Galatiƒuɔ 3

Katɔti Úte-mii Nwuna Kɔyu Na Bɔƒɔtaadi Ɔsu

1Amii Galatiƒuɔ alati bilákali ɔmɛni bilanu! Ɔma néƒie-mii kasusu úbo likpo lɛni? Ɔsika bina anumi na lɛ́su-mii Kristo kukpi na ugyii lɛlɔ litemi. 2Bɛya na liye-mii ɔmɛni linu. Katɔti Kɔyu kɔni na úte-mii mmɔ ni, ɔkɛnku ɔda bubo bɔni lɛlɔ na bɛɛdi ɔsu munuu ɔkɛnku litemi lɛni na bínu na bɛ́ƒɔ bɛ́di ɔsu? 3Bi ɔsu na bɛɛbla ala susuusu lɛni? Ka bíse bina ngba bɔmɛni bulie kalɔ ku Katɔti Kɔyu ɔyikun ni, bɛɛyɔ́ ka bɛwɔlɔ ku bayawine ɔyikun? 4Na abi ani na bíbo ni, bɛɛyɔ́ ka abla ukpludi? Nsu nka ɔɔɔdi ukpludi nɔɔ! 5Katɔti Kɔyu kɔni na úte-mii mmɔ ku akɔla lidu lidu ani na ɔ́bla na bina akɔ mmɔ ni, ɔkɛnku kalɛ na bɛɛdi ɔda bubo bɔmmɔ ɔsu na ɔ́bla-nya munuu ka bínu litemi buni lɛmmɔ na bɛ́ƒɔ-ni bɛdi ɔsu?

6Bɛnu Abraham. Bénweni banii, “Ka ɔ́ƒɔ Katɔti ɔ́di ɔsu ni, Katɔti ɔ́bu-nwu aani ukyuli ɔni nse siin.” 7Anwuɔsu bɛnu bɛti ka bekyuli bani mbo bɔƒɔtaadi ni, ama ndi Abraham bebi. 8Na Bunweni Kedee Ɔku kemmo básu bése ka ni, Katɔti ɔdubɔklibi anwu ku bani naaadi Yudaƒuɔ ƒui ntɛ ɔkɛnku bana bɔƒɔtaadi na Kristo lɛlɔ ɔsu. Anwuɔsu Katɔti ɔ́su litemi buni lɛmɛni úte Abraham kukuuku ɔnini, “Ndubute kadi ƒui bekyuli kusɛ kusɛ ɔkɛnku awɔ lɛlɔ.” 9Anwuɔsu bani mbo bɔƒɔtaadi ni, Katɔti úte ama ku Abraham ɔni mbo bɔƒɔtaadi ƒui kusɛ kusɛ.

10Na bani na ama béti bana anu básia ɔda bubo bɔkukudi bɔmmɔ lɛlɔ ni, ewida asiaku-ma. Ɔsika bénweni bése banii, “Ukyuli biala ɔni naaadubo etemila ani ƒui na bénweni bése na Ɔda Bubo Ɔku kemmo lɛlɔ bɔdi ni, ewida adubɔsiaku-nwu kama.” 11Sɔsɔ na ɔdi ka Katɔti uláklibi anwu ku ɔdi ntɛ ɔkɛnku ɔda bubo lɛlɔ. Ɔsika bénweni banii, “bani mɔɔsiaku-mi kama siin ni, badubulie ngba na bana bɔƒɔtaadi kemmo.” 12Nsu ɔda bubo bɔɔɔdanku bɔƒɔtaadi. Mmomu bénweni banii, “Ukyuli biala ɔni mɔɔdi ɔda bubo bɔmmɔ lɛlɔ ni, ɔda bubo ulu ɔmmɔ ɔdubute-nwu ngba.”

13Na Kristo nébo úbada-bu údie ewida kemmo. Na anwu nébenwini ewidala úte-bu. Ɔsika bénweni banii, “Ewida asiaku ukyuli ɔni na badubuti baƒala ugyii lɛlɔ.” 14Na Kristo ɔ́bla ɔmɛni kalɛ na kusɛ kusɛ ɔni na Katɔti ɔ́su úse ka wasiaku Abraham mmɔ ɔsiaku bani naaadi Yudaƒuɔ lɛnɔ kama ɔkɛnku Kristo Yesu lɛlɔ. Na ɔkɛnku bɔƒɔtaadi bɔmmɔ lɛlɔ ni, na abu lɛnɔ bɔkɛ Katɔti linyese lɛni ndi nwuna Kɔyu.

Kavumana Kadi Kakya Ɔda Bubo Ku Linyese Ntɛ

15Banwa, lɛla lɛni mɔɔsu mɛni ni, bɛya na liti lɛkɔku bula limeyi biala ngba bulie. Si nkyuli inyɔ bénu lɛlɔ kalɔ na lɛla lɛdi lɛlɔ na bényimi-ni lɛlɔ ni, bana kemmo ɔdi uuubo kuƒi ka ɔsɔ unweni iye ɔda lɛla lɛdi udie bunyimi bɔmmɔ kemmo. Lɛni kani na use na mɛni lɛnɔ. 16Linyese lɛni na Katɔti ɔ́su úse mmɔ lise lite Abraham ku ubidi. Na Bunweni Kedee Ɔku ɔmmɔ kemmo ni, Katɔti útasu ɔnii, “Abraham ku nwuna bebi.” Si ɔ́su ɔnii, “ku nwuna bebi” ni, na ɔɔtina ka bebi bammɔ bemomo. Mmomu bɔsu na ɔ́su ɔnii ku ubidi. Na ɔmɛni ɔɔtina ka ukyuli unwi pɛ. Na ukyuli ɔmmɔ ndi Kristo. 17Lɛla lɛni mɔɔtina ndi ka Katɔti únyimiku Abraham lɛla lɛdi. Na ɔ́su ka wadi bunyimi bɔmmɔ lɛlɔ. Na ɔda bubo bɔni na Katɔti úbete Mose na akwa eti maane ku avlaatɛ kama ni, ulakana na webile Katɔti bunyimi na linyese lɛmmɔ lɛbla kaduɛ. 18Na si lɛla lɛni na Katɔti ɔ́su úse ka wete mmɔ lɛkɛnku ɔda bubo lɛlɔ ni, na agyi anii ɔsɔ ɔɔɔdi linyese. Nsu ɔɔɔdi lɛni. Mmomu ɔkɛnku Katɔti ɔlati nwuna lɛƒɔndia ɔsu na úti-ni úte Abraham na nwuna linyese ɔsu.

19Na bi na ɔda bubo bɔmmɔ bɔdanku nɔɔ? Búbebunku na bɔnu likpidi bɔti. Na bɔdubɔkya utédu uwi ɔni na Abraham ubi ɔmmɔ webo. Anwuɔsu na Katɔti úse kenye kammɔ. Katɔti batu béti ɔda bubo bɔmmɔ béboku-bu ɔkɛnku ukyuli unwi ɔni nkya Katɔti ku bekyuli ntɛ. 20Nsu ka Katɔti ɔlati mɔɔbla lɛla lɛmɛni ɔƒɛni ɔsu ni, utáwia ntɛ ɔkyane ɔbambadi.

Ɔda Bubo Mɔɔtɔnku-bu Na Bɔɔnu Kristo

21Bɔtina na ɔmɛni ɔda ka ɔda bubo bɔmmɔ bɔ́ta bunye Katɔti linyese lɛmmɔ lɛlɔ? Oowo, kudii! Ɔsika si béti ɔda bubo bɔmmɔ béte ukyuli kalɛ na ɔkɛ ngba ni, na agyi anii ukyuli ɔdubɔbla siin ku Katɔti si ɔ́di ɔda bubo bɔmmɔ lɛlɔ. 22Nsu Bunweni Kedee Ɔku ɔmmɔ ɔ́su ka kayawi kemodi kénwini kabla ɔblane kéte likpidi. Na kenye kani na Katɔti ɔ́su úse ka wete bekyuli ɔkɛnku bɔƒɔtaadi na Yesu Kristo lɛlɔ kadububo kete bani náƒɔ-nwu bádi.

23Asa na bɔƒɔtaadi bɔmmɔ bɔdububo ni, ɔda bubo bɔmmɔ bɔ́bala-bu aani batɔntɛne kalɛ úti útédu ka bédie bɔƒɔtaadi bɔmmɔ keyi. 24Anwuɔsu ɔda bubo bɔmmɔ mɔɔgyumana-bu kalɛ na ɔtɔnku-bu na bɔnu Kristo, kalɛ na Katɔti ɔklibi abu ku-nwu ntɛ ɔkɛnku Kristo bɔƒɔtaadi bɔmmɔ ɔsu. 25Na ɔƒɛni ɔni na bɔƒɔtaadi bɔmmɔ búubo ni, ɔɔɔdi ɔda bubo bɔmmɔ nsɔ mɔɔnu-bu lɛlɔ.

26Ɔkɛnku Kristo bɔƒɔtaadi kemmo ɔsu na bina ƒui bɛdi Katɔti bebi. 27Ɔsika amii bani ƒui náƒɔ ntu bɔkpila ɔdi ɔmmɔ na Kristo kemmo ni, bíti Kristo bɛ́kya aani awu kalɛ. 28Anwuɔsu kavumana kadi kasɔ keeebo Yudani iye Helani iye ukyuli ɔni mɔɔbla ukyuli ɔdi kabla iye ɔni nli nte lɛlɔ iye ɔnana iye uleku ɔdi ntɛ. Ɔsika bina ƒui bɛ́bla ku Kristo Yesu unwi. 29Anwuɔsu si bɛdi Kristo ɔdi ni, na bɛdi Abraham kaba bebi, na bɛdi Katɔti linyese lɛmmɔ ala badine.

Currently Selected:

Galatiƒuɔ 3: lef

Highlight

Copy

Compare