Mateo 1
1
1Ɔmɛni ndi Yesu Kristo kaba kemmo bekyuli anyi. Na kási Dawid kaba kani nálɛ kási Abraham kemmo.
2Na ɔ́si Abraham lɛlɔ úbalɛ Ɔga Dawid lɛlɔ ni, kaba kammɔ kemmo bati anyi atɔ asia ndi amɛni.
Abraham, Isak, Yakob,
3Yuda ku nwuna banwani bananabi,
Peres ku Sera bani uni ndi Tamar, Hesron, Ram,
4Aminadab, Nahson,
5Salmon, Boas ɔni uni ndi Rahab, Obed ɔni uni ndi Rut, Yisai, Ɔga Dawid.
6Na ɔ́si Dawid lɛlɔ úbalɛ uwi ɔni na Babilonƒuɔ béƒie Israelƒuɔ bésienku bana kalɔ lɛlɔ ni, kaba kammɔ kemmo bati anyi ndi amɛni.
Dawid, Salomo ɔni uni ndi uleku ɔni na Uria úti dii,
7Rehabeam, Abia, Asa,
8Yehosaƒat, Yoram, Usia,
9Yotam, Ahas, Hiskia,
10Manase, Amon, Yosia,
11Yekonia ku nwuna banwani bananabi.
12Ɔ́si uwi ɔni na Israelƒuɔ bási Babilon bébo úbalɛ uwi ɔni na báwɔ Yesu ni, kaba kammɔ kemmo bati anyi ndi amɛni.
Yekonia, Sealtiel, Serubabel,
13Abihud, Eliakim, Asor,
14Sadok, Akim, Elihud,
15Eleasar, Matan,
16Yakob, Yoseƒ ɔni néti Maria ɔni náwɔ Yesu ɔni baalɔ banii Ukyuli Ɔƒunadi.
17Anwuɔsu ɔ́si Abraham lɛlɔ úbalɛ Dawid lɛlɔ ni, ɔdi kaba leevu-ine. Na ɔ́si Dawid lɛlɔ úbalɛ uwi ɔni na Babilonƒuɔ béƒie Israelƒuɔ bésienku bana kalɔ lɛlɔ lɛnɔ ɔdi kaba leevu-ine. Na ɔ́sɔ ɔ́si uwi ɔmmɔ kemmo úbalɛ uwi ɔni báwɔ Ukyuli Ɔƒunadi ɔmmɔ lɛnɔ ɔdi kaba leevu-ine.
Kalɛ Na Báwɔ Yesu Lɛlɔ Kɔtɛ
18Ɔmɛni ndi kalɛ na ɔ́bla asa na badubɔwɔ Yesu Kristo. Bévele Maria béte Yoseƒ, nsu asa na badubuti lɛlɔ ni, Maria ɔ́nu ɔ́ti ka ɔda kaƒɔ. Katɔti Kɔyu ɔyikun náya na úbo úte lɛni. 19Yoseƒ ɔdi ukyuli ɔni nse siin na Katɔti anumi. Nsu ka útayɔ ka uwi Maria anumi kalɔ na kadi akɔ ɔsu ni, ɔ́bla kasusu ɔnii ɔɔnyonu-nwu kpoo. 20Ka ɔ́bla kasusu kamɛni na útátɛ ni, Katɔti ɔtu ɔdi údie lɛlɔ ɔ́tina-nwu na kɔna kemmo, na ɔ́su-nwu ɔnini, “Yoseƒ, Dawid kaba kemmo ubi, tayia ka eti Maria aani ƒ'ulekudi kalɛ. Ɔsika kaƒɔ kani na ɔda mɛni ni, Katɔti Kɔyu ɔyikun kemmo na ɔ́si. 21Na ɔdubɔwɔ ɔnanabi. Na awɔ Yoseƒ asia-nwu lɛnyi anii Yesu, ɔsika anwu ndubudie nwuna bekyuli ɔlɛku bana ekpidi kemmo.”
22Maria lɛlɔ etemila amɛni álɛ lɛni kalɛ na ala ani na Katɔti ɔ́su úse ɔkɛ nwuna kenye udiene lɛlɔ ebo ete lɛni sɔsɔ. Ɔ́su ɔnii, 23“Adagyaa ɔdi ɔdubɔda kaƒɔ na ɔwɔ ubi ɔnanabi. Na bekyuli badubɔlɔ-nwu banii Imanuel.” Na nwuna kalɔ budie ndi Katɔti ulieku-bu.
24Anwuɔsu uwi ɔni na Yoseƒ ɔ́gyinya ni, úti Maria ɔ́bla ulekudi aani kalɛ na Katɔti ɔtu ɔmmɔ ɔ́su-nwu. 25Nsu ni, Yoseƒ ku Maria baaagyi lɛlɔ aani ɔnana ku uleku kalɛ útédu uwi ɔni na ɔ́wɔ ubidi ɔnanabi ɔmmɔ. Na Yoseƒ ɔ́sia-nwu lɛnyi ɔnii Yesu.
Currently Selected:
Mateo 1: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.