२ थेसलोनिकी 2
2
परमेस्वरकिन तँदा जैसिज़्याव
1अ गेनैं गेमेंर, गेप्रभु येसु ख्रीस फरी उहुक गे ओलस दुप्सिद सिप गेतारिज़्यावए जूँनी तोबो पाँ है गेदाचिज़्या। 2ख्वा ख्वाराए, ‘गेप्रभु येसु ख्रीस उहुन्या छ्याम ताधुके’ है लिज़्यार। नितावराए गे गेमिन कुद इताव चिथीर यापरींकिन स़ोनो जेल्योक हुद, ‘इताव पाँर परमेस्वरए उपुरूसनी ज़ गेदैके,’ है यालिदी ब नोराए यापाँ पतिद जेयुँ आँचा पाँचा ताजैच्यो। 3सुवाराए ल्योनी ब ताझुकिच्यो। मानुवा भरी परमेस्वरकिन तँदा जैसिद परमेस्वरए ओकानुन माभैंःज़्याव ऩुल्या मिँ ओमासरैंःसिवा पै नोकिन ङ़ादा गेप्रभु हुन्या माले। 4नो तँदा जैसिज़्यावए मानुवाताव मिँराए यामानिज़्याव देवताराकिन ओल ज़ सघ्योःसिद, परमेस्वरकिन ब स॰द ध्यान झ़िमल च़ुसिद, ‘परमेस्वर ङा ज़’ है लिन्या ले।#दान ११:३६; इज २८:२ 5जे जेमामेंःज़्याखेहो, आव पाँ भरी जेस ङालिज़्याक है दाव ज़ ङानैचिज़्याव। 6नो मिँ ओसरैंःसिन्या बेला ओमातावा पै नोलाई वैंद नैज़्याव ‘आवए ज़’ लिन्या ब जेसैंज़्या। 7खाली नो वैंज़्यावए येम ओमाऱासा पै नो मिँ माहुधुइ। परमेस्वरकिन तँदाङाव य़ेन ते आज्याल ब उजींल उजींल ताव ज़ लिज़्या। 8येम ओऱासोत वाज़ बल्ल नो परमेस्वरए ओकानुन माभैंःद तँदा जैसिज़्याव मिँ रैंःन्या ले। नोलाई गेप्रभु येसु ओज़गैस ओसरैंःसिहुक उस॰ ह्वास ओजैव प़ाइँना ज़ नो मिँ होक ज़ सिद उमिन ज़ म़ान्या ले।#यसै ११:४ 9नो मिँए ओय़ेन भरी सैताननिकाव ओतावए सैतानए ओसक्ती रैद अचम्बलाव य़ेनर चेतकर ब सतैंहुरिज़्याव। 10नर्गलाव येमदा बाज़्यावराए परमेस्वरए साचो ओपाँलाई माभैंःद बाँचैन्या येमलाई यासोवए नो मिँए ओछलनी प़ाइँ किसिमलाव धुतर पले·द याझुकैरिज़्याव। 11है जैद परमेस्वरए मनी ‘निताव धुत पाँलाई ज़ घपतिज़्यारक ते’ लिद मुन्दुक्यासो तान्या सराप ब याएरिज़्याव। 12साचो पाँलाई यायुँ माहुप्द मादान्या य़ेनदा यायुँ थू जैज़्याव भरी ननी ज़ परमेस्वरए ओसजाल परिन्या लेर।
परमेस्वरए ल्योदा बान्या छाँतिसिउर
13अ प्रभुए उयुँलाव मिताव गेनैं गेमेंर, जेजूँनी गे एकतार परमेस्वरलाई धन्याबाद चरैःव परिज़्या, काराव ल्यो ताकिन परमेस्वरए साचो ओपाँत जेयुँ जेसुहुप्ज़्याव स़ोनो छैंव पुरूसए जेलाई छैंवर ओजैचिउनी जेलाई ङ़ादाकिन ज़ अजम्बरी जुनी ओलस ज़ दैन्या छाँतिद नैचिउ। 14हो येमल बान्याए जूँनी ज़ गे गेसथैचिज़्याव चाव थानी परमेस्वरए जेलाई खुल्द नैचिउ। ननी ज़ गेप्रभु येसु ख्रीसए ओज़गै जे ब जेदैरिज़्या। 15है जैद गेनैं गेमेंर, जे गेल्योनी जेपैसिउ भरी, गेयाःनी तादी ब, सर्सिउ चिथीनी तादी ब जात्त ज़ माऱास्द नत ज़ थ॰रिद लिच्यो।
16-17गेप्रभु येसु ख्रीस स़ोनो गेबाबु परमेस्वरए जेलाई चाव जेय़ेन, चाव जेपाँ भरिल जेयुँर होलाँ जैद्याद थ॰रिउ युँ ब जैद ओयाचिउक। गेबाबुए गेल्योदा उयुँ थू जैद उयुँ ओगराँवनी ज़ गेलाई अजम्बरी जुनीए आस याद गेयुँ सझेंःद्यासिक्यो।
Currently Selected:
२ थेसलोनिकी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
