रोमी 12
12
जेक्याँ परमेस्वरए उमीं ज़ जैव ताके
1है जैद ङानैं ङामेंर, परमेस्वरए जेलाई उयुँ नावर जैद ओदयार सतैंद ओयाचिउए आव तोबो पाँत ङाबिन्ती लिज़्या — जे परमेस्वरलाई ओज़्यास्ज़्याव मिताव य़ेन छैंवनी दाद, जेक्याँ भरी ओललाई चरैःचिके। परमेस्वरए साचो ओसेवा दान्या ननी ज़। 2आव जुकलाव लन्थादा जेयुँ ताझाःच्यो। बुरू जेयुँलाई त़ोद साःरो जैचिके। हो ताकिन वाज़ परमेस्वरए काता ओपैंज़्याव हो सैंन्या जेले। है जैद काताकाव चाव उलिज़्याव, परमेस्वरलाई काताए खुसी ओजैज़्याव स़ोनो पक्का काता उलिज़्याव, हो ब चबनै सैंन्या जेले।
परमेस्वरए ओयाचिउ य़ेन चावस ज़ दाव ताके
3परमेस्वरए ङाल्योदा उयुँ ओगराँवए ज़ जे प़ाइँलाई है ङादाचिज़्या — जे तास॰च्यो। बुरू मासघ्योःसिद परमेस्वरए ओयाचिउ युँ हुप्न्या खावाकाव जेस उलिज़्याव हाःवाकाव ज़ जेक्याँलाई थ·रैच्यो। 4किताव गेक्याँताव गेखँ गेकुइर छुत छुत ताद सु सु याय़ेन ब लिज़्या, 5हिताव ज़ गे ख्रीसए उमिनतावर छुत छुत गेलिदी ब ख्रीसनी तक्याँ ज़ गेताज़्या। 6है जैद परमेस्वरए ओयासिउ गोइँनी सु सु गेबरदान छुत छुत ओतावए हो मितावनी ज़ दोव ताके। परमेस्वरए उपुरूसनी पाँज़्यावए परमेस्वरए ल्योनी ओदैव गोइँनी ज़ ओपाँक। 7सेवा दाज़्यावए सेवा ज़ ओदोवक। परमेस्वरए ओपाँ पैज़्यावए ओसैंव भरी ओरापैवक। 8परमेस्वरए ओपाँत यायुँ सझेंःद्याज़्यावए झन ज़ सझेंःद ओरायोक। याज़्यावए उकुइ सघ्योःद ओरायोक। हक दैवए गहकस य़ेन ओचलैवक। उयुँ नाज़्यावए उयुँ माकैद ज़ ओदोवक।
खैद लिन्या
9जे जेल खैन्या साचो युँनी ज़ ओताक। माचाव पाँलाई सोद, चाव पाँत खदेप ल्यो ताके। 10जे तोबो फूलाव मितावर जेतावए जे जेल समारिसिउ ताके। जे जेल क्याँकिन छुतए ओमान ब नैच्यो। 11परमेस्वरए ओसेवा धेङ्गै मादाद छैंव पुरूसनी कलँ लिद दोच्यो। 12परमेस्वरनिकाव जेदैव आसत रेंद ज़ लिच्यो, दुखलाई सहिच्यो, एकम्न्या पोंखारिउ ज़ नैच्यो। 13परमेस्वरए उमिनताव जेनैं जेमेंरालाई माथैंव मायो·वल यारासघैच्यो। जेझ़िमक हुव पाहुनारालाई चावस यारानैच्यो। 14जेखिरी पसिज़्यावरालाई ताराथल्च्यो, बुरू परमेस्वरए ल्योनी असिक याराएच्यो। 15रेंज़्यावरास रेंचिके, घर्ज़्यावरास घर्चिके। 16जे जे खैद लिच्यो। मासघ्योःसिद, ज़िम्ज़ारास मनी खदेप लिच्यो। ‘जे वाज़ बनै सैंन्या’ ताजैसिच्यो।#हितो ३:७ 17माचावलाई माचाव फर्कैद ताएच्यो। जेदोज़्याव भरिल जेपाँःच्या तापुलुस्क। 18जेधुवा भरी प़ाइँ मिँरास खैद लिच्यो। 19ङानैं ङामेंर, सुए ओक्याँत ज़ जेखिस ताफेरैच्यो। बुरू नो पाँ परमेस्वरलाई याद ओलस ज़ नैचिके। धर्मसास्त्रल मनी इताव सर्सिउ लिज़्या,
“परमेस्वरए है लिज़्या,
खिस फेरैद्यान्या ङा ङालिज़्या।”#ब्य ३२:३५
20“जे ते जेसुतुर ओकरेकिन ओकरे सैःदिचिके।
ऱी ओछोस्किन उऱीछो सैःदिचिके।
ननी ज़ ओङ़ैनी भुबुराए जेरालो मिताव तान्या ले।”#हितो २५:२१-२२
21है जैद माचावलाई माचावनी हारैन्या माःक, माचावलाई बुरू चावनी हारैन्या ची।
Currently Selected:
रोमी 12: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
