१ कोरिन्थी 11
11
1किताव ङा ख्रीसए ओदोज़्याव मिताव ङादोज़्या, हिताव ज़ जे ब ङा ङादोज़्याव मिताव दोच्यो।
परमेस्वरए ओसेवा तहस दान्या
2जे ङालाई प़ाइँनी प़ाइँनी जेचेतैनाज़्याव स़ोनो ङापैचिउ पाँर माऱास्द जेदोज़्यावए धन्याकावर है ङादाचिज़्या। 3हैदी ब फरी तोबो पाँ ङासम्जैचिज़्या। खेपा भरिए गेङ़ै ख्रीस लिज़्या, मेंमा भरिए याङ़ै खेपा लिज़्या, ख्रीसए ओङ़ै परमेस्वर लिज़्या। 4है जैद खेपाए ओङ़ै कप्द परमेस्वरलाई ओपोंखारिकिन, परमेस्वरए ओपाँ ओरासथैकिन, नो मिँए ओङ़ैलाई बीज्यात जैज़्याव। 5हिताव ज़ फरी मेंमाए ओङ़ै माकप्द ओपोंखारिकिन, परमेस्वरए ओपाँ ओरासथैकिन, नोए ओरेए ओमान नैद ओमायोए ओचेम एन्द ओख्याव मिताव लिज़्या। 6है जैद मेंमाए ओङ़ै माकप्द ज़ ओपोंखारिकिन, नोए ओचेम एन्द ओख्यादी ब ताए। खाली मेंमाए ओचेम ख्यान्या लाज हुव ओतावए बुरू ओङ़ै कप्द परमेस्वरलाई ओपोंखारिउक। 7खेपा फरी परमेस्वरए उसुरूप स़ोनो उसिङार ओतावए परमेस्वरए ओपाँ ओरासथैक नोए ओङ़ै ताकबोक। मेंमा फरी खेपाए ओसोभा ज़।#उत १:२६-२७ 8खेपा मेंमानी सिर्जैसिउ माःक, मेंमा खेपानी सिर्जैसिउ ची। 9स़ोनो परमेस्वरए खेपालाई मेंमाए उजूँनी ओजैव माःक, मेंमालाई खेपाए उजूँनी ओजैव ची।#उत २:१८-२३ 10है जैद परमेस्वरए ओचाकर्याराए ङ़ाक मेंमाए, “ङारेए ओपाँ धूँल ङालिज़्या” लिन्या सतैंन्याए जूँनी ओङ़ै ओकबोक। 11हैदी ब प्रभुए ओङ़ाक खेपा ओमातावा मेंमा माताए, मेंमा ओमाताव खेपा माताए। 12काराव ल्यो ताकिन स्रिस्तील मेंमा खेपानी ताव ज़, हाःकिन खेपा भरी नो मेंमानी ज़ ताज़्यार। हैदी ब गे भरी प़ाइँ परमेस्वरनी ज़ गेसिर्जिज़्या। 13मेंमाए ओङ़ै माकप्द परमेस्वरलाई ओपोंखारिकिन नो किताव जेङम्सिज़्या? जे ज़ सैंच्यो। 14किताव खेपाए ओचेम बनै ख्यो·व ओनैकिन लाज हुव लिज़्या लिन्या सुए ज़ है यामादाचिदी ब जेनी ज़ जेसैंज़्या, 15हिताव ज़ मेंमाए ओचेम ख्यो·व ओनैकिन नोलाई ओसोभा हुव लिज़्या लिन्या ब जेसैंज़्या। नो ओचेम ओङ़ैलाई कप्न्याए जूँनी यासिउ लिज़्या। 16खाली आव ङापाँर थैद सुवाराए माभैंःद खर्लेसिउ यापैंकिन गे स़ोनो परमेस्वरए ओमन्दलीरास आव चलन वाज़ लिज़्या है ङारादोज़्या।
प्रभु-भोज
17आव तोबो पाँल ते ङा जेलाई ङामासर्मैचिधुइ, काराव ल्यो ताकिन जे परमेस्वरए उमिनत जेदुप्सिक सु ज़ माबनिद झन ज़ जेबलेस्नाके। 18प़ाइँरानी जेलाई बले·ज़्याव पाँ आव ज़ लिज़्या, जे मन्दलील जेदुप्सिक माखैद ख्वा तँदा भेलेते ख्वा तँदा भेलेते जेजैसिज़्या दी लिन्या ङाथैज़्या। नो साचो मनी ताखेहो है ङालिज़्या। 19जे जेखार्ल साचो मिँ सरेस्न्याए जूँनी निताव खर्लेसिन्या ब ताज़्याखेहो! 20है जैद जे प्रभु-भोजल जेदुप्सिक प्रभुए उजूँनी ते साचो मारैंःके। 21झन सु सु जेज़्याव रैद ज़्युना जेहुव मिताव जैद नैंलाई ब माकींद ङ़ादा ज़ कार्लानी कुर्लु जेखेम्ज़्या। है जैद ख्वार ते करे ज़ जेताज़्या, ख्वार ते ज़्याद ओद मँःद लोलोतोःव ब जेताज़्या। 22काता, निताव ज़्यान्या ओन्या पो जेझ़िमक ओमालिज़्याव रो? सैं परमेस्वरए ओमन्दलीलाई सोद माथैंव मायो·वरालाई लाज मोर्नो जैना जेहुज़्याव रो? जे मितावरालाई ङा कै दान्या ओताव? कातानी ची जेलाई धन्याकावर है दान्या? इतावनी जेलाई धन्याकावर है ङामादाचिधुइ।
23आव पाँए उजूँनी गेप्रभुए ल्योनी किताव ङादैव, हिताव ज़ जेलाई ब ङायाचिके। गेप्रभु येसु ओक्योःसिज़्याव छ्याम रील प्रभुए भरेस उकुइत रैद, 24धन्याबाद चरैःद नो भरेसलाई केःद, “आव भरेस जेजूँनी झाःद ङायाचिरिज़्याव ङाक्याँ ज़। आकिनी जेजूँनी दाद ङायाचिउ य़ेन मामेंःन्याए जूँनी इताव ज़ दोच्यो,” है यादोक्यो। 25नकिन नो भरेस याज़्युवत गेप्रभुए फरी खुरी उकुइत रैद, “आव ङाझी ज़। आनी ज़ परमेस्वरए जेस साःरो बाचा नैद्याचिरिज़्याव।#प्रस २४:६-८; यर ३१:३१-३४ है जैद आव खुरीनी जेओक जेजूँनी दाद ङायाचिउ य़ेन तामेंःच्यो,” है यादोक्यो।
26जे नो भरेस जेज़्युक स़ोनो खुरीनी जेओक गेप्रभु फरी स्वर्गनी ओमाहुवा पै ज़ गेप्रभुए उजिउ झाःद ओयासिउ लिन्या जेसतैंज़्या। 27है जैद जोए प्रभु-भोजल प्रभुए उगुन माचेतैद बिनु सोर उज़्युकिन ओओकिन, नो मिँए प्रभुए ओक्याँ उझीलाई बीज्यात ओजैवनी ओखत ल्यो थ॰रिज़्या। 28है जैद जे सु सु जेयुँलाई जाँचिद वाज़ नो भरेस ज़्युच्यो स़ोनो खुरीनी ओच्यो। 29जोए प्रभुए ओक्याँताव य़ाकार माथ·रैद नो भोज उज़्युकिन ओओकिन, नो मिँए ओक्याँत सजा रैज़्याव। 30ननी ज़ जेखार्ल कुधु याजोरो हुव रूगीर लिज़्यार, ख्वार ते सिधुकेर। 31बुरू गेक्याँलाई गे ज़ गेजाँचिकिन परमेस्वरए गेलाई ओजाँचिसिक निताव सजा यान्या माले। 32खाली परमेस्वरए ल्योनी सजार गेदैक गेलाई ओलकिन तँदा लिज़्यावरास नास तातारक लिद गेजूँनी ज़ म·लैसिज़्याव।
33है जैद ङानैं ङामेंर, प्रभु-भोजल जेदुप्सिक प़ाइँ जेमादुमा पै कींसिच्यो। 34फरी सव़ाँसिन्याए जूँनी जेहुज़्याव ताकिन सु सु जेझ़िमक जेकरे सैःद हुच्यो, म़ानी नो सजाल परिन्या जेले।
उपुर्काव पाँर ङा ङाहुवत वाज़ है दान्या ङाले।
Currently Selected:
१ कोरिन्थी 11: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
