ओसाचीर 14
14
आइकोनियनल येसुए ओपाँ ओथासो
1आइकोनियन सहरल मनी पावल स़ोनो बारनाबासनी यहूदीराए धर्मसास्त्र झ़िमल बाद परमेस्वरए ओपाँ निरासथैक चावस पलास्द निरायोए यहूदीर स़ोनो छुत जातलावर बनै कुधु ज़ नो पाँत यायुँ हुप्के। 2खाली माभैंःज़्याव यहूदीराए ते छुत जातलाव मिँरालाई मचैद, ‘नोनी निपाँ ताथैच्यो’ लिद यार्नाल झाःद याराएकेर। 3हितावत मनी नोनी नो सहरल कुधु पै लिद प्रभुए ओक्याँत ख्यासिद माछे·द ज़ ओपाँर यारासथैकिनी। परमेस्वरए मनी थैज़्यावराए यायुँल य़ालो ओपाँर साचो ज़ थ·रैद्यान्याए जूँनी पावल स़ोनो बारनाबासनी निक्याँनी अचम्बलाव य़ेनर सरेसर ब दाव उनिएज़्याव। 4है जैद नो सहरलाव मिँर ऩेभा ताकेर। तभा यहूदीराए ल्योदा यालिज़्याव, तभा पावल स़ोनो बारनाबासनी निल्योदा यालिज़्याव। 5छींनी नलाव छुत जातलाव मिँर स़ोनो यहूदीर याघेप्पारास तोबो बुद्धी कलैद नोनिलाई बीज्यात जैद लुँए झेःव यापैंज़्याव। 6नोनी था निदैवत ननी धोंःद लुकोनिया खन्दलाव लुस्त्रा स़ोनो दर्बी सहर जीदा बाकिनी। 7नल मनी परमेस्वरए ओपाँ यारासथैकिनी।
लुस्त्राल येसुए ओपाँ ओथासो
8लुस्त्राल तोबो मिँ जर्मननी ज़ उखँ सिउ च़ुसिद उलिज़्याव। नो मिँ खर्क ज़ ओमाबाधुज़्याव। 9पावलए नल मनी परमेस्वरए ओपाँ ओरासथैज़्याक नो मिँए बनै धिद ओथैज़्याव। पावलए नोलाई रँःद सगराँसिन्याए जूँनी उयुँ उहुप्ज़्याव मिताव रँःद, 10बनै चोइस, “नखँर पलास्द च्याँःसिन्के,” है ओदोव प़ाइँना नो मिँ थर च्याँःसिद आदा होदा लिके। 11नलाव माहोल्याराए पावलए ओदोव य़ेन रँःद अचम्ब ताद, लुकोनिया खामनी, “देवतार मिँ जैसिद गेल्योक ज़ याहुव ओल्यो,” है लिद क़िकेर। 12बारनाबासलाई ‘जिउस’ देवता है दोकेर, पावललाई परमेस्वरए ओपाँ सथैज़्याव मुख्या मिँ ओतावए ‘हर्मेस’ देवता है दोकेर। 13जिउस देवताए ओथान सहर लापक उलिज़्याव। है जैद नो देवताए उपुजारीए माहोल्यारास खैद, वासर जास्सिउ बहरर सहरलाव य़ामक रैद, नोनिलाई पुजा दाव पैंकेर।
14हाःत ज़ बारनाबास स़ोनो पावलनी ‘अइ ची याजैज़्याव ओल्यो’ लिन्या सैंद, हार मानिद निक्वार चीए चीए माहोल्याराए याखार्ल बाद, 15“काता जेजैसिज़्याव इताव? गिन मनी जे स्यासो मिँनी ज़ ची। गिन गिन्सथैचिज़्याव चाव पाँनी ते इताव माचाहिउ पुजा दान्यालाई ऱास्द, नाम नम स़ोनो नलाव लिज़्याव भरी जैज़्याव, जींदो परमेस्वरलाई मानिन्या लिज़्या।#प्रस २०:११; भज १४६:६ 16परमेस्वरए ङ़ादाकिन जे मिताव छुत जातलाव मिँरालाई जेमन लागिउदा बाव ओयाचिज़्याव। 17हैदी मनी ओललाई सरेस्न्या सरेसर प़ाइँलाई ज़ याएक्यो। जेल्योदा मनी दाइनो ताद नम सवाद्याद, ज़्यावर सपरीद्याचिज़्याव। जेचाहिज़्याव भरी जोरैद्याद जेफू तसी जैद्याद जेयुँर होलाँ जैद्याचिज़्याव,” है लिद, 18है निरादोज़्यावत मनी नो माहोल्यारालाई पुजा दान्यात धो वैंव ताकिनी।
19छींनी एन्तिओखिया स़ोनो आइकोनियनलाव यहूदीराए लुस्त्राल हुद नलाव माहोल्यारालाई मचैद, पावललाई लुँ लुँए झेःद लल्यातोरो जैद, ‘उसिउ ची ओल्यो’ लिद सहरकिन पाखाङ ख्याकेर। 20खाली नो सहरलाव येसुए ओपाँत बाज़्यावर पावलए ओल्योक गुरिगाँ यादुप्सिक, पावल सोद यास ज़ सहरदा बाके। हो पराःती बारनाबासस दर्बी सहरदा बाकिनी।
सिरियालाव एन्तिओखियादा निओलो
21पावल स़ोनो बारनाबासनी दर्बील मनी चाव था सथैद येसुए ओपाँत हुन्यार कुधु ज़ याराजैकिनी। नकिन फरी ओल्द लुस्त्रा स़ोनो आइकोनियन सहरलाव घ्याँ पिसिदिया खन्दलाव एन्तिओखियादा बाद, 22नलाव, परमेस्वरए ओपाँत हुवरालाई, “परमेस्वरए ओपाँ ताऱास्च्यो,” लिद यायुँर सझेंःद्याद, “परमेस्वरए ओराज्याल कुधु दुखर सहिद वाज़ केस्न्या गेले,” लिद यारासम्जैकिनी। 23सु सु यामन्दलील सेवा चलैन्या स़ेरर खतैद्याद नोराए जूँनी उपासिद पोंखारिद यायुँ यासुहुबो परमेस्वरए ओपासल याराझाःकिनी। 24नकिन पिसिदिया खन्दलाव घ्याँ बाद पामफिलिया खन्दल केस्किनी। 25नल पर्गा सहरल बाद फरी ब परमेस्वरए ओपाँ यारासथैकिनी। ननी पुलुस्द अतालिया सहरल बाकिनी।
26नकिन फरी ऱी जहाजल पसिद सिरिया खन्दलाव एन्तिओखियादा बाकिनी। ङ़ादा नो एन्तिओखियानी ज़ नोनिलाई परमेस्वरए ओपाँ सथैन्याए जूँनी नलाव यायुँ हुबोराए परमेस्वरए ओपासल झाःद परींद यारानैज़्याव। है जैद नो य़ेन सयो·द नल ज़ ओल्किनी।#ओसा १३:२-३ 27पावल स़ोनो बारनाबासनी नल निकेसो प़ाइँना मन्दलीलाव मिँरालाई दुप्द परमेस्वरए नीस ओदोव य़ेन भरी है यारादोकिनी। “परमेस्वर गिनस गिनस बाद छुत जातलाव मिँरालाई पाला ओराज्याल पसिन्या येम फैद याएक्यो,” है लिन्या पाँर ब यारासथैकिनी। 28नोनी नो सहरल यायुँ हुबो निनैंरास कुधु पै लिकिनी।
Currently Selected:
ओसाचीर 14: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
