१ कोरिन्थी 2
2
किताव ओल्यो हिताव ज़ ङासथैचिउ
1ङानैं ङामेंर, ङा ङ़ादा जेल्योङ ङाहुव बेलाक परमेस्वरए म़ोंसिउलाव ओपाँ ङासथैचिज़्याक बनै सैंन्या मिँराए यापाँ मोहोन्यालो जैद यापाँज़्याव मितावनी ङामापाँए। 2बुरू जेल्योङ माहुद ज़ येसु ख्रीसए उमिन स़ोनो क्रुसत उजिउ झाःद ओयासिउए जूँनी वाज़ ङारापैया है ङालिज़्याव। 3झन जेल्योङ ङाहुक ते ङासक्तीर माल्यो ताद छे·व ज़ ङालिके। 4-5है जैद जेयुँ मिँराए याबुद्धीनी हुव पाँत ताहुप्क, परमेस्वरए ओसक्तीलाव थ॰रिउ पाँत वाज़ ओताक लिद ङा जेलाई परमेस्वरए ओपाँर ङासथैचिक मिँराए याबुद्धीनी यारामोहोनैज़्याव मितावनी ङासथैचिउ माःक। बुरू नो ङापाँत परमेस्वरए उपुरूस स़ोनो ओसक्ती ओरैंःवनी वाज़ ङासथैचिउ।
परमेस्वरए उपुरूसनिकाव चाव बुद्धी
6हितावत ब परमेस्वरए ओपाँत पाखो तावरालाई अचम्बलाव बिचारनी हुव पाँर ब ङारासथैज़्या। खाली नो पाँर आव जुकलाव बुद्धीनी ब माःक, खेम्द बान्या घेप्पाराए यागहकनी ब माःक। 7गे गेरासथैज़्याव परमेस्वरए ओपाँ ते बनै उबुद्धी ल्यो आःपै सुए ज़ यामाथ·रैताव कप्सिउ मिताव ज़ उलिज़्याव। खाली ओल परमेस्वरए ज़ नो पाँनी गेलाई ओज़गै मगैल लाँन्याए जूँनी नाम नम ओमाजैदकिन ज़ आव बेलाए जूँनी ज़ गोइँद ओनैज़्याव। 8आव जुकलाव घेप्पाराए परमेस्वरए ओगोइँनी ओदोव य़ेन झन माथ·रैधुकेर। थ·रैद यासैंव ताकिन ज़गै मगैव गेप्रभुलाई क्रुसत मासैःखेरहो।
9है जैद गे गेरासथैज़्याव पाँए उजूँनी धर्मसास्त्रल इताव सर्सिउ लिज़्या,
“परमेस्वरए ओललाई मया दाज़्यावरालाई
सुए ज़ यामारँःताव,
सुए ज़ यामाथैताव,
सुए ज़ यामासैंताव पाँर सतैंद याएरिज़्याव।”#यसै ६४:४
10नो पाँर फरी परमेस्वरए ओल उपुरूसए ज़ सतैंद्यासिक्यो। होए वाज़ पाँ भरी सैंज़्याव, परमेस्वरए उयुँलाव पाँर ब सैंज़्याव। 11गे मिँर ब गेक्याँताव पुरूसए वाज़ गेयुँलाव पाँ भरी सैंज़्याव। हिताव ज़ परमेस्वरए उयुँलाव ओपाँर ब ओल उपुरूसए वाज़ सैंज़्याव, छुतराए मासैंधुर। 12गेलाई ओल परमेस्वरए ओयासिउ बरदानर सैंव परींन्याए जूँनी उपुरूस याद नैसिउ। नो पुरूस आव मानुवाताव बुद्धी स्यासोनी माःक, परमेस्वरनी हुव ज़ लिज़्या। 13है जैद गेरासथैज़्याव भरी मिँए बुद्धीनी हुव माःक, परमेस्वरए उपुरूसए ओपैसिज़्याव वाज़ गेपाँज़्या। परमेस्वरए ओपाँ ते परमेस्वरए उपुरूसनी वाज़ पलास्सिज़्या। 14परमेस्वरए उपुरूस माल्यो मिँए परमेस्वरए उपुरूसनिकाव हुव पाँ माभैंःए। नोलाई ओअर्थ माल्यो पाँ मिताव ज़ लिज़्या। नो पाँर परमेस्वरए उपुरूसनी वाज़ सैंन्या ओतावए माबुझिधुव। 15परमेस्वरए उपुरूस दैव मिँए ते पाँ भरी थ·रैधुज़्याव। छुतराए ते नोए ओपाँलाई माथ·रैधुर। 16धर्मसास्त्रल ब इताव सर्सिउ लिज़्या,
“परमेस्वरए उयुँलाव पाँलाई थ·रैद,
ओललाई पैधुज़्याव सु ची उलिज़्याव?”#यसै ४०:१३
खाली गे ते ख्रीसए उयुँलाव पाँ दैवर गेलिज़्या।
Currently Selected:
१ कोरिन्थी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
