एफिसी 2

परमेस्‍वरए ओदयानी अजम्‍बरी जुनी गेदैके

1जे ङ़ादा परमेस्‍वरकिन तँदा ताद मादान्‍या य़ेनर दाद सिउल गनिसिउर जेल्‍यो। 2हो बेलाक आव मानुवाताव मिँर याबाज़्‍यावदा ज़ जे मनी जेबाज़्‍याव। माचाव पुरूसराए याघेप्‍पाए उधूँल ब जेलिज़्‍याव। नोए परमेस्‍वरकिन तँदा लिज़्‍याव भरिरालाई चलैव ज़ यानैज़्‍याव। 3गे ब ङ़ादा नोरास लिद जोत ब गेयुँ मानैधुद गेमन लागिउ य़ेनर गेदोज़्‍याव। है जैद गे ब नो उपुर्कावराए माँःती परमेस्‍वरए उरिस चोवर गेल्‍यो। 4हितावत ब परमेस्‍वरए उयुँ बनै ओगराँवए गे निताव मिँरालाई ब उयुँ नाद गेलाई मया दासिक्‍यो। 5ओल उयुँ ओगराँवनी ज़ गेलाई निताव पाप दाद सिउल गनिसिउनी हाइद ओज़ा येसु ख्रीसस अजम्‍बरी जुनील बान्‍या जैसिक्‍यो। 6परमेस्‍वरए गेलाई येसु ख्रीसस सिउनी सोचोइद स्‍वर्गत सिप ज़ राज्‍या चलैन्‍या जैद नैसिउ। 7आव भरी ते आव जुक ओखेमोत खर्क ज़ माखेम्‍न्‍या ओराज्‍याल ओल उयुँ गराँद ओज़ा येसु ख्रीसए ओक्‍याँत गेल्‍योदा ओदोव मागनिसिधुन्‍या ओदया सरैंःन्‍याए जूँनी ज़। 8परमेस्‍वरए ल्‍योदा जेयुँ जेसुहुबोए उयुँ गराँद बाँचैद नैचिउ। नो जे जेदोवनी माःक, परमेस्‍वरए अइज़ ओयाचिउ बरदान ची। 9गे गेदोवनी ताकिन ते सघ्योःसिन्‍या गेल्‍यो। 10गे ओल उसिर्जैसिउर ज़। नो उसिर्जैसिउ फरी ओज़ा येसु ख्रीसनी ज़। गेलाई उयुँलाव मिताव य़ेन दान्‍याए जूँनी ङ़ादा ज़ थ·रैद ओनैसिज़्‍याव।

येसु ख्रीसनी यहूदी मायहूदी तोबो ज़

11जे छुत जातलाव मिँर ङ़ादा अछतङ जेल्‍यो लिन्‍या तामेंःच्‍यो। जेलाई यहूदीराए भाःकिन ज़ ‘क्‍याल्‍न्‍या सरेस माजैसिउर’ लिद यासज़िम्‍चिज़्‍याव। खाली नो सरेस ते पाखाताव यहूदी चलन वाज़ लिज़्‍या। 12हो बेलाक साचो नोराए है यादाचिज़्‍याव मिताव ब जेल्‍यो। जे ङ़ादा ख्रीसकिन अछतङ, इस्राएलीरास ब मागनिसिउर, परमेस्‍वरए ओय़ाकालाव असिकल ब माल्‍योर, आव मानुवात बिनु परमेस्‍वरलावर काताए आस ब माल्‍योर जेल्‍यो। 13आज्‍याल ते जे येसु ख्रीसस सिप ज़ ताद जेले। जे ङ़ादा परमेस्‍वरकिन तादाङ ल्‍योरालाई येसु ख्रीसए उजिउ झाःद्याद उझी सोभोद ओयाचिउए जेलाई परमेस्‍वरए ल्‍योदा रैद नैचिउ।

14ख्रीसए गे यहूदी मायहूदीरालाई मासखैद ऩेभा जैज़्‍याव गेखार्लाव पाँलाई खेम्‍द्याद सखैद तोबोल ज़ थोम्‍सिक्‍यो। 15नो ऩेब्‍लोलाई थोम्‍द गेलाई ओल उमिनताव साःरो तक्‍याँ ज़ जैन्‍याए जूँनी उजिउ झाःद गेलाई मासखैज़्‍यावलाई उमिन सम़ैदिक्‍यो। नो गेलाई मासखैज़्‍याव पाँ पाखाताव मोसाए ओकानुनलाव सर्सिउ यहूदी चलनर ज़। 16ख्रीस क्रुसत तङ्गैसिद ओल उजिउ झाःद ओयासिउनी मिँ भरिरालाई या याल मासखैज़्‍यावलाई खेम्‍द्याद तोबो ज़ जैद परमेस्‍वरस यासखैज़्‍याव। 17ओल आव मानुवात हुद गे परमेस्‍वरस नजिक ल्‍यो यहूदीर स़ोनो जे परमेस्‍वरकिन तादाङ ल्‍यो छुत जातरालाई या याल सखैन्‍या पाँर यासथैक्यो।#यसै ५७:१९ 18ख्रीसए ल्‍योनी गे ऩेथोए तोबो छैंव पुरूस ज़ दैद परमेस्‍वर गेबाबुए ल्‍योल पसिउ गेदैज़्‍या।

19है जैद जे आज्‍याल ते परमेस्‍वरकिन तादाङावल गनिसिउर जेमाले। परमेस्‍वरए छैंव उमींरास तोबोल ब गनिसिद जेले, परमेस्‍वरए उझ़िमलावर ब ताद जेले। 20जे अगमबक्तार स़ोनो ओसाचीराए याथालिउ गज तर्त झाःसिउ मितावर ताद जेले। येसु ख्रीस फरी झ़िम अदैज़्‍याव गजलाव लुँ स्‍यासो लिज़्‍या। 21झ़िम भरी होए ओतर्त अदिद जे लुँए तर्त लुँ जोरैसिउ मितावर ताद प्रभुए छैंव उझ़िम जेतानाज़्या। 22ओलस तोबो ताद जे मनी छैंव पुरूसनी परमेस्‍वर लिन्‍या झ़िम जेतानाज़्‍या।

Currently Selected:

एफिसी 2: NKham

Highlight

Copy

Compare