Yeremia 20
20
Pasur Úƒie Yeremia
1Amu na Immer ubidi Pasur ɔni ndi ɔkpane ku kakpakɔ bagyumanane unengu únu lɛla lɛni na lɛ́su mmɔ. 2Na ɔ́ya na bébo-mi kaduɛ na ɔ́ya na béƒie-mi na bebo-mi kɔgba bákya kakpakɔ ɔtɔ kemmo na kesii kani na baalɔ Benyamin ɔban kayakun. 3Kadi kegye uwi ɔni na Pasur ɔ́nyonu-mi na mɔɔtɔlɔ mmɔ ni, lɛ́su-nwu nnini, “Unwoti ɔnii, ‘Nsɔ lɛɛɛdubo-ɔ bɔlɔ nnii Pasur, mmomu ndubɔlɔ-ɔ nnii Uƒuluƒuluti. 4Liƒu kani ndubo-ɔ butaada na adubuti liƒu lɛmmɔ akya ƒula bekyuli lɛlɔ. Na adubɔnu kalɛ na bekisine badubo-ma bɔdu na kekpokɔ. Na ndubɔya na Babilon ɔga uƒie ukyuli biala na Yuda kalɔ lɛlɔ ɔtɔlɔku na binwini-nwu bekyuli beƒiedi na ɔdu badi. 5Na ɔdubugyingya lɛla biala na ubo-ni unwini na ɔga kesii egulabi kavumi kesekɔ mmɔ na uti lɛla biala na lɛ́ƒɔ kuye na mmɔ ɔtɔlɔku Yerusalem. 6Pasur, áƒiɔ-mi na uwi ɔni na enye aanyi ɔkɔ, nsu aasu taatina ka ami mina kenye na aasu bekyuli. Na ɔmmɔ ɔsu na ndubɔya na Babilonƒuɔ betiku-ɔ ku ƒula kaduli bekyuli ku bakpana ƒui batɔlɔku aani bekyuli beƒiedi besienku Babilon kalɔ lɛlɔ kesii kani na bɛdubo bukpi na bava-mii mmɔ.’ ”
Yeremia Ɔ́kyaku Unwoti Unyeƒi
7Unwoti átɔlɔ-mi na ábu-mi kɔdɔlɔ. Na ebo ɔyikun etulo-mi ɔsu ádi-mi lɛlɔ. Na bekyuli benye beedumi-mi uwi ndi uwi na baapii-mi. 8Ala bubile ku kukpi lɛsa kani na áya na mɔɔkɔ́ teete bekyuli bammɔ. Na ƒula kenye kani na mɔɔsu mmɔ káya na edumi ku lɛbibo kani na mɔɔsiáku uwi ƒui. 9Na ɔɔbla-mi uwi ɔdi aani nda ƒula lɛlɔ kasusu buti iye ƒula lɛnyi muedi bɔlɔ nnya. Nsu ƒula litemi lɛɛdu-mi lɛlɔ kemmo aani ogya na naaakana na libile kenye lɛsɔ lilie kpoo. 10Muunú ka bekyuli bammɔ baatɛmi kabɛnsɛ banini, “Ukyuli biala ɔɔyia na uwi ɔmɛni geen na ɔlɛka budie Yeremia bɔƒiɔ na bɔdu-nwu kɔtɔ!” Na bekyuli bani ƒui na mɔɔlɔ nnii mina bakpana ƒui benye kagyumana ka banu mina likpidi lɛdi na bakɛ kasiakɔ. Na baasu banini, “Ɔƒɛni kalɛ Yeremia ɔdubɔƒiɔ ɔbla lɛla lɛdi na ɔnu-bu kakpagyuɛ na bɔsia ɔmmɔ lɛlɔ bɔkɛ-nwu.”
11Nsu ni, awɔ Unwoti, adi mina ukpone ɔyikune ɔni na enye-mi kama ɔsu ni, bekyuli bani mɔɔwia bakya-ma lɛsɛ mmɔ ƒui badubo bubuli na balakana-mi mmomu anumi adubuwi-ma kalɔ na beƒu na kɔƒa kukpo-ma uwi ƒui. 12Unwoti awɔ mɔɔkɔ́ku bekyuli bani mɔɔbla lɛbuni ƒui taanu na agyi ukyuli biala kayi ku kasusu kemmo ƒui. Lɛ́su-ɔ ala ani muukpóku-mi. Anwuɔsu ya na lɛnu kalɛ na adubudie mina bekisine kasi.
13Unwoti muudie lɛnu teemwi-ɔ, ɔsika awɔ muudie bekyuli bani na baanya taakya taalɛku balalane enu kemmo.
14Taya na kusɛ ɔsiaku limeyi lɛni néti-mi líboku kayawi. Na taya na kuse kusɛ ɔsiaku mina uni lɛnɔ! 15Na ɔnana ɔni nésie útásu mina ɔti ɔnini, “Mbo! Ákɛ ɔnanabi” ni, kusɛ kusɛ utasiaku-nwu. 16Ukyuli ɔmmɔ keyi kabla aani lɛma lɛni na ábwɛ na átanu-ni kɔnyana mmɔ. Na aya na uteenu kɔnu kenye ɔtanta biala ku kekpo kɔku na ɔƒiiwi. 17Ɔlɛka nka bukpi na anwu lɛnɔ ukpi na ɔni na úni na útadu-mi asa na lɛlɛ mbewi kalɔ banii ubi na báwɔ ɔsu. Nka mina uni kaƒɔ kemmo ndubunwini mina kaƒiɔtɔ. 18Bi geen ɔsu na ɔlɛka bawɔ-mi? Lɛbibo lɛmɛni kani ɔsu na likpi ku kɔƒa?
Currently Selected:
Yeremia 20: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
