Lɛnu Ƒui Ɔnu 5
5
1Ami ɔlati mina uleku uveledi,
líbo-ɔ kudɔ
aani ami ɔlati mina kemo
na mbadi ala mini mini ammɔ.
Ndubɔƒiɔ mina uwɔ kɔtakɛ na lɛni uwɔ ɔmmɔ.
Ndubɔni mina ntɛ ku mina bebuo anyii ntu bɔmmɔ.
Mina bakpana, bɛdi na bɛni utédu
uwi ɔni na bɔyɔ bɔmmɔ búmo-mii.
2Ntɛ mɔɔlɛɛ, nsu mina kayi kenye kagyumana,
na muugyé kɔna ka mina ɔyɔne úbo únye kayakun
uubó-mi kɔnu taasu-mi ɔnini,
“Mina kayi ku ɔyɔne, mina lɛmangbɛ
ɔni na lɛla lɛdi lítebie-nwu lɛlɔ,
lɛmi kayakun te-mi!
Amii ani náyu usien umodi ɔmmɔ áƒɔ-mi lili.”
3Nka lɛ́ɛƒɔ lɛgba na lídie mina adala ƒui líse.
Buti na nsɔ ndubo mina adala buti bɔkya,
na aba asɔ etuku-mi lɛgba?
4Mmɔ kani na lɛ́ti ka mina ɔyɔne ɔ́kya kɔnu kegbuta kama
na údie ugyii ɔni na líti lɛ́bala kayakun mmɔ,
na ɔ́bla-mi aani mina utu ɔ́da bubo ɔ́ya.
5Uwi ɔni na lɛ́ta lɛ́da kayakun kalɛmikɔ kammɔ
nnii mɔɔlɛmi ɔtɔ lite mina ɔyɔne ni,
ugyulo nnɔmii ƒɛƒɛɛ kani mɔɔyu-mi kɔnu ku animi lɛlɔ.
6Na ka unye ɔɔtɛmiku-mi ni, ɔ́bla-mi
aani mina utu ɔ́da bubo ɔ́ya.
Nsu ka lɛ́lɛmi ɔtɔ ni, mina ɔyɔne ɔ́yii-mi anumi kɔnakunwi
na lɛ́sɔ ńtanu-nwu.
Lɛni na ɔ́bla aani mina utu bɔnu na ɔ́nu úduo-mi kaƒɔ
ɔni na lɛ́wia-nwu laa na mɔɔva taakpali-nwu taanɔ.
7Mmɔ na usien bagyumanane bani nkɛ mɔɔkɔ́
taayu ɔma unengudi ɔmmɔ kemmo bénu-mi kɔku.
Na béƒie-mi na bébo-mi na bákya-mi ɔlɛ lɛlɔ
na bédie-mi kɔdi kɔni na mbi-mi lɛlɔ.
8Yerusalem begblebi, mɔɔsu-mii kpakplaa
nnii si bɛ́nu mina ɔyɔne ni,
bɛsu-nwu bɛnii nwuna bɔyɔ
bɔɔda-mi na lɛ́bla
kpɛtɛ kpɛtɛ.
9O begblebi ƒui ugblebi,
bi ɔsu na ƒula ɔyɔne lɛlɔ
libo-ɔ kubiti
lɛni utulo ukyuli bamba biala?
Na bi ɔsu na aatala-bu
akya-nwu anii
bɔsu-nwu kalɛ na ƒula kayi kaabla-a na nwuna lɛlɔ?
10Na nkyuli mpim leevu akɔ ni, anwu nálɛ-mi lɛkloƒu utulo
na ɔɔdia bɔnu na ubo ɔlɔkplu geen.
11Nwuna lili lɛ́ƒɔ-mi kuye
litulo sika ugyiedi ɔni ndia
utulo ƒui.
Na linwini ƒuku ƒuku
liwi-nwu lili
na lise totonto aani
aasɛ otondi.
12Na uukeye aani lɛmangbɛ
lɛni nákpi ntu,
na unye libiɔ kɔtu
aani sika ugyiedi asɛɛ,
na béti báklibi-nwu,
na nwuna anumi ebi eekeye
aani bebuo anyi ntu.
13Na nwuna litugya ƒui lise
aani kevoma kemo
kani kemmo na kutu akyala egyiibi ƒɛƒɛɛ áƒɔ ƒui.
Nu-nwu enyekuli aani ugyulo egyii anwula
ani na nwuna ɔnyi ƒɛƒɛɛ ɔni na uudie únwini
aani oloƒui ntu
na bɔɔyu-nwu lɛlɔ.
14Na nwuna enu ese aani kugyii kɔgba
kɔni na béti sika ugyiedi bákya-nwu bɔdia
ku asɛɛ ani na áƒɔ kuye.
Na nwuna ɔlɔgyii umodi use aani atu ɔtunkpɛ.
15Na nwuna lɛgba lise
aani ɔtɔ akpa
ani lɛlɔ na bámana atabi
ani náƒɔ kuye
na eekeye geen na enye sika ugyiedi atabi lɛlɔ.
Na unye lɛgadi kemmo
aani Lebanon Kɔbi
ku kuna egyii kpakplaa
ani nálɛ lili enye
bonwu bonwu.
16Kalɛ na ɔɔkya-mi kɔgbu ɔɔyu-mi kayi geen,
na mɔɔwia-nwu lɛni uwi
biala kemmo!
Currently Selected:
Lɛnu Ƒui Ɔnu 5: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
