Yeremia 9
9
1Si bunwini na mina anumi enwini imii ku libiɔ na nteewulo usien ku ɔƒɛ na mina bekyuli bani na bádu ɔsu nka ɔdia-mi. 2Na si busie na ndubɔkana na lisie kalɔ kakwiidi lɛlɔ ntábɛ, na lɛlɛ bekyuli bekpidi bamɛni akɔ ɔkɔ banyine bani naaasiaku Katɔti kama siin kudɔ nka ndubɔyɔ.
Unwoti Údie Yeremia Lɛla Lɛni Na Ɔ́su Kenye
3Unwoti ɔnini, “Ɔkɔ etemila aalɛ́ mina bekyuli kenye aani kalɛ na beebó atula taalɛku kataminta kemmo. Na ɔkɔ ala bɔbla ɔyikun kani mɔɔkɔ́-ma katɔ na ɔdi ulaƒɔ enu taasu ɔnii ami ndi Katɔti.
4“Yeremia, ɔkɔ etemila kani na ƒula bakpana ku lɛlɔ bekyuli ƒui baasu taasiku-ɔ lɛlɔ. Anwuɔsu teti ƒula anu tasia-ma lɛlɔ. 5Lɛlɔ kani na bakɛ beetú taavi uwi ƒui taawia ulu bamba ɔni lɛlɔ na basia banya bana bakpana bakya. 6Ukyuli biala ɔɔwia ka ɔkɛ ɔkpanadi lɛlɔ kɔsia. Na ɔdi biala uláwia ka ɔƒɔ enu ɔnii ami ndi Unwoti.
7“Anwuɔsu ndubo mina bekyuli kɔnyi bukpo na lɛƒɔ-ku lɛbla sɛɛn aani kalɛ na baakya sika ugyiedi ogya kemmo taaƒɔ-nwu na ɔɔbla sɛɛn. Nsɔ liiibo ulu bamba ɔdi lɛlɔ na ndubo bɔsia. 8Bani baawia keyi buɛɛ, nsu bana ɔkɔ ɔni na baanyi kenye kebo ɔbi na ɔɔdú ukyuli teetulo lɛtula lɛni na beebó taalɛ ukyuli na ɔɔɔgyi uuuse. 9Lɛ lɛla lɛdi lɛnumi te-mi na ɔdi kasusu kabuni kani ɔsu na bekyuli bamɛni bátamanku kɔtu bɔni? Ami Unwoti Ɔyikune Ƒui nátɛmi.
Yeremia Úwulo Na Nwuna Bekyuli Lili
10“Muuwulo teete bebuo kadikɔ kani na kakya abi lɛlɔ. Likpo lɛmmɔ lɛ́kwii na livo lɛbuni lɛdi lɛsɔ liiibo mmɔ, ɔsika ɔƒɛ ɔ́kyula lɛla biala na belusiene muedi basɔ balásia mmɔ. Na Ɔmantɛ bebuo ku alakpi akɔ bebuo ku baasɛ ƒui báyii na badi basɔ beeebo mmɔ.”
11Línu ka Unwoti uudie kenye ɔnini, “Si uwi ɔni na lɛ́wɔlɔ ku Yerusalem ku Yuda lɛma ƒui ni, mmɔ kadubɔsɔ kewi ukpludi aani alakpi lisu kesii kani na beƒukutu kani ndubo mmɔ bulie.”
Unwoti Ɔ́kyula Nwuna Kadi Bekyuli Kalɔ Na Bana Ekpidi Ɔsu
12Lɛ́su Unwoti nnini, “Bula ɔdi ulénu kalɔ lɛla lɛni ɔsu na kalɔ kammɔ kénwini kesii kani na ukyuli ɔdi ɔsɔ ulásia taavi lɛnɔ. Ɔdubɔkana na edie kalɔ ete-bu?”
13Mmɔ na Unwoti ɔnini, “Líbile kalɔ kammɔ na káyii udu, ɔsika bekyuli bammɔ bátadi mina litemi lɛlɔ na béni mina ɔda bubo ku ala ani na mɔɔtina-ma. 14Bábla atuɔkplu na bakya baakpá Baal baƒiɔ aani kalɛ na bana bati kuuku bábla. 15Ɔmmɔ ɔsu na ami, Unwoti Ɔyikune Ƒui, Israel Katɔti, líse kenye ka ndubo-a ugyulo ukpidi bute na bani na libile adila lite-ma na badi likpila. 16Na ndubo-ma bugyingya bɔkya na lɛbɔku-ma ntákya kaƒɔ kakaaka kesii kani kɔku na ama ku bana bati kuuku bétenu kudii. Na kawɔlɔkɔ ni, ndubo bɔya na bana bekisine bekpone bebo babadu bana bekplodi ɛlɛɛ bani mebu.”
Beleku Badi Benye Bete Kekwa Kalɔ Keku Buwulone Na Baƒɔ-ma Kayu
17Unwoti Ɔyikune Ƒui ɔnini, “Bɛtala na betétiku beleku bani mɔɔtu lɛkwanu teewulo keku na baƒɔ-ma kayu na bebo. Na bɛwia bani geen na ngyi-nwu kemmo kaduɛ mmɔ. 18Na bekyuli bammɔ lɛnɔ bátuna kɔnakunwi banini, ‘Bɛya na beyile bubo na bebewulo bete-bu utédu uwi ɔni na abu lɛnɔ bula anumi adubɔƒɔ imii.’ 19Bɛya na abu bani nkya Sion buteewulo momoomo na bɔsu bɔnii, ‘Bɔ́yii udu ɔƒaamu! Na bulakana kɔƒa kɔmɛni udu kenye bunye. Ɔsika bábwɛ-bu kɔduli ƒui na bábɔku-bu bálɛku bula kalɔ lɛlɔ.’ ”
20Na buuvele amii beleku bani muudie lɛnu lɛmmɔ bɔnii bɛsia lɛla lɛni na Unwoti ɔ́su anu kaduɛ. Na bɔdubɔtina-mii ɔkwanu ɔni na bɛdubuti bɛtina bina bebi belekubi ku bakpana. 21Bɔkya bula kɔgyumanakɔ kpakplaa kɔni na bɔ́tu kemmo, nsu kukpi kúyu kɔ́sia kúduo-bu lɛlɔ na kɔ́du bula banamu bani nli mɔɔƒia muedi ku bula bakloƒu bani mbo ɔyikun betulo ƒui.
22Unwoti ɔ́su-bu ka bula bekyuli badubo bukpi buwi kalɔ ƒui bɔka bɔmana aani kalɛ na kamu kaayɛɛlɛ teewi kalɔ na bátanwa-ka iye alakpi ani na bébo béwi kalɔ na ute-ka lɛmwi.
Ɔlɛka Bekyuli Babla Lɛla Lɛni Na Unwoti Ɔɔyɔ́ Teetulo
23Unwoti ɔnini, “Ɔdi biala utakun lɛmɛnɛ na nwuna lɛnunda iye ɔyikun iye lɛkɛ lɛlɔ. 24Na ukyuli ɔni mɔɔkun lɛmɛnɛ ni, ɔnu ka nwuna kasusu kese-nwu nwaa na ɔsiaku ami Unwoti. Na lɛla lɛni na mɔɔyɔ́ teetulo ƒui ndi lɛƒɔndia bɔbla ku etemila bɔtɛ siin ku bekyuli kɔnyana bɔnu na kalɔ kammɔ ƒui lɛlɔ.
25-26“Limeyi lɛdubo na ndubo Egyipteƒuɔ ku Edomƒuɔ ku Amonƒuɔ ku Moabƒuɔ kɔtu bɔni ku adua ani bekyuli nkya abi lɛlɔ mmɔ ƒui. Bekyuli bamɛni ƒui békulo ago, nsu ɔɔɔdi ami na baasiaku. Na lɛni kani na use amii Yudaƒuɔ lɛnɔ. Bina ɔlɔna kani na bíkulo na ɔɔɔdi bina kɔyi na bíti bíte-mi na bɛ́vumana udu na bɛsiaku-mi kama siin.”
Currently Selected:
Yeremia 9: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
