စံးထီၣ်ပတြၢၤ 80
80
တၢ်ထုကဖၣ်လၢပှၤကလုာ် အတၢ်ဆီလီၤကဒါက့ၤသးအဂီၢ်
1အံၣ်စရ့လးအပှၤကွၢ်သိဧၢ, ဒိကနၣ်ပှၤတက့ၢ်.
နဲဒၣ်ပှၤလၢအဆှၢယိၤသးဒ်သိတဖုအသိး,
လၢအဆ့ၣ်နီၤကဲစီၤပၤလၢ ခ့ရူာ်တဖၣ်အဘၢၣ်စၢၤတဂၤဧၢ,
2လီၣ်ဖျါထီၣ်နသးလၢအ့ဖရဲၣ်, ဘံၣ်ယၤမံၣ်ဒီးမနၤၡ့ၤအဒူၣ်တဖၣ်
အမဲာ်ညါဧၢ, န့ၣ်တက့ၢ်.
ထိၣ်ဂဲၤထီၣ်နဂံၢ်နဘါဒီး
ဟဲအုၣ်က့ၤခီၣ်က့ၤပှၤတက့ၢ်.
3ကစၢ်ယွၤဧၢ, ဒုးဟဲက့ၤပှၤ, ဒုးနဲၣ်ပှၤလၢနတၢ်သးကညီၤ,
ဒီးပကဘၣ်တၢ်အုၣ်က့ၤခီၣ်က့ၤပှၤလီၤ.
4ယွၤသ့တၢ်လၢာ်အကစၢ်ယွၤဧၢ,
မ့ၢ်နကသးထီၣ်နပှၤဂီၢ်မုၢ်
အတၢ်ထုကဖၣ်န့ၣ်ဆံးယံာ်လဲၣ်.
5နဒုးအီၣ်တ့ၢ်လံပှၤလၢမဲာ်ထံအကိၣ်,
ဒီးနဒုးအီပှၤလၢမဲာ်ထံလၢလီခီဖးဒိၣ်န့ၣ်လီၤ.
6နပာ်ပှၤလၢတၢ်အ့ၣ်လိာ်ဆိးက့လိာ်အလီၢ်
လၢပှၤလၢပဃၢၤ,
ဒီးပဒုၣ်ပဒါနံၤဘၣ်ပှၤလၢအကျါဒၣ်ဝဲန့ၣ်လီၤ.
7သ့တၢ်လၢာ်အကစၢ်ယွၤဧၢ, ဒုးဟဲက့ၤပှၤ,
ဒုးထံၣ်ပှၤလၢနတၢ်သးကညီၤ,
ဒီးပကဘၣ်တၢ်အုၣ်က့ၤခီၣ်က့ၤပှၤလီၤ.
8နဟဲစိာ်စပံးအမုၢ်တမုၢ်လၢကီၢ်အဲၤကူပတူးအပူၤ,
နဟီထီၣ်ကွံာ်ပှၤကလုာ်တဖၣ်ဒီး
သူၣ်လီၤစပံးမုၢ်အံၤလၢအဝဲသ့ၣ်အကီၢ်ပူၤလီၤ.
9နမၤပျီတၢ်လီၢ်လၢအဂီၢ်, ဒီးစဲၤလီၤဝဲအဂံၢ်,
ဒီးမၤပှဲၤထံဧိၤကီၢ်ဧိၤလီၤ.
10အဝဲဒၣ်မၤပှဲၤတၢ်လူၢ်တဖၣ်ဒီး အကဒုဒီးအဒ့တဖၣ်
လီၤကဒုဘၣ်သ့ၣ်ဆှိုအ့ရ့းဖးဒိၣ်တဖၣ်လီၤ.
11ယူာ်ဃီၤအဒ့တဖၣ်ဆူပီၣ်လဲၣ်ဖးဒိၣ်မဲးဒံး ထၢၣ်ရ့နယၢၣ်, ဒီးယံၤဝဲတုၤဆူ ထံကျိဖရၤသးန့ၣ်လီၤ.
12ဘၣ်မနုၤလၢနမၤဟးဂီၤကရၢၢ်လၢအအိၣ်ဝးတရံး အီၤန့ၣ်လီၤ.
ခဲအံၤပှၤလၢအလဲၤခီဂာ်တၢ်တဂၤလၢ်လၢ်ဟုၣ်အစပံးသၣ်တဖၣ် သ့ဝဲလီၤ.
13ထိးမံၤတဖၣ်ယီၢ်တံၢ်လီၤအီၤ
ဒီးတၢ်မံၤလာ်တဖၣ်အီၣ်တၢ်ဖဲန့ၣ်လီၤ.
14သ့တၢ်လၢာ်အကစၢ်ယွၤဧၢ, ဃၣ်နသးဆူပအိၣ်တက့ၢ်.
ကွၢ်လီၤလၢ်ပှၤလၢမူခိၣ်ဒီး
ဟဲအုၣ်က့ၤခီၣ်က့ၤနပှၤဂီၢ်မုၢ်တက့ၢ်.
15ဟဲဒီးအုၣ်က့ၤခီၣ်က့ၤ စပံးမုၢ်လၢ နသူၣ်လီၤတ့ၢ်အီၤ,
စပံးမုၢ်ဖိလၢနဒုးဒိၣ်ထီၣ်ဆူၣ်ထီၣ်အီၤအံၤတက့ၢ်.
16ပဒုၣ်ပဒါတဖၣ်ဒွဲၣ်ကွံာ်အီၤလၢမ့ၣ်အူ,
ကူာ်လီၤဃံၤကွံာ်အီၤလံ.
ကွၢ်အဝဲသ့ၣ်လၢတၢ်သးထီၣ်အပူၤဒီး
မၤဟးဂီၤကွံာ်အဝဲသ့ၣ်န့ၣ်တက့ၢ်.
17ပာ်မူဒီးကဟုဘံၣ်ကယာ်ဘၢ
ပှၤဂီၢ်မုၢ်လၢနဃုထၢတ့ၢ်လံအီၤ,
ပှၤကလုာ်လၢနမၤဆူၣ်ထီၣ်အဂံၢ်အဘါန့ၣ်တက့ၢ်.
18ပတဃၣ်ကွံာ်ပသးလၢနၤနီတဘျီလၢၤဘၣ်.
ပာ်မူပှၤဒီးပကစံးထီၣ်ပတြၢၤနၤလီၤ.
19ယွၤ, သ့တၢ်လၢာ်အကစၢ်ဧၢ,
ဒုးဟဲက့ၤပှၤတက့ၢ်.
ဒုးထံၣ်ပှၤလၢနတၢ်သးကညီၤ,
ဒီးပကဘၣ်တၢ်အုၣ်က့ၤခီၣ်က့ၤပှၤလီၤ.
Currently Selected:
စံးထီၣ်ပတြၢၤ 80: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
