२ तिमोथी 4
4
आव य़ेन नँ ज़ दोव ताके
1ङा नँलाई परमेस्वरए ओङ़ाक स़ोनो सिउ मासिउराए यान्याय फाल्द ओराज्या चलैहुरिज़्याव येसु ख्रीसए ओङ़ाक है ङादींज़्या — 2परमेस्वरए ओपाँ सथैन्यात जो बेलाक तादी ब झाःसिद ज़ लिनी। नरापैक नर्च्या मासैःद नोरालाई सिङार्द तादी ब, सम्जैद तादी ब, चाव येमदा ज़ याघलैयो। 3छींनी मिँराए साचो पाँलाई मासहिधुन्या बेला ब हुरिज़्या। नोराए यामन लागिउ पाँ सथैन्या मिँर जोतोरो ज़ रैद होराए यापाँ वाज़ थैन्या लहर दान्या लेर। 4है जैद साचो पाँदा यार्ना सूइद, माचाहिउ घर्ती बिन्ती मिताव पाँरादा यायुँ जैन्या लेर। 5नँ भन्या प़ाइँल नतहस लिद, दुख सहिद, चाव था फींजैद, नखतिउ य़ेनलाई सयो·के।
6ङा ते आव संसारनी बान्या बेला हुके। ङा ङापोहोन झाःद्यान्या सुरू ज़ ताद ले। 7सिपाईं मिताव लऱिद ङार्सा भरी झाःद, दाँजिसिन्या भरी खेम्द, ङायुँ हुबोलाई जोगोइद ङानैके। 8धर्मीराए यादैज़्याव इनाम ङा ङाजुँ ब स्वर्गत नैसिउ लिज़्या। मिँरालाई ओराफाल्रिज़्याव छ्याम न्यायस फाल्ज़्याव गेप्रभुए ज़ ङालाई याँरिज़्याव। खाली ङालाई वाज़ माःक, ‘ख्रीस खर्क हुके’ लिद यायुँ थू जैद कींद नैज़्यावराए जूँनी ब लिज़्या।
आदा होदा लिन्या पाँर
9नँ ङाल्योदा चाँदो हुद ङास दैसिन्या धामा दोके। 10देमासए आव मानुवाताव पाँरादा उयुँ झाःद ङालाई ऱास्द थेसलोनिकेल बाके। क्रेसेन्स गलातियाल बाके, तीतस ब दलमातियाल बाके। 11ङास लूका वाज़ लिज़्या। नँ नहुकिन मर्कूसलाई मनी रैद हुनी। नो मिँ ङालाई सघैन्या ओचाहित ल्यो लिज़्या। 12तुखिकसलाई एफिससदा परींद ङानै। 13नँ नहुक त्रोआसल कार्पसए उझ़िमकाव ङाख्यानैव क्वा ब रैद याँयो। नधुकिन नलाव पोस्तोको भरी ब यारैयो। नमाधुकिन ङा ङासरो कागतर भन्या काचाबुल यारैयो।
14तोम्ता य़ेन दोज़्याव अलेक्जेन्दरए ङाय़ेन बनै बले·द्याँक्यो। नोलाई गेप्रभुए नो ओबले·ज़्याव य़ेननी ज़ सजा यान्या ले।#भज ६२:१२ 15नो मिँनी नँ ब जोगोइसिद लिनी। नोए आव गेरासथैज़्याव पाँलाई वैंन्यात बनै ओर्सा झाःज़्याव।
16उस॰कताव ङामुद्दाल सुए ज़ धुरिद मायाँकेर, प़ाइँए ज़ ऱास्नाकेर। परमेस्वरए नोरालाई नो यादोव गल्ती नैद तारायोक। 17नोराए याख्यानैनादी ब, परमेस्वरए ओपाँ माथैव छुत जातलाव मिँराए ङायाःनी घथैरक लिद प्रभुए हो छ्याम ङालाई धुरिद्याँक्यो। है जैद हो छ्यामकाव सिन्या मितावनी ब ङापुलुस्के। 18ओल प्रभुए ज़ ङालाई माचाव भरिनी जोगोइद स्वर्गताव ओराज्याल पाथस ज़ सकेस्न्या ले। नोए उमिन जुक जुक पै खर्क ज़ माखेम्न्या ज़गै मगैव ओताक। आमेन।
जेरो है दान्या पाँर
19प्रिस्किला, अकिलास स़ोनो ओनेसिफरसए उझ़िमलावरालाई जेरो है यादोयो। 20इरास्तस कोरिन्थल ज़ रहिके। त्रोफिमसलाई ते मिलेतसल ओजोरो उहुज़्याव ङाख्यानैके। 21नँ य़ुँदा ओमाहुद ङ़ादा ज़ हुन्या जोर दोयो। नँलाई युबुलसए जेरो है दींज़्याव। पुदेस, लिनस, क्लौदिया स़ोनो उपुर्काव दाज्यु भाइराए ब हैज़ दींज़्यार।
22प्रभु नँस बास ओदोवक, उयुँ नल्योदा ओय़ाल्क।
Currently Selected:
२ तिमोथी 4: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
