१ तिमोथी 4
4
धुत पाँर पैन्या लेर
1परमेस्वरए उपुरूसए छर्लङ्ग ज़ है लिज़्या, छींनीकाव हुन्या बेलाक ख्वा मिँराए परमेस्वरए ओपाँ ऱास्द सैतान स़ोनो झुकैज़्याव पुरूसराए यारापैज़्याव पाँदा ज़ बान्या लेर। 2निताव पाँर पाजीराए याछलनी ज़ रा·सिन्या ले। नोराए, ‘धुतनी गेरापैज़्या’ लिन्या सैंज़्यावत ब यायुँ ऱाव झँए दामिसिउ मिताव लातासो तान्या ले। 3नोराए, ‘बिह्या ब दान्या माताए, ख्वा ख्वा ज़्यावर ब ज़्यान्या माताए’ है लिद यारापैरिज़्यार। जे ते जेसैंज़्या, नो भरी परमेस्वरए गे साचो ओपाँर सैंद गेयुँ हुबोरालाई खुसीस ज़्यान्या जैद नैद्यासिउ। 4परमेस्वरए ओजैव भरी चाव ज़ लिज़्या। जो ज़्याव ब, ‘आव परमेस्वरनी हुव ज़’ लिद धन्याबाद चरैःद खुसीस गेज़्युकिन माज़्यान्या काता ज़ माले। 5परमेस्वरए ओपाँत युँ हुप्द पोंखारिकिन प़ाइँ चोखो ज़ ताज़्या।
धुत पाँलाई वैंद साचो पाँ सथैन्या
6आव पाँ भरी परमेस्वरए ओपाँत हुवरालाई चावस नरासम्जैकिन येसु ख्रीसए चाव ओनोकोर थ॰रिन्या नले, स़ोनो ङ़ादाकिन ज़ नदोहुज़्याव नयुँ हुबो साचो परमेस्वरए ओपाँनी नबुद्धी ब झन ज़ छिप्नान्या ले। 7नलाव मिँराए याझाःज़्याव उर्ती माल्यो घर्ती बिन्तीर ताथैयो। बुरू नँ परमेस्वरए उयुँलाव मिताव छैंव युँ जैन्यादा उहिल हाइके। 8क्याँए जूँनी उहिल हाइज़्याव देखा युँल परमेस्वरए उयुँलाव मितावदा उहिल हाइन्या बनै ओचाहित ल्यो लिज़्या। नोए ओफाइदा आव जुनील ब ताज़्या, अजम्बरी जुनील ब ताज़्या। 9आव पाँ थ॰रिउ, युँ हुप्न्याकाव पाँ ज़ लिज़्या। 10नो फाइदाए जूँनी ज़ परमेस्वरए ओय़ेनत कलँ लिद धामा गेदोज़्या, काराव ल्यो ताकिन गेआस जींदो परमेस्वरए ल्योदा ज़ लिज़्या। नोए ज़ प़ाइँ मिँरालाई, खास ते यायुँ हुबोरालाई याबाँचैज़्याव।
11है जैद नँ आव पाँरानी ज़ पैद याअऱैयो। 12नरापैक सुवाराए, ‘इताव भर्ज़ाकावए ओपाँ काता थैन्या’ लिद हेला रँःन्या स्यासो तातानी। बुरू नँ नपाँ, नचाल चलन, नमया स़ोनो नयुँ हुप्द छैंव युँस नदोज़्यावनी यायुँ हुबो प़ाइँराए उसिऊसिरक। 13ङा ङामाहुवा पै मन्दलीलावरालाई धर्मसास्त्र प़रिद्याद यायुँ सझेंःद्याद यापैयो। 14ङ़ादा मन्दलीलाव स़ेरराए नक्याँत याकुइ नैद परमेस्वरए उपुरूसनी यापाँज़्याक नदैव बरदानलाई माऱास्द दाव य़ेन ज़ दोयो। 15आव प़ाइँ पाँत नयुँ थू जैद दाव ज़ नैयो। हो ताकिन ची नँ खा ङ़ादा नबाज़्याव नक्याँत झन ज़ रैंःन्या ले। 16नक्याँए जूँनी स़ोनो नरापैज़्याव पाँलाई ब जाँचिद जोगोइसिद दोयो। इतावदा धामा नदोकिन अजम्बरी जुनील नँ ब नतारिज़्या, नपाँ थैज़्यावर मनी नल ज़ तारिज़्यार।
Currently Selected:
१ तिमोथी 4: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
