡ ᐃᔅᒋᔄᓇᓄᐤ ᒧᔭᒻ ᐱᔅᒐ ᐊᓐᒡ ᐃᔪᒡ ᑲ ᐃᑎᒡ᙮ ᐊᓐᒋᓇ ᒪᒃ ᑲ ᓂᐸᐃᐛᔨᒋ ᒋ ᓂᓱᐅᓇᒋᐃᑯᐅᒡ᙮
11ᐊᐅᒄ ᐅᔭ ᒥᓯᐛ ᑲ ᐃᔅᐱᔨᒡ ᐊᓐᒡ ᐃᔪᒡ ᒐᒋ ᐅᒋ ᐃᔭᒂᒥᒥᑯᐅᔭᐧᒄ ᒐ ᐊᑲ ᒋ ᒥᒋᑐᑐᐛᐧᒄ ᒋᓴᒪᓂᑐᐤ᙮ ᒋ ᒥᓯᓇᐃᑭᓄᐛ ᒪᒃ ᐅᔭ ᐊᓐᑕ ᒐᒋ ᐅᒋ ᒋᔅᒐᔨᑎᒥᐃᑯᐅᔭᐧᒄ ᒐ ᐊᑲ ᒋ ᐃᓯ ᐱᒪᑎᓯᔭᐧᒄ ᑕᓐ ᑲ ᐃᓯ ᐱᒪᑎᓯᒡ᙮ ᐛᔅ ᓴᔅ ᒪᔅᑕᔾ ᑲ ᒋᓯᑲᒋ ᒋ ᐱᒪᑎᓯᓇᓄᐤ᙮
12ᐃᔭᒂᒥ ᒋᔾ ᑲ ᐃᑕᔨᑎᒥᓐ ᒧᔅ ᐊ ᓱᒋᑲᐳᔨᓐ ᒐ ᐊᑲ ᒋ ᐸᒋᓯᓂᔨᓐ ᒥᒋᑥᐅᓂᒡ ᐃᔅ᙮ 13ᒥᓯᐛ ᐊ ᐃᓯ ᑯᒂᒋᐃᑯᐅᔭᐧᒄ, ᐊᐅᑯᓐ ᐊ ᐃᓯ ᑯᒂᒋᐊᑭᓄᐅᑦ ᒥᓯᐛ ᐊᐛᓐ᙮ ᒥᒄ ᒪᒃ ᒋᓴᒪᓂᑐᐤ ᑯᐃᔅᒄ ᐃᑐᐤ᙮ ᓇᒪ ᒋᑭ ᐅᒋ ᐱᔅᑎᓂᑯᓄᐤ ᒥᒋᒪ ᒐᒋ ᐃᓯ ᑯᒂᒋᐃᑯᐅᐛᐧᒄ ᐊᑲ ᒋ ᐃᓯᑲᐳᔅᑎᒪᐧᒄ ᑯᒂᒋᐃᐛᐅᓐ᙮ ᐊᓐᑕ ᐊᓂᔭ ᒪᒂᒡ ᐊ ᑯᒂᒋᐃᑯᐅᐛᐧᒄ ᒋᑭ ᐛᐸᑎᔨᑯᓄᐤ ᒋᓴᒪᓂᑐᐤ ᑕᓐᑕ ᒐᒋ ᐅᒋ ᓴᐳᔅᑭᒪᐧᒄ ᐊᓐ ᑯᒂᒋᐃᐛᐅᓐ᙮ ᐊᐅᒄ ᐅᔭ ᐊ ᐃᓯ ᐎᒋᐃᑕᐧᒄ ᒐ ᐊᑲ ᒋ ᓴᐧᑯᒋᐱᑎᑯᐛᐧᒄ ᐊᓂᔭ ᑕᓐ ᐊ ᐃᓯ ᑯᒂᒋᐃᑯᐅᐛᐧᒄ᙮
ᒥᓂᑐᐧᑲᓐᒡ ᐊ ᒥᑯᓴᑐᑐᐛᑭᓄᐅᒡ ᑭᔭ ᐅᑎᐸᔨᒋᒐᐤ ᐅᑯᒥᓂᐅᐎᐃᐛᐅᓐ
14ᐊᑯ ᒪᒃ ᓂᐎᒐᐛᑭᓂᑎᒄ ᑲ ᓴᒋᐃᑎᑯᒡ, ᐊᑲᐎᔾ ᓂᑕ ᐊᔭᒥᐊᔅᑐᐛᐧᑯᒡ ᒥᓂᑐᐧᑲᓐᒡ᙮ 15ᓇᔅᒡ ᑲ ᒥᔪ ᓂᔅᑐᑕᒡ ᐊᐛᓐᒋ ᐊᐅᑯᓐ ᐊ ᐃᓯ ᐃᔨᒥᐃᑎᑯᒡ᙮ ᒪᒥᑐᓇᔨᑎᒧᒄ ᒪᒃ ᑕᓐ ᐊ ᐃᔅᒋᔄᔭᓐ᙮ 16ᐊᓐ ᐊ ᑯᒥᓂᐅᐎᔭᐧᒄ ᒋᓂᓇᔅᑯᒪᓄᐤ ᒋᓴᒪᓂᑐᐤ ᙭ ᐅᒥᐧᒄ ᐊᒋ ᓯᑲᐃᑲᑕᔨᒡ ᑭᔭ ᐅᐱᒪᑎᓯᐅᓐ ᐊᒋ ᐱᔅᑎᓇᐧᒃ ᙭᙮ ᐛᔅ ᐊᓐ ᓱᒥᓇᐳᔾ ᑲ ᒥᓂᔭᐧᒄ ᑭᔭ ᐊᓐ ᐸᒂᓯᑭᓐ ᑲ ᐅᑎᓇᐧᒄ ᐊᑯᑕ ᓄᑯᑕᔭᐧᒄ ᙭ ᐊᒋ ᓂᐱᔅᑎᒪᑕᐧᒄ ᐊᓐᑕ ᒐᒋ ᐅᒋ ᐛᐸᔨᑎᒪᑯᐅᔭᐧᒄ ᒋᒥᒋᑥᐅᓄᐛ᙮ 17ᒥᒄ ᐸᐃᑯᓱᐤ ᐊᓐ ᐸᒂᓯᑭᓐ ᒥᓯᐛ ᐊ ᒧᐛᐧᒄ, ᐊᑎ ᐊ ᒥᒐᑎᔭᐧᒄ ᓂᓇᐧᑯᐤ ᐊ ᐃᑕᔨᑕᑯᓯᔭᐧᒄ᙮ ᐃᔅᐱ ᒪᒃ ᐊ ᒧᐛᐧᒄ ᐊᓐ ᐸᐃᒄ ᐸᒂᓯᑭᓐ ᐸᐃᒄ ᒥᔪᐤ ᒋᑦ ᐃᓯᓇᑯᓯᓇᓄᐤ᙮
18ᒪᒥᑐᓇᔨᑎᒧᒄ ᒪ ᑕᓐ ᐊᔅᒄ ᐊ ᐃᑕᔨᑕᒂᒡ ᐊᓐᑕ ᒍᐤ ᐃᔪᒡ ᐊ ᑕᒡ᙮ ᒥᓯᐛ ᐊᓐᒡ ᑲ ᒥᒋᒡ ᐎᔭᓯᔪᐤ ᑲ ᒥᑐᔅᑕᐊᒧᐛᑭᓄᔨᒋ ᒋᓴᒪᓂᑐᐛ ᐊᐅᒄ ᐊᓐᒡ ᐊ ᒪᒧᐤ ᐊᑐᔅᑯᐛᒡ ᒋᓴᒪᓂᑐᐛ᙮ 19ᒪᐅ ᐊ ᐃᓯ ᐎᑎᒪᑎᑯᒡ ᐅ ᑲ ᐃᔅᒋᔄᔭᓐ᙮ ᐊᓐ ᒥᒋᒻ ᑲ ᒥᑐᔅᑕᐊᒧᐛᑭᓄᐎᒡ ᒥᓂᑐᐧᑲᓐᒡ, ᓇᒪ ᓇᔅᒡ ᒐᒂᓂᒡ ᐃᑕᐱᑎᓐ᙮ ᐊᐅᑯᓐ ᒪᒃ ᒧᔭᒻ ᒥᓂᑐᐧᑲᓐᒡ, ᓇᒪ ᒐᒂᓂᒡ ᐃᑕᐱᑎᓯᐅᒡ᙮ 20ᒪᐅ ᑭᔭ ᐊ ᐃᔅᒋᔄᔭᓐ᙮ ᐊᓂᔭ ᑲ ᒥᑐᔅᑕᐊᒧᐛᒡ ᒥᓂᑐᐧᑲᓇ, ᓇᒪ ᒋᓴᒪᓂᑐᐛ ᒥᑐᔅᑕᐊᒧᐛᐅᒡ, ᒥᒋ ᐊᒐᒂ ᐊᐅᑯᓂ ᒪᑐᔅᑕᐊᒧᐛᒡ᙮ ᓇᒪ ᒪᒃ ᒋ ᓂᑐᐛᔨᒥᑎᓇᐛᐤ ᒐᒋ ᐊᑐᔅᑯᐛᑯᒡ ᒥᒋ ᐊᒐᐧᑯᒡ᙮ 21ᓇᒪ ᑕᐱᔅᑯᓐ ᒋᐸ ᐅᒋ ᒥᓐᓇᐛᐤ ᐊᓐ ᒥᓂᒂᑭᓐ, ᐊᓐ ᑲ ᐅᒋ ᒥᓐᓇᓄᐅᒡ ᐊ ᒋᔅᒋᑐᐛᑭᓄᐅᑦ ᐅᑎᐸᔨᒋᒐᐤ ᐊᒋ ᓂᐱᔅᑎᒪᑕᒄ, ᑭᔭ ᐊᓐ ᒥᓂᒂᑭᓐ ᑲ ᐊᐱᑎᒡ ᒥᒋ ᐊᒐᐧᑯᒡ ᐊ ᒥᑐᔅᑕᐊᒧᐛᑭᓄᐎᒡ᙮ ᓇᒪ ᒋᐸ ᐅᒋ ᑯᒥᓂᐅᓇᐛᐤ ᐊᑯ ᑭᔭ ᒐᒋ ᒥᒋᔭᒄ ᑕᓐ ᐊ ᐃᓯ ᒥᑐᔅᑕᐊᒧᐛᑭᓄᐎᒡ ᒥᒋ ᐊᒐᐧᑯᒡ᙮ 22ᐅ ᑎᔭᒂ, ᒋᑭ ᒋᔄᐊᓄᐤ ᒋᓴᒪᓂᑐᐤ ᑭᔭ ᒋᑭ ᐅᑕᔨᑎᒻ᙮ ᒋᑦ ᐃᑕᔨᑕᓇᓄᐤ ᐊ ᐃᐛᒃ ᒋᔭᓄᐤ ᐊ ᓱᒋᓯᔭᐧᒄ ᐃᔅᐱᔅ ᒋᓴᒪᓂᑐᐤ ?
ᒧᔅ ᒋᔅᑕᔨᒻ ᒋᓴᒪᓂᑐᐤ
23ᐱᔅᒐ ᐊᐛᓐᒋ ᐃᔅᒋᔄᐅᒡ ᒥᒄ ᐛ ᐃᑎᔭᐧᒄ ᒋᑭ ᒋ ᐃᑎᓇᓄᐤ᙮ ᑕᑈ ᑭᑈ᙮ ᒥᒄ ᒪᒃ ᓇᒪ ᒥᓯᐛ ᒐᒂᓐ ᐊ ᐃᑐᑎᒪᐧᒄ ᒋ ᒥᔪ ᐃᑐᑕᑯᓇᓄᐤ᙮ ᑭᔭ ᓇᒪ ᒥᓯᐛ ᒐᒂᓐ ᐊ ᐃᑐᑎᒪᐧᒄ ᒋ ᒥᔪ ᐎᒋᐃᑯᓇᓄᐤ ᒐᒋ ᐊᔨᒋᑲᐳᐅᔭᐧᒄ᙮ 24ᓇᒪ ᒥᒄ ᐊᓂᔭ ᐎ ᐊ ᒥᔪ ᐎᒋᐃᑯᑦ ᒐᒂᔪᐤ ᒋᐸ ᐅᒋ ᐃᑐᑎᒻ ᐊᐛᓐ᙮ ᐃᔭᐱᒡ ᐃᑐᑎᒧᒄ ᒐᒂᓐ ᒐ ᒥᔪ ᐎᒋᐃᑯᒡ ᑯᑎᑭᒡ ᐊᐛᓐᒋ᙮
25ᐊ ᐅᑎᓂᒥᓐ ᐎᔭᔅ, ᓇᒪ ᒋᐸ ᐅᒋ ᑯᒂᒋᒐᒧᓐ ᑲ ᒥᑐᔅᑕᐊᒧᐛᑭᓄᐛᒂᓐᒋ ᒥᓂᑐᐧᑲᓐᒡ ᐊᓂᔭ ᐎᔭᓯᔪᐤ᙮ ᐊᑯ ᒪᒃ ᓇᒪ ᒋᑭ ᐅᒋ ᐃᑕᔨᑕᓐ ᐊ ᒥᒋᑐᑎᒥᓐ ᒥᒋᔨᓇ᙮ 26ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, “ᐅ ᐊᔅᒋᔾ ᑭᔭ ᒥᓯᐛ ᒐᒂᓐ ᐊ ᑎᒂᒡ ᐅᑕ ᐊᔅᒋᒡ, ᐅᑎᐸᔨᒋᒐᐤ ᑎᐱᔨᐛᐅᓯᐤ᙮”
27ᐊᐛᓐ ᐊᑲ ᑕᑈᔭᔨᒪᑦ ᒋᓴᒪᓂᑐᐛ ᐎᓴᒥᔅᒐ ᒐᒋ ᐎᒋ ᒥᒋᓱᒥᑦ, ᐃᑐᑕᔨᓇ ᒪᒃ, ᒋᑭ ᒋ ᒥᒍᐛᓐ ᐊᓂᔭᔪᐤ ᒥᒋᒥᔪᐤ ᐊ ᐊᓯᒥᔅᒃ᙮ ᐊᑯᔅ ᐊᑲ ᑯᒂᒋᒻ ᑲ ᒥᑐᔅᑕᐊᒧᐛᑭᓄᐅᒂ ᒥᓂᑐᐧᑲᓐ ᐊᓂᔭᔪᐤ ᒥᒋᒥᔪᐤ᙮ ᐊᑯ ᒪᒃ ᓇᒪ ᒋᑭ ᐅᒋ ᐃᑕᔨᑕᓐ ᐊ ᒥᒋᑐᑎᒥᓐ ᒥᒋᔨᓇ᙮ 28ᐃᑎᔅᒐ ᐊᐛᓐ, “ᒥᓂᑐᐧᑲᓐ ᐊᓐ ᒋ ᒥᑐᔅᑕᐊᒧᐛᑭᓄᐤ ᐅᔭ ᐎᔭᓯᔪᐤ,” ᐊᑲᐎᔾ ᒋᑭ ᐅᒋ ᒥᒍᐛᓐ ᐊᓂᔭ ᐎᔭᓯᔪᐤ᙮ ᐊᑯ ᒪᒃ ᐊᑲ ᒥᒍᐅᑕ ᒋᑭ ᓄᑯᑕᓐ ᐊᑲ ᒪᔭᔨᒥᑦ ᐊᓐ ᑲ ᐎᑎᒪᔅᒃ ᐅᔭ ᑭᔭ ᒋᑭ ᓄᑯᑕᓐ ᐊᑲ ᒪᔭᔨᒥᑦ ᐊᓂᔭ ᐎᔾ ᑕᓐ ᐊ ᐃᓯ ᑕᑈᑕᐧᒃ᙮ 29ᓇᒪᐎᔾ ᐊᓐ ᒋᔾ ᐊ ᐃᑕᔨᑎᒥᓐ ᒋᐸ ᐅᒋ ᐊᑲ ᒥᒋᓇᓄᐤ ᐊᓐ ᒥᒋᒻ ᒋᐸ ᐅᒋ ᐊᑲ ᒥᒋᓐ᙮ ᐊ ᓂᓇᑭᑐᐛᔨᑎᒧᑦ ᑕᓐ ᐊ ᐃᑕᔨᑕᐧᒃ ᐎᔾ ᐊᐅᑯᓐ ᐊᓐ ᒐ ᐅᒋ ᐊᑲ ᒥᒋᔨᓐ ᐊᓐ ᒥᒋᒻ᙮ ᒥᒄ ᒪᒃ ᒂᔄᓐ ᒋᑭ ᒋ ᐃᓯ ᑯᒂᒋᒐᒧᐤ ᐊᐛᓐ, “ᒐᒂᓐ ᒪᒃ ᒐ ᐅᒋ ᓇᑲᐎᔭᓐ ᐊ ᐃᑐᑎᒪᓐ ᒐᒂᓐ ᐊ ᐃᑕᔨᑎᒪᓐ ᐊᑲ ᒐᒂᓐ ᐊᐃᒡ, ᒥᒄ ᐊᓂᔭ ᐊ ᐃᑕᔨᑕᐧᒃ ᑯᑎᒃ ᐊᐛᓐ ᐊ ᒥᒋᑐᑕᑭᓄᔨᒡ ᐊᓂᔭ ᐊ ᐃᑎᓇᓄᐎᒡ᙮ 30ᐛᔅ ᓂᓇᔅᑯᒥᑲ ᒋᓴᒪᓂᑐᐤ ᐊᓐ ᒥᒋᒻ ᑲ ᒥᒋᔭᓐ, ᒐᒂᓐ ᒐ ᐅᒋ ᐃᑎᑯᐅᔭᓐ ᐊ ᐅᓂᐱᔨᔭᓐ ᐊ ᒥᒋᔭᓐ ᐊᓐ ᒥᒋᒻ ?”
31ᒪᐅ ᒋᐸ ᐃᑎᓇᐛᐤ᙮ ᒥᓯᐛ ᒐᒂᓐ ᐊ ᐃᑎᔭᒄ, ᐊ ᒥᒋᓱᔭᒄ ᑭᔭ ᒪᒃ ᐊ ᒥᓂᔭᒄ, ᒋᐸ ᐃᑐᑕᓇᐛᐤ ᒋᓴᒪᓂᑐᐤ ᒥᒄ ᒐᒋ ᒋᔅᑕᔨᒪᑭᓄᐅᑦ᙮ 32ᐃᓯ ᐱᒪᑎᓯ ᒪᒃ ᒐ ᐊᑲ ᒋ ᐅᔅᑎᐛᔨᑎᒥᐃᑦ ᐊᐛᓐ ᒍᐤ ᑲ ᐃᑎᔅᑲᓇᓯᑦ ᑭᔭ ᒪᒃ ᐊᐛᓐ ᐊᑲ ᒍᐤ ᐃᑎᔅᑲᓇᓯᑦ ᑭᔭ ᒪᒃ ᑯᑎᒃ ᐊᐛᓐ ᑲ ᑕᑈᔭᔨᒪᑦ ᒋᓴᒪᓂᑐᐛ᙮ 33ᐊᐅᑯᓐ ᐊ ᐃᑎᔭᓐ ᓂᔾ, ᒧᔅ ᓂ ᐎ ᓂᓇᐃᑎᒪᐤ ᒥᓯᐛ ᐊᐛᓐ ᒥᓯᐛ ᑕᓐ ᐊ ᐃᑎᔭᓐ᙮ ᓂ ᑯᒋᑕᓐ ᐊᑲ ᒥᒄ ᓂᔾ ᒐᒋ ᒪᒥᑐᓇᔨᒥᓱᔭᓐ ᒐᒂᓐ ᐊᓐ ᒐ ᒥᔪ ᐎᒋᐃᑯᐛᓇ᙮ ᐊᔪᐤ ᐊᓂᔭᔪᐛ ᒐᒂᔪᐛ ᑯᑎᑭᒡ ᐊᐛᓐᒋ ᒐ ᒥᔪ ᐎᒋᐃᑯᐛᒂ ᓂ ᒪᒥᑐᓇᔨᑎᒥᐃᑯᓐ, ᑭᔭ ᒐᒋ ᐃᓯᓇᑯᓂᔨᒡ ᒐᒋ ᐱᒪᒋᐅᒡ᙮
Currently Selected:
1 ᑯᕆᓐᑎᔭᓇ 10: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
