हिब्रू 13
13
परमेस्वरए ओपैंज़्याव य़ेनर
1जे नैं मेंस खैन्या य़ेन माऱास्द दाव ज़ नैच्यो। 2जेझ़िमक हुवलाई खर्क ज़ मासरेस्सिउ तादी ब चावस नैच्यो। ख्वा ख्वाराए नितावनी ज़ परमेस्वरए ओचाकर्यारालाई ब मासरेस्द ज़ यारानैकेर।#उत १८:१-८; १९:१-३ 3झ्यालखानाल लिज़्यावरालाई जे ब नोरास सिप जेलिज़्याव मिताव चेतैद याराचिऊच्यो। दुख दैज़्यावरालाई ब हितावनी ज़ याराचिऊच्यो।
4ज्या जेरैक, रे जेदोक, ज्या-री सतत लिन्या ओताक, असत दान्या ताताक। छुतए ओज्यास बाज़्यावर छुतए ओरेस बाज़्यावर स़ोनो पातर्या पातर्नी जैसिज़्यावर परमेस्वरए ओसजाल परिन्या लेर।
5धन सम्पतीए लोभनी अछतङ लिच्यो। जेस खा उलिज़्याव हाःत ज़ सोन्तोकोस लिच्यो। परमेस्वरए ओल ज़ है लिज़्या,
“ङा जेलाई खर्क ज़ ऱास्न्या ङामाले,
ख्यानैन्या ब ङामाले।”#ब्य ३१:६,८; यहो १:५
6है जैद गे धुक्क ताद ज़ है गेलिज़्या,
“गेप्रभुए प़ाइँल ज़ ओसघैसिज़्यावए कातानी ब छे·न्या गेमाले।
मिँराए गेलाई कै ची याजैसिधुरिज़्याव?”#भज ११८:६
7जेलाई परमेस्वरए ओपाँ सथैद जेङ़ात बाज़्यावरालाई याराचिऊचिके। नोराए याय़ेननी आः चाव ओताज़्याव ओल्यो लिन्या चेतैद जे ब नोराए माँःती जेयुँ सुहुप्च्यो।
परमेस्वरए ओपैंज़्याव पुजा
8येसु ख्रीस खर्क ज़ मात़ोसिए, ङ़ादा किताव ओल्यो आज्याल ब हिताव ज़ लिज़्या। 9है जैद भाँती भाँतिलाव छुतनी यारापैज़्याव पाँरादा ताबाच्यो। परमेस्वरलाई चरैःद ज़्यान्या ज़्यावए गेयुँलाई छैंव माजैव, ननी ओफाइदा ज़ माले। युँलाई छैंव जैज़्याव ते परमेस्वरए उयुँ गराँद दाद ओयासिउनी वाज़ ताज़्या।
10गेस तोबो थान लिज़्या। नो थानताव चरैःसिउ पाथा परमेस्वरए ओसेवा दोज़्याव पुजारीराए ब कैन्या माताए। 11कानुननी ब प्रधान पुजारीए पाथाए उझी लाँद पाललाव प़ाइँरानी चोखो पोल पसिद मिँराए यापापए जूँनी नो झी चरैःद ओराएज़्याव। नो पाथाए ओक्याँलाई ते सहरकिन पाखाङ लाँद यासघाज़्याव।#लेबी १६:२७ 12हिताव ज़ येसुए मनी उझी सोभोद गे मिँरालाई गेपापनी ऱास्द परमेस्वरस सखैन्याए जूँनी सहरकिन पाखाङ उजिउ चरैःद्यासिक्यो। 13है जैद गे मनी सहरकिन पाखाङ ओल्योदा बाद ओल ओदैव मिताव बीज्यात सहिउ ताके, 14काराव ल्यो ताकिन गे आव मानुवाताव जाँवा पै वाज़ खासिद गेलिज़्याव पोकिन एकतार लिन्या पो खिम्न्या लिज़्या।
15है जैद येसुए दाद ओयासिउए परमेस्वरए उमिन सघ्योःद्याद एकम्न्या धन्याबाद गेचरैःया। नो चरैःन्या आव ज़ — उगुन मामेंःद उमिन हाइन्या। 16स़ोनो छुतलाई समारिन्या, छुतलाई यान्या ब तामेंःच्यो। नितावनी ब परमेस्वरलाई चरैःज़्याव मिताव ज़ ताज़्या। ननी ज़ परमेस्वर खुसी ताज़्या।
17जेलोम्बाराए याधूँल लिद होराए यापाँ भैंःच्यो। किताव हिसाप दाज़्याव मिँए हिसाप सुदुमो परिज़्या, हिताव ज़ नोराए ब परमेस्वरए ओबगालरानी ‘तोबो ब ताम़ारक’ लिद जेलाई बनै धामास चिऊचिज़्यार। है जैद नोरालाई यानाल केःद्यान्या य़ेन ताताक, खुसी जैन्या य़ेन ओताक। यानाल केःद जेराएकिन जेलाई काता फाइदा ज़ तान्या माले।
गेजूँनी पोंखारिद्यासिच्यो
18गे गेजूँनी ब पोंखारिद्यासिच्यो। गे प़ाइँनी ज़ साचो छैंव य़ेन वाज़ दोव गेपैंज़्या। आःपै ते गेदोव भरित परमेस्वरए ओङ़ाक गेयुँ छैंव ज़ लिज़्या लिद गेयुँ हुबो ज़ लिज़्या। 19खाली ङा जेल्योदा चाँदो ज़ हुव ङापैंज़्या। होए जूँनी जे काचाबुल पोंखारिउ ताके।
जेलाई परमेस्वरए ओअसिक ओताक
20युँ होलाँ जैद्याज़्याव परमेस्वरए ज़ बेधाराए चाव यार्गे गावला गेप्रभु येसुलाई सिउनी सोचोइद्यासिक्यो। नो ओज़ाए उजिउ झाःद उझी सोभोद ओयासिउनी खर्क ज़ माखेम्न्या गेत्याला ब जैद्यासिक्यो। 21अब ते ओल ओपैंज़्याव मिताव य़ेन दान्यात सरजाम जोरैद ओयाचिउक। ओज़ा येसु ख्रीसए ओसक्तीनी उयुँलाव मिताव ब ओजैचिउक। ओललाई खर्क ज़ माखेम्न्या ज़गै मगैव ज़ ओताक। आमेन।
तुपैन्या पाँर
22अ ङानैं ङामेंर, जेलाई सा हाइन्या पाँ छ्या वाज़ सर्द नैद ङायाचिए। जे आव पाँत ज़ धिद लिच्यो लिद ङाबिन्ती लिज़्या। 23आःपै जेमासैंताखेहो, गेभाइ तिमोथीलाई झ्यालखानानी ऱास्द नैर। नो आल चाँदो उहुकिन, ङा नोस तखेप ङाहुरिज़्या। 24जेलोम्बार स़ोनो परमेस्वरए छैंव उमीं भरिरालाई जेरो है यारादोच्यो। स़ोनो इतालियालाव गेनैं गेमेंराए ब जेरो है दाचिज़्यार।
25जेल्योदा परमेस्वरए उयुँ ओगराँक। आमेन।
Currently Selected:
हिब्रू 13: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
