YouVersion Logo
Search Icon

ໂຢ​ຮັນ 14

14
ເຢ​ຊູ ເຊ ຕົ້ງ ມີ່ງ ຕສັ່ງ ເຕ໋ຍ ວົ້ວ ຕິ້ວ ເຈົ໊າ
1ເຢ​ຊູ ແອ໋ງ ກ໊ອງ, “ໄມ້ ຕູ໋ງ ໂຮຍ້ວ ຮວາງ ໂຮຍ້ວ ເດສົ້າ. ອ໋ອຍ ຕສຸ ສຽນ ເຂົາ ທິນ-ຮູ່ງ ຢ່າ ສຽນ ເຂົາ ເຢຍ. 2ເຢຍ ເຍີຍ ເຕຍ ເຍີຍ ເປຢົ໊າ ມ່າຍ ຢຽມ ເຍີຍ ຕ໋ອງ ທສ້ຳ ເຍີຍ. ເຊ ກ໊ອງ ໄມ້ ມ່າຍ ເຢຍ ຕສູ໊ງ ບົ໋ວ ເມີ່ຍ ບົວ ໝີ່ ອ໊ະ. ເຢຍ ຢ່າ ມີ່ງ ຫລິ່ວ ເລີ໌ຍ ຕ໋ອງ ປຸນ ເມີ່ຍ ບົວ ຢຽມ. 3ເຢຍ ມີ່ງ ຫລິ່ວ ເລີ໌ຍ ຕສຢັ໋ງ ຕ໋ອງ ປຸນ ເມີ່ຍ ບົວ ຢຽມ, ເຢຍ ແອ໋ງ ຕ້າຍ ຕໍ້ ເມີ່ຍ ບົວ ມີ່ງ ເຖສົາ ເຢຍ ຢຽມ ວົ້ວ. ເຢຍ ຢຽມ ຫາຍ ເມີ່ຍ ບົວ ຕສ່ຽວ ເຖສົາ ເຢຍ ຢຽມ ວົ້ວ. 4ເຢຍ ອ໋ອຍ ມີ່ງ ເຍີຍ ຕ໋ອງ ວົ້ວ ຕິ້ວ ເຈົ໊າ, ເມີ່ຍ ບົວ ຢ່າ ຮິ້ວ ເຍີຍ.”
5ໂທ​ມັດ ກ໊ອງ ບົ໋ວ ນິ່ນ, “ຕສ໊ຽວ ອ້າ! ເຢຍ ບົວ ໄມ້ ຮິ້ວ ຕຸ໊ ເມີ່ຍ ມີ່ງ ຫາຍ. ເຢຍ ບົວ ຮນັ້ງ ຫາຍ ນໍ ໄຮ່ ຮິ້ວ ຕຸ໊ ເຈົ໊າ ມີ່ງ?”
6ເຢ​ຊູ ເຕົາ, “ເຢຍ ເຊ ຕົ້ງ ມີ່ງ ຕສັ່ງ ເຕ໋ຍ ວົ້ວ ຕິ້ວ ເຈົ໊າ, ຢ່າ ຕົ້ງ ຕສຽນ ເລີ໌ຍ, ຢ່າ ຕົ້ງ ຕສຢັ້ງ ແໝ່ງ. ທສວດ ລິ໌ວ ເຂົາ ເຢຍ, ໄມ້ ມ່າຍ ຫາຍ ເຕົ້າ ໄຮ່ ມີ່ງ ຕຸ໊ ເຖົາ ຕສັ່ງ ເຕ໋ຍ ວົ້ວ. 7ເຊ ກ໊ອງ ເມີ່ຍ ບົວ ຕສະເກ້ງ ຮິ້ວ ຕຸ໊ ເຢຍ, ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຍີຍ ເຕຍ. ຢັ້ງ ນ້າຍ ເຈ໋ຍ ເມີ່ຍ ບົວ ຮິ້ວ ຕຸ໊ ນິ່ນ, ເມີ່ຍ ບົວ ຢ່າ ປວັດ ເຈ໋ຍ ນິ່ນ.”
8ຟີ​ລິບ ກ໊ອງ ບົ໋ວ ເຢ​ຊູ, “ຕສ໊ຽວ ອ້າ! ໂທ້ ເມີ່ຍ ປຸນ ເຢຍ ບົວ ປວັດ ຕສັ່ງ ເຕ໋ຍ ໂອ່. ປວັດ ລິ໌ວ ເຢຍ ບົວ ໂຮຍ້ວ ອກາຍ ອ໊ະ.”
9ເຢ​ຊູ ກ໊ອງ, “ຟີ​ລິບ ອ້າ! ເຢຍ ເຖສົາ ເມີ່ຍ ບົວ ຢຽມ ເລົ່າ ໄຫ່ ອ໊ະ. ເມີ່ຍ ຖສໍ່ ໄມ້ ແກ້ງ ຮິ້ວ ຕຸ໊ ເຢຍ ໄຟ? ຫາຍ ເຕົ້າ ປວັດ ເຈ໋ຍ ເຢຍ ເຊ ປວັດ ເຈ໋ຍ ຕສັ່ງ ເຕ໋ຍ. ຮນັ້ງ ນ້າຍ ເມີ່ຍ ເຫວີ່ຍ ຫາຍ ຕິ່ວ ກ໊ອງ, ‘ໂທ້ ປຸນ ເຢຍ ບົວ ປວັດ ຕສັ່ງ ເຕ໋ຍ?’ 10ເມີ່ຍ ໄມ້ ສຽນ ເຢຍ ຢຽມ ຕສັ່ງ ເຕ໋ຍ ກະຍົ໌ວ, ຕສັ່ງ ເຕ໋ຍ ຢຽມ ເຢຍ ກະຍົ໌ວ ໄຟ? ເຢຍ ເຖສົາ ເມີ່ຍ ບົວ ກ໊ອງ ນ້າຍ ເຕີ໋ຍ ຫວ່າ ໄມ້ ເຕສີ໌ຍ ເຢຍ ກັ້ນ ຮນ້ຳ ທສວດ ຕ້າຍ ກ໊ອງ. ຕສັ່ງ ເຕ໋ຍ ຢຽມ ເຢຍ ກະຍົ໌ວ ໂຕສ໋ວ ນິ່ນ ກັ້ນ ເຍີຍ ກົງ. 11ເມີ່ຍ ບົວ ອ໋ອຍ ຕສຸ ສຽນ ເຢຍ ຢຽມ ຕສັ່ງ ເຕ໋ຍ ກະຍົ໌ວ, ຕສັ່ງ ເຕ໋ຍ ຢ່າ ຢຽມ ເຢຍ ກະຍົ໌ວ. ໄມ້ ເຕສີຍ ແອ໊ະ, ອ໋ອຍ ຕສຸ ເຫວີ່ຍ ເຢຍ ໂຕສ໋ວ ເຍີຍ ສີ່ ສຽນ. 12ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ຫາຍ ເຕົ້າ ສຽນ ເຂົາ ເຢຍ, ວົ້ວ ເຕົ້າ ອ໋ອຍ ໂຕສ໋ວ ຮນັ້ງ ເຢຍ ໂຕສ໋ວ ນໍ. ນິ່ນ ໂຕສ໋ວ ເຍີຍ ສີ່ ຕສູ໊ງ ອ໋ອຍ ໂຕສ໋ວ ເກົ້າ ໂຮລ ເຈ໋ຍ ເຢຍ ເຍີຍ, ເຫວີ່ຍ ຕສຸ ເຢຍ ມີ່ງ ຕສັ່ງ ເຕ໋ຍ ວົ້ວ. 13ເມີ່ຍ ບົວ ເຕ໊ງ ເຢຍ ເຍີຍ ບົ໋ວ ໂທ້ ຫາຍ ຫຍູ່ງ, ເຢຍ ຕສູ໊ງ ອ໋ອຍ ໂຕສ໋ວ ວົ້ວ ຫຍູ່ງ. ຮນັ້ງ ນ້າຍ, ຕສັ່ງ ເຕ໋ຍ ເຫວີ່ຍ ນິ່ນ ເຍີຍ ຕອນ ຕຸ໊ ມ່ຽນ ທ່າຍ. 14ເຊ ກ໊ອງ ເມີ່ຍ ບົວ ເຕ໊ງ ເຢຍ ເຍີຍ ບົ໋ວ ໂທ້ ຫາຍ ຫຍູ່ງ, ເຢຍ ຕສູ໊ງ ອ໋ອຍ ໂຕສ໋ວ ວົ້ວ ຫຍູ່ງ.
ເຢ​ຊູ ແລ໌ງ ປຸນ ສີງ ລີ່ງ ເອຈ່ຍ
15“ເຊ ກ໊ອງ ເມີ່ຍ ບົວ ຮນ້ຳ ເຢຍ, ເມີ່ຍ ບົວ ຕສ່ຽວ ເອີຍ ຈ໊ຽນ ເຢຍ ເຍີຍ ຫລີ່ງ ໂຕສ໋ວ. 16ເຢຍ ອ໋ອຍ ເຖງ ຕສັ່ງ ເຕ໋ຍ ໂທ້, ນິ່ນ ຕສ່ຽວ ອ໋ອຍ ປຸນ ກັ້ນ ເຕົ້າ ຕ້າຍ ເຖງ ເມີ່ຍ ບົວ, ເຖສົາ ເມີ່ຍ ບົວ ຢຽດ ລິ໌ວ ຢຽມ. 17ນ້າຍ ເຕົ້າ ເຊ ສີງ ລີ່ງ, ຕົ້ງ ປຸນ ມ່ຽນ ຮິ້ວ ຕຸ໊ ຕສຽນ ເລີ໌ຍ ວົ້ວ ເຕົ້າ. ປ້າມ ມ່ຽນ ໄມ້ ໄຮ່ ຕສິ໊ບ ນິ່ນ, ເຫວີ່ຍ ຕສຸ ປ້າມ ມ່ຽນ ໝັ່ງ ໄມ້ ປວັດ ນິ່ນ ຢ່າ ໄມ້ ຮິ້ວ ຕຸ໊ ນິ່ນ. ມປ່າ ເມີ່ຍ ບົວ ຮິ້ວ ຕຸ໊ ນິ່ນ ເຍີຍ, ເຫວີ່ຍ ຕສຸ ນິ່ນ ເຖສົາ ເມີ່ຍ ບົວ ຢຽມ ຢ່າ ຢຽມ ເມີ່ຍ ບົວ ເຍີຍ ໂຮຍ້ວ. #14:17 ມ່າຍ ເຕີ໋ຍ ໂລ໌-ຮນອຍ ໂຊວ ກ໊ອງ “ຢ່າ ອ໋ອຍ ຢຽມ ເມີ່ຍ ບົວ ເຍີຍ ໂຮຍ້ວ”. 18ເຢຍ ໄມ້ ກວັ່ງ ເມີ່ຍ ບົວ ເປ໋ນ ກູ້ ຮັ່ນ ຕອນ. ເຢຍ ແອ໋ງ ອ໋ອຍ ຕ້າຍ ລໍ໌ ເມີ່ຍ ບົວ. 19ໄມ້ ເລົ່າ ປ້າມ ມ່ຽນ ໄມ້ ປວັດ ເຢຍ, ມປ່າ ເມີ່ຍ ບົວ ອ໋ອຍ ຕຸ໊ ປວັດ ເຢຍ. ເຫວີ່ຍ ຕສຸ ເຢຍ ຕສຢັ້ງ ຈ໊ຽນ, ເມີ່ຍ ບົວ ຕສ່ຽວ ຕຸ໊ ຕສຢັ້ງ ຈ໊ຽນ. 20ເຖົາ ວົ້ວ ຮນອຍ ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ຢຽມ ເຢຍ ເຍີຍ ເຕຍ ກະຍົ໌ວ, ເມີ່ຍ ບົວ ຢ່າ ຢຽມ ເຢຍ ກະຍົ໌ວ, ເຢຍ ຢ່າ ຢຽມ ເມີ່ຍ ບົວ ກະຍົ໌ວ.
21“ຫາຍ ເຕົ້າ ຕສິ໊ບ ເຢຍ ເຍີຍ ຫລີ່ງ ຢ່າ ເອີຍ ຈ໊ຽນ ໂຕສ໋ວ, ຕົ້ງ ວົ້ວ ເຕົ້າ ຮນ້ຳ ເຢຍ. ຫາຍ ເຕົ້າ ຮນ້ຳ ເຢຍ, ເຢຍ ເຍີຍ ເຕຍ ຢ່າ ຮນ້ຳ ນິ່ນ. ເຢຍ ຢ່າ ຮນ້ຳ ນິ່ນ ຢ່າ ອ໋ອຍ ປຸນ ນິ່ນ ຮິ້ວ ຕຸ໊ ເຢຍ.”
22ຢູ​ດາດ, ໄມ້ ເຕສີ໌ຍ ໝ່າຍ ເຢ​ຊູ ວົ້ວ ເຕົ້າ ຢູ​ດາດ ອິ​ສະ​ຄາ​ລິ​ໂອດ, ໜ່າຍ ເຢ​ຊູ, “ຕສ໊ຽວ ອ້າ! ເມີ່ຍ ເຫວີ່ຍ ຫາຍ ຕິ່ວ ກ໊ອງ ເມີ່ຍ ອ໋ອຍ ປຸນ ເຢຍ ບົວ ຮິ້ວ ຕຸ໊ ເມີ່ຍ ມປ່າ ໄມ້ ປຸນ ປ້າມ ມ່ຽນ ຮິ້ວ ຕຸ໊ ເມີ່ຍ?”
23ເຢ​ຊູ ເຕົາ ນິ່ນ, “ຫາຍ ເຕົ້າ ຮນ້ຳ ເຢຍ ຕສ່ຽວ ເອີຍ ຈ໊ຽນ ເຢຍ ອຈ໋າວ ເຍີຍ ຫວ່າ ໂຕສ໋ວ. ເຢຍ ເຍີຍ ເຕຍ ຕສ່ຽວ ຮນ້ຳ ນິ່ນ. ເຢຍ ເຖສົາ ເຢຍ ເຍີຍ ເຕຍ ຢ່າ ອ໋ອຍ ຕ້າຍ ລໍ໌ ນິ່ນ, ເຖສົາ ນິ່ນ ຢຽມ. 24ຫາຍ ເຕົ້າ ໄມ້ ຮນ້ຳ ເຢຍ ຕສ່ຽວ ໄມ້ ເອີຍ ເຢຍ ອຈ໋າວ ເຍີຍ ຫວ່າ. ເມີ່ຍ ບົວ ໄຮ໌ ເຢຍ ກ໊ອງ ລິ໌ວ ນ້າຍ ເຕີ໋ຍ ຫວ່າ, ໄມ້ ເຕສີ໌ຍ ເຢຍ ກັ້ນ ຮນ້ຳ ທສວດ ຕ້າຍ ກ໊ອງ. ເຊ ຕສັ່ງ ເຕ໋ຍ, ຕົ້ງ ພ້າຍ ເຢຍ ຕ້າຍ ວົ້ວ ເຕົ້າ, ເຍີຍ ຫວ່າ.
25“ເຢຍ ຖສໍ່ ເຖສົາ ເມີ່ຍ ບົວ ຢຽມ ເຍີຍ ຕສຢັ້ງ ໂຫ່ ເຢຍ ກ໊ອງ ເດສ່ງ ນ້າຍ ເຕີ໋ຍ ຫວ່າ ບົ໋ວ ເມີ່ຍ ບົວ. 26ເຖງ ມ່ຽນ ວົ້ວ ເຕົ້າ, ຕົ້ງ ຕສັ່ງ ເຕ໋ຍ ອ໋ອຍ ເຕ໊ງ ເຢຍ ເຍີຍ ບົ໋ວ ພ້າຍ ຕ້າຍ ເຍີຍ ສີງ ລີ່ງ, ອ໋ອຍ ອຈ໋າວ ຫຍູ່ງໆ ເມີ່ຍ ບົວ, ຢ່າ ອ໋ອຍ ປຸນ ເມີ່ຍ ບົວ ໄຮ່ ຈັ໋ງ ຕຸ໊ ເຢຍ ບົ໋ວ ເຈ໋ຍ ເຍີຍ ຢຽດ ຕສູ໊ງ.
27“ເຢຍ ລ່ຽວ ແປ້ງ ອອນ ປຸນ ເມີ່ຍ ບົວ. ເຊ ເຢຍ ກັ້ນ ເຍີຍ ແປ້ງ ອອນ ເຢຍ ເຖສີຍ ປຸນ ເມີ່ຍ ບົວ. ເຢຍ ປຸນ ເຍີຍ ໄມ້ ຮນັ້ງ ປ້າມ ມ່ຽນ ປຸນ ເຍີຍ. ໄມ້ ຕູ໋ງ ເດສົ້າ ຟ່ານ ຢ່າ ໄມ້ ຕູ໋ງ ກ້ຳ ເດສ໋ຍ.
28“ເມີ່ຍ ບົວ ໄຮ໌ ເຢຍ ກ໊ອງ ເຈ໋ຍ, ເຢຍ ອ໋ອຍ ຕສຸ ເລີ່ຍ ອກອຍ ເມີ່ຍ ບົວ, ມປ່າ ເຢຍ ແອ໋ງ ອ໋ອຍ ຕ້າຍ ລໍ໌ ເມີ່ຍ ບົວ. ເຊ ກ໊ອງ ເມີ່ຍ ບົວ ຮນ້ຳ ເຢຍ, ເມີ່ຍ ບົວ ອ໋ອຍ ຕສຸ ອະເຮນີ້ຍ ເຢຍ ມີ່ງ ຕສັ່ງ ເຕ໋ຍ ວົ້ວ ເຫວີ່ຍ ຕສຸ ຕສັ່ງ ເຕ໋ຍ ເກົ້າ ໂຮລ ເຈ໋ຍ ເຢຍ. 29ນ້າຍ ເຕີ໋ຍ ສີ່ ໄມ້ ແກ້ງ ທສວດ ເຢຍ ຈາ-ດ່າງ ບົ໋ວ ຕສຢັ໋ງ ເມີ່ຍ ບົວ. ຕສົ໊ວ ນ້າຍ ເຕີ໋ຍ ສີ່ ທສວດ ເມີ່ຍ ບົວ ຕສ່ຽວ ສຽນ ອ໊ະ.
30“ຢັ້ງ ນ້າຍ ເຈ໋ຍ ເຢຍ ໄມ້ ຕຸ໊ ເຖສົາ ເມີ່ຍ ບົວ ກ໊ອງ ຫວ່າ ທສ້ຳ ເຫວີ່ຍ ຕສຸ ກຸ໊ນ ປ້າມ ເກນ ວົ້ວ ເຕົ້າ ອ໋ອຍ ຕ້າຍ. ນິ່ນ ໄມ້ ມ່າຍ ຫັດ ມ໌າ ກຸ໊ນ ເຢຍ. 31ມປ່າ ເຢຍ ເອີຍ ເດສ່ງ ຕສັ່ງ ເຕ໋ຍ ພ້າຍ ເຢຍ ເຍີຍ ຫວ່າ ເຫວີ່ຍ ປຸນ ລູ່ງ ເດ໊ຍ ມ່ຽນ ຮິ້ວ ຕຸ໊ ເຢຍ ຮນ້ຳ ຕສັ່ງ ເຕ໋ຍ. ເຈ໌ຍ ຊິນ ຕ້າຍ. ບົວ ມີ່ງ ອ໊ະ.

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy