လံာ်တၢ်ဘူၣ်ထီၣ်ဘါထီၣ် 25
25
တၢ်အိၣ်ဘှံးအနံၣ်
(သိၣ်သီ. ၁၅:၁-၁၁)
1ယွၤကတိၤတ့ၢ်တၢ်ဒီးစီၤမိၤၡ့လၢကစၢၢ်စံၤနါအလိၤဒီးမၤလိာ်အီၤ, 2လၢကဟ့ၣ်လီၤတၢ်သိၣ်တၢ်ဘျၢတဖၣ်ဆူအံၣ်စရ့လးအပှၤဂီၢ်မုၢ်ဒ်လၢ လာ်အံၤအသိးန့ၣ်လီၤ. တုၤသုလဲၤနုာ်လီၤဆူကီၢ်လၢယွၤဟ့ၣ်လီၤသုန့ၣ်, လၢသုတၢ်မၤလၤကပီၤယွၤအဂီၢ်လၢနွံနံၣ်တနံၣ်န့ၣ်သုကဘၣ်ဟးဆှဲးတၢ်သူၣ် လီၤဖျးလီၤတၢ်န့ၣ်လီၤ. 3သုကဘၣ်သူၣ်လီၤဖျးလီၤတၢ်လၢသုစံာ်ပျီပူၤ, ပဲာ်ဃိကဆှီထီၣ်စပံးအလီၢ်, ဒီးပာ်ဖှိၣ်တၤသူတၤသၣ်လၢဃုနံၣ်အတီၢ်ပူၤလီၤ. 4မ့မ့ၢ်နွံနံၣ်တနံၣ်န့ၣ်ကဘၣ်မ့ၢ်တၢ်အိၣ်ဘှံးလၢလၢပှဲၤပှဲၤအနံၣ် တနံၣ်လၢဟီၣ်ခိၣ်အဂီၢ်, နံၣ်တနံၣ်လၢအဘၣ်တၢ်ပာ်စီဆှံအီၤဆူယွၤအအိၣ်န့ၣ်လီၤ. သူၣ်လီၤဖျးလီၤတၢ်လၢသုစံာ်ပျီပူၤတဂ့ၤ, ဒီးပဲာ်ဟိကဆှီထီၣ်သုစပံးအလီၢ်တဂ့ၤ. 5သုတဘၣ်ကူးဘုလၢအမဲထီၣ်ဒၣ်တၢ်တဖၣ်ဒၣ်လဲာ်န့ၣ်ဘၣ်. ဒီးသုတဘၣ်ဒဲးဖှိၣ်စပံးသၣ်လၢစပံးမုၢ်လၢသုတပဲာ် ဟိကဆှီဘၣ်အီၤန့ၣ်ဘၣ်. မ့ၢ်တၢ်အိၣ်ဘှံးအနံၣ်လၢဟီၣ်ခိၣ်အဂီၢ်လီၤ. 6ဟီၣ်ခိၣ်န့ၣ်မ့ၢ်တဘၣ်တၢ်သူၣ်လီၤဖျးလီၤတၢ်လၢအပူၤလၢနံၣ် တနံၣ်အံၤအပူၤဘၣ်ဆၣ်ဒီး, ကဟ့ၣ်ထီၣ်တၢ်အီၣ်တၢ်အီလၢသုဂီၢ်, သုကုၢ်တဖၣ်အဂီၢ်, သုခ့သုပှၤတဖၣ်လၢအဒိးလဲအသးအဂီၢ်, ပှၤတခီဘီမုၢ်ဖိလၢအအိၣ်ဒီးသုတဖၣ်အဂီၢ်, 7လၢသုဆၣ်ဖိကီၢ်ဖိအဒၢတဖၣ်ဒီးသုဆၣ်ဖိကီၢ်ဖိအမံၤတဖၣ် လၢသုပျီပူၤတဖၣ်အဂီၢ်န့ၣ်လီၤ. တၢ်ခဲလၢာ်လၢအမဲထီၣ်သၣ်ထီၣ်န့ၣ်ကမ့ၢ်လၢတၢ်အီၣ်အဂီၢ်န့ၣ်လီၤ.
တၢ်သဘျ့အနံၣ်
8ဒီးသုကဘၣ်ဂံၢ်နွံနံၣ်နွံဝီ, ခဲလၢာ်ကဘၣ်အိၣ်လွံၢ်ဆံခွံနံၣ်န့ၣ်လီၤ. 9ဒီးလၢလါနွံလါတလါထီၣ်အသီတဆံအနံၤလၢအမ့ၢ်ဝဲတၢ်ပူၤဖျဲး အမုၢ်နံၤန့ၣ်သုဘၣ်ဒုးသီၣ်ကွဲၤအသီၣ်လၢသုကီၢ်ဒီကီၢ်ညါန့ၣ်လီၤ. 10လၢကျဲဒ်အံၤန့ၣ်သုကဘၣ်ပာ်စီဆှံနံၣ်ယဲၢ်ဆံအနံၣ် န့ၣ်ဒီးဘိးဘၣ်သ့ၣ်ညါတၢ်သဘျ့ဆူပှၤကိးဂၤဒဲးလၢအအိၣ် လၢကီၢ်ပူၤဒီကီၢ်ညါန့ၣ်လီၤ. လၢနံၣ်အံၤအကတီၢ်ပူၤန့ၣ်ကယဲၢ်တၢ်ဖိတၢ်လံၤ, တၢ်စုလီၢ်ခီၣ်ခိၣ်လၢအဘၣ်တၢ်ဆါလီၤကွံာ်တ့ၢ်လံအီၤတဖၣ်ကဘၣ် တၢ်ဟ့ၣ်က့ၤဆူအကစၢ်ဒၣ်ဝဲအအိၣ်မ့ၢ်ဂ့ၤ, ဆူအစၢၤအသွဲၣ်တဖၣ်အအိၣ်မ့ၢ်ဂ့ၤ, ဒီးပှၤတဂၤလၢ်လၢ်လၢအဘၣ်တၢ် ဆါလီၤကွံာ်အီၤဒ်ကုၢ်အသိးန့ၣ်ကဘၣ်တၢ်ဆှၢက ဒါက့ၤအီၤဆူအဒူၣ်ဖိထၢဖိဒၣ်ဝဲအအိၣ်န့ၣ်လီၤ. 11သုတဘၣ်သူၣ်လီၤဖျးလီၤတၢ်လၢသုစံာ်ပျီတဖၣ်အပူၤဘၣ်, သုတဘၣ်ကူးက့ၤတၢ်လၢအမဲထီၣ်သၣ်ထီၣ်အတၢ်ဒၣ်ဝဲဘၣ်, ဒီးသုတဘၣ်ထၢဖှိၣ်စပံးသၣ်တဖၣ်လၢစပံး အလီၢ်လၢအတဘၣ်တၢ်ပဲာ်ဟိကဆှီထီၣ်အီၤတဖၣ်အပူၤန့ၣ်ဘၣ်. 12ဒီနံၣ်ညါအံၤကမ့ၢ်နံၣ်စီဆှံလၢသုဂီၢ်လီၤ. သုကဘၣ်အီၣ်ဒၣ်ထဲတၢ်လၢအမဲထီၣ်ဒၣ်အတၢ်လၢစံာ်ပျီပူၤန့ၣ်လီၤ. 13ဒီးလၢနံၣ်အံၤအပူၤန့ၣ်ကယဲၢ်တၢ်စုလီၢ်ခီၣ်ခိၣ်လၢအဘၣ်တၢ်ဆါ လီၤကွံာ်တ့ၢ်လံတဖၣ်ကဘၣ်တၢ်ဟ့ၣ်က့ၤအီၤဆူအကစၢ်လၢအခီၣ်ထံး အအိၣ်န့ၣ်လီၤ. 14မၤသးဒ်န့ၣ်ဒီးဖဲသုဆါလီၤကွံာ်ဟီၣ်ခိၣ်ဆူပှၤအံၣ်စရ့လးဖိကဒဲကဒဲမ့ၢ်ဂ့ၤ, သုပှ့ၤဟီၣ်ခိၣ်လၢအအိၣ်မ့ၢ်ဂ့ၤမၤအီၤတတီတလိၤတဂ့ၤ. 15ဒ်တၢ်သဘျ့အနံၣ်ပူၤကွံာ်ဝံၤဒ်နံၣ်တဖၣ်အတၢ်ဂံၢ်အသိးန့ၣ် နဘၣ်ပာ်တၢ်အပှ့ၤလၢတၢ်လၢနပှ့ၤလၢပှၤလၢနဃၢၤအအိၣ်န့ၣ်လီၤ. ဒ်တၤသူတၤသၣ်သၣ်ထီၣ်အနံၣ်အတၢ်ဂံၢ်အိၣ်ဝဲအသိးန့ၣ်အဝဲကဘၣ်ဆါ န့ၢ်နၤတၢ်လီၤ. 16အနံၣ်အလါမ့ၢ်အါဒီးနဘၣ်မၤအါထီၣ်တၢ်အပှ့ၤလီၤ, အနံၣ်အလါမ့ၢ်စှၤဒီးနဘၣ်မၤစှၤလီၤတၢ်အပှ့ၤလီၤ. အဂ့ၢ်ဒ်အံၤ, တၢ်လၢအဆါလီၤကွံာ်ဝဲဒီးနၤန့ၣ်မ့ၢ် တၤသူတၤသၣ်အနီၣ်ဂံၢ်လၢဟီၣ်ခိၣ်အံၤဟ့ၣ်ထီၣ်ဝဲန့ၣ်လီၤ. 17ဒီးမၤတတီတလိၤလိာ်သုသးတဂ့ၤ. မ့မ့ၢ်ပျံၤသုကစၢ်ယွၤတက့ၢ်. အဂ့ၢ်ဒ်အံၤ, ယဲဒၣ်အံၤယမ့ၢ်ယွၤ, သုကစၢ်ယွၤန့ၣ်လီၤ.
နွံနံၣ်တနံၣ်အတၢ်ကီတၢ်ခဲ
18ဒီးသုဘၣ်တိၢ်န့ၢ်ယွၤအတၢ်မၤလိာ်ဒီးအတၢ်သိၣ်တၢ်သီတဖၣ်ဒ်သိး သုကအိၣ်ဂၢၢ်ဆိးကျၢၤလၢကီၢ်ပူၤန့ၣ်လီၤ. 19ဒီးဟီၣ်ခိၣ်ကဟ့ၣ်ထီၣ်အတၤသၣ်, ဒီးသုကအီၣ်ကုးအီပှဲၤဒီးသုကအိၣ်ဂၢၢ်ဆိးကျၢၤလၢအပူၤလီၤ.
20ဘၣ်ဆၣ်ဒီးသုကစံးနွံနံၣ်တနံၣ်န့ၣ်ပကအီၣ်တၢ်မနုၤလဲၣ်, မ့ၢ်လၢပတဘၣ်ဖှံတၢ်ဒီးပတဘၣ်ထၢဖှိၣ်တၢ်အဃိန့ၣ်လီၤ. 21ယွၤကဆိၣ်ဂ့ၤထံကီၢ်လၢဃုနံၣ်တနံၣ်အတီၢ်ပူၤဒ်သိးအကဟ့ၣ်ထီၣ်တၢ်အီၣ်လၢကလၢဝဲသၢနံၣ်အဂီၢ်လီၤ. 22ဖဲသုသူၣ်လီၤဖျးလီၤတၢ်လၢဃိးနံၣ်တနံၣ် န့ၣ်သုကအီၣ်ဘၣ်ဒံးတၢ်လၢသုကူးတ့ၢ်လၢဃုနံၣ်တနံၣ်အတီၢ်ပူၤ, ဒီးကလၢဝဲတုၤလီၤလၢတၢ်လၢသု သူၣ်လီၤလၢနံၣ်အဝဲန့ၣ်ဘၣ်တၢ်ကူးက့ၤအီၤတစုန့ၣ်လီၤ.
တၢ်ဟ့ၣ်က့ၤတၢ်စုလီၢ်ခီၣ်ခိၣ်
23ဒီးသုဟီၣ်ခိၣ်န့ၣ်တဘၣ်တၢ်ဆါလီၤကွံာ်အီၤလီၤထူလီၤယိာ်ဘၣ်. အဂ့ၢ်ဒ်အံၤ, တမ့ၢ်သုတၢ်ဘၣ်. ဒီးသုမ့ၢ်ပှၤတခီဘီမုၢ်ဖိဒီးပှၤသမှံၤလၢယဂီၢ်လီၤ.
24ဖဲဟီၣ်ခိၣ်န့ၣ်ဘၣ်တၢ်ဆါလီၤအီၤန့ၣ်, သုဘၣ်သ့ၣ်ညါလၢဟီၣ်ခိၣ် အကစၢ်လၢအခီၣ်ထံးန့ၣ်အိၣ်ဒီးခွဲးယာ်လၢကပှ့ၤကဒါက့ၤဝဲဒၣ်န့ၣ်လီၤ. 25ပှၤအံၣ်စရ့လးဖိတဂၤဂၤမ့ၢ်ဖှီၣ်လီၤယာ်လီၤဝဲတုၤအဘၣ် ဆါလီၤကွံာ်အဟီၣ်ခိၣ်န့ၣ်ဒီး, အဘူးအတံၢ်လၢအဘူးကတၢၢ်ဒီး အီၤကဘၣ်ပှ့ၤကဒါက့ၤဝဲဒၣ်န့ၣ်လီၤ. 26ပှၤတဂၤလၢအတအိၣ်ဘၣ်ဒီးအဘူးအတံၢ်လၢကပှ့ၤက့ၤဟီၣ်ခိၣ်န့ၣ်, လၢခံမ့ၢ်ဘီၣ်ထီၣ်ညီထီၣ်က့ၤဒီးကဘၣ်ပှ့ၤကဒါက့ၤဟီၣ်ခိၣ်န့ၣ်လၢအနီၢ်ကစၢ်ဒၣ်ဝဲလီၤ. 27ဒီးအဝဲကဘၣ်ဟ့ၣ်က့ၤတၢ်အပှ့ၤဆူပှၤလၢအပှ့ၤတၢ်န့ၣ်စးထီၣ်လၢ အဆါလီၤတၢ်အနံၣ်တုၤနံၣ်လၢတၢ်သဘျ့အနံၣ်, ဒီးတၢ်ကဟ့ၣ်ကဒါက့ၤအီၤအဟီၣ်ခိၣ်န့ၣ်လီၤ. 28ဘၣ်ဆၣ်ဒီးအစ့မ့ၢ်တအိၣ်လၢလၢပှဲၤပှဲၤလၢကပှ့ၤကဒါက့ၤဟီၣ်ခိၣ် န့ၣ်ဒီး, ဟီၣ်ခိၣ်န့ၣ်ကအိၣ်ဒၣ်လၢပှၤလၢအပှ့ၤတ့ၢ်အီၤတဂၤန့ၣ်အစုပူၤ တုၤလၢတၢ်သဘျ့အနံၣ်တစုန့ၣ်လီၤ.
29ဒီးပှၤတဂၤမ့ၢ်ဆါလီၤကွံာ်ဟံၣ်တဖျၢၣ်လၢဝ့ၢ်အိၣ်ဒီးအခိၣ်ဒူ န့ၣ်ဒီး, အဝဲအိၣ်ဒီးအတၢ်ခွဲးတၢ်ယာ်လၢကပှ့ၤကဒါက့ၤဝဲဖဲ တနံၣ်ပှဲၤထီၣ်, စးထီၣ်လၢအဆါလီၤကွံာ်ဝဲအမုၢ်တနံၤန့ၣ်လီၤ. 30ဘၣ်ဆၣ်ဒီးမ့ၢ်တပှ့ၤကဒါက့ၤဝဲလၢတနံၣ်အတီၢ်ပူၤဘၣ်ဒီး, အတၢ်ခွဲးတၢ်ယာ်လၢကပှ့ၤကဒါက့ၤတၢ်အဂီၢ်န့ၣ်လီၤမၢ်ဝဲ, ဒီးအဟံၣ်န့ၣ်ကကဲထီၣ်ပှၤလၢအပှ့ၤတ့ၢ်အီၤတဂၤဒီးအစၢၤအသွဲၣ် တဖၣ်အတၢ်လီၤစိၤန့ၣ်လီၤ. ဒီးဟံၣ်န့ၣ်တုၤလၢတၢ်သဘျ့အနံၣ်ဒၣ်လဲာ်န့ၣ်တဘၣ်တၢ်ဟ့ၣ်ကဒါ က့ၤအီၤလၢၤဘၣ်န့ၣ်လီၤ. 31မ့မ့ၢ်ဟံၣ်ဧိၤဃီဧိၤလၢအအိၣ်ဝဲလၢသဝီလၢအခိၣ်ဒူဝးတ ရံးအီၤတအိၣ်ဘၣ်တဖၣ်အပူၤန့ၣ်ဘၣ်တၢ်ပာ်အီၤဒ်စံာ်ဧိၤပှဲၤဧိၤလၢခိအသိးန့ၣ်လီၤ. အကစၢ်လၢအခီၣ်ထံးတဂၤန့ၣ်အိၣ်ဒီးအတၢ်ခွဲးတၢ်ယာ်လၢကပှ့ၤကဒါက့ၤဝဲ, ဒီးကဘၣ်တၢ်ဟ့ၣ်ကဒါက့ၤအီၤလၢတၢ်သဘျ့အနံၣ်အပူၤန့ၣ်လီၤ. 32ဘၣ်ဆၣ်ဒီး, ပှၤလ့ၤဝံဖိတဖၣ်အိၣ်ဒီးအတၢ်ခွဲးတၢ်ယာ်လၢကပှ့ၤ ကဒါက့ၤအဟံၣ်အဃီလၢအဝ့ၢ် လၢတၢ်ပာ်လၢအဂီၢ်တဖၣ်အပူၤတဘျီလၢ်လၢ်န့ၣ်လီၤ. 33ဒီးဟံၣ်လၢအဘၣ်တၢ်ဆါအီၤလၢပှၤလ့ၤဝံဖိ, ဒီးမ့ၢ်တဘၣ်တၢ်ပှ့ၤကဒါက့ၤအီၤဘၣ်န့ၣ်ကဘၣ်တၢ်ဟ့ၣ်က့ၤအီၤလၢ တၢ်သဘျ့အနံၣ်န့ၣ်လီၤ. အဂ့ၢ်ဒ်အံၤ, ဟံၣ်ဧိၤဃီဧိၤလၢပှၤလ့ၤဝံဖိအ ဝ့ၢ်တဖၣ်အပူၤန့ၣ်မ့ၢ်အဝဲသ့ၣ်အတၢ်လီၤထူလီၤယိာ်လၢအံၣ်စရ့လးအပှၤဂီၢ်မုၢ်အကျါန့ၣ်လီၤ. 34ဒီးအစံာ်အပှဲၤလၢအဝ့ၢ်အဃၢၤတဖၣ်န့ၣ်တဘၣ်တၢ်ဆါကွံာ်အီၤဘၣ်. အဂ့ၢ်ဒ်အံၤ, မ့ၢ်အတၢ်လီၤထူလီၤယိာ်လီၤ.
တၢ်ဟ့ၣ်လိၢ်လီၤပှၤဖှီၣ်ဖိယာ်ဖိ
35ဒီးပှၤအံၣ်စရ့လးဖိကဒဲကဒဲလၢအအိၣ် ဘူးဒီးသုတဂၤမ့ၢ်ဖှီၣ်လီၤယာ်လီၤဒီးမၤစၢၤလီၤက့ၤအသး တသ့ဘၣ်န့ၣ်, သုကဘၣ်လုၢ်အီၣ်အီၤဒ်သုလုၢ်အီၣ်ပှၤတခီ ဘီမုၢ်ဖိတဂၤအသိး, ဒ်သိးအကအိၣ်မူဒီးသုကသ့ဝဲအဂီၢ်န့ၣ်လီၤ. 36စ့အအ့ၣ်မ့ၢ်ဂ့ၤတၢ်အါထီၣ်မ့ၢ်ဂ့ၤဟံးန့ၢ်လၢအအိၣ်တဂ့ၤ. မ့မ့ၢ်သုဘၣ်ပျံၤသုကစၢ်ယွၤဒီးပျဲပှၤအံၣ်စရ့လးဖိကဒဲကဒဲဒီးသု အိၣ်မူဘူးဒီးသုတက့ၢ်. 37ဒီးသုတဘၣ်ဟ့ၣ်လီၤအီၤလၢသုစ့လၢတၢ်အ့ၣ်ထီၣ်အဂီၢ်ဘၣ်. ဒီးသုတဘၣ်ဟ့ၣ်လီၤအီၤလၢသုတၢ်အီၣ်လၢတၢ်အါထီၣ်အဂီၢ်ဘၣ်. 38တၢ်မၤလိာ်အံၤမ့ၢ်ယွၤ, သုကစၢ်ယွၤလၢအထုးထီၣ်သုလၢကီၢ်အဲၤကူပတူးဒ်သိးကဟ့ၣ်သု လၢကီၢ်ကနၤဧၣ်ဒီးကဲထီၣ်ဝဲသုကစၢ်ယွၤအတၢ်မၤလိာ်န့ၣ်လီၤ.
တၢ်ပျၢ်ကွံာ်ကုၢ်တဖၣ်
39ဒီးပှၤအံၣ်စရ့လးဖိကဒဲကဒဲဒီးသုလၢအအိၣ် ဘူးဒီးသုတဂၤမ့ၢ်ဖှီၣ်လီၤယာ်လီၤတုၤအဘၣ်ဆါလီၤအသးလၢသုဒ် ကုၢ်တဂၤအသိးန့ၣ်ဒီးသုတဘၣ်မၢအမၤတၢ်ဒ်ကုၢ်တဂၤအသိးန့ၣ်ဘၣ်. 40အဝဲကအိၣ်ဒီးသုဒ်ပှၤဒိးလဲအသးဖိတဂၤအသိးဒီးမၤသုတၢ်မၤတုၤလၢနံၣ်သဘျ့ အကတီၢ်န့ၣ်လီၤ. 41အကတီၢ်ဖဲန့ၣ်အဝဲဒီးအဖိတဖၣ်ကဟးထီၣ် ကွံာ်လၢသုအိၣ်ဒီးကက့ၤကဒါက့ၤဆူအဒူၣ်ဖိထၢဖိဒၣ်ဝဲအ အိၣ်, ဒီးမိၢ်ပၢ်ဖံဖုလၢပျၢၤတဖၣ်အတၢ်စုလီၢ်ခီၣ်ခိၣ်အအိၣ်န့ၣ်လီၤ. 42အံၣ်စရ့လးအပှၤဂီၢ်မုၢ်မ့ၢ်ယွၤအကုၢ်အပှၤတဖၣ်လၢအဝဲထုး ထီၣ်အီၤလၢကီၢ်အဲၤကူပတူးအပူၤန့ၣ်လီၤ. အဝဲသ့ၣ်တဘၣ်တၢ်ဆါလီၤကွံာ်အီၤဆူကုၢ်အလီၢ်န့ၣ်ဘၣ်. 43သုတဘၣ်ပၢအီၤလၢတၢ်စုဆူၣ်ခီၣ်တကးဘၣ်. မ့မ့ၢ်သုဘၣ်ပျံၤသုကစၢ်ယွၤန့ၣ်လီၤ. 44သုမ့ၢ်လိၣ်ဘၣ်ကုၢ်ဒီးပှ့ၤန့ၢ်အီၤလၢပှၤကလုာ်အိၣ်လၢသုခိၣ် သုဃၢၤတဖၣ်န့ၣ်တက့ၢ်. 45သုပှ့ၤန့ၢ်ပှၤတခီဘီမုၢ်ဖိလၢအအိၣ်လၢသုကျါတဖၣ်အဖိသ့ဝဲစ့ၢ်ကီးလီၤ. ဖိသၣ်ဒ်န့ၣ်သိးတဖၣ်လၢအအိၣ်ဖျဲၣ်ထီၣ်လၢသုကီၢ်ပူၤကကဲထီၣ်သုတၢ်န့ၣ်လီၤ. 46ဒီးသုကပာ်လီၤတဲာ်အဝဲသ့ၣ်လၢ သုဖိခွါတဖၣ်အတၢ်န့ၢ်သါအဂီၢ်ဒီးကဘၣ်မၤအတၢ်မၤတစိၤသုဖိ ခွါတဖၣ်အသးသမူန့ၣ်လီၤ. ဘၣ်ဆၣ်ဒီးသုတဘၣ်မၤအံၣ်စရ့လးဖိကဒဲကဒဲဒီးသုလၢတၢ်စု ဆူၣ်ခီၣ်တကးန့ၣ်ဘၣ်.
47ပှၤတခီဘီမုၢ်ဖိလၢအအိၣ်လၢ သုကျါမ့ၢ်ဘီၣ်ထီၣ်ညီထီၣ်ဒီးဖဲပှၤအံၣ်စရ့လးဖိကဒဲက ဒဲဒီးသုတဂၤမ့ၢ်ဖှီၣ်လီၤယာ်လီၤဝဲဒီးဆါလီၤကွံာ်အသးဒ် ကုၢ်တဂၤအသိးဆူပှၤတခီဘီမုၢ်ဖိတဂၤန့ၣ်အအိၣ်မ့ၢ်ဂ့ၤဆူအဟံၣ်ဖိဃီ ဖိတဂၤဂၤအအိၣ်မ့ၢ်ဂ့ၤ, 48မ့ၢ်ဆါလီၤကွံာ်တ့ၢ်လံအသးဒၣ်လဲာ်, အဝဲအိၣ်ဒံးဒီးတၢ်ခွဲးတၢ်ယာ်လၢတၢ်ကပှ့ၤက့ၤအီၤအဂီၢ်န့ၣ် လီၤ. အဒီပုၢ်ဝဲၢ်အကျါတဂၤဂၤမ့ၢ်ဂ့ၤ, 49အဖါတံၢ်မ့ၢ်ဂ့ၤ, အတခွါမ့ၢ်ဂ့ၤ, အဘူးအတံၢ်တံၢ်နီၢ်အကျါတဂၤဂၤမ့ၢ်ဂ့ၤ, ပှ့ၤက့ၤအီၤသ့ဝဲဒၣ်န့ၣ်လီၤ. အဝဲအနီၢ်ကစၢ်ဒၣ်ဝဲမ့ၢ်ဘီၣ်ထီၣ်ညီထီၣ်န့ၣ် ဒီးပှ့ၤက့ၤအသးဒၣ်ဝဲသ့လီၤ. 50အဝဲကဘၣ်ကတိၤတၢ်ဒီးပှၤလၢအပှ့ၤအီၤတဂၤ, ဒီးအဝဲသ့ၣ် ကဘၣ်ဂံၢ်နီၣ်နံၣ်တဖၣ်စးထီၣ်အကတီၢ်လၢအဝဲဆါလီၤအသးတုၤနံၣ် တၢ်သဘျ့အကတီၢ်ဒီးကဘၣ်ပာ်လီၤအတၢ်သဘျ့အပှ့ၤဒ်ပှၤဒိးလဲအသး ဖိတဂၤအဘူးအလဲအိၣ်ဝဲအသိးန့ၣ်လီၤ. 51တချုးနံၣ်သဘျ့တုၤန့ၣ်တၢ်ဆၢကတီၢ်မ့ၢ်အိၣ်ဒံးအါနံၣ်ဒီးအဝဲ ကဘၣ်မၤပှဲၤထီၣ်တၢ်အပှ့ၤလၢအဘူးအလဲလၢအဒိးန့ၢ်ဘၣ်ဝဲအကျါ တနီၤဒ်တၢ်ဆိၣ်အိၣ်ဝဲအသိးန့ၣ်လီၤ. 52ဒီးနံၣ်လၢအိၣ်လီၤတဲာ်မ့ၢ်စှၤဒီးကဘၣ် မၤပှဲၤထီၣ်တၢ်အပှ့ၤလၢအဘူးအလဲလၢအဒိးန့ၢ်ဘၣ်ဝဲအကျါတနီၤ, ဒ်တၢ်ဆိၣ်အိၣ်ဝဲအသိးစ့ၢ်ကီးန့ၣ်လီၤ. 53ဒ်ကုၢ်လၢအဘၣ်တၢ်ဒိးလဲအီၤတနံၣ်ဘၣ်တနံၣ်အသိးန့ၣ်ကဘၣ်အိၣ်ဒီး ပှၤလၢအပှ့ၤအီၤဒီးတၢ်တဘၣ်မၤအီၤလၢတၢ်စုဆူၣ်ခီၣ်တကးအပူၤန့ၣ်ဘၣ်. 54ဒီးအဝဲဒၣ်မ့ၢ်တဘၣ်တၢ်ပျၢ်ကွံာ်အီၤလၢကျဲဒ်သိးအံၤဘၣ်ဒီး, အဝဲဒီးအဖိတဖၣ်ကဘၣ်တၢ်ပျၢ်ကွံာ်အီၤလၢနံၣ်တၢ်သဘျ့အကတီၢ်န့ၣ်လီၤ. 55အဂ့ၢ်ဒ်အံၤ, ပှၤအံၣ်စရ့လးဖိန့ၣ်မ့ၢ်ယကုၢ်ယပှၤလီၤ. အဝဲသ့ၣ်မ့ၢ်ယကုၢ်ယပှၤလၢယဒုးဟးထီၣ်ကွံာ်အီၤလၢအဲၤကူပတူးအပူၤလီၤ. ယဲဒၣ်အံၤယမ့ၢ်ယွၤသုကစၢ်ယွၤလီၤ.
Currently Selected:
လံာ်တၢ်ဘူၣ်ထီၣ်ဘါထီၣ် 25: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.