Yeremia 17

Unwoti Ɔdubo Yuda Kɔtu Bɔni

1Unwoti ɔnini, “Ukyuli ɔdi ulakana amii Yuda kadi bekyuli bina ekpidi ani na bɛ́bla bunine budie. Bénweni-nya básia bina kɔyi lɛlɔ aani kalɛ na beebeyi lɛtabi teenweni lɛla lɛdi taasia-ni lɛlɔ iye ala ani na bɛɛnwí taasia bebuo ese ani nlɛ bina akpabi lɛlɔ na akpabi ammɔ ekpo ammɔ. 2Ɔsika kaba biala atɔ asia bina ƒui bɛ́lɛ baƒiɔ akpabi bíte lɛlɔ na bɛɛkpá Asera baƒiɔ beledi bammɔ na bina kalɔ kesii biala na abi ku abinkpo lɛlɔ ku egyii enengudi kalɔ. 3Anwuɔsu ndubo bina ala ani ƒui na bibo ku bina akpabi ammɔ ƒui bɔƒɔ bute bina bekisine. 4Bina kalɔ kani na líte-mii kadubɔlɛ-mii enu na líti-mii lɛbla bekyuli bamba kabla bablane na kaƒɔ, ɔsika bɛ́ya na mina kɔnyi kɔ́kɔ geen aani kalɛ na ogya ɔɔda na ukyuli ɔdi ulakana bunine.

Biti Bina Kayi Ƒui Bɛsia Unwoti Lɛlɔ

5“Bekyuli bani ƒui nénwini kama bákya-mi na béti bana anu básia bekyuli bayawine ɔyikun lɛlɔ ni, ami Unwoti líwida-ma. 6Badubo bɔkwii bunye aani lɛku kemmo alakpi aani kalɔ kakwiidi kalɔ kani na mma bɔ́ƒɔ-ka lɛlɔ na lɛla biala lilakana bɔkwɛ na lɛlɛ lili na mmɔ.

7“Na bani néti bana anu básia-mi lɛlɔ ni, ndubute-ma kusɛ kusɛ. 8Na badubɔbla aani egyii ani nákwɛ enye kutudɔ na ana ligyiitu líduo lísie kalɔ ƒui na lɛɛkɛ́ ntu na evete asia-ku lili bili bili uwi biala. Egyii ani nákwɛ enye ketudɔ ina ɔnantu ulána muedi baaadaku-ni.

9“Bibo ɔkɔ geen, amii Yuda kadi bekyuli, na bɛɛtɔ́lɔ amii alati bina lɛlɔ muedi, na bilakana bɔvumana. 10Nsu ngyi bina ablala ku kasusu ƒui, na ndubo bɔnu ka bɛ́kɛ lɛla lɛni na lɛ́manku-mii. 11Bɛ́nya bina bakpana bɛ́kya, nsu ala ani ƒui na bɛ́kɛ na ese-mii ni, adubo bɔtɔlɔ-mii kudɔ aani baasɛ avala ani na béyu bákya aasɛ bamba kalɔ na évuo. Na mmɔ na bɛdubɔnu bɔti badɔlɔdi bani udu na bɛdi.”

Yeremia Ɔ́kpali Katɔti Úvele-nwu

12Bula Unwoti, ƒula kakpakɔ kani na ƒula lɛgadi keliekɔ kani muukeye. Na ényene-ka kɔbi lili ɔ́si ala kalɔ kesekɔ ƒui. 13Ese aani libiɔ lɛni mɔɔyu na eete Israelƒuɔ ngba na bebo lɛnunsia na ƒula lɛlɔ. Nsu si bekyuli bammɔ béni lɛla lɛni na ásu-mi ni, adubo-ma bɔkpala bɔtɔlɔ aani lɛla lɛni na bénweni básia ɔtumu akɔ. 14Awɔ Unwoti kani na muumwi. Anwuɔsu bwi-mi na edie-mi! Na ndubɔkɛ ɔlɔkplu na lɛkɛ bɔƒɔ. 15Yudaƒuɔ baamá-mi taasu-mi banini, “Yeremia, aasu-bu anii Unwoti nákya-a litemi kenye na aasu-bu. Bi ɔsu na ala ani ƒui na aasu elebo-nwu kemmo?”

16Unwoti, awɔ náƒuna-mi anii ntaanu ƒula bekyuli lɛlɔ na ɔmmɔ na nnye mɔɔbla. Na lɛla biala na lɛ́su ni, agyi-ni. Na ńtasu-ɔ ina limeyi lɛdi nnii ni-ma kɔtu kɔdi dii. 17Mina kayi ƒui kasia-a lɛlɔ ka adubudie-mi na ɔgbankpi uwi. Anwuɔsu sɔ takya-mi bɔyia. 18Die-mi na lɛla lɛdi takana bɔbla ku kɔƒa kudɔ. Na aya na mina bekisine mmomu batakana lɛla lɛdi bɔbla na kɔƒa kukpo-ma. Ya na ɔgbankpi ɔlɛku-ma na ala ani na baayia teetulo alɛku-ma.

Bɛnwuna Na Lɛnwunameyi Lɛlɔ

19-20Unwoti ɔ́su ɔnini,

“Yeremia, sie ténye Yerusalem ɔban kayakun biala kenye ku kani na ɔga ɔɔsia mmɔ kenye na atɛmiku ɔga ɔmmɔ ku bekyuli bammɔ ƒui anii ami ndi Unwoti, anwuɔsu bise atu na binu. 21-24Si bɛɛwia bina ngba na bɔ́ƒɔ-mii kuye ni, amu bitabla kabla kadi na Lɛnwunameyi lɛlɔ. Na biteti lɛla lɛdi bɛsia lili na bɛsia bɛlɛ ɔban kayakun kadi kenye iye bina kɔduli kayakun iye kesii bamba kadi.

“Bɛbla Lɛnwunameyi kedee na bɛda-ni kaduɛ! Ɔda ɔmɛni kani na líbo bina bati kuuku, nsu béni na bátadi-mu lɛlɔ na bétenu kalɔ lɛnɔ banii ukyuli ɔdi ɔlɛ-ma na bada baya. Nsu si amii bɛdubunu na bɛdi ɔda bubo bɔmɛni lɛlɔ ni, 25Dawid ɔtɔ kemmo na ukyuli ɔdubɔsi uwi biala kemmo na ɔdi lɛga na Yuda ku Yerusalem ƒui. Na ɔga ɔmmɔ ku nwuna lɛku batine ƒui badubulie bapɔnkɔ ku bapɔnkɔ kɛɛkɛ na basia beduo lɛban lɛmmɔ kɔyakun na Yuda ku Yerusalem kadi bekyuli lɛnɔ badubɔsiaku-ma. Bekyuli badubɔkya mmɔ tɛɛ uwi biala kemmo. 26Na bekyuli badubɔsi abi lɛlɔ ku abi kaƒɔna lɛma wɛlɛ wɛlɛ bamba lɛni na amadɔ na Yuda ku Benyamin kalɛkɛ lɛlɔ úti úsie ɔƒɛ kanukɔ bebo. Na beti akpala ku edula etela ku oloƒui beboku-ma babagya-mi enu na bakɔ-mi adɛ. 27Nsu si bɛɛgyú ala teeti taasia kɔyakun kɔmɛni taalɛ na Lɛnwunameyi lɛlɔ na bɛɛla ala nina lɛlɔ aani limeyi keeke bamba biala ni, ndubo ogya bɔtu bɔkya kɔyakun kɔmmɔ na lɛkyula ɔma unengudi ɔmmɔ ƒui ku kɔgyumanakɔ kɔmmɔ ƒui.”

Currently Selected:

Yeremia 17: lef

Highlight

Copy

Compare