Hebriƒuɔ 1
1
Katɔti Ubi Ubo Kenyekɔ Utulo Katɔti Batu
1Na uwi ɔni návi kemmo ni, Katɔti ɔ́sia nwuna kenye bediene lɛlɔ ɔ́tɛmiku bula bati kuuku kɔlɛ kɔlɛ na lilu bun bun lɛlɔ. 2Nsu na uwi ukplodi ɔmɛni kemmo ni, Katɔti ɔ́tɛmiku-bu ɔ́siaku Ubidi lɛlɔ. Ubi ɔmmɔ na ɔ́ƒuna úse ka ɔbla nwuna ala ƒui ɔdine. Na nwuna lɛlɔ kani na ɔ́sia údie kayawi ƒui. 3Ubi ɔmmɔ ndi Katɔti bukeye bɔni mɔɔsí Katɔti ɔni nse kede kede lɛlɔ. Na ɔdi Katɔti ukyuli udu ɔmmɔ geen. Na ɔkɛnku nwuna litemi lɛni mbo ɔyikun lɛlɔ ɔsu na lɛla biala linye nina kenyekɔ na kayawi. Na uwi ɔni na úti lɛlɔ ɔ́kpa kalɛ na Katɔti uti bayawine ekpidi ɔkyiɛ-ma ni, úsie útélie keliekɔ kenengudi ƒui na Katɔti kɔdianu kakɛ.
4Ɔmɛni ɔsu na ubo kenyekɔ utulo Katɔti batu. Na lɛni kani na lɛnyi lɛni na ubo lɛnɔ lɛ́ƒɔ kuye litulo ama lɛdi.
5Ɔsika ni, Katɔti útasu nwuna ɔtu ɔdi dii ɔnini,
“Awɔ ndi mina ubi.
Na ɔmwi ni, línwini-ɔ ɔti.”
Na ɔ́sɔ útasu ɔtu ɔdi ɔnini,
“Ami madi-nwu kɔti,
na anwu wadi mina ubi.”
6Uwi ɔni na Katɔti Ubi ɔni ntɔ ala ƒui úbo kayawi kamɛni lɛlɔ ni, Katɔti ɔ́su ɔnini,
“Bɛya na Katɔti batu ƒui bakɔliku-nwu lɛnyi katɔ.”
7Na etemila ani ndanku Katɔti batu lɛlɔ ni, ɔ́su ɔnini,
“Lɛ́bla mina batu na bese
aani ɔƒɛƒɛɛ.
Na ama bani mɔɔbla
mina kabla ni,
lɛ́bla-ma na bese aani ogya linyemi.”
8Nsu na Ubidi ɔmmɔ lɛlɔ ni, Katɔti ɔ́su ɔnini,
“Ati, awɔ ni, ƒula lɛga kadikɔ
kadubo buse uwi ƒui.
Na adubɔdi ƒula bekyuli lɛlɔ na ulu siin lɛlɔ.
9Awɔ mɔɔyɔ́ lɛla lɛni nse siin,
na ekisi ala ani naaakɛ
ulu lɛlɔ.
Anwuɔsu ni, ami ƒula Katɔti
lɛ́ƒuna awɔ, Ati, ka akɛ kenyekɔ etulo na bakladi ƒui akɔ.
Na lɛ́ya-a na ákɛ lɛlɔyɔ na uwi ɔni na líti nnɔmii líwi-ɔ aani likposela.”
10Katɔti ɔ́sɔ ɔ́su ɔnini,
“O Blɔti, na kalɔ kesekɔ ni,
awɔ nédie kayawi
kamɛni ƒui,
na éti ƒula enu ábla kayaa.
11Ala amɛni ƒui adubɔyii udu.
Nsu awɔ ni,
adubulie uwi ƒui.
Ala ammɔ ƒui adubɔtɔ aani adala kuuku kalɛ.
12Adubɔƒɛ-nya asala aani kalɛ na baaƒɛ awu.
Na aani kalɛ na baavumana adala ni,
lɛni kani na Katɔti ɔdubo ala ammɔ bɔvumana.
Nsu kalɛ kani na awɔ ese ni,
lɛni na adubo buse.
Na ƒula akwa alása kudii.”
13Ɔɔɔdi Katɔti ɔtu ɔdi na Katɔti ɔ́su ɔnini,
“Sɔ lie keliekɔ kani náƒɔ kuye ketulo ƒui na mina kɔdianu kakɛ
wetédu uwi ɔni na meti ƒula bekisine makya-a lɛgba kalɔ.”
14Na nwuna batu ƒui ama ni, ɔɔɔdi ayu ani muusié-nwu bɔtala ka beteebunku bekyuli bani na Katɔti ɔdubɔya na bakɛ bɔƒɔ na badi yoo?
Currently Selected:
Hebriƒuɔ 1: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
