Bumomo Bɔka 10
10
Mose Uti Sika Ɔƒualadi Ɔvɔ Kakpɛɛ
1Amu na Unwoti ɔ́su Mose ɔnini, 2“Tu sika ɔƒualadi na eti avɔ kɔkpɛɛ inyɔ, na eteeti-ku taalɔ Israelƒuɔ taasala ku kati bute uwi ɔni na bata bana keliekɔ bayu ulu. 3Si bávwi kɔkpɛɛ inyɔ bɔmmɔ ni, na Israelƒuɔ ƒui ɔlɛka babasiaku-ɔ na Unwoti Adi Kevo kammɔ anumi. 4Nsu si bávwi kakpɛɛ kenwi ni, na ɔɔtina ka benengu bammɔ ku baduɔti bammɔ ƒui ɔlɛka babasa-a kudɔ na Unwoti Adi Kevo kammɔ anumi. 5Si bénu kɔkpɛɛ bɔku klukwii kunwi kani, ni, na ɔɔtina ka adua ani náda keliekɔ na ɔƒɛ katukɔ kakɛ na ɔlɛka bata bayu ulu. 6Na si básɔ bénu-ka bɔvwi lɛni kani kunyɔdi ni, na adua ani náda keliekɔ na kada kakɛ na ɔlɛka bata bana keliekɔ bayu ulu. Kɔkpɛɛ bɔvi klukwii ɔmɛni ndubɔbla kati bute uwi ɔni na bata bayu ulu. 7Na bekyuli bammɔ ƒui bɔlɔ bɔsala ni, ɔlɛka kɔkpɛɛ kɔmmɔ bɔvwi bɔvumana ku kati bute kalɛ na bata bayu ulu.
8“Na Aaron bebi bani ndi bakpane ndubo kɔkpɛɛ kɔmmɔ butaavwi. Na ɔda bubo bɔmɛni buse bute-mii uwi ƒui ku bina bawɔ bawɔ. 9Na si bɛ́ta bɛnii biikpóku bina bekisine bani na banii babaƒɔ-mii kalɔ ni, na bɛvwi kakpɛɛ kammɔ kɔnakunwi. Na bina Unwoti Katɔti ɔdubo-mii bunyimo na ukpo ɔƒɔ-mii na bina bekisine enu kemmo. 10Na bina lɛlɔyɔ emeyi ku emeyi ani na bɛ́lɛ ugyii bíse aani kɔbuli kɔwɔdi bɔlɛ ku abamba ni, bɛvwi kɔkpɛɛ kɔmmɔ na bɔkyula akpala ku unwi bɔbla akpala ammɔ lili na adubunwini bina lɛlɔ enyimo ete Unwoti na bina lili. Ami ndi bina Unwoti Katɔti.”
Israelƒuɔ Báta Sinai Ketele Kemmo Bátɔlɔ
11Na lɛkwa linyɔdi kɔbuli kunyɔdi limeyi aavlanyɔdi lɛlɔ ka Israelƒuɔ bálɛ Egyipte kalɔ lɛlɔ ni, liƒlukutu lɛmmɔ lɛ́sɔ lɛ́ta na Unwoti Adi Kevo lɛlɔ. 12Amu na Israelƒuɔ báta Sinai ketele kalɔ kakwiidi kemmo mmɔ báyu ulu na bávi ekpo ekpo. Na liƒlukutu lɛmmɔ lítáyu lílie Para ketele kalɔ kakwiidi kemmo. 13Na kudeedi kɔmɛni na báta báyu ulu na Unwoti ɔda bubo kenye ɔkɛnku Mose lɛlɔ.
14Na Yuda kaba bekyuli náka bɔta na bana esu kenye ku bana likposela na Aminadab ubidi Nahason ndi bana ɔtɔnkune. 15Na Suar ubidi Netaneel ɔtɔnku Isakar kaba bekyuli lisu. 16Na Helon ubidi Eliab ɔtɔnku Sebulon kaba bekyuli lisu.
17Ɔmmɔ kama bégyingya Unwoti Adi Kevo kammɔ na Gerson bebi ku Merari bebi bani nti-ka lɛnɔ báyu ulu.
18Ɔƒɛni Ruben kaba bekyuli násia-ma kama, na bana esu esu kenye, na Seleur ubidi Elisur ɔtɔnku-ma ku bana likposela. 19Na Surisadai ubidi Selumiel ɔtɔnku Simeon kaba bekyuli lisu. 20Na Deuel ubidi Eliasaƒ ɔtɔnku Gad kaba bekyuli lisu. 21Ɔmmɔ kama Kehat kaba bekyuli bani nti Unwoti Adi Kevo kemmo ala kedee basia. Na ɔdi ka balɛ Unwoti Adi Kevo kammɔ asa na ama betédu mmɔ.
22Ɔmmɔ kama Eƒraim kaba bekyuli nsia na bana esu esu kenye, na Amihud ubidi Elisama ɔtɔnku-ma ku bana likpose aƒlaga. 23Na Pedahsur ubidi Gamaliel ɔtɔnku Manase kaba bekyuli lisu. 24Na Gideoni ubidi Abidan ɔtɔnku Benyamin kaba bekyuli lisu.
25Amu na kawɔlɔkɔ ƒui ni, Dan kaba bekyuli bakpɛ kama na bana esu kenye aani lisu likplodi. Na Amisadai bidi Ahieser ɔtɔnku-ma ku bana likposela. 26Na Okran ubidi Pagiel ɔtɔnku Aser kaba bekyuli lisu. 27Na Enan ubidi Ahira ɔtɔnku Naƒtali kaba bekyuli lisu. 28Na lɛni na Israelƒuɔ kaba bekyuli esu esu ammɔ béti bésie bana ulu ɔmmɔ ka báyu ulu.
29Amu na Mose ɔ́su ulekudi ɔti Hobab ɔni ndi Midiani ɔni baalɔ Reuel ubidi ɔnini, “Uwi údu ka buteesie kalɔ kani na Unwoti ɔ́su úse ɔnini, ‘Ndubuti-ka lite-mii,’ mmɔ lɛlɔ. Bo na abasiaku-bu, na bɔdubɔda-a kaduɛ, ɔsika Unwoti úse ala abuni kenye úte Israelƒuɔ.”
30Amu na Hobab údie kenye ɔnini, “Oowo, lɛɛɛdubo mmɔ busie, mmomu línwini lísela mina bati ku beni kalɔ lɛlɔ.”
31Mmɔ na Mose ɔ́su-nwu ɔnini, “Buvele nda-a tatɔlɔ-bu kudɔ. Ɔsika agyi kesii kani búsela bútáda bula keliekɔ na ketele kalɔ kakwiidi kemmo, na adubɔbla ɔtɔnkune ete-bu. 32Na si asiaku-bu ni, ala abuni ani na Unwoti ɔdubute-bu mmɔ ni, abu ku-ɔ ƒui bɔdubule-nya.”
33Ɔmmɔ ɔsu Israelƒuɔ báta Sinai kɔbi kedee kaƒɔna mmɔ na bésie emeyi atɛ. Na Unwoti Bunyimi Adaka ɔtɔ-ma emeyi atɛ ammɔ ƒui kalɛ na utáwia keliekɔ kadi ute-ma na banwuna. 34Na Unwoti liƒlukutu lɛmmɔ lɛɛƒa-ma katɔ ɔƒiiwi ɔ́si ɔni na báta bakɛ ulu.
35Na uwi biala na Bunyimi Adaka ɔmmɔ ɔdubo bɔgyu ni, Mose uudie kudu kɔmɛni,
“Unwoti ta!
Na ƒula bekisine begyingya.
Na aya na bani muukisi-ɔ bekeli na ƒula anumi.”
36Na uwi biala na Adaka ɔmmɔ ɔdubo budi bunye na Mose ɔsɔ udie kudu ɔnini,
“Unwoti, yu bo,
Israelƒuɔ bekyuli mpim mpim akɔ.”
Currently Selected:
Bumomo Bɔka 10: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
