Esekiel 6
6
Israel Ɔdi Ɔ́sa
1Unwoti Katɔti ɔnini, 2“Esekiel, ɔyawine ubi, nwini anumi tina Israel abi lɛlɔ na asu-ma anii, 3amii abi ku ana kɔka ku awɛ ƒui binu! Ndubo bunwini bunye bɔsiaku-mii na lɛgyingya ekpo ani ƒui na bɛ́tu kadi bamba baƒiɔ biala bɛ́lɛ na baakpá. 4Ndubo lɛbi biala bɔbwɛ na lɛdu bekyuli bani mɔɔkpá baƒiɔ na baƒiɔ bani na bávɔ iye bánwi bése baakpá mmɔ anumi. 5Na bekpine ku bana ekubi adubuwi aka amana baƒiɔ bammɔ ku bana abi ammɔ ƒui amadɔ mmɔ. 6Na Israel lɛma ƒui lɛdubo bɔbwɛ na lɛnu ka bana baƒiɔ bammɔ ku baƒiɔ lɛtɔ ku abi ammɔ ku ala avɔdi ku anwidi ammɔ ƒui áyii udu. 7Bina bekyuli ƒui badubo bukpi na kalɔ kammɔ ƒui lɛlɔ. Na bani mebu badubo bɔnu bɔti ka ami Unwoti nábla ala amɛni udu.
8“Ndubo bɔya na bekyuli badi belie banu kɔtu bɔni bɔmɛni ƒui bɔlɛ atɔ asia bétédu kawɔlɔkɔ. Nsu ndubo-ma bugyingya bɔkya kadi bamba bekyuli akɔ 9na beténwini batɔntɛne bete-ma na mmɔ. Na si bábla kasusu básiku-mi lɛnɔ ni, badubo bunyimo ka bákya-mi kɔƒa na báta bénye-mi lɛlɔ na baƒiɔ bani na bákpa ɔsu. Na badubɔyɔ ka beni bana lɛlɔ na alaekpidi ani na bábla ɔsu. 10Na badubɔti lɛnɔ ka ami ndi Unwoti na ɔlɛka bekyuli benu mina bɔlɛ bɔni na mɔɔlɛ-ma kpakplaa mmɔ na badi-mu lɛlɔ lɛnɔ.”
11Amu na Unwoti Katɔti ɔ́sɔ ɔ́su ɔnini, “Esekiel, gya enukpɛ na etu ɔgba kalɔ momoomo ku lɛƒɛda! Wulo kɔnyana geen, ɔsika Israelƒuɔ bábla ala ani muusé lɛlɔ na ɔlɛka bekpi na bana bekisine bekpone lɛkɔkɔ iye kɔka ku ɔlɛ ɔdu-ma. 12Bekyuli bani na bakya ɔgyu ni, ɔlɛ ukpidi ɔdubo-ma bubo na bekpi na bani na bede ni, badubukpi na kekpokɔ. Na bani mebu lɛnɔ ni, kɔka kɔdubo-ma bɔdu. Kalɛ na líti kɔnyi ńtédu ni, lɛni kani na ndubo-ma kɔnyi kɔmmɔ ala bɔbla butédu! 13Oloƒui na bekyuli bamɛni bátaakyula na abinkpo ku abi enengudi eli teete baƒiɔ bani abi na bátu bényene mmɔ na egyii enengudi kpakplaa amɔ kalɔ. Nsu si uwi ɔni na bánu ka bekpine bewi báka bámana mmɔ bene ƒui ni, badubɔnu bati ka ami ndi Unwoti. 14Ndubo bɔya na bana kalɔ ƒui kenwini kakɔ kagyani kani nsɔ naaadubo lɛla lɛdi bɔdia bɔbla ɔ́si kɔnwinimi kalɔ kakwiidi kani na kada kakɛ útédu ɔma ɔni baalɔ Dibla na katɔ kakɛ. Na badubo bɔnu bɔti ka ami Unwoti nábla ala amɛni.”
Currently Selected:
Esekiel 6: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
