Israelƒuɔ Bɔlɛ 29

Kalɛ Ɔlɛka Bese Katɔti Bakpane

1“Asa na adubuse Aaron ku nwuna bebi badi bakpane ni, ala amɛni na ɔlɛka abla. Ƒuna ɔmantɛ akɔ ɔgyani ku baƒonu bagyani inyɔ bani na bɔsɔ bɔdi buuubo-ma lɛlɔ. 2Na eti edula ebi ɔlaaƒɔ buni ɔni na bɔnyii buuubo-nwu kemmo, na abla bodobodo unengudi ku ubliidi na asala-nwu ku nnɔ ku bodobodo bɛɛbɛɛ na esusu-nwu nnɔ. 3Na si uwi ɔni na adubo ebeti bebuo bammɔ akpa ete-mi ni, na ala bodobodo ɔmmɔ ƒui ewi kagyigyɛ kemmo na eti ada. 4Na akpanku Aaron ku nwuna bebi eboku Adi Kevo kammɔ kayakun kenye na abla-ma ntu bɔkpila ɔdi. 5Na adubuti bakpane lɛwu lɛmmɔ akya Aaron awu gyɔlɔɔ ɔmmɔ ku ɔtɔdi akɔnkɔ bune ku bakpane awu kpɛtɛ kpɛtɛ kedee ɔmmɔ ku kayi lɛbalala lɛdiku ku kavobi lɛduni buni lɛni bédi kaduɛ mmɔ. 6Na ebi-nwu dukuu kabwa kammɔ. Na eti likpose kalɛkɛ kammɔ ebo ada kabwa kammɔ lɛlɔ. 7Na ɔmmɔ kama na eti likpose nnɔmii bɔmmɔ ewi-nwu lili na ese-nwu likpo. 8Ɔmmɔ kama na akya Aaron bebi lɛwu lɛtɔdi akɔnkɔ bune lɛmmɔ. 9Na eti atɛntɛ aduni ammɔ ada-ma eli. Na eti bana aduni ada-ma kavobi. Na ese-ma aani mina bakpane kalɛ. Ɔsika ama ku bana bawɔ ndubo mina bakpane bɔbla úsela uwi ƒui.

10“Na akpanku ɔmantɛ akɔ ɔgyani ɔmmɔ esienku Adi Kevo kammɔ kayakun. Na aya na Aaron ku nwuna bebi bananabi beti bana enu basia ebuo ɔmmɔ kuli. 11Na adu ebuo ɔmmɔ na mina lɛkpabi lɛni nlɛ mina Adi Kevo kammɔ kudɔ. 12Na eti lɛnimi akya ubugya ɔmmɔ kemmo na eti esusu bebuo ese ani nlɛ lɛkpabi lɛmmɔ lɛlɔ. Na ewilimi ubugya ɔmmɔ ɔkladi ewi kalɔ na lɛkpabi lɛni kudɔ bɛ́du ebuo ɔmmɔ. 13Na eti lɛmwi lɛni ƒui nkya ebuo ɔmmɔ kaƒɔ kemmo ku akɔ ammɔ ku akabi anyɔ ammɔ ku ana lɛmwi ɔ́sia ogya lɛlɔ na lɛkpabi lɛmmɔ lɛlɔ na ɔ́kyula-ni ƒui. 14Nsu ɔmantɛ akɔ ɔgyani ɔmmɔ ɔku ɔni bédie-nwu ku lɛna lɛmmɔ ku ala ani béwilimi-nwu kaƒɔ kemmo ƒui ni, béti-nya bátákyula na keyi na bana keliekɔ kammɔ kama beti bevele likpidi buti taakyiɛ.

15“Na akpanku koƒonu kɔgyani kunwi eboku na Aaron ku bebi beti enu basia-ku kuli. 16Na adu koƒonu kɔmmɔ na akuna ubugya ɔmmɔ ewi lɛkpabi ekpo ene ammɔ ƒui. 17Na ekulo-ku na aƒɔ kuna aƒɔla ku lɛgba na eti ebuo ɔmmɔ ƒui ku nwuna lili asia lɛkpabi lɛmmɔ lɛlɔ. 18Na akyula koƒonu kɔmmɔ ƒui na lɛkpabi lɛmmɔ lɛlɔ na ɔdubɔbla akpala bɔkyula ƒui uyɔ ɔnyi ƒɛƒɛɛ ɔni mɔɔyɔ́ ami Unwoti kaƒɔ.

19“Na akpanku koƒonu kɔgyani kɔkladi eboku na Aaron ku nwuna bebi bananabi beti enu basia-ku lili. 20Na adu ebuo ɔmmɔ. Na eti ubugya ɔmmɔ ɔdi esusu Aaron kɔdianu kɔtu kawɔlɔkɔ ku nwuna kɔdianu kɔnu ku ɔgba animigya. Na abla lɛni kani ete nwuna bebi lɛnɔ. Na akuna ubugya ewi lɛkpabi lɛmmɔ ekpo ene ammɔ ƒui. 21Na eti ubugya ɔmmɔ ɔdi na eti nnɔmii bɔni na eti éwi Aaron lili mmɔ ɔdi ewi ubugya ɔmmɔ kemmo. Na akuna ewi Aaron ku lɛwu lɛni na ɔkya mmɔ lɛlɔ. Na asɔ akuna ɔdi ewi nwuna bebi ku bana lɛwu lɛlɔ. Na ɔmɛni ndubɔtina ka bése-ma bakpane bete-mi.

22“Koƒonu kɔmɛni kubunku bakpane buse kabla kammɔ kadi. Anwuɔsu ti lɛmwi lɛni nkya ebuo ɔmmɔ ɔka kakɛ ku kaƒɔ kemmo ku akɔ ammɔ kawɔlɔkɔ kakɛ ku nwuna akabi anyɔ ku kuna kɔdianu libuli lɛmmɔ se sɛsɛɛ. 23Na edie bodobodo ɔni kemmo na bɔnyii buuubo-nwu kemmo na use Unwoti anumi mmɔ. Die unengudi ku ubliidi ku ɔni nse bɛɛbɛɛ. 24Na eti bodobodo ɔmmɔ ku lɛna lɛmmɔ akya Aaron ku bebi enu kemmo na bakɔliku-nya katɔ batina-mi bebo akpala ammɔ kudu. 25Ɔmmɔ kama na aƒɔ akpala ammɔ asiku bana enu kemmo akyula na lɛkpabi lɛmmɔ lɛlɔ ete-mi, na nwuna uyɔ ɔnyi ƒɛƒɛɛ ɔdubɔyɔ-mi kaƒɔ. 26Na si bɛ́wawa lɛna linyɔdi lɛmɛni bíte Aaron ɔkpane buse kabla ni, bɛkɔliku kayi lɛna lɛmmɔ katɔ bɛtina-mi na bibo akpala ammɔ kudu. Na ɔmmɔ kama lɛna lɛmmɔ lɛdubunwini ƒula kadikɔ.

27-28“Ɔ́si uwi ɔmɛni kemmo úsela uwi ƒui ni, si beesé ɔkpane ɔdi iye baabla unwi bɔbla akpala ni, kayi lɛna ku libuli lɛmmɔ lɛdubunwini ala ani na Israelƒuɔ badubuti bete Aaron ku nwuna bebi aani bana akpala ani na béboku ami, Katɔti. 29-30Na si Aaron úkpi ni, ɔlɛka beti nwuna ɔkpane lɛwu bete nwuna bebi bani mɔɔdi nwuna ala aani ɔkpane unegudi kalɛ. Na ɔlɛka ala ɔdine ɔmmɔ ɔkya lɛwu lɛmmɔ emeyi maatɛ ani kemmo na beesé-nwu ɔkpane mmɔ.

31“Ebuo ɔni bɛ́du bíte bakpane bammɔ buse ni, biƒulo-nwu na Adi Kevo kayakun kenye mmɔ. 32Na aya na Aaron ku nwuna bebi bananabi beti bodobodo lidu ɛtɛ lɛmmɔ na badi ku lɛna lɛmmɔ na mina kevo kayakun kenye. 33Na Aaron ku bebi bananabi lɛti badi adila kedee ammɔ. Na beti babla likpidi kɔtu bɔni budie lɛkpa limeyi bɔdi. Na taya na ukyuli ɔdi ɔdi adila ammɔ adi ubunku-ma. 34Na si adila kedee ammɔ ébu úti útédu lɛdigye ni, na bakyula-nya.

35“Na eti emeyi maatɛ ese Aaron ku bebi mina bakpane aani kalɛ kani libo-ɔ ɔda pɛpɛɛpɛ. 36Na limeyi biala ɔlɛka adu ɔmantɛ akɔ ɔgyani unwi na eti abla alaekpidi kɔtu bɔni budie akpala. Na ɔmɛni ndubɔya na mina lɛkpabi lɛbla kedee. Na asɔ akuna likpose nnɔmii ewi lɛkpabi lɛmmɔ lɛlɔ na lɛbla kedee lɛwɔlɔ ƒui. 37Na abla ala amɛni asia kama emeyi maatɛ. Na ɔmɛni ɔdubɔya na lɛkpabi lɛmmɔ lɛbla kedee. Na si ukyuli ɔdi útuku lɛkpabi lɛmmɔ ni, anwu lɛnɔ ɔdubɔbla kedee.”

Lɛkpa Lɛni Ɔlɛka Abla Limeyi Ndi Limeyi

38Amu na Unwoti ɔ́sɔ ɔ́su Mose ɔnini, “Limeyi ndi limeyi ɔlɛka adu baƒonu bagyani inyɔ bani nákɛ lɛkwa linwi. 39Na adu unwi ɔtanta na adu unwi useyi uwi. 40Na kudeedi ni, wia bodobodo ɔlaaƒɔ ɔni muukeye na akya akyami anyɔ. Na akya nnɔ ɔɔƒɛɛ unwi ewi-nwu lɛlɔ. Na akya ntɛ lɛnɔ ɔɔƒɛɛ unwi ewi-nwu kemmo na eti abla akpala ammɔ. 41Na adu kunyɔdi useyi uwi na ebunku ɔlaaƒɔ ku ntɛ aani ɔtanta ɔdi kalɛ kani na ɔbla ɔnyi ƒɛƒɛɛ akpala bɔkyula ute ami Unwoti.

42“Na lɛni na awɔ ku ƒula kaba ƒui bɛdubo akpala amɛni butaabla na Adi Kevo kammɔ kayakun kesii kani na ndubo mbasiaku-mii na lɛtɛmiku-mii. 43Ndubɔsiaku amii Israelƒuɔ ƒui na mmɔ na ndubo bukeye na lɛbla mmɔ kedee.

44“Na ndubo kevo kammɔ ku lɛkpabi lɛmmɔ budie buse sɛsɛɛ bute ami Unwoti na lidie Aaron ku nwuna bebi bananabi lɛnɔ lise sɛsɛɛ na benwini bakpane bataabla-mi kabla. 45Na ami Unwoti ndubɔkya-mii akɔ aani bina Katɔti kalɛ. 46Na mmɔ na bɛdubɔnu bɔti ka ami ɔni ndi bina Katɔti nédie-mii lɛ́lɛku Egyipte kalɔ lɛlɔ.”

Currently Selected:

Israelƒuɔ Bɔlɛ 29: lef

Highlight

Copy

Compare