Hosea 7
7
1“Na uwi biala na nnii mɔɔbwi mina kadi bekyuli Israelƒuɔ lɛsiku bana lɛlɛ lɛni na beeƒi kudɔ ni, kalala ku ɔkɔ bɔnyi ku ekpidi lidu bamba kani na mɔɔnu. Na beyune baabwɛ teeduo bekyuli kɔduli na bakɛ lilu lɛlɔ ƒui baaví. 2Na bana ɔdi ulakali taanu ɔnii mɔɔnu kalɛ na bana ekpidi áka ámana-ma aani kalɛ na beenyimi lɛla lɛdi, nsu mɔɔnu ɔmɛni ƒui.
3“Na bana ɔbladu ɔmɛni ɔdi bana benengu bammɔ ƒui lɛlɔyɔ. 4Na kalɛ na balɛ-mi kama ɔɔda-ma ɔkwɛ aani ogya ku lɛyu lɛni náabi lise úte bodobodo buƒi. 5Na limeyi lɛni na beesé ɔga ni, anwu ku nwuna benengu ƒui báni ntɛ békpi na baabla adɔlɔla. 6Kɔnyi kukpidi kɔ́ƒɔ-ma kayi kemmo aani kalɛ na ogya ɔɔkya taada na bodobodo lɛyu kemmo ɔni na asa kadi keteegye ni, na ogya ɔmmɔ uudie linyemi! 7Kɔnyi kɔmmɔ kɔ́ya na báƒɔ ogya bakɛ aani ogya ku lɛyu na bádu bana batɔnkune ƒui unwi unwi. Na bana ɔdi útabla kasusu ɔnii ɔɔkpali-mi uvele kebunku kadi.
8“Israel kadi bekyuli bani násalaku kadi bamba bese aani bodobodo ɔni na béƒi na ɔ́bi kakɛ ku kakɛ. 9Bányonu lɛlɔ béte baƒɔ na bana ɔyikun ƒui ɔ́yii udu na balanu taati. Na bana lili linwini lɛ́ta lɛɛƒuala, nsu balanu ɔmmɔ lɛnɔ taati. 10Israelƒuɔ lɛlɔ katɔ bɔkɔliku muudie-ma teete, na balatuna banii beenwíni bebo ami bana Unwoti Katɔti kudɔ iye bawia-mi kama ulu na lɛƒɔ-ma.
11“Israelƒuɔ báta bénwini aani bakpaƒɛɛlɛ bani nkɛ esu esu beeveyi teesie taasɔ, na Egyipteƒuɔ ku Asiriaƒuɔ ntɛ baawia kabɛkɔ. 12Nsu ndubo-ma budie na mina asawu kemmo aani kalɛ na ɔgbini uudie aasɛ na kamia kemmo na lɛni-ma kɔtu kalɛ na lɛ́su ka ndubo bɔbla kalɛ. 13Bɔbuɛ muute-ma, ɔsika ala adubo-ma bukpoku na bayii udu aani bana lɛyuƒɔla ka béni-mi ɔsu. Nsu lɛ́yɔ ka nka lidie-ma. 14Belewulo taakpali-mi geen taasiku bana kayi kemmo, mmomu bebi bana kɔtɛnkɔ beewulo kɔnyana, na baabla lɛlɔ ulikplu ala ani na basiaku ala bamba baabla na basia anu ka ɔmmɔ ɔdubɔya na bakɛ kebunku na wete-ma kusɛ kusɛ na bakɛ edula pii ani na baawia. 15Ina ka ami náda-ma na lɛ́tina-ma ala ɔsu na bagyi lɛla lɛni na bagyi ni, báta bénye-mi lɛlɔ.
16“Béni banii belenwini belebo-mi kudɔ na basia Baal baƒiɔ anu bani neeebo ɔyikun ɔdi. Anwuɔsu na bese aani kataminta kani naaadia, na bana batɔnkune ƒui badubo kuwii kenye bɔtɛ na ukyuli tabu ku enyekpi ani na baatɛmi ɔsu. Na Egyipteƒuɔ badubo-ma buti bunwini lɛmala.”
Currently Selected:
Hosea 7: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
