Mateo 12
12
Yesu Ku Ƒarisiƒuɔ Bákya Unyeƒi Na Lɛnwunameyi Lɛlɔ
1Uwi ɔdi kama ni, Yesu ku nwuna batɛyane bási baaví kemo kadi na lɛnwunameyi lɛlɔ. Ka kɔka kɔɔda nwuna batɛyane bammɔ ɔsu ni, bése kalɔ baaƒɛ edula adi ani nse aani anta taavumi taakun. 2Ƒarisiƒuɔ badi bánu ɔmɛni na básu Yesu banii, “Ƒula batɛyane baabla lɛla lɛni na ɔda bubo bɔmmɔ bútile kuƒi ka babla na lɛnwunameyi lɛlɔ.”
3Mmɔ na Yesu údie kenye na úye-ma ɔnini, “Bítaka Bunweni Kedee Ɔku kemmo ala bítenu lɛla lɛni na Dawid ɔ́bla uwi ɔni na kɔka kɔɔda anwu ku nwuna bekyuli? 4Útéduo Katɔti ɔtɔ kemmo na úti adila ani na béti bákpa béte Katɔti úboku na bádi. Ɔ́bla lɛni ina ka bakpane lɛti pɛ na ɔlɛka badi adila ammɔ. 5Ngyi ka bɛ́ka lɛnɔ na ɔda bubo ɔku kemmo ka ina ka bulabla kabla kadi na lɛnwunameyi lɛlɔ ni, bakpane bani nkya Katɔti kakpakɔ mmɔ beeti bebuo taakpa. Na baladu-ma kɔtɔ. 6Na mɔɔsu-mii ka ni, lɛla lɛni náƒɔ kuye litulo Katɔti kakpakɔ lɛkya bina akɔ mɛni. 7Bunweni Kedee Ɔku ɔɔsu ɔnii, ‘Kɔnyana bɔnu na ami Katɔti mɔɔwia, na ɔɔɔdi bebuo lɛkpa.’ Si biinú ala amɛni kalɔ ni, nka biládu bekyuli bani na bátaƒiɔ-mii kɔtɔ. 8Ɔsika Ukyuli Ɔyawine Ubi ɔdi lɛnwunameyi Unwoti.”
Yesu Ɔ́bwi Ɔnana Ɔni Kɔnu Kunwi Kɔ́gogolo-nwu
9Amu na Yesu ɔ́tɔlɔ úsie Yudaƒuɔ kasalakɔ kadi. 10Mmɔ na útánu ɔnana ɔni na kɔnu kunwi kɔ́gogolo-nwu. Bekyuli badi bakya mmɔ bani nkya mɔɔwia ka bakywɛ Yesu kakpagyuɛ kalɛ na ɔƒiɔ ɔda bubo bɔmmɔ. Anwuɔsu béye-nwu banini, “Ɔda bubo buute kuƒi ka babwi ɔlɛ na lɛnwunameyi lɛlɔ?”
11Yesu lɛnɔ úye-ma ɔnini, “Si úbo úte ka bina ɔdi ubo koƒonu kɔdi na kútánu ubu na lɛnwunameyi lɛlɔ ni, ulésie uletédie-ku? 12Ukyuli ɔ́ƒɔ kuye útulo koƒonu. Anwuɔsu ɔda bubo buute kuƒi ka bɔnu kɔnyana na lɛnwunameyi lɛlɔ.”
13Amu na ɔ́su ɔnana ɔni na kɔnu kɔ́gogolo-nwu mmɔ ɔnini, “Nene ƒula kɔnu.” Na únene-ku. Kɔnakunwi ni, kɔnu kɔmmɔ kɔ́sɔ kɔ́bla aani kalɛ na kunyɔdi kɔmmɔ kuse. 14Amu na Ƒarisiƒuɔ bani nkya mmɔ bátɔlɔ na bátábla kasusu ka badu Yesu.
Yesu Ndi Kabla Ɔblane Ɔmmɔ Ɔni Na Katɔti Ɔ́ƒuna
15Uwi ɔni na Yesu únu ka Ƒarisiƒuɔ beeti-nwu lɛlɔ kasusu kekpidi ni, ɔ́tɔlɔ-ma kudɔ mmɔ, na bekyuli pii badi básiaku-nwu. Ɔ́bwi bani muuƒi ƒui na bana akɔ. 16Na ɔ́bala-ma ɔnii betedie-nwu keyi. 17Ɔ́su lɛni kalɛ na lɛla lɛni na Katɔti ɔ́su úse ɔkɛnku nwuna Kenye Udiene Yesaia lɛlɔ ebo ete lɛni sɔsɔ. Ɔ́su ɔnini,
18“Ɔmɛni ndi mina kabla ɔblane ɔni na lɛ́ƒuna,
na mɔɔyɔ́-nwu. Na mina kayi kasia-nwu lɛlɔ geen.
Ndubuti mina Kɔyu lɛkya-nwu lɛlɔ kemmo
na wedie litemi bɔtɛ siin keyi watina kadi ƒui.
19Ulakyaku ukyuli ɔdi unyeƒi iye ɔvanku ukyuli ɔdi.
Na ukyuli ɔdi ulénu-nwu lɛdi na kuyeya ulu lɛlɔ.
20Ɔdubɔda bani neeebo lɛlɔkplu buɛɛ,
na ulakwanyiku bani na enu áƒɛ-ma.
Mmomu ɔdubunye kpakplaa utédu ka litemi bɔtɛ siin wadi lɛlɔ geen.
21Na kadi bekyuli ƒui badubɔsia anwu lɛti anu.”
Básu Banii Yesu Ɔyikun Ɔ́si Ayu Ekpidi Ɔtɔnkune Kudɔ
22Amu na bekyuli badi béti ɔnana ɔdi ɔni na kɔyu kukpidi kuukpóku-nwu na ulákana bɔnu iye ulétemi béboku Yesu kudɔ. Na Yesu ɔ́bɔku kɔyu kɔmmɔ na ɔlɛne ɔmmɔ ɔ́kana na uutemi na ɔɔnu lɛnɔ. 23Ɔmɛni ɔ́bla bekyuli bammɔ kalɛ kadi. Na béye banii, “Ɔga Dawid Uwɔ Ɔƒunadi ɔmmɔ na ɔdi mɛni?”
24Amu na uwi ɔni na Ƒarisiƒuɔ bénu ɔmɛni ni, básu banini, “Ɔkɛnku ayu ekpidi unengu Beelsebul lɛlɔ na ukyuli ɔmɛni ɔɔgyá ayu ekpidi taalɛku bekyuli lɛlɔ kemmo.”
25Na Yesu ɔ́ti bana kasusu na ɔ́su-ma ɔnini, “Lɛga kadikɔ kani néle lɛlɔ akpa akpa ni, kelénye. Na ɔma iye kaduli kani muule lɛlɔ akpa akpa na beekpóku lɛlɔ ni, kaabwɛ. 26Na si lɛkpa linwi liikpóku lɛkpa linyɔdi na Satan lɛga kadikɔ kemmo ni, na ɔɔtina ka lɛga kadikɔ kammɔ kéle lɛlɔ na kadubɔbwɛ. 27Na bi ɔsu na bɛɛsu bɛnii Beelsebul ɔyikun kemmo na mɔɔgyá ayu ekpidi taalɛku bekyuli lɛlɔ kemmo? Si use lɛni ni, bɛɛkali ka nwuna ɔyikun kemmo na bina basiakune ama beeti taagya ayu ekpidi taalɛku bekyuli lɛlɔ kemmo? Oowo! Ala ani na bina basiakune baabla mɔɔtina ka bina kakali kaaadia! 28Ɔɔɔdi Beelsebul ɔyikun na ɔdi. Mmomu Katɔti Kɔyu néte-mi ɔyikun ɔni na muuti taagya ayu ekpidi taalɛku bekyuli lɛlɔ kemmo. Na ɔmɛni ɔɔtina ka Katɔti lɛga kadikɔ kéebo-mii akɔ.
29“Mbo ɔyikun ntulo Satan, ɔsika ukyuli ɔdi ulakana na wabwɛ weduo ɔyikune ɔdi kɔduli weti-nwu ala ntu si ɔ́kana-nwu buƒie bunyimi asa na wakana-nwu kaduli buduo.
30“Ukyuli ɔni naaasiaku-mi ni, ɔ́ta únye-mi lɛlɔ. Na ukyuli ɔni naaani teede-mi ni, na uukeli-mi. 31Ɔmɛni ɔsu ni, mɔɔsu-mii nnii Katɔti ɔdubuti alaekpidi biala na bekyuli bábla ku anyikpi biala ani na bálɔ Katɔti ƒui ɔkyiɛ-ma. Nsu anyikpi ani na ukyuli ɔdi ɔdubɔlɔ Katɔti Kɔyu ni, Katɔti uleti ulakyiɛ-nwu. 32Na ukyuli ɔni ndubɔlɔ Ukyuli Ɔyawine Ubi anyikpi adi ni, Katɔti ɔdubuti ɔkyiɛ-nwu. Nsu uleti anyikpi ani na ukyuli ɔdi ɔdubɔlɔ Katɔti Kɔyu ulakyiɛ-nwu na ngba bɔmɛni kemmo iye bɔni ndububo kemmo lɛnɔ.
Kugyii Biala Ebi Na Beeti Taanu Kugyii Kɔmmɔ Udu Taati
33“Ɔdi ka bɛti ka kugyii kɔbuni kɔɔnwu ebi abuni, na kugyii kɔni naaadia kɔɔnwu ebi ani naaadia. Kugyii biala ebi na beeti taanu kugyii kɔmmɔ udu taati. 34Bɛdi bekyuli bekpidi geen aani balakpi! Na ala abuni adi alalɛ-mii kenye! Ala ani nkya ukyuli kasusu kemmo kani na uudie keyi. 35Ukyuli ɔbuni ni, ala abuni ani nse-nwu na uudie taalɛku keyi. Na ukyuli ukpidi lɛnɔ ni, alaekpidi ani nse-nwu na uudie taalɛku keyi. 36Mɔɔyá na ɔbla-mii nwaa ka litemi bɔtɛ limeyi ni, ukyuli biala ɔdubudie lɛlɔ kenye na etemila keeke biala nálɛ-nwu kenye lɛlɔ. 37Na amii alati etemila na Katɔti ɔdubuti ɔtɛku-mii litemi na ɔdu-mii kɔtɔ iye ute-mii ubo.”
Yesu Úni Ɔnii Ulabla Akɔla Budie Taatina Adi
38Amu na ɔda bubo ala batinane ku Ƒarisiƒuɔ badi básu Yesu banii, “Ala ɔtinane, bɔɔwia ka abla akɔla budie taatina adi atina-bu kalɛ na bɔƒɔ-ɔ bɔdi.”
39Mmɔ na Yesu údie kenye ɔnini, “Bɛnu kalɛ na ɔmwi limeyi kaba bekyuli bebo likyulikpi na balayia Katɔti. Bɛɛwia bɛnii mbla akɔla budie taatina adi, nsu lɛɛɛdubo bɔbla. Akɔla budie taatina ani kani na bɛdubɔnu ndi ani ndaku Katɔti Kenye Udiene Yona. 40Kalɛ na Yona ɔ́kya kabɛ kebendi kaƒɔ kemmo emeyi atɛ usien ku ɔƒɛ ni, lɛni kani na Ukyuli Ɔyawine Ubi lɛnɔ ɔdubɔkya kalɔ kemmo emeyi atɛ usien ku ɔƒɛ. 41Na litemi bɔtɛ limeyi lɛmmɔ lɛlɔ ni, Niniweƒuɔ badubɔta bebebo-mii lɛnimi enwu, ɔsika bénwini kama bákya bana ekpidi uwi ɔni na Yona ɔ́kɔ lɛsa úte-ma. Na mɔɔsu-mii ka ukyuli ɔdi ɔkya-mii akɔ mɛni na utulo Yona. 42Na litemi bɔtɛ limeyi lɛmmɔ lɛlɔ ni, Uleku Ɔga ɔni nási kada kakɛ lɛnɔ ɔdubɔta unye na ubo-mii lɛnimi enwu, ɔsika ɔ́si ɔgyu kakaaka na úsie Ɔga Salomo kudɔ úténu-nwu lɛnunda ala bɔtina. Na mɔɔsu-mii geen ka ukyuli ɔni ntulo Salomo ɔkya mɛni.
Kɔyu Kukpidi Kɔɔsɔ Taabawia Keliekɔ
43“Mɔɔsu-mii ka uwi ɔni na bágya kɔyu kukpidi bálɛku ukyuli lɛlɔ kemmo ni, kuusié taavi kesii kani nákwii taawia keliekɔ. Na si útakɛ kadi ni, 44kɔɔsu lɛlɔ kɔnii, ‘Ndubɔsɔ linwini nteesie mina kaduli kakukudi kammɔ.’ Na ɔɔsɔ teesie taatánu ka lɛla lɛdi liiibo ɔtɔ ɔmmɔ kemmo, nsu bákpala mmɔ na lɛdi biala lise sɛɛn. 45Ɔmɛni ɔsu ni, ɔɔsɔ teenwini teesie na utákpanku ayu ekpidi maatɛ ani ntulo-nwu, na bebo bebelie mmɔ. Na kawɔlɔkɔ ni, ukyuli ɔmmɔ ablala eebie teetulo kalɛ na ése kudeedi muedi. Ɔmɛni ndububo kaba kekpidi kamɛni lɛlɔ.”
Ɔma Ndi Yesu Kaduli Bekyuli Geen?
46Uwi ɔni na Yesu ɔkya uutemiku bekyuli bammɔ ni, nwuna banwani ku uni bébo bébenye keyi banii baawia ka batɛmiku-nwu. 47Amu na bekyuli bani nnye mmɔ akɔ unwi útásu Yesu ɔnii, “Nu, ƒ'ini ku ƒula banwani benye keyi ngye baawia ka batɛmiku-ɔ.”
48Yesu údie kenye ɔnini, “Ɔma ndi mina uni na ɔma bene ndi mina banwani?” 49Amu na ɔ́kywɛ kɔnu ɔ́tina nwuna batɛyane na ɔ́su ɔnini, “Bɛɛnu mina uni ku mina banwani! 50Na ukyuli ɔni mɔɔbla mina Ɔti ɔni nkya katɔ lɛyɔla ni, anwu ndi mina ɔnwani ɔnanabi ku ɔnwani ulekubi ku mina uni.”
Currently Selected:
Mateo 12: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
