၄ မိ 17
17
17
စအၫရၧၫ့အနိၪထိၭဘီၩ့.
1-2ယဟိဝၩချဲၩ့ဆၧလၧစမိစ့ၭတၭစံၭဝ့ၫဒၪ, ချဲၩ့ဆၧ လၧၦအံၫစရ့လၭဖိၪတၭ, မၩန့နိၪထိၭဘီၩ့ လၧလဂၩ လဘီၩ့, လဂၩလဘီၩ့ဘဲၫအဖါလဖၪအဂံၪ့အၥိၭ, အၦ ဒိၪလဖၪထီးအလူၬ ဘဲၫအဝ့ၫၥံၪအဖါလဖၪ အဂံၪ့အ ၥိၭ, နိၪထိၭဘီၩ့လဆံၫနံၫဘီၩ့နီၪဆံၭ. ကွ့ၭလဂၩအမံၩ့ လဂၩအမံၩ့ လၧအနိၪထိၭဘီၩ့ဒၪဝ့ၫအလီၩ့နီၪဆံၭ. 3တၭလၧလံဝဲၫအနိၪထိၭဘီၩ့အလီၩ့နီၪ နဘၪကွ့ၭစအၫ ရၧၫ့အမံၩ့လီၫ. အဂဲးဘဲၫယီၩ နိၪထိၭဘီၩ့လဘီၩ့နီၪ 4မိအီၪလၧအဖါၥံၪ အဂံၪ့အခိၪအဂးလီၫ.- တၭနဘၪ အီၪက့ၪလၩ့ဆၧလဖၪနီၪ လၧဆၧအီၪကီၪ့အတဲၩဆံၫ့ ဎံၪအဖၧၩ့ လၧဆၧအုၩ့လၩ့အမ့ၬယၫ, ထီးဒၪအလး 5လၧယမိဂဲၫဒၪလိၬယၥၭ လၧနၥံၪနီၪလီၫ.- တၭဆၧမိ မၩအၥၭလၧၦလၧယရွံန့လဂၩ အနိၪထိၭဘီၩ့နီၪ မိဖီၫ ထၪ့, ဘဲၫၥိၭၦအံၫစရ့လၭဖိၪ အဆၧၥူၭဝံၪၥူၭလၩလၧ ယလီၩ့လၧအၥူၭဝံၪၥူၭလၩ လၧနၥံၪအလီၩ့အကၠီၩ့နီၪ ယမိဒုၭထုၬဝ့ၫဒၪလီၫ.
6စမိစ့ၭချဲၩ့ဆၧလၧၦအံၫစရ့လၭဖိၪတၭ, ကယဲအၦ ဒိၪလဖၪဖ့ၪလၫ့အဝ့ၫ လၧနိၪထိၭဘီၩ့, ၦဒိၪလဂၩလ ဘီၩ့လဂၩလဘီၩ့, ကိၭဂၩဒ့ၭ, ဘဲၫအဖါၥံၪအဂံၪ့ခိၪ အၥိၭနီၪ, နိၪထိၭဘီၩ့ လဆံၫနံၫဘီၩ့လီၫ. စအၫရၧၫ့ အနိၪထိၭဘီၩ့နီၪ အီၪဝ့ၫလၧနိၪထိၭဘီၩ့လဖၪ အကျၩ 7လီၫ.- တၭစမိစ့ၭ အီၪက့ၪနိၪထိၭဘီၩ့လဖၪ လၧဆၧ အုၩ့လၩ့အတဲၩဆံၫ့ဎံၪအဖၧၩ့ လၧယဟိဝၩ အမ့ၬယၫ 8လီၫ.- တၭဆၧမၩအၥၭ လၧဆၧဖၩ့ထၪ့လနံၩနီၪစမိစ့ၭ လ့ၩနုၬလၧဆၧအုၩ့လၩ့ အတဲၩဆံၫ့ဎံၪအဖၧၩ့တၭ, ယိ ခွါ, စအၫရၧၫ့အနိၪထိၭဘီၩ့ လၧလံဝဲၫအဂံၪ့အဂးလ ဘီၩ့နီၪဒိၭထၪ့ဝ့ၫယူၭ, ဒဲထိထၪ့ယူၭဖီၫထၪ့ယူၭ, ဒဲၥၪ 9ထၪ့ယူၭ ၡကၭၥၪနီၪလီၫ.- တၭစမိစ့ၭဂဲၫဆိၬထၪ့ခွံၬ နိၪထိၭဘီၩ့ထီးအလူၬ လၧအအီၪလၧယဟိဝၩအမ့ၬ ယၫနီၪ ဖိးလၧၦအံၫစရ့လၭဖိၪအအီၪတၭ, အဝ့ၫၥံၪ ယိဝ့ၫတၭ, မၩန့ဝ့ၫလဂၩအနိၪထိၭဘီၩ့ဒၪဝ့ၫ, လဂၩ အနိၪထိၭဘီၩ့ဒၪဝ့ၫလီၫ.
10တၭယဟိဝၩ စံၭစမိစ့ၭ, ဂဲၫဆိၬထၪ့ဒီၭ စအၫရၧၫ့ အနိၪထိၭဘီၩ့လၧဆၧအုၩ့လၩ့အမ့ၬယၫ, ဘဲၫၥိၭဆၧ မိအီၪက့ၪထၬဝ့ၫ လၧဆၧမၩနဲၪ့လၧအထၫ့ဒၩ ၦပိၩ့ထၪ့ ဆၧလဖၪနီၪဆံၭ. တၭနဘၪဒုၭလၩ့မါခွံၬ အဝ့ၫၥံၪအ ဆၧၥူၭဝံၪၥူၭလၩ လၧယလီၩ့ဘဲၫၥိၭအထီးၥံၫလဂ့ၩ. 11တၭစမိစ့ၭမၩဝ့ၫ, ဘဲၫယဟိဝၩမၪလူၬဝ့ၫအၥိၭနီၪ, မၩ ဝ့ၫဘဲၫနီၪၥိၭဆ့လီၫ.
12ၦအံၫစရ့လၭဖိၪချဲၩ့ဒုၪ့စမိစ့ၭတၭ, စံၭဝ့ၫဒၪ,ယိခွါ, 13ပၥံၫ, ပဂၭဂီၩ့,ပဘၪဆၧဂၭဂီၩ့ကိၭဂၩဒ့ၭလီၫ.- ၦလၧ အလ့ၩဘူၭလၧယဟိဝၩ အတဲၩဆံၫ့ဎံၪကိၭဂၩဒ့ၭနီၪ, မိၥံၫတၭး မွဲပမိလူၬလၧဆၧၥံၫအကၠီၩ့နီၪဆ့ဧၪ.
Currently Selected:
၄ မိ 17: pwokyn2
Highlight
Copy
Compare
Share
Want to have your highlights saved across all your devices? Sign up or sign in
Pwo Kayin Bible © Bible Society of Myanmar, 1883.
