Yeremia 40
40
Bédie Yeremia Na Ɔ́kɛ Bɔnwuna
1Ami ku bekyuli bani nási Yuda ku Yerusalem ƒui na bébo kɔgba na bákpanku baatɔlɔku béselaku Babilon. Na Nebusaradan ndi unengu ɔni mɔɔnu bagyumanane bani ndanku-bu mmɔ lɛlɔ. Ka bédi-bu bényene Rama ni, Unwoti ɔ́ya na bédie-mi kɔgba kemmo na béte-mi bɔnwuna. 2Mmɔ na Nebusaradan ɔ́su-mi ɔnini, “Yeremia, Unwoti, ƒula Katɔti, ɔ́lɛ ƒula kadi bekyuli kpakplaa ɔ́siku ɔgbankpi ɔni na ɔdubo bɔya na ɔlɛku-ma lɛlɔ. 3Nsu beni na benye baabla ala ani mɔɔta teenye-nwu lɛlɔ uwi biala. Na ɔƒaani ni, ɔ́ni-ma kɔtu aani kalɛ na ubo-ma lɛnimi enwu úse. 4Ɔmwi ni, lɛ́da kɔgba kɔmɛni muudie-ɔ enu taatina ka líte-ɔ bɔnwuna! Si aayɔ́ ni, akana na asiaku-mi na busie Babilon na ndubɔnu ka bánu-ɔ lɛlɔ kaduɛ kalɛ na ɔ́manku. Na si mɛni lɛnɔ na anii aasɔ akya ni, ebo kuƒi ka esie kesii biala na aayɔ́. 5Gedalia na Ɔga Nebukadnesar ɔ́ƒuna ka utaadi Yuda kalɔ kammɔ lɛlɔ. Akana na elie ede-nwu na ɔdubute-ɔ lɛla biala lɛni na adubɔwia iye akana na elie kesii biala na aayɔ́.”
Amu na Nebusaradan úte-mi adila ku ala ani ƒui na ndubɔyaki, na ɔ́nyonu-mi na lɛ́tɔlɔ. 6Na lɛ́bla kasusu ka ndubɔsɔ lɛkya mina kadi bekyuli kudɔ na Yuda kalɔ lɛlɔ mmɔ, na lilie Mispa ɔma kemmo na lilie lide Gedalia.
Báƒɛ Edula Básiku Mmo Béboku
7-8Netania ubidi ɔni baalɔ Ismael ku Karea bebi bananabi inyɔ bani ndi Yonatan ku Yohanan ni, ama nádi Yudaƒuɔ bekpone benengu. Na lɛni kani na Tanhumet ubidi Seraia ku Netoƒani ɔni baalɔ Eƒai bebi bananabi ku Yasania ɔni nási Maaka. Ama ku bana bekpone ni, bana kakyakɔ keeebo Yerusalem ɔma kemmo, anwuɔsu kekpo kéteƒie ama. Na bénu ka Gedalia ndi ukyuli ɔni na báƒuna ka utaadi Yuda lɛlɔ na bawabane bani mɔɔyaki ala teetulo ƒui banana ku beleku ku banamu ama béteti-ma bátatɔlɔku bétesienku Babilon. Anwuɔsu bésie Mispa mmɔ banii batánu bana lɛlɔ ɔdine ɔwɔdi.
9Amu na Gedalia ɔ́su-ma ɔnini, “Liti mina litemi muute-mii ɔni na utalɛka bɛyia Babilonƒuɔ kabla bablane bammɔ. Mmomu bɛsɔ bɛkya kalɔ kamɛni lɛlɔ na bɛsiaku Babilonƒuɔ Ɔga Nebukadnesar na lɛla biala lɛdubuse kaduɛ lite-mii. 10Ami ndubulie mɛni na ntaaƒɔ Babilonƒuɔ benengu bani ndubo mɛni buteebo. Nsu amii ni, bɛsɔ binwini bisie bina lɛma kemmo na bitaƒɛ edula biboku na bɛbla ntɛ na bidie nnɔ bɔdi lɛnɔ biboku na buse lɛlɛ kama.”
11-12Uwi ɔni na Babilonƒuɔ báka Yuda bukpo ni, Yudaƒuɔ pii békeli bésie Moab ku Amon ku Edom abi lɛlɔ ku kɔlɔ bamba pii lɛnɔ kemmo. Nsu Yudaƒuɔ bamɛni bénu ka Gedalia na Babilonƒuɔ ɔga ɔ́ƒuna úse ka utaadi Yuda kalɔ ƒui lɛlɔ, nsu nkyuli ɛlɛɛ kani nébu bakya kalɔ kammɔ lɛlɔ. Ɔmmɔ ɔsu bekyuli bamɛni bénwini bébo banii bebebunku na bede egyiibi ani nánwu kaduɛ mmɔ na lɛkwa lɛmmɔ kemmo utulo akwa bamba ƒui.
Bekyuli Badi Bádu Gedalia
13Limeyi lɛdi ni, Yohanan ɔ́sala banana bamba bani na anwu ku-ma ƒui nádi Yuda kalɔ bekpone benengu na bébo Gedalia kudɔ na Mispa ɔma kemmo. 14Mmɔ na básu-nwu banini, “Gedalia, búbo bubete-ɔ kati na enye kagyumana ka Amon Ɔga Baalis útétiku Ismael na kayu kenye ɔnii ubadu-ɔ!”
Nsu Gedalia útaƒɔ-ma kenye kammɔ útadi. 15Anwuɔsu Yohanan ɔ́bɛ úbo Gedalia kudɔ na ɔ́su-nwu ɔnini, “Ya na lɛdu Ismael lɛbɛla na ukyuli ɔdi ɔɔɔdubo bɔti ukyuli ɔni nádu-nwu. Ɔsika nkyuli ɛlɛɛ bani nébu na Yuda kalɔ lɛlɔ mɛni beeemomo na ƒula lɛlɔ kani na bana lɛlɔ bɔnu bɔsia. Na si banii bádu-ɔ ɔƒɛni ni, badubo-ma bɔbɔku bugyingya ƒui iye badu-ma muedi.”
16Amu na Gedalia údie kenye ɔnini, “Tadu Ismael! Ɔsika lɛla lɛni na ásu ásiku-nwu lɛlɔ lilakana na wabla litemi geen.”
Currently Selected:
Yeremia 40: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
