Kɔgya 145
145
1Ndububo-ɔ lɛnyi kudu lɛkɔliku-ɔ katɔ.
Na nteemwi-ɔ lɛnyi kedee úti úsela uwi ƒui.
2Limeyi ndi limeyi ndubumwi-ɔ lɛnyi
na lɛtalaku ƒula lɛnyi katɔ uwi ndi uwi.
3Unwoti Katɔti úbomo geen, na ɔ́manku bumwi.
Na nwuna ɔyikun ni, ukyuli ɔdi ulénu-nwu kalɔ kudii.
4Ƒula ablala ɔsu ni,
badubo-ɔ bumwi ɔ́si kaba útédu kaba.
Na badubo ƒula ala enengudi lidu lidu
ani na ábla lɛsa bɔkɔ.
5Badubɔsu kalɛ na ƒula lɛgadi liikeye,
na ndubulie kalɔ na liduo lɛlɔ kemmo lɛnu
ƒula akɔla ala budie taatina lidu lidu lɛni na aabla.
6Na bekyuli badubɔsu ala enengudi ani na ábla,
na lidie ƒula ɔyikun bonwu keyi lɛtina.
7Badubo lɛbuni bonwu lɛni na ábla-bu butaasu ku lɛlɔyɔ,
na bedie agya basu kalɛ na ese siin na ebo lɛƒɔndia.
8Unwoti ubo lɛƒɔndia na ɔɔnu kɔnyana
na uléti kɔnyi pla pla,
na ɔɔyɔ́ bekyuli uwi ndi uwi.
9Unwoti Katɔti ɔdia ute ukyuli biala.
Na ala ani ƒui na údie ni, ɔɔnu ana ƒui kɔnyana.
10O Unwoti, ala ani ƒui na édie adubumwi ƒula lɛnyi.
Na ƒula bekyuli kedee ƒui badubo-ɔ lɛnyi katɔ bɔtalaku.
11Badubɔsu kalɛ na ƒula lɛga kadikɔ keekeye
ku kalɛ na ebo ɔyikun.
12Na ɔmɛni ɔdubɔya na ukyuli biala ɔnu ƒula ablala bonwu ɔti
ku kalɛ na ƒula Katɔ Ɔga Ɔma lɛgadi liikeye.
13Na ƒula lɛga kadikɔ kammɔ keeebo kawɔlɔkɔ
na awɔ kani ndubɔdi lɛga buteesie uwi ƒui.
Unwoti ɔɔdi nwuna linyese lɛlɔ
na ubo lɛƒɔndia na nwuna ablala ƒui kemmo.
14Na bekyuli bani ƒui mɔɔbla kpɛtɛ kpɛtɛ ni,
Unwoti ɔɔda-ma na ɔɔkya-ma ɔyikun.
Na bani na bakya lɛbibo kemmo ni,
uukpó teete-ma.
15Ƒula ala ediedi ƒui aanu-ɔ anumi.
Na awɔ muute-ma bana lɛdila na uwi lɛlɔ.
16Awɔ muubimi ƒula enu
na lɛla biala nli ngba lɛɛkɛ́ nina lɛla lɛni na ɔɔwia.
17Unwoti use siin na ulu biala lɛlɔ,
na ubo lɛƒɔndia na nwuna ablala ƒui kemmo.
18Unwoti ude bekyuli bani mɔɔkpali-nwu
ulu lɛlɔ ku ɔbu geen.
19Bekyuli bani ƒui mɔɔyia-nwu ku ɔbu ni,
ɔɔbla bana lɛyɔla teete-ma.
Na uunú bana kɔvanu na uubo taabaƒɔ-ma si bévele-nwu.
20Na bani ƒui mɔɔyɔ́-nwu ni, ɔɔgyumana-ma.
Nsu balalane ama ni, ɔdubɔyila-ma udu.
21Ndubumwi Unwoti uwi biala.
Amii nwuna ala ediedi ƒui bimwi-nwu lɛnyi kedee
ɔ́si ɔƒɛni úsela uwi ƒui.
Currently Selected:
Kɔgya 145: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
