Esekiel 34
34
Israel Batɔnkune Badi Baƒonu Badane Bani Neeebo Kɔsia
1Unwoti Katɔti ɔnini,
2“Esekiel, ɔyawine ubi, Israel batɔnkune bese aani baƒonu badane bani mɔɔnu mina baƒonu bani ndi Israel kadi bekyuli lɛlɔ. Nsu mɔɔwia ka lɛdu bɔtɔnkune bamɛni kɔtɔ na lɛsu-ma nnini, ‘Ami Unwoti Katɔti mɔɔsu amii Israel baƒonu badane nnii bɛdubo udu bɔyii na amii ɔdi ɔsa! Bɛɛnu amii alati lɛlɔ na bíni mina baƒonu lɛlɔ bɔnu. 3Bɛɛní bana anyi ntu na biiti bana linwini teedi adi teete lɛlɔ. Na bɛɛdú babuni bani nélie lɛmwi taakun, nsu bíni na bilanu baƒonu lisu lɛmmɔ lɛlɔ! 4Bíni bani nse kpɛtɛ kpɛtɛ bɔgyumana na bɛbwi bani muuƒi iye binyimi-ma lɛlɛ lɛni na báƒɔ. Biidie-ma atu na baakɛ taavi kalɛ kalɛ na bilasia bani náyii ulu kama. Bɛɛbla-ma ulikplu na bɛɛɛdaku-ma lɛda. 5Báyii ulu bakɛ kesi kesii na ka bátakɛ ɔdane ɔdi ɔsu ni, beƒiebuo békpoku-ma na béƒie-ma taakun. 6Anwuɔsu mina baƒonu bégyingya bakya kalɔ lɛlɔ kesii biala. Bakɛ abi lɛlɔ ku abinkpo ƒui lɛlɔ na bátakɛ ukyuli ɔni nawia-ma kama ulu.
7-8“ ‘Na ɔƒaani ni, binu lɛla lɛni na ami Unwoti Katɔti mɔɔsu amii baƒonu badane bammɔ. Beƒiebuo békpoku mina baƒonu na béƒie-ma bákun, ɔsika bíni-ma lɛlɔ bɔnu. Na bítatásia bani na báyii lɛnɔ kama kudii. Na amii bɛɛdi teemo, nsu bítete mina baƒonu ama adila. 9-10Anwuɔsu ami Unwoti ndubo-mii kɔtu bɔni! Na likpo lɛƒɔ-ma ƒui na bina enu kemmo, na nsɔ lɛɛɛdubo bɔya na bɛbla bana badane ɔƒaamu iye bɛdu ɔdi lɛnɔ bɛkun. Ami Unwoti násu.’ ”
Unwoti Ndi Baƒonu Ɔdane Buni
11Ɔmmɔ kama ni, Unwoti ɔ́sɔ ɔ́su ɔnini,
“ ‘Ndubo mina baƒonu kama bɔsia na ami ɔlati lɛnu-ma lɛlɔ 12aani kalɛ na baƒonu ɔdane ɔɔsia baƒonu bani náyii kama. Ɔ́si kɔnyana limeyi suu lɛni kani na bégyingya-ma bákya kalɔ lɛlɔ kadi bekyuli akɔ ni, uwi ɔmmɔ kani lɛlɔ na mina baƒonu báyii. Nsu ndubo bukpo bɔƒɔ-ma ƒui 13na lɛkpanku-ma lɛsiku baƒɔ kɔlɔ kɔni lɛlɔ na bégyingya bakya ƒui lɛsɔku liboku. Ami ndubɔbla bana ɔdane na lɛya na badi na Israelƒuɔ abi ku awɛ kemmo kesii kani na kadi kalɔ kabuni lɛlɔ. 14Badubo bɔdi bɔvi ƒaa na lɛla lɛdi lilékpoku-ma na kesii kani na kadi adila abuni kakyakɔ. 15Líse kenye ka ndubo-ma lɛlɔ bɔnu na lɛda-ma kɔkɔɔkɔ. 16Na ndubɔsia bani náyii ku bani négyingya bakya lɛnɔ kama na linyimi bani náƒɔ lɛlɔ alɛbi na bani lɛgyumana bani nse kpɛtɛ kpɛtɛ. Na bani nélie lɛmwi na bebo ɔlɔkplu ni, ndubɔdu ama, ɔsika lɛla lɛni ndi lɛbuni na mɔɔbla uwi biala.’ ”
Katɔti Ɔdubɔdu Bekyuli Bekpidi Kɔtɔ
17Unwoti Katɔti ɔ́su Israelƒuɔ bani nse aani nwuna baƒonu ɔnini,
“Ndubo-mii anu bɔsia geen unwi unwi na lɛnu bani ndi baƒonu bani mbo ɔlɔkplu ku bani nse kpɛtɛ kpɛtɛ. 18Bina badi bɛɛkun livo lɛbuni geen na bɛɛnya taavi lɛkladi lɛlɔ si uwi ɔni na bɛ́wɔlɔ. Na bina badi bɛɛní ntu bɔbuni, na si bɛ́wɔlɔ na bɛkya bɔkladi lɛgba na bɔbla aba aba. 19Na ɔmmɔ ɔɔtina ka mina baƒonu bakladi ama balakɛ ntu bɔbuni taani.
20“Anwuɔsu ami Unwoti Katɔti ndubo-mii kemmo bule na bani mbo ɔlɔkplu bakya bunwu, na bani nse kpɛtɛ kpɛtɛ lɛnɔ bakya bunwu. 21Ɔsika amii bani lɛlɔ mbo ɔkplu bɛɛtu bani nse kpɛtɛ kpɛtɛ ku bina ese kpakplaa kalɛ na adila edu amii lɛti. 22Nsu ndubo bukpo bɔƒɔ-ma ƒui kalɛ na bilátaabla-ma lɛla lɛni naaadia. Na ndubɔƒuna-ma lɛsiku-mii kudɔ na lɛdu-mii kɔtɔ.
23“Na ɔmmɔ kama ni, ndubute-mii baƒonu ɔdane buni ɔni ndubɔsi mina kabla ɔblane ɔni ndi Ɔga Dawid ɔtɔ kemmo na bina ƒui bani mbo ɔlɔkplu ku bani na bese kpɛtɛ kpɛtɛ ƒui bakɛ ɔdane unwi pɛ na ɔnu-mii lɛlɔ kaduɛ. 24Anwu ndubɔbla bina ɔtɔnkune na ami lɛbla bina Katɔti. Ami Unwoti násu.
Uwi Ɔbuni Ɔdubo Ute Unwoti Baƒonu
25“Israel kadi bekyuli ndi mina baƒonu. Na líse kenye kpakplaa ka badubuli na atu bɔyɔ kemmo. Na ndubo eƒiebuo biala bɔbɔku bɔtɔlɔku kalɔ kakwiidi ku lɛku lɛmmɔ kemmo na basɔ baaadubo bɔyia. 26Badubulie bamana mina kɔbi kedee lɛlɔ. Na ndubo-ma kusɛ kusɛ bute na ɔnantu ɔna ute-ma utulo kalɛ na baawia muedi. 27Na bana adingyii adubo bɔnwu kaduɛ na edula lɛnɔ adia-ma. Ndubo bɔya na bakɛ bɔnwuna ƒaa na belie bana kalɔ lɛlɔ ku atu bɔyɔ na basɔ balabla ukyuli bamba kabla. Na badubɔnu bati ka ami ndi Unwoti. 28Kadi bamba bekyuli basɔ baaadubo-ma buyu. Na beƒiebuo lɛnɔ basɔ beleƒie-ma balakun. Na basɔ baaadubo lɛla lɛdi lɛnɔ bɔyia. 29Ndubo bɔya na baƒɛ edula abuni geen balɛku bana mmo kalɛ na kɔka kɔsɔ kulada-ma iye baƒɔ bani na bana adɔ basɔ baláma-ma. 30Na ukyuli biala ɔdubɔnu ka mɔɔgyumana mina kadi bekyuli Israelƒuɔ. Ami Unwoti nése kenye kamɛni. 31Mina baƒonu na badi na ami ndi bana Katɔti. Na mɔɔnu-ma lɛlɔ.”
Currently Selected:
Esekiel 34: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
