याकूब 5
5
अर्काए ओक्याँत धनी तावर
1ए धनी तावर, आव ङापाँ थैचिके। जेक्याँत हुरिज़्याव छे छे ङम्सिउ दुखए जूँनी जेयुँ माचाव जैद घर्चिके। 2जेधन भरी ब उपुव मिताव ज़ ताद ले, जेक्वा भरी ब ओनाँःव मिताव ज़ ताद ले। 3जेसुन चाँदीर ब पींज्यासो मिताव ज़ ताद ले। नो पींज्यासो ज़ जेसाची ताद फाल्न्या छ्याम मेंःए माँःती जेक्याँलाई ज़्यान्या ले। है जैद नो जेदुप्ज़्याव धन भरी आछिमकावए जूँनी माःक, फाल्न्या छ्यामकावए उजूँनी ची। 4नो जेएँःलाव य़ेन दाज़्याव बाहोर्यारालाई याःथन प़ाइँ मायाद य़ेन वाज़ दाव जेरापरींकिन नो जेमारायो भरी जेङ़ैत ज़ तान्या ले। नो बाहोर्यार याक़िज़्याव माहान परमेस्वरए थैरिज़्याव।#ब्य २४:१४-१५ 5जे आव मानुवात जेयुँनी हुव भरी दाद थाँतस लिद पल्सिन्या छयामकावए उजूँनी बनै जेसोसोइसिज़्या। 6झन जेकिन तँदा माजैसिद काता ज़ मापाँज़्याव धर्मीलाई मनी खत लैद जेसैःके।
दुखर सहिद गेप्रभुलाई कींव ताके
7जे ङानैं ङामेंर, गेप्रभु फरी ओमाहुवा पै जेयुँ थू जैद कींद नैच्यो। एँःलाव य़ेन दाज़्यावए ब ओवासो धुरलाई ओमामींःवा पै कींद नैज़्याव। स़ोनो ‘नम मावारिज़्या’ लिद नमलाई ब उँध्याली उभ्याली चिऊव ज़ नैज़्याव। 8हिताव ज़ जे पाला ख्रीसलाई ओमाहुवा पै ‘जुनी ब हुया ज़’ लिद जेयुँ सुहुप्द कींद नैचिके। ओल हुन्या तादाङ माले, लापक ज़ लिज़्या। 9ङानैं ङामेंर, जे छुतए ओङ़ैत तागन्गनैच्यो। जे अर्काए ओगल्ती अऩाकल ज़ पले·द जेएकिन नोकिन जे जेगल्ती झन ज़ रैंःज़्या। नो जेय़ेन फाल्न्या जेय़ामक ज़ च्याँःसिद ले।
10ङानैं ङामेंर, परमेस्वरए उमिन हाइज़्याव अगमबक्ताराए किताव दुखर सहिद थ॰रिद लिकेर, हिताव ज़ जे मनी थ॰रिद लिच्यो। 11नो थ॰रिद लिज़्यावरालाई गे धन्याकावर ज़ है गेरादोज़्या। अय्यूबए मनी बनै धो सहिउ दुखर दैद उसहिउत परमेस्वरए हाः चाव ओजैव जे ज़ जेसैंज़्या। है जैद परमेस्वरए उयुँ ओनाज़्याव उयुँ ओय़ाल्ज़्याव ननी ज़ रैंःज़्या।#अयू १:२१-२२; २:१०; भज १०३:८
आगल्या पाँ तापाँच्यो
12ङानैं ङामेंर, प़ाइँरानी घेप्पा पाँ आव ज़ — नाम नम अथबा जोराए मिनर तादी ब हाइद किर्या ताझाःच्यो। बुरू जेपाँक हैज़लाई हैज़ लिच्यो, माःकलाई माःक ज़ लिच्यो। आगल्या जेपाँकिन गल्ती थ॰रिन्या ओछ्यास लिज़्या।
ओजोरो हुज़्यावलाई पोंखारिद्यान्या
13जेस सुवार दुखल यालिकिन नोए परमेस्वरलाई ओपोंखारिउक। फरी सुवार रेंवर यालिकिन नोए परमेस्वरए उमिनत भजन ओगैवक। 14जेस सुवार याजोरो उहुकिन होए मन्दलीलाव स़ेररालाई ओराखुलोक। नो स़ेरराए ओजोरो हुवए ओङ़ैत परमेस्वरए उमिननी म़ास थीद्याद पोंखारिद ओएरक। 15परमेस्वरलाई युँ सुहुप्द पोंखारिकिन ओजोरो हुज़्याव गराँन्या ले। ओजोरो हुवलाई ओल परमेस्वरए ज़ सोचोइज़्याव। फरी नो मिँए पाप ओदोव ताकिन, ओपाप ब क्याल्सिज़्या। 16सगराँसिन्याए जूँनी जेदोव पाप जे जेल माम़ोंद भैंःद जे जे पोंखारिसिच्यो। धर्मी मिँए परमेस्वरलाई ओपोंखारिउ पाँए बनै घ्योःव य़ेन दोज़्याव। 17एलिया ब गे स्यासो मिँ ज़ ओल्यो। होए ‘नम तावाक’ लिद ध्यानस ओपोंखारिक आव नामल स़ोंरिम छ मैना भरी नम वा ज़ मावाके।#१ राज १७:१; १८:१ 18फरी ‘नम ओवाक’ लिद ओपोंखारिक नम वाद आव नामल अनर बनै ज़ ताके।#१ राज १८:४२-४५
पाप दाज़्यावलाई सोवोल्न्या
19अ ङानैं ङामेंर, आव ब सैंच्यो, जेनी सुवार परमेस्वरए ओयेमनी ओल्द ओबाकिन जोए नोलाई सोवोल्द रैज़्याव, 20होए नो मिँलाई नर्गनी सोवोल्द ओरैव मिताव ज़ लिज़्या। कुधु ओपाप ब कप्द ओयो मिताव ज़ लिज़्या।#हितो १०:१२
Currently Selected:
याकूब 5: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
