Israelƒuɔ Bɔlɛ 31
31
Unwoti Ɔ́ƒuna Besaleel Ku Oholiab
1Amu na Unwoti ɔ́su Mose ɔnini, 2“Lɛ́ƒuna Besaleel ɔni ndi Uri ubidi na ɔdi Hur uwɔ. Na ɔ́si Yuda kaba kemmo ka udi Adi Kevo ku ala ani ɔlɛka banwi bakya ɔtɔ ɔmmɔ ƒui. 3-5Na lɛ́ya na mina kɔyu kɔ́ƒɔ-nwu lɛlɔ kemmo ƒui na líte-nwu lɛnunda ku lɛlati bonwu lɛni na ɔkana uti sika ugyiedi ku ɔƒualadi ku abuala egyiedi ɔvɔ ala lidu lidu. Na uti kugyii lɛnɔ ɔnwi ala lidu lidu. 6Na lɛ́ƒuna Oholiab ɔni nási Dan kaba kemmo lɛnɔ ka uteete-nwu kebunku. Na líti lɛnunda ku lɛlati lɛ́kya bekyuli bamba bani ndubɔbla lɛla biala aani kalɛ na líbo-ɔ ɔda. 7Na badubo Adi Kevo kedee, ku Unwoti Bunyimi Adaka, ku nwuna likpidi kɔtu bɔni budie libila, ku ala ani ƒui nkya kevo kammɔ kemmo bɔbla. 8Na badubɔbla ala kasiakɔ ku ala ani beeti taasia-nwu lɛlɔ ku asogya ligyii kalɛkɔ ku oloƒui kakyulakɔ 9ku lɛkpabi ku nina lɛlɔ ala ku lɛkyami lɛni béti abuala egyiedi bávɔ-ni ku nwuna ɔka. 10Na badubɔka ɔkpane Aaron ku nwuna bebi lɛwu buni lɛni badubo bɔkya buti bɔbla bakpane kabla. 11Na badubɔbla nnɔmii ku oloƒui ƒɛƒɛɛ ɔni beeti taabla Katɔti Kakpakɔ Kedee lɛlɔ kabla. Na badubɔbla ala amɛni ƒui aani kalɛ kani na líbo-ɔ ɔda.”
Lɛnwunameyi Ɔda Bubo
12Amu na Unwoti úbo Mose ɔda ɔnini, 13“Su Israelƒuɔ anii, ‘Bɛdi lɛnwunameyi lɛni ndi mina limeyi lɛlɔ. Ɔsika limeyi lɛmmɔ lɛdi likposela lite ami Unwoti ku amii Israelƒuɔ ɔ́si ɔƒɛni úsela uwi ƒui. Na ɔmɛni ndubɔtina ka ami Unwoti náƒuna-mii lɛ́bla mina bekyuli.
14“ ‘Na bɛdi lɛnwunameyi lɛmɛni lɛlɔ kaduɛ. Ɔsika lɛdi mina limeyi kedee. Na ukyuli ɔni mayu atuɔkplu na wabla kabla kadi limeyi lɛmmɔ lɛlɔ ni, ɔlɛka badu-nwu.’ 15Su-ma anii beti emeyi aku babla kabla bete lɛlɔ, nsu limeyi maatɛdi lɛdi lɛnwunameyi lɛni lídie líse líte lɛlɔ. Na ukyuli ɔni mabla kabla kadi limeyi lɛmmɔ lɛlɔ ɔlɛka badu-nwu. 16Na Israelƒuɔ ɔlɛka basia limeyi lɛmɛni anu na bataadi-ni aani bunyimi bɔni nse nte uwi ƒui. 17Na bunyimi bɔmɛni bɔdi bunyimi bɔni ndubɔkya ami ku Israelƒuɔ ƒui ntɛ ɔ́si ɔƒɛni úsela uwi ƒui. Ɔsika ami Unwoti líti emeyi aku lídie katɔ ku kalɔ. Na limeyi maatɛdi lɛlɔ ni, lɛ́da kabla lɛ́ya na lɛ́nwuna.”
18Uwi ɔni na Katɔti ɔ́tɛmi-ku Mose ɔ́wɔlɔ na Sinai kɔbi lɛlɔ ni, úti nwuna bunyimi kɔlɛkɛ kɔni na Katɔti ɔlatidi únweni ɔda bubo ɔ́sia úte-nwu.
Currently Selected:
Israelƒuɔ Bɔlɛ 31: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
