Yeremia 13
13
Yeremia Ɔ́kya Lɛwuku Kpɛtɛ Kpɛtɛ Lɛdi
1Unwoti ɔ́su-mi ɔnini, “Sie na etéye lɛwuku kpɛtɛ kpɛtɛ lɛdi na akya-ni uwi klukwii ɔdi, nsu taƒɔ-ni.” 2Anwuɔsu lísie ntéye lɛwuku lɛmmɔ lɛ́kya kalɛ na ɔ́su-mi.
3Nwuna kama ni, Unwoti ɔ́su-mi ɔnini, 4“Die lɛwuku lɛmmɔ na esie Euƒrate Ketu na eti-ni atábɛla mmɔ na atakpɛ bonwu kɔka kɔdi kemmo.” 5Na ami lɛnɔ lísie ńtábla lɛni kani.
6Ka uwi klukwii ɔdi úbavi ni, Unwoti ɔ́sɔ ɔ́su-mi ɔnini, “Sɔ nwini sie na etéti lɛwuku lɛmmɔ.” 7Línwini lísie na ńtéku lɛwuku lɛmmɔ lídie kesii kani na líti-ni lɛ́kya mmɔ. Nsu kɔdi kɔmmɔ kɔ́tɔ na lɛwuku lɛmmɔ líkulo.
8Amu na Unwoti ɔ́su-mi ɔnini, 9“Yeremia, ndubo Babilonƒuɔ butiku na bayila Yuda ku Yerusalemƒuɔ lɛlɔ katɔ bɔtalaku. 10Yuda kadi bekyuli badi bekyuli bekpidi na bebo atuɔkplu na belenu litemi. Na baabla lɛla biala na ama baayɔ́ na baakpá baƒiɔ na mina litemi bunu kenye. Na si uwi ɔni na lɛ́wɔlɔ lɛla lɛni na nnii mɔɔblaku-ma ni, basɔ baaadubo lɛla lɛdi bɔdia bɔbla, ɔsika lɛni na badubo buse aani kalɛ na lɛwuku lɛmmɔ lise na aanu. 11Uwi ɔni na átaakya lɛwuku lɛmɛni ni, líƒie-ɔ na lɛ́da-a kavobi kaduɛ. Lɛni kani na lɛ́da Israel ku Yuda lɛga kɔdikɔ kɔmmɔ. Lɛ́da-ma lɛ́kya kpakplaa na lɛ́yɔ ka lɛbla-ma mina kadi bekyuli na baƒɔ lɛnyi kalɛ na kadi bekyuli bamba bataabu-mi na bemwi-mi lɛnyi, nsu béni banii belénu-mi litemi.”
Bɛdubuyile Bina Nte Ebui Ku Ntɛ Bɔbuni
12Unwoti ɔ́su-mi ɔnini, “Yeremia, su Yudaƒuɔ anini, ‘Unwoti, Israel Katɔti, údie lɛdi úte-mii ɔnii biyile bina ntɛ ebui ku ntɛ.’ Na ama badubudie kenye banini, ‘Buuyile bula ntɛ ebui ku ntɛ! Na bi ɔsu na awɔ nsɔ mɔɔsu-bu lɛla lɛni na bɔgyi buse na bɔɔbla?’ 13Si básu lɛni ni, na edie kenye anini, ‘Ami ndi Unwoti na lɛla lɛni na ndubo bɔbla lɛdubo bɔya na ukyuli biala na Yuda ku Yerusalem babla aani ntɛ na báni bémo. Na bani ɔdi ndubo butulo ndi baga bani nási Dawid ɔtɔ kemmo ku bakpane ku kenye bediene. 14Na ndubo-ma buti bubonku lɛlɔ aani ebui ammɔ kalɛ. Na lɛɛɛdubo bakloƒu ku begblebi ku benengu bammɔ ƒui kɔnyana bɔnu, mmomu ndubo bana ƒui udu bɔyila. Ami Unwoti násu.’ ”
Badubo Yuda Kadi Bekyuli Buti Bɔtɔlɔku
15Amii Yudaƒuɔ, bitatalaku lɛlɔ katɔ lɛni bitetuloku ka binu lɛla lɛni na Unwoti ɔ́su. 16Binye bɛɛsia bukeye anu, nsu lɛdisa na Unwoti úti uumene-mii. Bɛɛnu ka ɔyuli kɔyu kɔ́ɔƒɔ abi ammɔ lɛlɔ suu ɔdubo. Anwuɔsu binwini bibo Katɔti kudɔ na bidie bina alaekpidi kalɔ bite-nwu asa na bigyiile bibuli. 17Na si bɛ́talaku lɛlɔ katɔ na bítenu-nwu litemi ni, ami lɛti ndubo buwulo uwi ɔni na badubuti Katɔti bekyuli batɔlɔku aani bekyuli batɔntɛne.
18Unwoti ɔnii nsu-mii ka ɔga ɔmmɔ ku uni ƒui badubɔta bana kuliekɔ na bebimi bana kɔgabwa. 19Báaka bámana lɛma linengudi lɛni nkya kalɔ kakwiidi kemmo na kada kakɛ. Na ukyuli ɔdi ulakana na weduo iye ɔdi ɔkana bɔlɛ lɛnɔ. Na badubuti ukyuli biala na Yuda batɔlɔku.
20Yerusalem, awɔ nátaatalaku lɛlɔ katɔ ka aadi Yudaƒuɔ lɛlɔ ɔsu. Nsu wɛ na bakya ɔƒɛni? Nwini nu katɔ kakɛ na adubɔnu ƒula bekisine ka badubo. 21Ama bana lɛlɔ na éti anu ási dii ka badubo-ɔ bubunku. Nsu ɔƒaani ndubɔya na badi-ɔ lɛlɔ. Bi ndi-ɔ kasusu na ɔmmɔ lɛlɔ? Adubo lɛbibo kemmo bɔkya aani uleku ɔni ntɛ kɔwɔ na uunú ɔlɛ. 22Agyi lɛla lɛni ɔsu na ƒula adala ábwɛ-ɔ lɛlɔ na bekyuli beedumi-ɔ? Ɔkɛnku ƒula ekpidi bonwu bonwu ani na aabla ɔsu. 23Aakali ka adubɔvumana na ataabla lɛla lɛni na lɛdia ɔƒaamu?
24“Ndubo-mii bubo bugyingya aani kalɛ na ɔƒɛƒɛɛ ɔni muukpó na kalɔ kakwiidi lɛlɔ uubo aƒaaƒa teedie kamu ebi kemmo si baaƒɛ́-nya. 25Ami Unwoti násu lɛni na lɛɛɛdubo mina kasusu bɔvumana. Ɔsika bíni-mi na bísie bɛɛkpá baƒiɔ bani naaasu litemi geen. 26Búlie aani ɔgya ku ule, nsu bɛ́lɛ-mi kama na bítasiaku-mi kama siin. Na bínwini bayalɛ muedi na uwi ɔni na bɛkɛ abi eli ku mmo ƒui bɛɛkpá baƒiɔ bani muusé lɛlɔ mmɔ ɔsu. 27Anwuɔsu ndubo bina adala bɔni budie-mii lɛlɔ na bɛsɔ bɛkɛ kasɔngya ku kɔƒa kɔƒa na ukyuli biala utaanu-mii. Amii ɔdi ɔ́sa na bɛ́yii udu! Bɛɛƒɔ́ taadi ka bɛdubɔsɔ bɛbla bekyuli bani mamanku ka bɛsɔ bɛkpali-mi?”
Currently Selected:
Yeremia 13: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
