दर्सन 21
21
परमेस्वरए ओबास मिँरास तान्या ले
1हाःत ज़ फरी ङाभाल्सिक साःरो नाम नम ङारँःके। ङ़ादाङाव नाम नम समुन्द्रस ज़ खेम्के।#यसै ६५:१७; ६६:२२ 2नकिन तोबो भर रे दाव मेंमा ओरेए जूँनी झलैसिउ मिताव छैंव सहर, साःरो यरूसलेम परमेस्वरए ल्योनी स्वर्गतिन उझरिहुज़्याव ङारँःके।#यसै ५२:१; ६१:१० 3हाःत ज़ स्वर्गताव राजाए ल्योनी तोबो गा बनै चोइस अइ उलिज़्याव ङाथैके, “अबकिन परमेस्वरए ओबास मिँरास तारिज़्या। है जैद ओल मिँरास लिद नोरालाई उमींर ज़ जैद ओल यापरमेस्वर ज़ तान्या ले।#इज ३७:२७; लेबी २६:११-१२ 4नोरास ज़ लिद याप़िलर सीद्याद खर्क ज़ मासिन्या याजैरिज़्याव। ङ़ादाङाव माचाव भरी नाम नमरास ज़ ओखेमोए अबकिन सोगो दाद घर्न्या ब तान्या माले, काताए दुख ब तान्या माले,” है लिद पाँके।#यसै २५:८; ३५:१०; ६५:१९
5नकिन नो सिंहासनत च़ुसिद लिज़्यावए है लिके, “अबकिन प़ाइँ साःरो ज़ ङाजैरिज़्या।” फरी ब ङालाई है दाँक्यो, “है जैद आव ङापाँ ब सर्के, साचो थ॰रिउ ज़ लिज़्या। 6नो ङापाँ आव ज़ — अब ते प़ाइँ यो·के। ङा अल्फा स़ोनो ओमेगा ज़।#21:6 दर्सन १:८ चिऊन्या। ङा प़ाइँरानी ङ़ाताव, प़ाइँरानी छींताव ङालिज़्या। ङापाँत ऱी छोस्ज़्याव मिँलाई अजम्बरी जुनीलाव ऱी अइज़ याद उऱीछो सैःद्यान्या ङाले।#यसै ५५:१ 7है जैद ङा ङापाँत जो झेंःस्या ताज़्या, होए नो असिकर दैरिज़्याव। ङा होए ओपरमेस्वर ज़ ङातारिज़्या, नो ङाज़ा ज़ तारिज़्या।#२ समू ७:१४; भज ८९:२६-२७ 8फरी ङापाँत छेपोवा ताज़्यावर, यायुँ माहुप्ज़्यावर, युँ माजामो य़ेन दोज़्यावर, मिँ सैःज़्यावर, पातर्या पातर्नीर, मन्तर तन्तर दाज़्यावर, अङग्या पुजा दाज़्यावर, धुत पाँज़्यावर, नो भरिराए याजुँ गन्धकनी चाँःज़्याव मेंःल लिज़्या। है जैद ऩेखेप सिज़्यावर आवर ज़।”
साःरो यरूसलेम
9हाःत ज़ नो याकुइताव खुरील ऩुल्पा ऩुल्मा लिज़्याव सात जना चाकर्यारानी तोबोए ङाल्योक हुद, “आत हुन्के, ङा नँलाई पाथाए ओब्याहोल्यानी सतैंद ङाईंरिज़्या,” है दाद, 10ङालाई परमेस्वरए उपुरूसनी झेंःव गोंत लाँद छैंव यरूसलेम सहर स्वर्गतिन उझरिहुज़्याव सतैंद्याँक्यो।#इज ४०:२ 11नो सहरत परमेस्वरए ओज़गै उलिज़्याव। नो ज़गै बनै ओएः ल्यो छैंव यूँखार स्यासो झिलिक झिलिक ओताज़्याव। 12नो सहर घ्वाँगिल बनै झेंःव भार्ना उलिज़्याव। नो भार्नात बाह्र गोता य़ामर यालिज़्याव। नलाव पाल्यार बाह्र जना चाकर्यार यालिज़्याव। तोबो तोबो य़ामत इस्राएली बाह्र थरराए यामिनर सर्सिउ उलिज़्याव। 13नो य़ामर पुर्ब त॰दा स़ोम्लो, पछ्युँ त॰दा स़ोम्लो, उत्तर त॰दा स़ोम्लो, दखिन त॰दा स़ोम्लो यालिज़्याव।#इज ४८:३०-३५ 14नो सहरए ओभार्ना अदैज़्याव गजलाव लुँर ब बाह्र गोता यालिज़्याव। नत तोबो तोबो लुँत पाथाए बाह्र जना ओसाचीराए यामिन सर्सिउ उलिज़्याव।
15नकिन नो ङास पाँज़्याव चाकर्याए नो सहरलाई ओय़ामर ओभार्नारास ज़ गोइँन्याए जूँनी उकुइत सुने ताङ्गा तोबो रैद ओनैज़्याव।#इज ४०:३ 16नो सहरलाई ओगोइँक ओर्ख्यो, ओराँ प़ाइँदा ज़ सम सम ताद चार पात्या ताके। नो ताङ्गाए ओगोइँनी ओर्ख्यो ब ऩेहजार चार सय किलोमितर, ओराँ स़ोनो ओर्झें ब हाःज़ ताके। 17नो सहरलाव भार्नाए ओपाता ओगोइँक नो मनी मिँए ओगोइँनी तादी ब, चाकर्याए ओगोइँनी तादी ब, पैंसथी मितर ताके। 18नो भार्नाए उलुँर बनै चाव घ्यामो लुँर यालिज़्याव। सहर भरी ते बनै चाव सुन स्यासो छैं छैंव यूँखार स्यासो उलिज़्याव। 19नो गजलाव झाःसिउ लुँ भरी बनै याएः ल्यो चाव चावर वाज़ यालिज़्याव। उस॰कताव लुँए उमिन स्फतीक ताके। हुकिनकाव लुँ नीर, हुकिनकाव लाल, हुकिनकाव पन्ना, 20हुकिनकाव गोमेद, हुकिनकाव सारदियस, हुकिनकाव पित्मनी, हुकिनकाव पिरोजा, हुकिनकाव पुस्पराज, हुकिनकाव लसुने, हुकिनकाव धुम्रकान्त, हुकिनकाव मार्तीस। 21नो बाह्र गोता य़ाम भरी मुतीनी जैसिउ उलिज़्याव। तोबो तोबो य़ाम तोबो तोबो मुतीए ज़ जैसिउ उलिज़्याव। सहरलाव दोहार फरी छैंव सिसा मिताव बनै चाव सुन लैसिउ उलिज़्याव।#यसै ५४:११-१२
22नो सहर भरिल ते ध्यान झ़िम ते काङ्क ज़ ङामारँःके। नलाव ध्यान झ़िम ते परमप्रभु बनै ओसक्ती ल्यो परमेस्वर स़ोनो पाथानी ज़ ची निल्यो। 23नो सहरलाई पलाँव जैन्या निमीए ओचाहित ब ओमालिज़्याव, स़्यावैए ओचाहित ब ओमालिज़्याव। नो सहरलाई पलाँव जैज़्याव परमेस्वरए ओज़गै ज़, सहरलाव बत्ती फरी पाथा ज़।#यसै ६०:१९-२० 24हाः बेलाक प़ाइँ राज्यालाव मिँर नो ज़गैत ज़ आदा होदा लिन्या लेर। मानुवाताव राजा भरिराए ब यासकाव लिज़्याव चाव चाव भरी ब नल ज़ रैन्या लेर।#यसै ६०:३ 25नो सहरल फरी री खर्क ज़ मातान्या, ला वाज़ ओतावए नलाव य़ामर ब खर्क ज़ गल्सिन्या मालेर। 26है जैद प़ाइँ राज्यानिकाव यामिन थासो चाव भरी प़ाइँ नल ज़ हुन्या लेर।#यसै ६०:११ 27माचाव, युँ माजामो, असत दोज़्यावर ते सु ज़ पसिउ दैन्या मालेर। पाथाए अजम्बरी जुनीलाव ओपोस्तोकोल यामिन सर्सिउर वाज़ पसिन्या लेर।#यसै ५२:१; इज ४४:९
Currently Selected:
दर्सन 21: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
