Yeremia 38
38
Béti Yeremia Bátákya Libiɔ Lɛni Nákwii Kemmo Ɔtɔntɛne Kalɛ
1Limeyi lɛdi ni, Matan ubidi Seƒatia ku Pasur ubidi Gedalia ku Selemia ubidi Yehukal ku Milkiya ubidi ɔni baalɔ Pasur bénu ka mɔɔsu Yudaƒuɔ ka 2-3Unwoti násu ɔnini, “Kekpo kadubo-mii buƒie si bɛ́sɔ bɛkya Yerusalem mɛni iye kɔka kɔdu-mii iye lɛlɛ likpidi libo-mii na bikpi. Na Babilonƒuɔ badubo-mii bɔka bɔkya na beti ɔma ɔmmɔ ku lɛla biala benwini bana ɔdi. Nsu si bíboku lɛlɔ kalɔ bíte-ma na bɛ́nyonu lɛlɔ bíte-ma ni, badubɔya na bilie ngba.”
4Anwuɔsu bana ine bammɔ bésie ɔga kudɔ na bátásu-nwu banini, “Ɔdi ka adu Yeremia, ɔsika ɔɔkya bekpone bammɔ ku bekyuli ƒui liƒu, na ɔ́ya na baayia ɔni na basɔ beeebo lɛnunsia lɛdi munu munu. Ulebunku bula kadi bekyuli na ulu biala lɛlɔ, mmomu uubile-ma na ɔɔkya-ma ɔlɛ lɛlɔ.”
5Amu na Sedekia ɔ́su-ma ɔnini, “Bɛbla-nwu lɛla lɛni na bɛɛyɔ́, ɔsika lɛɛɛdubo-mii bɔkana bɔbala.”
6Amu na básɔku-mi bésienku ɔga kesii kaduli kemmo kesii kani na bagyumanane bammɔ bakya mmɔ, na báyula-mi bákya libiɔ lɛdi kemmo ku kɔbuli, na libiɔ lɛmmɔ lɛdi ɔga ɔmmɔ ubidi ɔni baalɔ Milkiya libiɔ. Nsu ntu bɔdi buuubo-ni kemmo.
7-8Uwi ɔmmɔ ni, benengu bammɔ akɔ unwi ɔ́kya ɔga kesii mmɔ ɔni nási Kus kalɔ lɛlɔ na baalɔ-nwu Ebedmelek. Ɔnana ɔmɛni nésie Ɔga Sedekia kudɔ uwi ɔni na uli Benyamin Ɔban Kenye mmɔ ɔɔbla nwuna kabla na útásu-nwu lɛla lɛni na bekyuli bamɛni bábla-mi. 9Ebedmelek ɔ́su-nwu ɔnini, “Ɔga Ɔbune, kenye udiene na Yeremia ɔdi, na kalɛ na bekyuli bammɔ béti-nwu bátákya libiɔ kemmo mmɔ ɔɔɔdi munu munu báƒiɔ. Ɔƒɛni si adila ása na Yerusalem ni, agyi anii Yeremia ɔdubo bukpi na mmɔ.”
10Mmɔ na Sedekia údie lɛdi ɔnini, “Tákpanku mina bekpone avlaatɛ na bisie na etédie Yeremia alɛku mmɔ. Na bitenye bitanu na ukpi na mmɔ.”
11Ebedmelek ku bekpone bammɔ bésie ɔga kesii kaduli mmɔ na bátáwia adikpi adi na egulabi kesekɔ ɔtɔ ɔlɔndi kemmo na úbo kabuli ɔ́da-nya lɛlɔ na ɔ́yula ɔ́kya libiɔ lɛmmɔ kemmo. 12Amu na ɔ́su-mi ɔnini, “Ti adikpi amɛni kya ƒula kanwa kalɛ na kɔbuli kɔmɛni kulamana-a.” Anwuɔsu ka lɛ́bla lɛni lɛ́wɔlɔ ni, 13bekpone bammɔ báni-mi bálɛku libiɔ lɛmɛni kemmo. Na ka ɔ́si uwi ɔmmɔ lɛlɔ ni, báda-mi bákya ɔga kesii kaduli kemmo mmɔ na bagyumanane bammɔ akɔ.
Ɔga Sedekia Úye Yeremia Ala Adi Únu
14Ɔga Sedekia ɔ́ya na bákpanku-mi béboku-nwu kudɔ na kakpakɔ ɔkɛ nwuna kayakun kani nábɛ mmɔ kemmo na ɔ́su-mi ɔnini, “Mɔɔwia ka liye-ɔ ala adi na lɛti litemi geen lɛmmɔ.”
15Amu na lídie kenye nnini, “Bi na aawia ati? Ngyi ka si lɛ́su-ɔ muedi ni, aaadubo bunu na bɔwia na adubɔwia ka badu-mi mmomu!”
16Mmɔ na úse kenye ɔnini, “Lɛ́kpali Unwoti, ala ƒui Udiene ɔni nli ngba uwi ƒui, ka lɛɛɛdubo bɔya na badu-ɔ, na ɔdi biala lɛnɔ ulénu lɛla lɛni na bɔɔsu na ɔdi lɛnɔ uládu-ɔ.”
17Amu na lɛ́su-nwu nnii Unwoti ɔnini, “Sedekia, ami ndi Unwoti Ɔyikune Ƒui, Israel Katɔti. Na muusé kenye ka si bɛ́kya lili kalɔ bíte Ɔga Nebukadnesar na bɛ́nyonu lɛlɔ bíte nwuna benengu ni, baaadubo awɔ ku ƒula kaduli bekyuli ƒui ɔdi biala bɔdu. Na balakyula Yerusalem lɛnɔ. 18Nsu si bíni na bɛnii bilakya-ma lili kalɔ bɔdi ni, ndubo bɔya na Babilonƒuɔ bekpone baka ɔma ɔmmɔ bakya na beti lɛla biala benwini bana lɛdi. Na beƒie-mii lɛnɔ na binwini-ma batɔntɛne.”
19Mmɔ na Sedekia údie kenye ɔnini, “Naaakana lili kalɔ bɔkya bute Babilonƒuɔ bani na ama ku Yudaƒuɔ báabla benwi mɛni na beleti-mi belete-ma na babla-mi kalala, ɔsika Yudaƒuɔ bammɔ lɛlɔ libo-mi liƒu geen na mɔɔyia ka badubo-mi bususu kalɛ udu naaadia bɔnu.”
20Amu na lɛ́su-nwu nnini, “Lɛ́su-ɔ ka si adubunu Unwoti litemi ni, Babilonƒuɔ baaadubo-ɔ buti bɔkya Yudaƒuɔ enu kemmo, mmomu adubulie ƒaa na ala adianku-ɔ kaduɛ. 21Nsu Unwoti údie ɔ́tina-mi ka si ébulo na étenu-nwu litemi bɔdi ni, 22badubo ƒula beleku bani na ɔga kesii mmɔ ƒui buƒie na benwini batɔntɛne bete Nebukadnesar benengu. Na beleku bammɔ badubɔsu-ɔ banini, ‘Bakpana bani lɛlɔ na asia anu ni, ama nákpanku-ɔ bátáyila aanu-ɔ náaƒɔ lɛlɔ akya aba kemmo na bakpana bammɔ bénwini na báda-a bese.’ 23Babilonƒuɔ bekpone badubo ƒula beleku ku bebi ƒui buti bunwini bekyuli beƒiedi na beti-ɔ benwini ɔtɔntɛne bete Ɔga Nebukadnesar. Na bakyula Yerusalem bewi kalɔ kputu kputu.”
24Amu na Sedekia ɔnini, “Yeremia, si ánu ka ásɔku lɛla lɛni na ami ku-ɔ bɔsu mɛni asu ukyuli ɔni ni, bakana na badu-ɔ. 25Na ngyi nwaa ka si mina benengu bammɔ báti bula kelisa kamɛni lɛlɔ litemi ni, badubo-ɔ buye lɛla lɛni na ami ku-ɔ bɔ́su. Na ɔƒɛni kalɛ badubɔwia ulu ka badu-ɔ muedi si átasu-ma lɛla lɛmmɔ. 26Anwuɔsu si béye-ɔ ni, na asu-ma ka buvele na ada-mi anii nsɔ ntasɔku-ɔ ntesienku Yonatan kaduli, ɔsika si ásɔ énwini ésie mmɔ ni, adubukpi.”
27Na sɔsɔ ni, benengu bammɔ bánya bébo bébeye-mi bɔsa bɔni na ami ku ɔga bɔsa mmɔ kalɔ bénu. Na lɛ́su-ma lɛla lɛni kani na ɔga ɔ́su-mi mmɔ kani pɛpɛɛpɛ. Anwuɔsu ɔdi ɔ́sɔ úteye-mi lɛla lɛdi útasiku bula bɔsa bɔmmɔ lɛlɔ kudii lɛnɔ ka ɔdi útenu-bu kɔtɔ kɔmmɔ ɔsu.
28Amu na bábala-mi bákya ɔga kesii kaduli bagyumanane bammɔ kudɔ mmɔ útédu limeyi lɛni na kekpo kéƒie Yerusalem.
Currently Selected:
Yeremia 38: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
