Esekiel 47
47
Lɛ́nu Ketu Blii Kadi Ka Kaagbá Taasi Kakpakɔ Mmɔ
1Ɔnana ɔmmɔ ɔ́sɔ ɔ́kpanku-mi na búnwini búsie kakpakɔ kemmo mmɔ. Na mmɔ na lɛ́nu ketu blii kadi ka kaagbá taasi kayakun kammɔ kalɔ. Kése kalɔ kási kakpakɔ kammɔ kada kakɛ na ɔ́gba ɔkɛ lɛkpabi lɛmmɔ kudɔ na ɔ́gba ɔkɛ kaduli kammɔ kemmo úsela ɔƒɛ kanukɔ kakɛ.
2Bɔ́gyu bɔ́tɔlɔ kakpakɔ amadɔ mmɔ na bɔkɛ bútávi ɔban kayakun katɔdi kudɔ na bɔ́ka bɔ́mana bútédu ɔban kayakun kani na ɔƒɛ katukɔ. Na lɛ́nu ka ketu blii kammɔ kágba késela ɔƒɛ kanukɔ ɔ́si ɔban kayakun kani na kada kakɛ mmɔ kudɔ.
3Ɔnana ɔmmɔ úti úsie ɔƒɛ katukɔ kakɛ na lɛ́nu ka údie nwuna ugyii lɛkɔkula na ɔ́kɔku lɛgba budie eti leevu ku liti ku leevu ɔ́yula kada kalɛ na ketu kammɔ kéti késela mmɔ. Na ɔ́su-mi ɔnii nkya ketu kammɔ lɛgba nteebo. Na ntu bɔmmɔ búbedu-mi anikpo. 4Ɔ́sɔ ɔ́kɔku lɛgba budie eti leevu ku liti ku leevu ɔ́yula na ɔ́su-mi ɔnii nkya lɛgba na ntu bɔmmɔ búbedu-mi kavobi. 5Ɔ́sɔ ɔ́kɔku lɛgba budie eti leevu ku liti ku leevu ɔ́yula na ketu kammɔ kasɔ kaladia lɛgba bɔkya ntu bɔkpi na ákpi. 6Amu na ɔ́su-mi ɔnini, “Esekiel, ɔyawine ubi, se atu na enu lɛla lɛdi asiku ala ani na ánu lɛlɔ.”
Bɔ́sia búsie ketu kammɔ kɔtu. 7Na ntánu egyii pii ka enye ketu ɔvi ɔnanyɔ. 8Na ɔnana ɔmmɔ ɔ́su ɔnini, “Ntu bɔmɛni bɔ́gba bɔkɛ ɔƒɛ kanukɔ mɛni búsela Yordan Ketu ɔkwalɛ kemmo na bɔdubo kenye buti butákya Ɛpugyie kemmo kesii kani na ɔdubo mma ntu bɔmmɔ bunwini bɔbla ntu bɔbuni mamaama bɔni mɔɔdia bɔni. 9Na kesi kesii na ntu bɔmɛni bɔ́gba bɔkɛ ni, ketu kemmo lɛna ku kɔbɛ lidu lidu badubo mmɔ bɔkya. Ɔsika ɔdubo ngba ku ntu bɔbuni bɔni mɔɔdia bɔni buti buboku Ɛpugyie kemmo. 10Na ɔ́si ɔma ɔni baalɔ banii Engedi útédu Eneglaim ɔma bekyuli badubo kɔbɛ buteedie na mmɔ na bakula bana lɛsawu na ɛpu kɔtu mmɔ. Na kɔbɛ lidu pii kɔdubɔkya Ɛpugyie kemmo aani kalɛ na kɔkya Mediterenia Ɛpu kemmo. 11Nsu lɛba lɛni ndubɔkya ɛpu amadɔ mmɔ ani ni, mma bɔdubɔkya-ni kemmo kalɛ na bekyuli bakɛ-mu bedie. 12Adingyii pii adubɔkwɛ ketu kamɛni kɔtu na ataanwu ebi kɔbuli biala. Na evete ammɔ aaadubo bɔkwii bɔnu kudii, ɔsika adubo ntu butaakɛ uwi biala taasiku ketu kani mɔɔgbá taasi kakpakɔ kudɔ mmɔ na bekyuli badubuti evete ammɔ babwi bekyuli.”
Básia Kalɔ Kammɔ Lɛmii
13-14Unwoti Katɔti ɔ́su Israel kadi bekyuli ɔnini,
“Si uwi ɔni na béle kalɔ kammɔ béte Israel adua leevu-anyɔ ammɔ ni, Yoseƒ kɔdua bekyuli badubɔƒɔ bule akpa anyɔ. Na ka éle kalɔ kammɔ likeke, ɔsika ami nése ƒula bati kukuuku kenye ka ndubuti kalɔ kamɛni lite bana. Na ndubɔtina-a kalɔ kammɔ lɛmii.
15“Ɔmii ɔni na katɔ kakɛ ɔdubuse kalɔ ɔsi Mediterenia Ɛpu kudɔ na uti usie ɔƒɛ katukɔ utédu Hetlon ɔma. Na ɔkɛ Lebo Hamat ɔ́via Sedad. 16Na ɔkɛ Berota ku Sibraim lɛma lɛni nwi Damasko ku Hamat lɛgakadikɔ kalɔ ɔmii lɛlɔ. Na utáwɔlɔ na Hasa-Hatikon ɔni nkya Hauran ɔmii lɛlɔ. 17Anwuɔsu ɔmii ɔni na katɔ kakɛ ɔmii ɔdubɔvi Mediterenia Ɛpu ku Hasar-Enan ɔni nkya Damasko ku Hamat ɔmii lɛlɔ ntɛ.
18“Na ɔmii ɔni na ɔƒɛ katukɔ kakɛ ɔmii ɔdubuse kalɔ ɔsi ɔmii ɔni nkya Damasko ku Hauran lɛga kadikɔ kalɔ ɔmii lɛlɔ. Na ɔdubuti ɔyu kada kakɛ na ɔkɛ Yordan Ketu kani néle Gilead ku Israel kɔlɛkɛ. Na ɔdubusie útáwɔlɔ na Ɛpugyie na kesii kani nde Tama ɔma.
19“Na ɔmii ɔni na kada kakɛ ɔdubuse kalɔ ɔsi Tama na ɔkɛ kada kada na ɔƒɛ kanukɔ kakɛ útédu abiɔ ani na Meriba-Kades. Na ɔdubɔsia Egyipteƒuɔ ɔmii lɛlɔ utédu Mediterenia Ɛpu.
20“Na ɔmii ɔni na ɔƒɛ kanukɔ ɔdubuse kalɔ ɔsi Mediterenia Ɛpu utédu kesii kani mma Hamat na ɔƒɛ kanukɔ kakɛ.
21“Kalɔ kani nkya ntɛ bɔmɛni na badubo bule bute Israel adua ammɔ. 22Kadubo Israelƒuɔ kadi bunwini ku baƒɔ bani ƒui nkya-ma kudɔ na báwɔ béte Israelƒuɔ. Ɔdi ka banu baƒɔ bamɛni aani Israelƒuɔ bebi na bada-ma lɛni kani na bele kalɔ kammɔ 23kakɛ kadi bete-ma na kɔdua kɔni kemmo na bakya. Ami Unwoti Katɔti násu.”
Currently Selected:
Esekiel 47: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
