Budie Taatina 14

Yohane Ɔ́nu Koƒonu Ubi Ku Nwuna Bekyuli

1Ɔmɛni kama ni, lɛ́nu na budie taatina bɔmmɔ kemmo ka Koƒonu Ubi ɔmmɔ unye Sion Kɔbi lɛlɔ. Na bekyuli bani mabla aani mpim eti anyɔ ku aavlene-ine benye mmɔ. Na bekyuli bamɛni atɛntɛ ni, bénweni Koƒonu Ubi ɔmmɔ ku Ɔti lɛnyi básia. 2Amu na línu lɛdi bonwu lɛdi lɛni nse aani ntu bɔni mɔɔgbá taayu lɛtakpɛ bonwu lɛdi lɛlɔ na lɛ́sɔ lɛ́lɛ aani si katɔ muudu ku kɔku bonwu. Lɛnɔ ni, use aani ɔnu na bagyane baagyá na lɛbentaa lɛlɔ.

3Na nkyuli mpim eti anyɔ ku aavlene-ine bamɛni badi bekyuli bani na bédie básiku kayawi na bákɛ ngba bɔƒɔ. Na bana ƒui benye lɛgaboku ku Katɔti ngba batu ine bammɔ anumi ku benengu bammɔ anumi. Na béteedie ɔnu ɔwɔdi ɔni na ama lɛti pɛ kani nákana-nwu bɔtɛya. 4Ama ndi bekyuli bani náda lɛlɔ sɛɛn. Na bana lɛlɔ lilese lɛlɔ na lɛsɔnɔdi ala lɛlɔ ɔsu. Ama mɔɔsiaku Koƒonu Ubi ɔmmɔ likpo biala na úsela. Ama na bédie bálɛku bayawine ƒui akɔ. Na ama ndi bekyuli bedeedi bani na béti béte Katɔti ku Koƒonu Ubi ɔmmɔ. 5Likpidi lɛɛɛma bekyuli bamɛni lɛlɔ, na ɔkɔ lɛla lɛdi lɛɛɛda-ma.

Yohane Ɔ́nu Katɔ Batu Ine Badi

6Ɔmmɔ kama lɛ́nu Katɔti ɔtu ɔbambadi ɔdi ka úveyi ɔɔví kayaa katɔ katɔ ku litemi buni lɛni nse nte uwi biala. Litemi lɛmmɔ lɛsa na úbo úbakɔ ute bekyuli bani nlie kayawi kamɛni lɛlɔ. Na ama ndi kalɔ biala lɛlɔ bekyuli ku kaba biala ku adi ƒui batɛmine ku bekyuli lidu ƒui. 7Ɔ́su ku lɛdi bonwu ɔnini, “Bɛbu Katɔti na bɛkɔliku-nwu lɛnyi katɔ! Ɔsika nwuna uwi údu ka ɔtɛku bayawine ƒui litemi. Bimwi anwu ɔni nábla katɔ ku kalɔ ku ɛpu ku ntukpa ƒui!”

8Katɔti ɔtu unyɔdi ɔsia udeedi kama na ɔɔva momoomo ɔnini, “Úbuli! Babilon bonwu ɔmmɔ úbuli geen! Kayawi bekyuli ƒui báni ɔma ɔmmɔ alaekpidi bɔbla békpi aani ntɛ. Na ɔ́tɔlɔ-ma aani kalɛ na ɔyalɛ ɔɔtɔ́lɔ bekyuli taatákya likpidi kemmo.”

9Katɔti ɔtu ɔbambadi ɔsia bammɔ kama na ɔɔva ku lɛdi momoomo ɔnini, “Bekyuli bani mɔɔlɛ akɔnkɔ teete eƒiebuo ɔmmɔ ku nwuna baƒiɔ bani na bávɔ béte lɛlɔ ni, ama náƒɔ eƒiebuo ɔmmɔ likpose na bana atɛntɛ iye kɔnu. 10Ama na Katɔti ɔdubɔya na bani nwuna kɔnyi lɛbibo ɔɔƒɛɛ ku ɔdu kati kati! Ogya ku ogya atabi adubo-ma bɔkyula na Katɔti batu kedee ku Koƒonu Ubi anumi. 11Na ogya ɔni mɔɔkyula-ma uyɔ ɔdubɔkɔ uteesie katɔ uwi ƒui. Na usien ku ɔƒɛ ni, bekyuli bamɛni balákɛ bɔnwuna! Ɔsika ama mɔɔlɛ akɔnkɔ teete eƒiebuo ɔmmɔ ku nwuna baƒiɔ, na báƒɔ nwuna lɛnyi likpose.

12“Ɔmɛni ɔsu ɔlɛka amii Katɔti bekyuli bani mɔɔdi Katɔti litemi lɛlɔ na bɛsiaku Yesu kama ulu lɛlɔ ni, binye lɛbibo kenye kpakplaa.”

13Ɔmmɔ kama línu lɛdi lɛdi ka lɛ́si katɔ na lɛɛsu lɛnini, “Nweni ala amɛni. Bekyuli bani na lɛlɔ lɛdubɔyɔ-ma ndi bani ndubukpi ka básiaku Blɔti kama ɔ́si ɔƒɛni úsela ɔsu.” Na Katɔti Kɔyu kɔɔtuna kɔnini, “Ɛɛn, badubɔkɛ bɔnwuna! Na badubɔkɛ bana kabla kɔsia!”

Baasála Kayawi Bekyuli

14Ɔmmɔ kama ni, lɛ́nu ƒututuu ɔdi. Na lɛ́nu ka ukyuli ɔni nálɛ Ukyuli Ɔyawine Ubi ulie ɔmmɔ lɛlɔ, na sika ugyiedi kagabwa kebi-nwu lili. Na ɔda lɛsaka. 15Amu na ɔtu ɔbambadi ɔ́lɛ ɔ́si kakpakɔ mmɔ na ɔ́va ku lɛdi momoomo ɔɔsu ukyuli ɔni nlie ɔmmɔ lɛlɔ ɔnini, “Awɔ, sala Katɔti bekyuli lɛku kayawi aani kalɛ na beeti lɛsaka taanwa edula. Ɔsika uwi údu ka basala-ma bete-nwu.” 16Amu na ukyuli ɔni nlie lɛlɔ mmɔ ɔ́sala-ma na kalɔ kammɔ lɛlɔ ƒui.

17Ɔmmɔ kama lɛ́sɔ lɛ́nu Katɔti ɔtu ɔbambadi ka ɔ́si Katɔti kakpakɔ mmɔ ɔ́yu úbo, na anwu lɛnɔ ɔ́da asɔsɔ ɔni mbo ɔbi.

18Na ɔtu ɔbambadi lɛnɔ ɔ́si Katɔti lɛbi lɛmmɔ kudɔ úbo. Na anwu ndi ɔni mɔɔdi ogya lɛlɔ. Ɔtu ɔmmɔ ɔ́va ku lɛdi momoomo na ɔ́su Katɔti ɔtu ɔni nda asɔsɔ mmɔ ɔnini, “Awɔ, sala bekyuli bekpidi lɛku kayawi aani kalɛ na beeti asɔsɔ ɔni mbo ɔbi teede egyiibi. Ɔsika uwi údu ka basala-ma.”

19Anwuɔsu Katɔti ɔtu ɔmmɔ ɔ́sala bekyuli bammɔ na kayawi lɛlɔ, na úti-ma útéwi kesii kani na Katɔti ɔdubɔni-ma kɔtu aani ebi ani béde béwi ntɛ kablakɔ. 20Na ɔ́ni-ma kɔtu na ɔma ɔmmɔ kabanye aani kalɛ na baamana ntu teedie ebi ammɔ kemmo. Na ubugya ɔ́gba ɔ́si mmɔ, na ɔ́ƒɔ kalɛkɛ kammɔ ƒui. Na ubugya ɔmmɔ bɔgyu ɔdubudu ukyuli limɔ.

Currently Selected:

Budie Taatina 14: lef

Highlight

Copy

Compare