Israelƒuɔ Bɔlɛ 33

Unwoti Ɔ́su Israelƒuɔ Ka Bata Sinai Kɔbi Lɛlɔ

1Amu na Unwoti ɔ́su Mose ɔnini, “Awɔ ku bekyuli bani na ákpanku álɛku Egyipte mmɔ bɛta kesii kani bilie mɛni. Na biteesie kalɔ kani líse kenye ka mete Abraham ku Isak ku Yakob ku bana bawɔ mmɔ lɛlɔ. 2Na ndubɔya na mina ɔtu ɔgyumana-mii. Na ndubɔbɔku Kanaanƒuɔ ku Amoriƒuɔ ku Hitiƒuɔ ku Perisiƒuɔ ku Hiwiƒuɔ ku Yebusiƒuɔ bani nlie mmɔ lidie. 3Kalɔ kani lɛlɔ bísela mmɔ egyiibi ntu bɔɔyu emini aani uwɔ na kana lɛlɔ bebuo baayu anyi ntu pii. Nsu ami Unwoti lɛɛɛdubo-mii bɔkpanku. Ɔsika bɛdi bekyuli bani atu mbo ɔkplu geen, na ɔƒɛni kalɛ ndubɔyila-mii udu na ulu lɛlɔ.”

4Uwi ɔni na bekyuli bammɔ bénu ɔmɛni ni, bana lɛlɔ lɛ́bla-ma kɔnyana na beewulo. Na básɔ bátada lɛlɔ ku sika ugyiedi ala. 5Ɔsika Unwoti ɔ́su Mose na úbasu-ma ɔnini, “Bɛdi bekyuli bani atu mbo ɔkplu geen, na ɔƒɛni kalɛ si ami ku-mii bɔsiaku lɛlɔ uwi klukwii ɔdi muedi ni, ndubɔyila-mii udu kede kede. Ɔƒɛni ɔdi biala ɔda nwuna sika ugyiedi ala udie, na ndubɔnu kalɛ maabla-mii.” 6Anwuɔsu ka bátɔlɔ Sinai kɔbi lɛlɔ mmɔ ni, básɔ bátada sika ugyiedi ala.

Katɔti Adi Kevo Kasakɔ

7Na kesi kesii Israelƒuɔ badubɔda keliekɔ kadi ni, Mose uuti Katɔti Adi Kevo taatálɛ keliekɔ kammɔ kabanye. Na ɔsia-nwu lɛnyi ɔnii Katɔti Kevo Kasakɔ. Na ukyuli biala mɔɔwia lɛla lɛdi ɔsiku Katɔti kudɔ uusié mmɔ. 8Na uwi biala na Mose úsie kevo kammɔ kudɔ ni, Israelƒuɔ ƒui baalɛ́ teenye bana nvo kɔyakun taanu Mose utédu ka úduo-ka kemmo. 9Na si Mose úsie kevo kammɔ kemmo ni, liƒlukutu bonwu lɛmmɔ liibo teebenye ɔtɔ ɔmmɔ kayakun uwi ɔni na Unwoti ɔkya ɔɔtɛmi-ku Mose. 10Na si Israelƒuɔ bánya bánu liƒlukutu lɛmmɔ na kevo kayakun na ɔdi biala uuboku lɛlɔ kalɔ. 11Na Unwoti ɔɔtɛmi-ku Mose anumi ku anumi aani kalɛ na bakpana baatɛmi. Na Mose ɔ́sɔ únwini úsie nwuna keliekɔ. Nsu okloƒu ɔni muubunku Mose na baalɔ-nwu banii Yosua na ɔdi Nun ubidi ni, anwu ɔɔƒɔ́ lɛlɔ taakya Katɔti kevo kammɔ kemmo.

Unwoti Ɔ́lɛ Ugyii Ka Ɔdubulieku Nwuna Bekyuli

12Amu na Mose ɔ́su Unwoti ɔnini, “Ɔdi sɔsɔ ka awɔ násu-mi anii nkpanku bekyuli bamɛni nsienku kalɔ kani kenye na ése-ma lɛlɔ. Nsu átasu-mi ukyuli ɔni na ndubo-mi bubunku. 13Na ɔƒɛni ɔni lɛ́ɛti-ɔ mɛni ni, ya na lɛti ƒula kasusu kani na ada, kalɛ na makana na mesie anumi na mabla ƒula lɛyɔla. Na enyimo lɛnɔ ka awɔ náƒuna bekyuli bamɛni ábla ƒula badi.”

14Amu na Unwoti ɔ́su Mose ɔnini, “Ndubɔkpanku-mii, na ndubɔya na bikpo bɛdi lɛlɔ.”

15Amu na Mose údie kenye ɔnini, “Si agyi ka aaadubo-bu bɔkpanku bɔdi ni, ya na bɔsɔ bɔkya kesii kani bulie mɛni. 16Na dɛ na ɔdubɔbla na bekyuli banu bati ka kaƒɔ kaayɔ́-ɔ na ƒula bekyuli lɛlɔ ku ami lɛnɔ si átatɔnku-bu? Si akya-bu akɔ ni, kayawi bekyuli ƒui badubɔnu kavumana kebendi na abu ku-ma ntɛ.”

17Amu na Unwoti ɔ́su Mose ɔnini, “Kalɛ na aayɔ́ ka lɛbla lite-ɔ ni, lɛni kani ndubo bɔbla. Ɔsika ngyi-ɔ kaduɛ na ƒula ala ƒui aayɔ́-mi kaƒɔ.”

18Mmɔ na Mose ɔ́su Unwoti ɔnini, “Amu buvele nda-a, ya na lɛnu ƒula bukeye.”

19Amu na Unwoti údie kenye ɔnini, “Ndubɔya na mina bukeye bɔvi ƒula anumi. Na si mɔɔví ni, ndubɔlɔ mina lɛnyi kedee nnii Unwoti. Na ukyuli ɔni litemi mɔɔyɔ́ ni, ndubɔnu-nwu kɔnyana. Na ukyuli ɔni mɔɔyɔ́ lɛnɔ ni, ndubɔbla-nwu lɛƒɔndia. 20Na aaadubo mina anumi bɔnu. Ɔsika ukyuli biala ulanu-mi anumi na welie ngba.”

21Amu na Unwoti ɔ́su Mose ɔnini, “Aanu kesii kadi na kede-mi na mmɔ akana akɔ etéduo lɛtakpɛ ɔkɔkɔ ɔdi kemmo. 22Na si mina bukeye bɔ́si bɔɔví ni, ndubɔya na anu-mi asiku ɔkɔkɔ mmɔ. Na ndubuti mina enu libiɔ-ɔ lɛlɔ uti utédu ka lɛ́vi lɛ́wɔlɔ. 23Na ɔmmɔ kama ndubɔda mina enu lidie-ɔ lɛlɔ, na adubɔnu mina kama, nsu ɔɔɔdi mina anumi.”

Currently Selected:

Israelƒuɔ Bɔlɛ 33: lef

Highlight

Copy

Compare