Etemila 10
10
1Kalɛ na si balɔlɔ békpi bákya nnɔmii ƒɛƒɛɛ kemmo
na ɔɔyá na nnɔmii bɔmmɔ ɔnyi ɔɔbla buɛ buɛ ni,
lɛni na kɔdɔlɔ kɔɔyá na lɛnunda ku ɔbu ɔɔyii udu.
2Banundane kayi kaatɔnku-ma na baabla ala abuni.
Lɛni kani na badɔlɔdi kayi kaatɔnku-ma na baabla likpidi.
3Si ina ɔgbami na ɔdɔlɔdi ɔkɛ muedi ni,
nwuna busie lɛti lɛti bɔɔtina-a kalɛ na ɔ́dɔlɔ.
4Si ƒula ɔtɔnkune ɔ́kɛ kɔnyi ɔ́kya-a ni,
teni ƒula kabla na ada-ka ewi.
Ɔsika lɛlɔ kalɔ buboku buɛɛ uutile
na uuboku kɔnyi ku ala pii kalɔ.
5Lɛ́nu likpidi bamba bɔbla na kalɔ kamɛni lɛlɔ.
Na batɔnkune bani mɔɔdi bekyuli lɛlɔ
mɔɔbla likpidi lɛmɛni.
6Na ama muuti badɔlɔdi teenyene kunyekɔ kɔni mbo ɔbu
na balakɛne mmomu na beeboku kalɔ.
7Lɛ́nu ka bekyuli bani nkya bekyuli kudɔ baabla-ma kabla
mmomu nlie bapɔnkɔ kama
na bagabi bakɛ lɛgba aani ama mmomu ndi kabla bablane.
8Bekyuli bani muukú libu teese bana bakpana ni,
ama alati mɔɔnú-ni kemmo.
Lɛni kani na bekyuli bani mɔɔbwɛ kɔwodu taawia kasiakɔ ni,
balakpi mɔɔdu-ma.
9Ukyuli ɔni na atabi na aabwɛ ni,
akana na aƒɔ ɔlɛ na ana bɔbwɛ kemmo.
Na si egyii lɛnɔ na aabwɛ ni,
ɔgbankpi ɔkana na ɔsiaku-ɔ.
10Oloma ɔni neeebo ɔbi ni,
amu ntu ébeyi ku ɔyikun momoomo.
Nsu si agyi-nwu kemmo ni,
adubɔbwɛ lɛla lɛni na aayɔ́ abwɛ.
11Si kɔlakpi kɔ́ɔdu ukyuli kɔ́wɔlɔ asa na ukyuli ɔni ngyi bɔkanti
ɔnii ɔɔbala-ku bɔdu ni, kekeeke na ɔdi.
12Ɔnundane etemila ani mɔɔlɛ́-nwu kenye aatina lɛƒɔndia.
Nsu ɔdɔlɔdi etemila mɔɔyila-nwu udu.
13Badɔlɔdi balabla kasusu si baatɛmi.
Na ɔmmɔ muuboku-ma ɔgbankpi na kawɔlɔkɔ.
14Na badɔlɔdi bammɔ
beemomo atɛ
nsu bula ɔdi ɔɔɔgyi lɛla lɛni masia.
Lɛni kani na bɔɔɔgyi lɛla lɛni ndubo kama.
15Ɔdɔlɔdi kabla ni, lɛlɔ butu bukpludi na bɔdi,
ɔsika ɔɔɔgyi ulu ɔni na ɔsia uduo ɔma.
16Kalɔ kani ɔtɔnkune mɔɔbla anamula
na bɔdi ku bɔni emeyi bɔdi kani na nwuna benengu belie bete ni,
bɔbuɛ na beete kalɔ kammɔ.
17Nsu kalɔ kani ɔtɔnkune ndi ukyuli ɔni náni ɔ́kɔ
na nwuna benengu baládi taani kani ni,
kalɔ kammɔ keesié anumi.
18Kɔkɔsɔ kuutulo bekyuli geen
ɔni na si ɔtɔ ɔni kemmo beli muedi uudú ni,
balakana na betile liƒi lɛmmɔ.
Na beenye taanu na ɔtɔ umodi ɔmmɔ ɔƒɛ uwi kalɔ.
19Bɔdi ku bɔni bɔɔyá na lɛlɔ lɛɛyɔ́ ukyuli geen
nsu egulabi mɔɔbla lɛla biala.
20Tabɛ takya ƒula ɔtɔ kemmo na ataalɔ ɔga
iye ɔlakɛne ɔdi lɛnyi eteedumi na eteewida-nwu.
Ɔƒɛni kalɛ aasɛ blii ɔdi úveyi ɔɔví eli
na ɔdubuti-ɔ litemi utásu-ma.
Currently Selected:
Etemila 10: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
