Yeremia 30
30
Unwoti Ɔdubudie Israel Ku Yuda Na Bakɛ Bɔnwuna
1-2Unwoti, Israel Katɔti, ɔ́su-mi ɔnini, “Yeremia, ti kugyii akpa ɔku kakunkɛ iye bebuo ɔku kakunkɛ ɔni lɛlɔ na beenweni ala taasia na enweni ala ani ƒui na lɛ́su-ɔ asia-nwu lɛlɔ. 3Limeyi lɛdi lɛdubo na ndubɔya na Israel ku Yuda ƒui basɔ babasala na kalɔ kani na líti líte bana bati kuuku mmɔ lɛlɔ.”
4-5Unwoti ɔ́tala-mi ɔ́kya Israelƒuɔ ku Yudaƒuɔ ɔnini, “Ami Unwoti muunú kɔvanu kɔni ndanku ayiala na ɔɔɔdi keyi buɛɛ kɔvanu. 6Bɔkana na banana badubɔkana na bawɔ? Na bi ɔsu na mɔɔnu-ma ƒuƒuu lɛni na bada bana nƒɔ beesusu ani beleku bani na kawɔƒɔ kaadu? 7Mina kadi bekyuli, blii kani nébu na bɛdubo abi bubo geen butulo ala ani náalɛku-mii ábavi. Nsu ndubo-mii budie ƒui.
8“Ɔƒaani ni, bɛdi bekyuli bani mɔɔbla kadi bamba bekyuli kabla. Nsu ndubo ala nda-mii mmɔ ƒui bɔƒɛ budie-mii lɛlɔ. Na ndubɔƒɛ katuma kɔgba kɔni nda-mii mmɔ ɔsu na binye bɛɛbla bekyuli bamba kabla budie-mii lɛlɔ. 9Na ɔmmɔ kama na binwini mina kabla bablane na lɛƒuna ɔga lite-mii lɛsiku Dawid ɔtɔ kemmo.
10“Amii, mina bekyuli bani nkya katɔ ku kada ƒui, bɛsɔ bitayia. Ami ɔdi na bɛdi bɛ́manku ka lɛni-mii kɔtu, anwuɔsu na lígyingya-mii lɛ́kya kadi bamba bekyuli akɔ na ɔlɔgyu kakaaka. Nsu nsiaku-mii na ndubɔyila kadi bamba bakyuli bammɔ udu. 11Na ndubɔsɔku-mii ku bina bawɔ liboku bina kalɔ kani lɛlɔ na mɔɔgyumana-mii na mɔɔnu-mii lɛlɔ na mɔɔyá na keyi kaayɔ́ku-mii lɛlɔ. Na liƒu biala lɛsɔ lilakya-mii kemmo. Ami Unwoti násu.”
Unwoti Ɔdubɔbwi Israel Ku Yuda Bekyuli Bana Lɛlɛ Lɛni Na Beeƒi
12Unwoti ɔnini, “Mina kadi bekyuli, bɛ́ƒɔ ɔlɛ na bɛɛyɔ́ bikpi. 13Bádu-mii likpidi bonwu lɛdi kɔtɔ na ukyuli ɔdi uuubo ukpo ute-mii. Na alɛbi lɛnɔ áƒɔ-mii lɛlɔ kesii biala ɔni na kuvo kɔdi kuuubo na kɔbwi-mii. 14Na bina bakpana lɛnɔ báyiƒala-mii na basɔ baaadaku-mii lɛda lɛnɔ. Na ami muedi mina ɔbladu ɔ́tina ka línwini-mii ukisine. Na ka bina ekpidi ébomo na emomo ɔsu ni, ndubo-mii ulikplu bɔbla si mɔɔní-mii kɔtu. 15Anwuɔsu ɔdia-mii utulo ka bíbile kenye kpoo na bɛ́sɔ bítewulo bɛnii ɔdi ubaƒɔ-mii na bina ɔlɛ bunu kemmo.
16“Nsu si bina bekisine bákɛ kenyekɔ na banii bɛɛyú-mii iye bayila-mii udu ni, ami lɛnɔ ndubo-ma buyu iye lɛyila-ma udu. Na badubuƒie ama lɛnɔ besienku kaƒɔ ɔlɔgyu. 17Ukyuli biala ulawia ka udie-ɔ kakpana na ɔɔɔdaku-ɔ lɛda lɛnɔ si lɛla lɛdi mɔɔlɛ́ku-ɔ. Nsu ndubo-mii bɔbwi ƒui bɔsiku bina lɛlɛ lɛni nda-mii kudɔ na lɛlɔ lɛsɔ lɛbla-mii sɛɛn na bɛsɔ bɛkɛ bina ɔlɔkplu.”
Unwoti Ɔdubudie Israel Ku Yuda
18Unwoti ɔnini, “Israel ndubo-ɔ kɔnyana bɔnu na asɔ enwini ebo ɔma. Yerusalem, ɔƒaani ni, ɔma ɔmmɔ ɔ́bwɛ na uwi aani kebu, nsu badubo-ɔ bɔsɔku bɔtu ƒui kede kede ku baga kesii kawɔdi na bina kɔduli kɔdubunye kesii kani kúnye dii kúbavi. 19Kadi bamba bekyuli badubo-mii bɔnu bɔƒalɛ na babu-mii. Na bebi badubɔƒɔ-mii kɔduli kemmo pii geen. Na bɛdubo limeyi bɔdi na bɛkɛ ebiti na bimwi-mi ku lɛlɔyɔ lɛnu. 20Na ɔdubuse aani kuuku kalɛ kani pɛpɛɛpɛ. Bina kadi bekyuli badubo-mi bɔkpa. Na ndubɔni ukyuli biala medumi-mii kɔtu. 21Na bina akɔ kani na bɛdubɔkɛ bina ɔtɔnkune bɛsiku. Na si lɛ́lɔ-nwu nnii ubo-mi kudɔ na mina kakpakɔ ni, ɔdubɔni ude-mi na mina lɛkpabi lɛlɔ. Ɔsika ɔdi ulakana-mi bɔni bude si ɔɔɔdi bɔlɔ na lɛ́lɔ-nwu. 22Bɛdubo mina bekyuli bunwini na ami lɛnɔ linwini bina Katɔti. Ami Unwoti násu.
23“Líti kɔnyi geen aani ɔƒɛƒɛɛ ɔni kenye mbo ɔkplu na ndubo bekyuli bani mɔɔbla likpidi butiku. 24Na mina kɔnyi kenye kaaadubo bɔyɔ wetédu uwi ɔni na lɛ́bla lɛni mɔɔyɔ́ lɛ́wɔlɔ. Na limeyi lɛdi ni, bɛdubunu lɛla lɛni na ndanku mɛni kalɔ.”
Currently Selected:
Yeremia 30: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
