Agba 1
1
Agba Adanku Kasusu Kadi
1Agba amɛni na Dawid ubidi Salomo ɔni ndi Israelƒuɔ Ɔga úbo.
2Na lɛla lɛni na agba amɛni adanku ndi
ka atina bekyuli na bakana badi lɛlɔ lɛlɔ
na benu asugba kalɔ.
3Na bekyuli batɛya kalɛ na bada lɛlɔ kaduɛ
na belie ngba buni,
na babla ala na ulu lɛlɔ siin na adia lɛnɔ.
4Agba amɛni ndubɔya na bani na bana
kasusu kásɔ bati lɛla.
Na begblebi ku bakloƒu bati lɛla
na babla kasusu na bana keliela lɛlɔ.
5Na bani na báda anu ni,
bana lɛnunda lɛɛkɔ́ katɔ teebu.
Na bani mɔɔnu ala kemmo taati lɛnɔ
bati bana kasiakɔ.
6Na benu agba ku kenwini etemila kalɔ
na benu banundane agyolo ku kekuma atɛ kalɔ.
7Unwoti bɔyia ndi ukyuli lɛlati kalɔ kesekɔ.
Nsu badɔlɔdi beení lɛnunda etemila
ku kalɛ na badi lɛlɔ lɛlɔ kaduɛ.
Da Anu Ɔkɛnku Kalɛ Na Ƒ'ɔti Ɔɔlɛ-ɔ Kpakplaa Lɛlɔ
8Ubi, se atu na enu ƒ'ɔti ɔda bubo.
Na teni ƒ'ini lɛla lɛni na ɔɔtina-a.
9Lɛla lɛni na átɛya bana kudɔ
ɔdubunwini kagabwa kebi-ɔ lili.
Na unwini asɛɛ abuni akya-a limɔ.
10Mina ubi, si bekyuli bekpidi baadɔ́dɔ-ɔ ni,
nwini kama kya-ma!
11Badubɔkana na basu-ɔ banini, “Bo, basiaku-bu.
Na aya na bɔbɛ na bɔdu ukyuli ɔdi!
Na bubi kesii kadi butaatu bekyuli
bani nátabla-bu lɛla lɛdi.
12Ya na bubweli-ma ngba ngba aani kaƒiɔtɔ,
na bɔyila-ma udu ƒui aani bekyuli
bani nánu béduo ubu kemmo.
13Na bana ala abuni ani na búƒie bɔ́ƒɔ ni,
bɔdubuyile bula lɛtɔ ku-nya!
14Bo na ebenyeku-bu kpakplaa,
na abu ku-ɔ bɔdubule ala ani na búƒie bɔ́ƒɔ mmɔ.”
15Ubi, tesie ku bekyuli bammɔ udu!
Tani tede bana kɔvinkɔ munu munu!
16Baababla ku usi taatábla ekpidi.
Na baababla teewi ubugya kalɔ.
17Keeke na aakywɛɛ kakpagyuɛ
si baasɛ benye baanu!
18Nsu uuuse lɛni ku bekyuli bammɔ udu.
Ama alati lɛlɔ na bebi baatú,
na kubu na baasia ama alati lɛlɔ.
19Bekyuli bani ƒui na anumi eegyie-ma
na lɛkɛ likpidi lɛlɔ ni,
lɛni na bana kawɔlɔkɔ kaabla.
Bɔlɛ Ute Bekyuli Bani Muuní Lɛnunda
20Lɛnunda lise aani ukyuli ɔni muubó kudu na lilu lɛlɔ.
Na uute kenye na kɔsalakɔ ƒui.
21Na ɔɔkpali bani ƒui nkɛ ulu unengudi
ɔni lɛlɔ baaní lɛsɛ, na uubó kudu
taasiku awodu eli.
Na ɔɔsu nwuna kenye na ɔma unengudi
ɔmmɔ awoduku kɔyakun kenye.
22Lɛnunda ɔ́kpali ɔnini,
“Amii bani na bina kasusu kásɔ ni,
uwi ɛlɛ na bɛdubusie anumi ku bina ngba
bɔni násɔ bulie bitédu?
Uwi ɛlɛ na amii bani mɔɔmá litemi geen
lɛmmɔ bɛdubɔbla lɛni bitédu?
Na amii badɔlɔdi bikisi lɛlati?
23Si bunu na bínu-mi bɔdɔnku ni,
nka ala ani ƒui nkya-mi kayi kemmo
na ndubudie lɛsu-mii,
na lɛya na bɛti mina lili kemmo kakali ƒui.
24“Nsu bítakpete-mi uwi ɔni na lɛ́kpali-mii.
Na uwi ɔni na lídie enu nnii mɔɔƒɔ́-mii ni,
ɔdi útenwini útanu-mi.
25Na ka bíni mina bɔlɛ
na bilátuna bɛnii ndɔnku-mii ɔsu ni,
26Ami lɛnɔ ndubo-mii bɔma
si uwi ɔni na ɔgbankpi úbo-mii lɛlɔ.
Na lɛpii-mii si uwi ɔni na lilikpi ala eekpóku-mii,
27na ese aani ɔƒɛƒɛɛ kpakplaa
uwi ɔni na ɔgbankpi ɔda-mii ɔɔvínku
aani ɔƒɛƒɛɛ ɔni mɔɔkya ligede
na ala ani nétulo-mii áya na kayi kaakpulu-mii.
28“Uwi ɔmmɔ ni, bɛdubɔkpali ami Lɛnunda,
nsu naaakpete-mii.
Na bɛdubɔwia-mi na bilanu-mi.
29Ɔsika bíkisi lɛlati na bítaƒuna
ka bitaayia Unwoti ku ɔbu.
30Bíni mina bɔlɛ
na bíveli atu na mina bɔdɔnku ɔsu
31na ngba bɔni udu na bilie ni,
nwuna ebi na bɛdubo bɔdi.
Na ulu ɔni na bɛ́ƒuna ka bɛsia ni,
nwuna ala emo-mii.
32Ɔsika bekyuli bani na bana kasusu kásɔ ni,
ngba bukpidi bɔni na belie ndubo-ma bɔdu.
Na ala ani na badɔlɔdi baakali ka átɛ áwɔlɔ ƒui
ndubo bɔya na bayii ku udu.
33Nsu bani ƒui muunú-mi litemi ni,
badubulie ngba na atu bɔyɔ kemmo,
na lɛla lɛdi lilékpoku-ma
na balayia ka ukpidi ɔdi walɛku-ma lɛnɔ.”
Currently Selected:
Agba 1: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
