Timoteo 2 4
4
Die Litemi Buni Lɛmmɔ Kenye
1Nnye Katɔti ku Kristo ɔni ndubɔsɔ ubo ubatɛku bayawine ku bekpine litemi anumi. Na ka ɔdubɔsɔ ubo na nwuna lɛga bɔdi kemmo ɔsu ni, mɔɔlɛ-ɔ kpakplaa nnii 2si bebo kɔnu o-o, iye beeebo kɔnu o-o ni, die litemi buni lɛmmɔ kenye. Klibi-ma, na adɔnku-ma, na akya-ma ogya. Na si eedie ala kalɔ taatina-ma ni, na ewi lɛlɔ na akɛku-ma kayi geen. 3Ɔsika uwi ɔdi ɔdubo ɔni na bekyuli basɔ baaadubo litemi buni lɛmɛni bɔda. Mmomu badubɔwia ala bamba batinane bete lɛlɔ na bataasu-ma ala ani udu na baawia beteenu. 4Badubo kama bunwini bɔkya litemi buni lɛmɛni na basiaku etemila anwidi kama. 5Na awɔ ni, da lɛlɔ kaduɛ na ulu biala lɛlɔ, na ataakya ɔkplu na lɛbibo biala kemmo. Na abla kabla aani litemi buni lɛmɛni lɛsa ɔkɔne. Na abla ƒula baƒɔtaadine ɔtɔnkune kabla ƒui kaduɛ.
6Ɔsika ami ni, mina ngba bɔdaku kalɔ buwi aani ntɛ lɛkpa. Na uwi lɛnɔ úudu ka lɛtɔlɔ kayawi kamɛni kemmo. 7Líkpo kekpo kabuni na lɛ́wɔlɔ mina kabla aani usi ukeline buni kalɛ. Na lɛ́da mina bɔƒɔtaadi na Kristo kemmo útédu kawɔlɔkɔ. 8Na ɔ́si ɔƒɛni ni, Katɔti ɔ́ɔklibi mina kabwa kani mɔɔtina ka lílie ɔƒɔtaadine ngba ulu lɛlɔ úse-mi. Ɔdi kabwa kani na Blɔti ɔni mɔɔtɛ bula ƒui litemi ulu lɛlɔ ɔdubo-mi bute limeyi likplodi lɛmmɔ. Na ɔɔɔdi ami lɛti pɛ ndubɔkɛ-ka, mmomu ami ku bani ƒui lɛnɔ nsia anu bete Blɔti bɔsɔ bubo bɔmmɔ.
Yile-mi Bubanu
9Sia ulu biala lɛlɔ na eyile-mi bubanu. 10Ɔsika Dema ɔ́tɔlɔ-mi kudɔ na ɔsiaku kayawi ala kama úsie Tesalonika. Na Kreske anwu ni, úsie Galatia, na Tito úsie Dalmatia. 11Luka lɛti nébu ɔkya-mi kudɔ. Anwuɔsu tiku Marko na bibo, ɔsika ɔdi-mi ubunkune geen. 12Lɛ́tala Tihiko na Eƒeso. 13Na si adubo ni, ti mina kɔyɔ awu gyɔlɔɔ ɔni na lɛ́da líse Karpo kudɔ na Troia boku-mi. Na eti mina lɛku ku kɔkunkɛ kɔni na mɔɔwia teetulo lɛnɔ boku-mi.
14Aleksandro ɔni ndi ɔkywɛne ɔ́bla-mi kalala geen. Na Blɔti ɔdubɔƒɔ-nwu lɛla lɛni na ɔ́bla kayu. 15Anwuɔsu awɔ lɛnɔ nye kagyumana te-nwu, ɔsika ɔ́ta únye bula ala ani na bɔɔtina lɛlɔ geen.
16Kudeedi kɔni na bátɛku-mi litemi ni, ɔdi biala útakana na ubo ubenye-mi litemi kama, mmomu béni-mi bése. Nsu muuvele Katɔti nnii utani-ma kɔtu na ɔmɛni lɛlɔ. 17Nsu ni, Blɔti únyeku-mi na ɔ́kya-mi ɔyikun na lɛ́kana lɛ́su Blɔti litemi lɛmmɔ kaduɛ lite bani naaadi Yudaƒuɔ na mmɔ. Na Blɔti údie-mi kukpi kemmo. 18Blɔti ɔdubudie-mi na ɔgbankpi biala kemmo, na ɔdubo-mi bɔkpanku buɛɛ buɛɛ na liduo Katɔ Ɔga Ɔma. Bumwi na buute Katɔti ɔ́si ɔƒɛni úsela ƒui. Ɔsia lɛni.
Bɔɔkada-a
19Muugyele Priska ku Akwila ku Onesiƒoro kaduli bekyuli ƒui. 20Erasto ɔmu ɔkya Korinto, na Troƒimo anwu uuƒi ɔsu lɛ́da-nwu lɛ́kya Mileto. 21Kya ɔkplu na ebo ebeduo mɛni asa udu kɔyɔ uwi. Eubulo ku Pude ku Lino ku Klaudia ku baƒɔtaadine banwa bakladi ƒui beegyele-ɔ o-o!
22Blɔti ɔda-a kɔyu, na muuvele-nwu nnii ɔda-mii kaduɛ na nwuna lɛƒɔndia kemmo.
Currently Selected:
Timoteo 2 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
