Yesaia 58
58
1“Kɔ litemi lɛmmɔ lɛsa
na tebile kenye tasɔ telie.
Na asu mina kadi bekyuli Israelƒuɔ
bana ekpidi ku kalɛ na báta bénye-mi lɛlɔ.
2Baakɔ́ taayu limeyi ndi limeyi
banii ami na baasiaku.
Na beekpóku lɛlɔ
aani si mina litemi na baawia batɛya.
Na baatina lɛlɔ aani kadi bani bekyuli
mɔɔwia ka babla lɛbuni
na baadi mina ɔda bubo lɛlɔ.
Baawia ka lɛni lide-ma
suɛlɛ suɛlɛ
na lɛtɛ litemi na ulu lɛlɔ siin lite-ma,
na baasu ka lɛlɔ lɛɛyɔ́-ma ka bataasiaku-mi.
3Beeye banii, ‘Bi ɔsu na búnyimi kenye
na átakpete-bu?
Na búboku lɛlɔ kalɔ
na átanu átati?’
“Nsu uwi ɔni na bɛnii kenye na biinyimi mmɔ ni,
na binye bina ala ani mɔɔyɔ́-mii kaƒɔ bɔbla lɛlɔ
na bɛɛwia amii lɛti bɔdia
na bɛɛnya bina kabla bablane ama taakya.
4Bɛɛkɛ́ ku kɔnyi muedi
na binye kagyumana ka bikpo.
Nsu utabla-mii dɛye dɛye,
ɔsika Unwoti ulakana na wenu-mii bɔkpali
na ɔbladu ɔmɛni kemmo!
5Bɔkali na bɛɛkali bɛnii kalɛ na binyimi kenye,
na bini adila bite lɛlɔ,
na bɛkya lili kalɔ buɛɛ bite Unwoti
aani livo lɛni na ɔƒɛƒɛɛ ku ɔnantu ntu
búbo bɔ́kya kalɔ mɔɔda-nwu ebiti?
Munuu kalɛ na bɛda
kɔnyana ala,
na bɛkpi ntɔ na bɛɛlɔ kenye bunyimi
bɔni ndi Unwoti limeyi lɛni mɔɔda-nwu kubiti?
6“Kudii, mmomu lɛla lɛni
mɔɔyɔ́ Unwoti kaƒɔ
ndi kalɛ na bɛya na bekyuli
bani na baanya taakya
bakɛ bɔnwuna na belie
bete lɛlɔ.
Na kalɛ na bekyuli baládi
litemi lɛlɔ siin teete bekyuli
na únwini aani kɔgba na kɔda bekyuli ɔkwɛ ni,
bidie-ku bana ɔkwɛ
na bikulo kɔbuli kɔmmɔ ƒui bana lɛlɔ.
7Na bile bina adila bite ukyuli biala na kɔka kɔɔda.
Na bɛya na bawabane ku bani neeebo kuduokɔ
bakɛ kuduokɔ bina kudɔ na bakɛ kɔtɛnkɔ.
Na bani mɔɔyaki adala lɛnɔ
na bite-ma adala na babɛ kɔyɔ.
Na bilénwini kama bilakya bina lɛlɔ bekyuli.
8Si bɛ́bla ɔmɛni ni,
bɛdubɔnu kalɛ na muukeye
na ɔya na bɛkɛ ɔlɛ bɔbwi.
Na bina ala bɔbla siin bɔmɛni
bɔdubɔgyumana-mii na bina keliela kemmo
na Unwoti bukeye bɔgyumana-mii
bɔsiku bina kama.
9Na si bɛ́kpali Unwoti ni,
ɔdubɔtuna ute-mii kɔnakunwi ɔnini,
‘Bɛɛnu-mi nnye-mii kudɔ mɛni!’
“Bitabla bina bakpana kalala na bitanyi ɔkɔ
na bɛdu-ma kɔtɔ iye bɛda litemi bɛsia-ma lɛlɔ lɛnɔ.
10Bile bina adila bite bani na
kɔka kɔɔda
na bɛƒɔ bani neeebo kuduokɔ
na bakɛ kuduokɔ na bina kudɔ
na bɛnu-ma lɛlɔ.
Na ɔmmɔ ɔdubɔya na bina ablala ekeye
na kesii kani na kese suu.
Na si amii lɛnɔ bíduo ɔgbankpi ɔdi kemmo
na use aani kalɛ na beeduo lɛdisa kemmo ni,
na unwini aani ɔƒiiwi kadi nwaa ute-mii.
11Unwoti ɔdubɔtɔnku-mii
na ute-mii ala ani ƒui námanku-mii
na kalɔ kakwiidi kammɔ kemmo
na ute-mii ɔlɔkplu.
Na bɛdubɔbla aani
kevoma kemo
kani edula mɔɔkɛ́ ntu
uwi biala
iye ketu kani ntu naaakwii uwi ɔdi.
12Bɛdubɔsɔku bina atɔnku
ani nábwɛ uwi gyɔlɔɔ aani akwa akwa mɛni bɔtu.
Na ɔkɛnku ɔmmɔ ɔsu bekyuli badubɔlɔ-mii banii
bekyuli bani mɔɔsɔku atɔnku
ku lɛma linengudi awodu taatala
na basɔku lɛblɔnu bedie.
13“Nsu ɔlɛka bɛka mina Lɛnwunameyi bɔbu
aani lɛlɔyɔ lɛkpa limeyi
na bɛda enyekpi bɔtɛmi
kalɛ kalɛ bɛya
ku ala basa basa bɔbla bɛya
na limeyi linengudi
lɛmɛni lɛlɔ.
14Na bɛdubɔnu lɛlɔyɔ
lɛni nkya mina bɔsiaku kemmo
na lɛya na ɔbu ɔkya-mii lɛlɔ
na kayawi kadi bekyuli ƒui anumi
na bɛdi-ma lɛlɔ útédu abi eli ƒui.
Na Unwoti ɔdubute-mii
kusɛ kusɛ
na bile bɛdi bina nana ati Yakob
kalɔ kammɔ uwi ƒui.”
Lɛni na Unwoti ɔlati ɔ́su!
Currently Selected:
Yesaia 58: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
