Lewiƒuɔ Ɔda Bubo 8

Bése Aaron Ku Bebi Bananabi Bakpane

1Amu na Unwoti ɔ́su Mose ɔnini, 2“Sie na etétiku Aaron ku nwuna bebi bananabi eboku ku lɛwu gyɔlɔɔ lɛni baakya mmɔ. Na eti likpose nnɔmii ku ɔmantɛ akɔ ɔgyani ɔni na badubuti bakyula babla likpidi lili buvele akpala ku baƒonu inyɔ. Na eti kagyigyɛ ku bodobodo ɔni kemmo na bɔnyii buuubo ada. 3Na asala kadi bekyuli bammɔ ƒui na beténye Unwoti Adi Kevo kammɔ kaduli kayakun kenye.” 4Amu na Mose lɛnɔ ɔ́bla kalɛ kani na Unwoti ɔ́tina-nwu mmɔ. Na bátása na mmɔ.

5Mose ɔ́su kasalakɔ bekyuli bammɔ ɔnini, “Binu lɛla lɛni na Unwoti úbo ɔda ka bɛbla.”

6Mmɔ na Mose ɔ́ya na Aaron ku nwuna bebi bananabi bálɛ bébo anumi na ɔ́bla-ma ntu bɔkpila ɔdi. 7Úti awu gyɔlɔɔ ɔmmɔ ɔ́kya Aaron, na úti lɛduni lɛdi ɔ́bala-nwu ɔ́mana, na úti awu ɔtɔdi akɔnkɔ bune ɔ́kya-nwu, na úti bakpane awu kpɛtɛ kpɛtɛ kedee ɔ́kya-nwu, na úbo awu ɔmmɔ kavobi lɛduni buni lɛni bédi kaduɛ mmɔ ɔ́bala-nwu kavobi. 8Ɔmmɔ kama úti kayi lɛbalala lɛdiku lɛdi lɛnɔ ɔ́bala-nwu kayi. Na úti Katɔti lɛyɔla bɔti atabi ani baalɔ Urim ku Tumim ɔ́kya kayi lɛdiku lɛmmɔ kemmo. 9Úti dukuu kabwa úbi Aaron lili, na úti sika ugyiedi likpose kalɛkɛ úbo ɔ́da kabwa kammɔ anumi kakɛ aani kalɛ na Unwoti úbo Mose ɔda.

10Ɔmmɔ kama Mose úti likpose nnɔmii bɔmmɔ na ɔ́bla úsusu Unwoti Adi Kevo kammɔ ku kana lɛlɔ ala ani nkya kevo kammɔ kemmo ƒui lɛlɔ na ɔ́bla-nya kedee. 11Na ɔ́kuna nnɔmii bɔmmɔ bɔdi úwi lɛkpabi lɛmmɔ lɛlɔ maatɛ. Na ɔ́kwaa lɛkpabi lɛmmɔ ku anwabui ammɔ ƒui lɛlɔ. Na ɔ́kuna-mu úwi lɛkyami bonwu lɛni nlɛ mmɔ ku lɛkyami lɛmmɔ ɔka lɛlɔ ƒui. 12Na úti likpose nnɔmii bɔmmɔ úwi Aaron lili na úse-nwu likpo na ɔ́bla-nwu kedee. 13Nwuna kama ni, Mose ɔ́lɔ Aaron bebi bananabi bammɔ úboku lɛlɔ kudɔ na ɔ́kya-ma lɛwu lɛtɔdi akɔnkɔ bune lɛmmɔ na úti aduni ɔ́da-ma kavobi. Na úti aduni adi úbo ɔ́da-ma eli aani kalɛ kani na Unwoti úbo-nwu ɔda mmɔ.

14Ɔmmɔ kama úti ɔmantɛ akɔ ɔgyani ɔni na badubuti babla likpidi lili buvele akpala ammɔ úboku. Na Aaron ku nwuna bebi bananabi béti bana enu básia ebuo ɔmmɔ lili bátina ka ɔmmɔ na béti bényene bana kenye ka beti babla akpala ammɔ. 15Ɔmmɔ kama Mose ɔ́du ebuo ɔmmɔ, na úti lɛnimi ɔ́kya ubugya ɔmmɔ kemmo na úti úsusu bebuo ese ani ƒui nlɛ lɛkpabi lɛmmɔ lɛlɔ na ɔ́bla lɛkpabi lɛmmɔ sɛɛn. Na úti ubugya ɔkladi úwi lɛkpabi lɛmmɔ kalɔ na ɔ́bla lɛkpabi lɛmmɔ kedee na lise sɛsɛɛ úte Unwoti kalɛ na udie kɔtu bɔni biala nina lɛlɔ. 16Na úti lɛmwi lɛni ƒui nkya ebuo ɔmmɔ kaƒɔ kemmo ku akɔ ammɔ ku akabi anyɔ ammɔ ku ana lɛmwi ɔ́sia ogya lɛlɔ na lɛkpabi lɛmmɔ lɛlɔ na ɔ́kyula-ni ƒui. 17Nsu ɔmantɛ akɔ ɔgyani ɔmmɔ ɔku ɔni bédie-nwu ku lɛna lɛmmɔ ku ala ani béwilimi-nwu kaƒɔ kemmo ƒui ni, béti-nya bátákyula na keyi na bana keliekɔ kammɔ kama kalɛ kani na Unwoti úbo-nwu ɔda.

18Ɔmmɔ kama béti koƒonu kɔgyani kɔni na badubuti babla akpala bɔkyula mmɔ béboku na Aaron ku bebi béti enu básia-ku lili. 19Mose ɔ́du-ku, na úti ubugya ɔmmɔ ɔ́kuna uwi lɛkpabi lɛmmɔ lɛlɔ ɔ́mana. 20Ɔmmɔ kama úkulo lɛna lɛmmɔ wɛlɛ wɛlɛ na úti ebuo ɔmmɔ lili ku lɛmwi lɛmmɔ ku lɛna lɛmmɔ ƒui ɔ́kyula. 21Na ɔ́ƒɔ aƒɔla ammɔ ku agyobi ammɔ ƒui na úti koƒonu kɔmmɔ ɔ́kyula ɔ́bla akpala bɔkyula ƒui uyɔ ɔnyi ƒɛƒɛɛ ɔni mɔɔyɔ́ ami Unwoti kaƒɔ aani kalɛ na Unwoti úbo-nwu ɔda.

22Amu na úti koƒonu kunyɔdi lɛnɔ úboku, na aku ndi ɔkpane buse ebuo, na Aaron ku nwuna bebi bananabi béti enu básia-ku lili. 23Mose ɔ́du-ku na úti ubugya ɔmmɔ ɔdi úsusu Aaron kɔdianu kɔtu kawɔlɔkɔ mmɔ ku nwuna kɔdianu kɔnu ku nwuna kɔdianu ɔgba animigya. 24Mose ɔ́ya na Aaron bebi bananabi bammɔ lɛnɔ báni béde-nwu na úti ubugya ɔmmɔ ɔdi úsusu-ma kɔdianu atu kawɔlɔkɔ ku bana kɔdianu animigya ku bana kɔdianu lɛgba animigya. Na Mose úti ubugya ɔkladi ɔ́kuna úwi lɛkpabi lɛmmɔ lɛlɔ ɔ́mana.

25Na úti lɛmwi lɛmmɔ ku lɛmwi lɛni ndanku ɔka ku lɛmwi lɛni nkya ebuo ɔmmɔ kaƒɔ kemmo ƒui ku akɔ ammɔ kenye munu munu kammɔ ku akabi anyɔ ammɔ ƒui ku ana lɛmwi úbunku kɔdianu libuli. 26Ɔƒɛni kagyigyɛ kadi kese Unwoti anumi mmɔ, na udie bodobodo ɔni na bɔnyii buuubo-nwu kemmo ku bodobodo udu bamba ɔni nse bɛbɛɛbɛ ku ɔbambadi ɔni na básala ku nnɔ, na úti amɛni ƒui úbunku lɛmwi ku ebuo libuli lɛmmɔ lɛlɔ.

27Ala amɛni ƒui na úti ɔ́sia Aaron ku nwuna bebi bananabi enu lɛlɔ, na bákɔliku-nya katɔ bátina Unwoti bébo akpala ammɔ kudu. 28Ɔmmɔ kama Mose ɔ́sɔ ɔ́ƒɔ-nya ɔ́siku bana enu kemmo ɔ́kyula na lɛkpabi lɛmmɔ lɛlɔ úbunku akpala akladi ammɔ úte Unwoti. Na adi ɔkpane buse akpala bɔkyula ƒui uyɔ ɔnyi ƒɛƒɛɛ ɔni mɔɔyɔ́ Unwoti kaƒɔ. 29Mose úti ebuo ɔmmɔ kayi ɔvu lɛnɔ ɔ́kɔliku katɔ ɔ́tina Unwoti úbo akpala ammɔ kudu. Na ɔmmɔ ndi Mose kadikɔ na ɔkpane buse akpala ani na ɔ́bla kemmo aani kalɛ na Unwoti úbo-nwu ɔda.

30Anwuɔsu Mose úti nnɔmii bɔni na ɔdubuti use Aaron likpo mmɔ ku ubugya ɔni nsia lɛkpabi lɛlɔ mmɔ ɔdi na ɔ́kuna-nwu úwi Aaron lɛlɔ ku nwuna lɛkpa lɛwu gyɔlɔɔ lɛmmɔ lɛlɔ ku nwuna bebi bananabi bammɔ. Na ɔ́ƒuna-nwu úse sɛsɛɛ na ɔ́bla-nwu kedee ku nwuna lɛwu ku nwuna bebi bananabi lɛwu ƒui lɛnɔ.

31Amu na Mose ɔ́su Aaron ku nwuna bebi bananabi ɔnini, “Biti lɛna lɛmmɔ na biƒulo-ni na Unwoti Adi Kevo kayakun kenye mmɔ. Na biti bodobodo ɔni béti bábla ɔkpane buse akpala ammɔ na ɔkya kagyigyɛ kemmo mmɔ na amii kani bɛdi ku lɛna lɛmmɔ aani kalɛ na líbo-mii ɔda. 32Na lɛna ku bodobodo ɔni mebu ni, ɔlɛka bɛkyula-nwu ƒui. 33Na bitavi bitalɛ Unwoti Adi Kevo kaduli kayakun na emeyi maatɛ kemmo úti útédu uwi ɔni na bina ɔkpane buse kabla kammɔ kása bɔbla, ɔsika emeyi maatɛ na baabla kabla kammɔ. 34Ala ani ƒui na bɔ́bla ɔmwi mɛni adi akpala ani ɔda na Unwoti úbo ka bɔbla na udie kɔtu bɔni biala na bina lɛlɔ. 35Na ɔlɛka bɛsɔ bɛkya Unwoti Adi Kevo kaduli kammɔ kayakun kenye emeyi maatɛ usien ku ɔƒɛ. Na bɛbla ala ani ƒui na Unwoti ɔɔwia ka bɛbla kalɛ na bilekpi, ɔsika lɛni na Unwoti ɔɔwia.” 36Ɔmmɔ ɔsu Aaron ku nwuna bebi bananabi bábla lɛla biala aani kalɛ na Unwoti ɔkɛnku Mose lɛlɔ úbo-ma ɔda.

Currently Selected:

Lewiƒuɔ Ɔda Bubo 8: lef

Highlight

Copy

Compare