Sakaria 9

Katɔti Ɔdubɔni Israel Bekisine Ƒui Kɔtu

1Unwoti ɔnii nwuna anumi asia ukyuli biala lɛlɔ, na bani ɔdi mbo ɔkplu utulo ƒui ndi Israel adua ammɔ. Na ɔ́tɛ litemi ɔ́du Hadrak ku Damasko lɛma linengudi lɛmmɔ kɔtɔ. 2Lɛni kani na ɔdubɔtɛ litemi na ɔdu Hamat ɔma unengudi ɔni na ude mmɔ kɔtɔ ku Tiro ku Sidon lɛma bekyuli bani náda anu mmɔ.

3Tiro ɔ́tu kagyumanakɔ kpakplaa na ɔ́buma sika ɔƒualadi ku ugyiedi úyile mmɔ kalɛ na basu banii ulu ntɛ lɛti na lɛdi.

4Na ɔƒaani ni, Unwoti ɔdubɔni Tiro kɔtu na ɔya na kɔwaba kuƒie-nwu. Nwuna lɛkɔlɔ libendi lɛdubɔnu ntu na lɛdi lɛnɔ lɛda ogya. 5Na Askelon ku Gasa lɛma ƒui litaatɔ kpakpaakpa na liƒu ɔsu. Na Ekron anwu ɔyila lɛnunsia biala. Badubɔdu Gasa ɔga na bayila Askelon bekyuli ƒui udu.

6Baƒɔ bebi badubɔsi ekpo ekpo bebeti Asdod ɔma ɔmmɔ benwini ama ɔdi. Na Unwoti ɔlati ɔdubukpeli Ƒilisti ubo na nwuna lɛlɔ katɔ bɔtalaku ɔsu. 7Na Ƒilistiƒuɔ basɔ baaadubo lɛna ku ubugya bɔkun iye adila bamba ani muusé lɛlɔ. Mmomu badubunwini Yuda kakɛ kadi na basɔ balakun lɛna ku ubugya. Ama lɛnɔ badubunwini bula Katɔti bekyuli aani kɔdua na Yuda adua akladi akɔ. Na Katɔti ɔdubɔƒɔ Ekron ɔma bekyuli aani kalɛ na ɔ́bla Yebusiƒuɔ.

8Katɔti ɔnini, “Ndubo lɛlɔ bɔklibi buse na lɛgyumana mina kakpakɔ na bekyuli bani muubo banii bebekpo babwɛ ɔtɔ ɔmmɔ ɔsu. Ngyi ala ani ƒui mɔɔlɛ́, na nsɔ lɛɛɛdubo kuƒi bute na ɔdi ubabla mina kadi bekyuli kalala kadi lɛnɔ.”

Unwoti Ɔ́su Ka Badubɔwɔ Ɔga

9Ukyuli biala ɔni nkya Sion ɔdi limeyi na ɔva momoomo ku ebiti banini, “Bɛnu! Bina ɔga ɔdubo-mii kudɔ. Use siin na ɔdanku bɔƒɔ. Uboku lɛlɔ kalɔ na ulie ebuo ala utine ubi lɛlɔ ɔdubo. 10Ami, Unwoti, ndubɔda kekpo kɛɛkɛ ku bana bapɔnkɔ lɛlɛku Israel kalɔ lɛlɔ. Na kɔtaminta kɔni na bényimi bése béte kekpo ni, ndubɔƒɛ-ku ƒui. Ndubuti keyi buɛɛ liboku kadi bekyuli. Na ƒula ɔga ɔdubɔdi lɛlɔ ɔ́si ɛpu ɔvi unwi úsie ɔvi ɔkladi. Na nwuna lɛga kadikɔ kadubɔsi Euƒrate Ketu bonwu kɔtu na kavia kalɔ ƒui lɛlɔ.

Unwoti Úse Kenye Ka Ɔdubudie Bekyuli Bani Ƒui Na Béƒie

11“Kenye kani na línyimi ku amii mina bekyuli ni, ubugya na búti buse-ka likpo. Na ɔƒaani ni, amii badi bɛdi bekyuli bani na béƒie bákya libiɔ lɛni kemmo na ntu buuuwi kemmo. Nsu ndubo mbedie-mii na lɛƒɔ-mii, 12na lɛya na bɛsɔ bɛkɛ lɛnunsia. Binwini bisie bina kagyumanakɔ kpakplaa kammɔ. Ɔsika ɔmwi ni, ndubo-mii kayu bɔƒɔ akpa anyɔ na kabla ala ani nése-mii dii ɔsu. 13Na ndubuti Yuda lɛbla aani mina kataminta na liti Israel lɛbla atula. Na ndubuti Sion bekyuli lɛbla aani mina kewii na likpoku Grikiƒuɔ.”

Unwoti Ɔdubɔgyumana Nwuna Bekyuli

14Unwoti Katɔti ɔdubɔda ɔlɛ kayaa na bana eli, na nwuna atula adubo butaatu taavi kayaa aani kalɛ na kayaa kaabwɛ ogya.

Katɔti ɔdubɔya na bavwi nwuna kɔkpɛɛ, na ɔdubukpoku nwuna bekisine na ɔƒɛƒɛɛ kpakplaa ɔni mɔɔkya ligede kemmo ɔsi kada kakɛ. 15Unwoti Ɔyikune Ƒui ɔdubo nwuna bekyuli bɔgyumana, na ɔya na bani muuƒwimi kavwinvwi ku atabi bubo geen banya bana bekisine besusu kalɔ. Badubo butaabɔku-ma ku kɔvanu aani bekyuli bani na békpi ntɛ na bana ɔyikun umo-ma aani ubugya akpala kalaku kani néyi tɛtɛɛtɛ.

16Unwoti Katɔti ɔdubudie-ma limeyi lɛmmɔ lɛlɔ, ɔsika nwuna bekyuli na badi. Na badubo buteekeye aani asɛɛ ebi ani náƒɔ kuye geen na akya kagabwa kemmo.

17Na badubɔdia bɔnu geen. Na bakloƒu ku begblebi badubɔlɛ lili na mmɔ aani kalɛ na kamu kaalɛ teenye kemo iye egyiibi ani nánwu asia na adingyii kemo.

Currently Selected:

Sakaria 9: lef

Highlight

Copy

Compare