Esekiel 12

Esekiel Ɔ́tina Israelƒuɔ Kalɛ Na Badubo-ma Buƒie Bɔtɔlɔku

1Unwoti ɔnini, 2“Esekiel, ɔyawine ubi, bekyuli bani mɔɔkya lɛsɛ akɔ na akya. Bebo anumi, nsu béni banii balanu baláti. Na bebo atu, nsu béni banii belese atu na benu.

3“Anwuɔsu asa na ɔƒɛ wasa ni, si atu na enu lɛla lɛni na mɔɔyɔ́ ka abla. Bo ƒula ala alɛɛ ani obo aani si buti bada-a batɔlɔku aani ɔtɔntɛne kalɛ. Na alɛ eténye kesii kani na ukyuli biala wanu-ɔ kaduɛ na akɛ eteesie taavi. Ɔƒɛni kalɛ si benye baanu lɛla lɛni na aabla ni, badubo bɔnu bɔti lɛsɛ bakyane bani udu na badi. 4Si uwi ɔni na ábla ɔmɛni áwɔlɔ ni, na enwini esie ƒula kaduli. Na ɔmmɔ kama si uwi ɔni na ɔ́bla usien ni, na avi alɛ kaduli aani si buƒie na béƒie-ɔ bátɔlɔku béselaku kalɔ bamba kadi lɛlɔ. 5Ya na ukyuli biala unye utaanu-ɔ asa na edie liƒi na ƒula ɔtɔ kowodu kɔdi kemmo na eti ƒula obo ada na akpɛ alɛ kowodu liƒi lɛmmɔ kemmo. 6Gyu ƒula obo ɔmmɔ sia ƒula amangba na eti lɛla lɛdi ebi anumi na alɛ eduo lɛdisa lɛmmɔ kemmo kalɛ na alanu ɔmii ɔni kemmo na ésela aláti. Na ala amɛni ƒui enwini Israelƒuɔ kati bute kpakplaa.”

7Amu na lɛ́bla ala ani ƒui na Unwoti ɔ́su-mi ɔnii mbla mmɔ. Lɛ́sala ala alɛɛ adi. Na uwi ɔni na ɔƒɛ úsela bɔni ni, na ukyuli biala lɛnɔ unye ɔɔnu-mi ni, lídie liƒi lɛdi na mina ɔtɔ kowodu kemmo. Na lɛ́ni mina obo lɛ́lɛku lɛ́sia mina lɛmangba na liduo kadi suu kammɔ kemmo.

8Kadi kegye ɔtanta ni, Unwoti 9únyimene-mi ka lɛsɛ bakyane bammɔ ɔdi biala utakana na uye lɛla lɛni na mɔɔbla mmɔ kalɔ.

10Anwuɔsu ɔ́sɔku-mi ɔ́tala ɔnii ntásu-ma ɔnini, “Unwoti ubo kenye kadi na ɔsu Yerusalem ɔtɔnkune ku bani na ɔtɔnku mmɔ ƒui! 11Lɛ́bla ala amɛni lɛ́tina-ma kalɛ na banu bati ala ani ndubo-ma bɔlɛku uwi ɔni na badubuti-ma batɔlɔku aani bekyuli beƒiedi kalɛ. 12Na Yerusalem ɔtɔnkune ɔdubuti nwuna obo ɔsia lɛmangba useyi uwi na ɔsia kowodu liƒi lɛni na bekyuli bamba bédie na nwuna ɔtɔ awodu kemmo. Na ɔdubuti lɛla lɛdi ubi nwuna anumi na uláti ɔmii ɔni lɛlɔ na úsela. 13Unwoti ɔla ndubo nwuna asawu bubo na udie-nwu uwi ɔni na ɔ́si ɔɔlɛ́ Yerusalem ɔma kemmo. Na ɔmmɔ kama na bakpanku-nwu besienku Babilon, nsu ɔɔɔdubo mmɔ bɔnu ku nwuna anumi kudii. 14Na badubo nwuna benengu alati ku nwuna bekpone bɔgyingya bɔkya kesii biala na Unwoti ɔdubo-ma budie ƒui bute unwi unwi na badu.

15“Na Unwoti ɔdubo bekyuli bani nébu bakya Yerusalem lɛlɔ bunye na babɔku-ma batákya kadi bamba bekyuli akɔ kesii kani na badubusie batánu bati ka ami nábla ala amɛni ƒui. 16Badi badubɔlɛ kekpo ku kɔka ku lɛlɛ likpidi enu kemmo. Na ama ndubo baƒɔ bammɔ bɔsu kalɛ na bábla ekpidi ani ndi ekisila bonwu bonwu ɔsu na Unwoti ɔ́ni-ma kɔtu lɛni.”

17Unwoti ɔnini, 18“Esekiel, ɔyawine ubi, ya na lɛlɔ litaatɔ-ɔ na kadikɔ ku liƒu na ƒula enu eteeboku lɛlɔ si aaní ntu. 19Su Israel kadi bekyuli anii ami Unwoti násu nnii limeyi lɛdi lɛdubo ɔni na lɛlɔ lɛdubo-ma butaatɔ si baadi na bana enu eteeboku lɛlɔ di baaní ntu. Na badubo kalɔ kammɔ ƒui udu bɔyila na ɔsɔ uwi ukpludi, ɔsika bábla ulikplu ku kalala geen. 20Badubo ɔma biala bubo bɔbwɛ na lɛla biala lɛsɔ liladia na ɔma ɔmmɔ kemmo, ɔsika kalɔ kammɔ kadubunwini kɔnwinimi kalɔ kakwiidi. Na badubo bɔti ka ami ndi Unwoti.”

Unwoti Etemila Adubudie Lɛlɔ Atina Ka Adi Etemila Geen

21Unwoti ɔnini, 22“Esekiel, ɔyawine ubi, eenú ka bekyuli beebó lɛgba lɛmɛni na Israel bubo bubo banini, ‘Lɛla biala uwi ɔɔví, na kenye bediene ala ani baanu muedi asɔ alalɛ kalɛ na básu.’ 23Na ɔƒaani ni, ya na kadi bekyuli bammɔ bati ka ni, ami Unwoti ndubo-ma ɔkɔ bɔsia ka lɛsugba lɛmmɔ lɛɛɛdi litemi geen na ɔsɔ ɔɔɔdubo bunwini lɛla lɛni na bataasu na Israel. Ɔsika uwi klukwii kemmo ni, mina etemila ani ƒui na lɛ́su adubo ete lɛni! 24Bekyuli bammɔ basɔ baaadubo etemila keeke ku ɔkɔ bɔlɛ bɔdi bunu. 25Ndubute-ma mina linyesia na ala ani na masu adubo bɔlɛ lɛni kani. Tɛmiku lɛsɛ bakyane bammɔ kpakplaa ka uwi údu ka bani-ma kɔtu. Ami Unwoti muusé kenye kamɛni.

26-27“Esekiel, Israel kadi bekyuli baasu lɛnɔ banii ƒula etemila ku kɔyu kemmo ala bɔnu ƒui bɔdanku uwi ɔni mebo kama kama.

28“Anwuɔsu su-ma anii mina etemila amɛni adubo-nwu kemmo lɛni uwi klukwii ɔmɛni kemmo kani aani kalɛ na lɛ́su-ma kpakplaa líse. Ami Unwoti násu.”

Currently Selected:

Esekiel 12: lef

Highlight

Copy

Compare